1. Fa a pipel fu Yehovah e difrenti fu tra sma di e kari densrefi Kresten?

 DEN futuboi fu Yehovah e preiki a bun nyunsu fayafaya. Disi na wán reide fa den e difrenti fu den sma di e kari densrefi Kresten (Tit. 2:14). Ma a kan taki yu no e firi fu go preiki son leisi. Kande yu e firi leki wan getrow owruman di ben taki: „Son leisi mi no e firi fu go na ini a preikiwroko.”

2. San kan meki en muilek son leisi fu tan du a preikiwroko nanga prisiri?

² Kande den tra sani di de fu du na ini a diniwroko fu Yehovah e gi wi moro prisiri leki a preikiwroko. Fu san ede? Fu di te wi e bow noso ondrow Kownukondre zaal, te wi e yepi wi brada nanga sisa di kisi fu du nanga rampu, noso te wi e gi den dek’ati, dan wi e si den bun bakapisi wantewante èn dati e meki wi firi bun. Te wi e wroko makandra nanga den brada nanga sisa fu wi, dan wi e wroko na ini freide èn wi e sori lobi gi makandra. Wi sabi taki wi brada nanga sisa de nanga tangi gi den sani di wi e du gi den. Ma kande wi e preiki omeni yari kba na ini a srefi kontren, èn wan tu sma nomo ben wani arki a Bijbel boskopu. Kande son sma e taki grofu nanga wi te wi e preiki gi den. Wi sabi tu taki now di a kba e kon moro krosbei, wi kan ferwakti taki moro sma o gens wi (Mat. 10:22). San kan yepi wi fu tan du a preikiwroko fu wi fayafaya?

3. Fa Lukas 13:6-9 e sori taki Yesus ben de fayafaya?

³ Wi kan leri fa fu de fayafaya na ini a preikiwroko te wi e poti prakseri na a eksempre fu Yesus. Di a ben de na grontapu a no tapu noiti fu preiki fayafaya gi sma. Fu taki en leti, a ben e wroko moro tranga dei fu dei. (Leisi Lukas  13:6-9.) Na ini wan agersitori, Yesus agersi a wroko fu en nanga a di fu wan man di ben e wroko na ini wan droifidyari. A man disi ben du tranga muiti dri yari langa fu sorgu gi wan figabon, sondro taki a bon ben gi froktu. Yesus preiki dri yari langa tu gi den Dyu, ma furu fu den no tron en disipel. Tòg Yesus no tapu fu preiki gi den. Neleki a man fu a droifidyari, a ben e tan howpu taki a figabon ben o gi froktu. Yesus du moro muiti srefi fu doro na ati fu den Dyu.

4. San na fo sani di wi kan leri fu Yesus?

⁴ Na ini na artikel disi wi o luku fa Yesus ben e du a wroko fu en fayafaya, spesrutu na ini den lasti siksi mun fu a diniwroko fu en. Te wi e gi yesi na san a taki èn na san a du, dan dati o yepi wi fu tan preiki fayafaya. Wi o poti prakseri now na fo sani di wi kan leri fu Yesus: (1) A ben e tan hori na prakseri san Yehovah ben wani taki a du, (2) a ben e ferstan Bijbel profeititori èn a ben e hori ensrefi na den, (3) a ben de seiker taki Yehovah ben o horbaka gi en, èn (4) a tan abi a fertrow taki son sma ben o arki en.

A HORI NA PRAKSERI SAN YEHOVAH WANI TAKI YU DU

5. Fa Yesus sori taki a ben e tan hori na prakseri san Yehovah ben wani taki a du?

⁵ Yesus ben e preiki „a bun nyunsu fu Gado Kownukondre” fayafaya, fu di a ben sabi taki na a wroko dati Gado ben wani taki a du (Luk. 4:43). Gi Yesus, a preikiwroko ben de a moro prenspari wroko na ini en libi. Srefi na ini den lasti mun fu a diniwroko fu en, a ben e go „na ala den foto èn na ala den dorpu” fu preiki gi sma (Luk. 13:22). Boiti dati, a ben e leri tra disipel fu preiki a bun nyunsu neleki fa en ben e du dati.​—Luk. 10:1.

