1-3. Sortu sani kan tyari problema kon na ini a trowlibi? (Luku a prenki na a bigin fu na artikel.)

„EFU yu e du ala muiti fu abi wan bun trowlibi èn yu e sori taki yu wani dati trutru, dan Yehovah o blesi yu”, na so wan masra di trow 38 yari kaba taki. Iya, masra nanga wefi kan de koloku nanga makandra èn den kan horibaka gi makandra na ini muilek ten.—Odo 18:22.

² Ma Bijbel e sori taki trowpaar „o kisi banawtu na ini den libi” (1 Kor. 7:28). Fu san ede? Fu di den broko-ede fu na aladei libi kan tyari problema kon na ini a trowlibi. Fu di wi alamala na sondusma, meki masra nanga wefi kan taki sani son leisi di e hati a trowpatna fu den èn son leisi den no man taki bun nanga makandra (Yak. 3:2, 5, 8). Furu trowpaar abi wan wroko di e teki furu ten fu den èn den musu sorgu den pikin. Te den abi broko-ede èn te den weri, dan a kan taki den no abi nofo ten fu du sani nanga makandra fu kan abi wan koloku trowlibi. Moni problema, siki noso tra problema kan meki taki safrisafri a lobi nanga a lespeki di den abi gi makandra e kon swaki. Son leisi a kan gersi leki sma abi wan bun trowlibi, ma a trowlibi kan pori te den trowpatna e du den sani di a sondu skin wani. Den sani  dati na hurudu, ogri di sma e du sondro fu syen, feantifasi, kesekese, dyarusu, faya-ati nanga trobi.—Gal. 5:19-21.

³ San e meki en moro muilek, na taki wi e libi na ini den „lasti dei” pe furu sma lobi densrefi nomo èn den no abi lespeki gi Gado. Te trowpatna abi den fasi disi, dan a trowlibi fu den kan pori (2 Tim. 3:1-4). Boiti dati, wi abi wan ogri-ati feanti di wani pori a trowlibi. Na apostel Petrus warskow wi: „Didibri, a feanti fu unu, e waka lontu leki wan lew di e bari, fu di a e suku fu swari wan sma.”—1 Petr. 5:8; Openb. 12:12.

4. Fa trowpaar kan abi wan bun èn koloku trowlibi?

⁴ Wan masra na ini Yapan taki: „Mi ben e stress fu di mi ben abi moni problema. Mi no ben e taki furu nanga mi wefi, èn dati meki en srefi ben e stress tu. Boiti dati, mi wefi kon siki seryusu no so langa pasa. Son tron ala den broko-ede disi ben meki taki wi kisi trobi.” A tru taki problema o de na ini wan trowlibi, ma toku wi kan abi wan koloku trowlibi. Nanga a yepi fu Yehovah, trowpaar kan abi wan bun èn koloku trowlibi. (Leisi Psalm 127:1.) Wi kan agersi a trowlibi nanga wan ston-oso di masra nanga wefi musu bow. Meki wi poti prakseri na feifi sani di kan yepi den fu bow na oso disi. Wi o luku sosrefi fa lobi de leki a smenti di e hori den ston fu na oso disi na wán.

5, 6. San masra nanga wefi kan du fu meki Yehovah de na ini den trowlibi?

⁵ Te wan trowpaar wani abi wan bun trowlibi, dan den musu dini Yehovah fayafaya èn den musu saka densrefi na en ondro. En na a sma di seti a trowlibi. (Leisi Preikiman 4:12.) Te wan trowpaar e meki Yehovah tiri den, dan den e sori taki a de na ini a trowlibi fu den. Bijbel e taki: „Efu unu ben o komoto na a reti pasi èn beni go na reti-anusei noso na kruktu-anusei, dan nanga un eigi yesi unu o yere wan sten na un baka e taki: ’Disi na a pasi. Waka na tapu’” (Yes. 30:20, 21). Na ini a ten disi trowpaar kan „yere” san Yehovah e taki te den e leisi Gado Wortu makandra (Ps. 1:1-3). A trowlibi fu den o kon moro bun te den e hori na Osofamiri Anbegi doronomo na wan fasi di e gi den prisiri èn di e tranga a bribi fu den. Te den e begi makandra, dan a trowlibi fu den o tranga èn den o man kakafutu gi a grontapu fu Satan.