6. Fu san ede Yehovah wani taki wi teki prati na a preikiwroko, aladi tra wroko de di wi musu du gi en? (Luku a prenki.)

⁶ Na ini a ten disi, a de so tu taki a preikiwroko na a moro prenspari wroko di Yehovah nanga Yesus wani taki wi du (Mat. 24:14; 28:19, 20). Iniwan wroko di wi e du gi Yehovah e horbaka gi a preikiwroko. Fu eksempre, wi e bow Kownukondre zaal èn wi e dini na Betel fu horbaka gi a preikiwroko di wi e du. Te wan rampu psa, dan wi e sorgu taki den brada nanga sisa fu wi e kisi  den sani di den abi fanowdu, so taki den kan tan kon na den konmakandra èn so taki den kan go doro nanga a preikiwroko. Te wi e hori na prakseri taki a preikiwroko na a moro prenspari wroko di Yehovah wani taki wi du, dan disi o gi wi dek’ati fu tan teki prati ibri wiki na a wroko disi. János, wan owruman na ini Hongaria, e taki: „Mi e tan hori na prakseri taki nowan enkri wroko di wi e du gi Yehovah kan teki a presi fu a preikiwroko, fu di dati na a moro prenspari wroko di wi kisi fu du.”

7. Fu san ede Yehovah wani taki wi tan preiki? (1 Timoteyus 2:3, 4)

⁷ Wan sani di o yepi wi fu de fayafaya na ini a preikiwroko, na te wi e leri fu si sma soleki fa Yehovah e si den. Yehovah wani taki so furu sma leki a kan e kon sabi a bun nyunsu. (Leisi 1 Timoteyus 2:3, 4.) Fu di a bun nyunsu disi kan kibri sma libi, meki Yehovah e yepi wi fu tron moro bun preikiman. Fu eksempre, a brochure Lobi o yepi yu fu meki disipel, e gi wi bun rai di kan yepi wi fu bigin wan takimakandra nanga sma, so taki den kan bigin studeri Bijbel fu tron disipel fu Yesus. Awinsi sma no e tron futuboi fu Yehovah now, tòg den kan kisi okasi fu du dati fosi a bigi banawtu kon na wan kba. Kande bakaten den o memre san wi ben taigi den èn kande den o wani dini Yehovah. Ma dati o psa soso te wi e tan preiki.

A POTI PRAKSERI NA BIJBEL PROFEITITORI

8. Sortu Bijbel profeititori yepi Yesus fu gebroiki en ten na wan koni fasi?

⁸ Yesus ben e ferstan fa Bijbel profeititori ben o kon tru. A ben sabi taki a diniwroko fu en ben o teki dri na afu yari nomo (Dan. 9:26, 27). A ben e ferstan tu san profeititori ben e taki fu a ten te a ben o dede èn fu a fasi fa a ben o dede (Luk. 18:31-34). Fu di a ben sabi den sani disi, meki a gebroiki en ten so bun leki a ben man. Dati meki a preiki fayafaya fu man klari a wroko di a ben kisi fu du.

9. Fa Bijbel profeititori e yepi wi fu preiki fayafaya?

⁹ Te wi e ferstan Bijbel profeititori, dan dati kan gi wi dek’ati fu preiki fayafaya. Wi sabi taki a grontapu disi o kon na wan kba heri esi. Wi sabi tu taki den sani di e psa na ini a ten disi èn a fasi fa sma e tyari densrefi e kruderi nanga san Bijbel e taki fu den lasti dei. Wi e ferstan a Bijbel profeititori di e sori taki a kownu fu a zuidsei èn a kownu fu a noordsei ben o feti nanga makandra „na ini a ten fu a kaba”. Wi sabi taki disi abi fu du nanga den regering fu Ingrisikondre nanga Amerkankondre di abi trobi nanga a regering fu Rosiakondre nanga den tra regering di e horbaka gi en (Dan. 11:40). Wi e ferstan tu taki a futu fu a popki na ini a profeititori fu Danièl 2:43-45 e prenki a Grontapumakti fu Ingrisikondre nanga Amerkankondre. Neleki fa a profeititori e taki, wi e bribi taki heri esi Gado Kownukondre o tyari wan kba kon na libisma regering. Ala den profeititori disi e sori taki a kba no de fara moro. Dati meki wi musu preiki a bun nyunsu fayafaya.