⁶ Gerhard fu Doisrikondre taki: „Te wi abi problema noso te wi no frustan makandra so bun, dan wi e lasi prisiri. Na den ten dati den rai fu Gado Wortu e yepi wi fu abi pasensi èn fu gi makandra pardon. Den sani disi prenspari srefisrefi na ini wan bun trowlibi.” Masra nanga wefi e sorgu taki Gado de na ini den trowlibi te den e dini en makandra. Na so den o tan krosibei fu Yehovah èn den o lobi makandra moro.

7. Fa wan masra musu libi nanga en wefi?

⁷ A fasi fa wan masra e tiri en osofamiri kan meki taki a abi wan bun èn koloku trowlibi. Bijbel e taki: „Krestes na a ede fu ibri man. A man na a ede fu na uma” (1 Kor. 11:3). San disi wani taki? A srefi fasi fa Yesus ben de nanga den disipel fu en, na so masra musu libi nanga den wefi. Yesus no ben de grofu èn a no ben e du ogri-ati sani nanga den. Ala ten a ben e sori lobi, switifasi, safri-ati, nanga sakafasi. A no ben e dwengi den disipel fu du sani soleki fa en wani.—Mat. 11:28-30.

8. San wan masra kan du fu meki en wefi lobi en èn lespeki en?

⁸ Wan Kresten masra no abi fu dwengi  en wefi fu sori lespeki gi en. Na presi fu dati, a musu ’tan libi nanga en wefi na wan fasi di e sori taki a e frustan en bun’. A e frustan taki en wefi ’moro swaki èn a de leki wan prapi di kan broko makriki’ (1 Petr. 3:7). Wan masra kan sori taki a lobi en wefi trutru te a e taki nanga en na wan lespeki fasi èn te a e du sani fu sori taki a lobi en. A e du disi awinsi den de den wawan noso awinsi den de nanga tra sma (Odo 31:28). Te a masra e libi nanga en wefi na so wan lobi-ati fasi, dan a wefi o lobi en èn a o lespeki en. Disi o meki taki Gado o blesi a trowlibi fu den.

9. Fa wan wefi kan sori taki a abi sakafasi èn taki a e saka ensrefi na ondro en masra?

⁹ Te wi kon frustan den rai nanga wet fu Yehovah, dan wi o lobi en nanga wi heri ati. Disi o yepi wi fu saka wisrefi na ondro a bigi èn makti Gado disi (1 Petr. 5:6). Wan prenspari fasi fa wan wefi e sori taki a e saka ensrefi na ondro Yehovah, na te a e wroko makandra nanga en masra èn te a e horibaka gi en. Bijbel taki: „Un wefi, saka unsrefi na ondro un masra, soleki fa a fiti bakaman fu Masra” (Kol. 3:18). A tru taki a no ala ten wan wefi o agri nanga den bosroiti di en masra e teki. Ma efu den bosroiti dati no de teige den wet fu Gado, dan wan wefi di abi sakafasi o horibaka gi en masra.—1 Petr. 3:1.

10. Te wan wefi lobi en masra, dan fu san ede a o saka ensrefi na en masra ondro?

¹⁰ Wan wefi abi a grani fu de a „patna” fu en masra (Mal. 2:14). Te wan trowpaar musu teki bosroiti, dan a wefi e taki na wan lespeki fasi san a e denki èn fa a e firi, aladi a e tan sori sakafasi. Wan koni masra o arki bun san en wefi e taki (Odo 31:10-31). Te wan wefi e saka ensrefi na en masra ondro fu di a lobi en, dan prisiri, freide, nanga wánfasi o de na ini na osofamiri. Na so masra nanga wefi o de koloku fu di den sabi taki den e plisi Gado.—Ef. 5:22.

11. Fu san ede a prenspari fu gi makandra pardon?

¹¹ Efu masra nanga wefi wani abi wan koloku trowlibi ala ten, dan den musu leri fu gi makandra pardon. Den o lobi makandra moro te den e ’tan frudrage makandra èn te den e gi makandra pardon nanga den heri ati’ (Kol. 3:13). Ma a trowlibi no o waka bun te den no wani frigiti den fowtu di a patna fu den meki èn te den e taki fu den fowtu ibri tron baka te den abi trobi. Te den ston fu wan oso priti, dan safrisafri na oso e kon swaki. Na so a de tu taki te trowpatna e tan du hati sani nanga makandra èn te den ati e bron nanga makandra, dan a o moro muilek fu gi makandra pardon. Disi kan swaki a trowlibi. Ma te masra nanga wefi e gi makandra pardon neleki fa Yehovah e gi sma pardon, dan a trowlibi fu den o kon moro tranga.—Mika 7:18, 19.