10. Na sortu tra fasi Bijbel profeititori e gi wi dek’ati fu tan preiki a bun nyunsu?

¹⁰ Bijbel profeititori e poti prakseri tu na wan boskopu di wi e angri fu ferteri sma. Carrie, wan sisa di e dini na ini a Dominikan Republiek, e taki: „Te mi e prakseri den moi sani di Yehovah o du na ini a ten di e kon, dan mi feni taki mi musu ferteri trawan den sani dati.” A e taki moro fara: „Te mi e si sortu problema sma abi, dan mi e ferstan taki den musu kon sabi taki Yehovah pramisi fu du moi sani tu gi den.” Bijbel profeititori e sori taki Yehovah e  yepi wi fu du a wroko disi, èn disi e gi wi dek’ati fu tan preiki. Leila, di e libi na ini Hongaria, e taki: „Yesaya 11:6-9 e gi mi dek’ati fu preiki a bun nyunsu srefi gi sma di gersi leki den no o wani arki en. Mi sabi taki Yehovah kan yepi iniwan sma fu kenki.” Èn Christopher, wan brada fu Sambia, e taki: „Neleki fa Markus 13:10 ben taki na fesi, a bun nyunsu e panya na heri grontapu, èn mi e si en leki wan grani taki mi man yepi fu meki a profeititori disi kon tru.” Sortu Bijbel profeititori e gi yu dek’ati fu tan preiki a bun nyunsu?

A BEN DE SEIKER TAKI YEHOVAH BEN O HORBAKA GI EN

11. Fu san ede Yesus ben musu abi a fertrow taki Yehovah ben o yepi en fu tan preiki fayafaya? (Lukas 12:49, 53)

¹¹ Yesus ben abi a fertrow taki Yehovah ben o yepi en fu tan preiki fayafaya. Yesus ben e taki na wan lespeki fasi nanga sma te a ben e preiki gi den, ma a ben sabi taki a Kownukondre boskopu ben o meki son sma kisi atibron èn taki furu sma ben o gens a bun nyunsu fayafaya. (Leisi Lukas 12:49, 53.) Den kerki fesiman no ben lobi san Yesus ben e preiki èn dati meki ibri tron baka den pruberi fu kiri en (Yoh. 8:59; 10:31, 39). Ma Yesus tan preiki a bun nyunsu fu di a ben sabi taki Yehovah ben de nanga en. „Mi no de mi wawan, ma a Tata di seni mi kon de nanga mi. . . . A no gowe libi mi fu mi tan mi wawan, fu di ala ten mi e du san e plisi en.”​—Yoh. 8:16, 29.

12. Fa Yesus sreka den disipel fu en fu tan preiki a bun nyunsu aladi trawan ben o gens den?

¹² Yesus memre den disipel fu en taki den ben kan de seiker taki Yehovah ben o horbaka gi den. Ibri tron baka a ben e gi den a dyaranti taki Yehovah ben o yepi den, srefi te sma ben e ferfolgu den (Mat. 10:18-20; Luk. 12:11, 12). Fu di a ben sabi taki furu sma ben o gens a bun nyunsu, meki a gi den disipel a rai fu tan na ai (Mat. 10:16; Luk. 10:3). A taigi den tu taki efu sma no ben wani arki den, dan den no ben musu dwengi den (Luk. 10:10, 11). Boiti dati, a taigi den fu lowe go na wan tra foto efu sma ben e ferfolgu den (Mat. 10:23). Aladi Yesus ben de fayafaya èn ben e fertrow tapu Yehovah, tòg a ben e luku bun taki a no ben e poti ensrefi na ini situwâsi pe sma ben kan du ogri nanga en.​—Yoh. 11:53, 54.

13. Fu san ede yu kan abi a fertrow taki Yehovah o yepi yu?

¹³ Na ini a ten disi, furu sma e gens a wroko fu wi. Dati meki wi abi a yepi fu  Yehovah fanowdu fu man tan preiki a bun nyunsu fayafaya (Openb. 12:17). Fu san ede yu kan abi a fertrow taki Yehovah o horbaka gi yu? Wi kan leisi san a e taki na ini Yohanes kapitel 17. Yesus aksi Yehovah fu kibri den apostel fu en, èn na dati Yehovah du tu. A buku Tori fu den apostel e ferteri fa a yepi den apostel fu preiki fayafaya aladi sma ben e ferfolgu den. Yesus begi Yehovah tu fu kibri den sma di ben e bribi den sani di den apostel ben e taki. Dati wani taki dati Yesus begi tu gi yu. Yehovah no kba piki a begi fu Yesus. A o yepi yu neleki fa a ben yepi den apostel.​—Yoh. 17:11, 15, 20.

14. Fu san ede wi kan de seiker taki wi o man preiki a bun nyunsu fayafaya, srefi na ini muilek ten? (Luku a prenki.)

¹⁴ Now di a kba e kon moro krosbei, a kan taki a o moro muilek gi wi fu preiki a bun nyunsu. Ma Yesus gi wi a dyaranti taki a o gi wi a yepi di wi abi fanowdu fu man du a wroko disi fayafaya (Luk. 21:12-15). Neleki Yesus nanga den disipel fu en, wi e meki sma srefi besroiti efu den wani arki wi èn wi no e hartaki nanga den. Srefi na ini kondre pe den brada fu wi no man preiki fri, den e tan preiki a bun nyunsu fu di den no e fertrow tapu den eigi krakti, ma tapu Yehovah. Neleki fa Yehovah ben gi den fosi Kresten krakti, na so a e gi wi krakti na ini a ten disi, so taki wi „kan du a preikiwroko finifini”, na a fasi fa a wani dati (2 Tim. 4:17). Yu kan de seiker taki efu yu e fertrow tapu Yehovah, yu o man tan preiki fayafaya.

A TAN ABI A FERTROW TAKI SMA BEN O ARKI

15. San e sori taki Yesus ben abi a fertrow taki a preikiwroko fu en ben o abi bun bakapisi?

¹⁵ Yesus ben abi a fertrow taki son sma ben o arki a bun nyunsu. A sani dati yepi en fu tan nanga prisiri èn fu tan wroko tranga na ini a preikiwroko. Fu eksempre, bijna wán yari baka di Yesus bigin preiki, a si taki furu sma ben de klarklari fu arki a bun nyunsu. A teki den sma disi gersi nanga wan gron di abi n’nyan di lepi kba fu koti (Yoh. 4:35). Bijna wán yari baka dati, a taigi den disipel fu en: „A kotiwroko bigi” (Mat. 9:37, 38). Èn bakaten, a taigi den ete wan leisi: „A kotiwroko bigi . . . Begi a Masra fu a kotiwroko meki a seni wrokoman go du a kotiwroko fu en” (Luk. 10:2). Yesus tan abi a fertrow taki sma ben o de di ben o wani arki a bun nyunsu, èn a ben breiti te den ben e arki.​—Luk. 10:21.

16. Fa den agersitori fu Yesus yepi den disipel fu en fu bribi taki a boskopu di den ben e preiki ben o yepi furu sma? (Lukas 13:18-21) (Luku a prenki.)

 ¹⁶ Yesus ben e tan memre den disipel fu en taki a bun nyunsu ben o tyari bun bakapisi kon. A sani disi yepi den fu tan preiki fayafaya. Meki wi poti prakseri na wan tu fu den agersitori fu en. (Leisi Lukas 13:18-21.) Na ini wan fu den agersitori dati, Yesus agersi a Kownukondre boskopu nanga wan pkin mosterd-siri di gro kon tron wan bigi bon. Disi ben wani taki dati furu sma ben o gi yesi na a bun nyunsu èn taki noti no ben kan tapu pasi gi a bun nyunsu disi. Na ini wan tra agersitori Yesus agersi a Kownukondre boskopu nanga srudeki. A du disi fu sori taki a Kownukondre boskopu ben o preiki na furu presi na heri grontapu èn taki a ben o meki sma tyari kenki kon na ini den libi, awinsi trawan no ben o man si den kenki dati wantewante. Na so Yesus yepi den disipel fu en fu bribi taki a boskopu di den ben e preiki ben o yepi furu sma.

17. Fu san ede wi kan tan abi a fertrow taki a preikiwroko fu wi o abi bun bakapisi?

¹⁷ Te wi e prakseri fa a preikiwroko e yepi so furu sma na heri grontapu, dan dati e gi wi dek’ati fu tan preiki a bun nyunsu fayafaya. Ibri yari, milyunmilyun sma di wani sabi moro e kon na a Memrefesa èn den e studeri Bijbel nanga wi. Hondrohondro dusun sma e dopu èn den e preiki a bun nyunsu makandra nanga wi. Wi no sabi omeni sma ete o arki a bun nyunsu, ma wi sabi taki Yehovah e tyari wan bigi ipi sma kon na wán di o psa a bigi banawtu libilibi (Openb. 7:9, 14). A Masra fu a kotiwroko de seiker taki furu sma de ete di o gi yesi na a bun nyunsu. Dati meki wi o tan preiki fayafaya.

18. San wi wani taki trawan musu si te den e poti prakseri na wi?

¹⁸ Den tru disipel fu Yesus ala ten ben e preiki a bun nyunsu fayafaya. Di sma si fa den apostel ben e preiki fayafaya èn sondro frede, dan den kon ferstan „taki na den man disi ben e waka nanga Yesus fosi” (Tori 4:13). Te sma e si fa wi e du a preikiwroko, dan kande den o ferstan tu taki wi e du a wroko disi na a fasi fa Yesus ben e du dati.