12. Fa lobi „e tapu bun furu sondu”?

¹² Trutru lobi „no e tan memre na ogri di trawan du”. Na presi fu dati „lobi e tapu bun furu sondu”. (1 Kor. 13:4, 5; leisi 1 Petrus 4:8.) Sobun, te wan sma lobi wan trawan, dan a no o teri omeni leisi a e gi a trawan pardon. Di na apostel Petrus aksi omeni leisi a musu gi trawan pardon, Yesus piki en: „Seibitenti na seibi tron” (Mat. 18:21, 22). San Yesus ben wani taki nanga den wortu disi? A ben wani sori taki wan Kresten no musu teri omeni leisi a e gi trawan pardon, ma a musu du dati ala ten.—Odo 10:12. *

13. San kan yepi trowpatna fu gi makandra pardon?

¹³ Annette fu Doisrikondre taki: „Efu wan trowpaar no wani gi makandra pardon, dan den o kisi bita-ati gi makandra èn den no o frutrow makandra moro. Disi kan pori a trowlibi fu den. Te yu e gi pardon, dan a trowlibi o waka moro bun èn unu o lobi makandra moro.” De nanga tangi èn sori taki yu abi warderi. Meki a tron wan gwenti fu prèise yu trowpatna (Kol. 3:15). Te unu e du den sani disi, dan unu o man gi makandra pardon ala ten. Na so unu o de koloku, unu o abi wánfasi èn Gado o blesi unu.—Rom. 14:19.

14, 15. San Yesus taki na Mateyus 7:12 èn fa dati o yepi trowpaar fu abi wan moro bun trowlibi?

¹⁴ A no de fu taki dati yu lobi te sma e sori lespeki gi yu. Yu lobi te trawan e arki yu èn te den e hori den firi fu yu na prakseri. Ma yu yere wan sma taki wan leisi: „Na so a wani du? Mi o sori en!” Son leisi wan sani e pasa taki yu kan denki so, ma Bijbel e taigi wi: „No taki: ’San a du nanga mi, na dati mi o du nanga en tu’” (Odo 24:29). Yesus ben sori san na a moro bun sani fu du na ini den sortu muilek situwâsi disi. A ben taki: „San unu wani meki sma du gi unu, na dati un musu du gi den tu” (Luk. 6:31). Yesus ben wani sori taki wi musu libi nanga sma soleki fa wi wani sma fu libi nanga wi èn wi no musu pai den ogri fu ogri. Sobun, a fasi fa wi e libi nanga wi trowpatna o meki taki wi abi wan trowlibi di e waka bun.

¹⁵ Trowpaar kan abi wan moro bun trowlibi te den e poti prakseri na den firi fu a patna fu den. Wan trowpaar fu Zuid-Afrika taki dati den pruberi fu du san Mateyus 7:12 e taki. A masra taki: „A tru taki son  leisi wi e mandi, ma mi e du muiti fu libi nanga mi wefi soleki fa mi wani en fu libi nanga mi èn en srefi e pruberi fu du dati tu. Dati meki wi e sori lespeki gi makandra èn wi e gi makandra grani.”

16. San trowpatna no musu du nanga makandra?

¹⁶ No go taigi sma sortu swakifasi yu patna abi èn no krutukrutu fu den gwenti noso maniri fu en di yu no lobi. No wisiwasi en tu. Hori na prakseri taki a trowlibi a no fu strei suma moro tranga, suma man bari moro tranga èn suma man taki a moro hati sani. A tru taki wi alamala e meki fowtu èn son leisi wi kan meki trawan ati bron. Ma awinsi yu na wan masra noso wefi, a no bun noiti fu wisiwasi noso lagi yu trowpatna. Nowan fu unu abi a reti tu fu pusu noso naki en trowpatna.—Leisi Odo 17:27; 31:26.

17. Fa den masra kan du san Mateyus 7:12 e taki?

¹⁷ Na son presi sma feni taki wan man musu naki en wefi noso a musu du tra ogri-ati sani nanga en fu sori taki en na wan trutru man-nengre. Ma Bijbel e taki: „A sma di ati no e bron esi betre moro wan tranga man èn a sma di man hori ensrefi, betre moro a wan di e teki wan foto abra” (Odo 16:32). Wan sma musu du furu muiti fu man dwengi ensrefi neleki Yesus Krestes. Wan man di e kosi en wefi èn di e du ogri-ati sani nanga en no o de wan mati fu Yehovah moro. A psalm skrifiman David, di ben de wan tranga deki-ati man, ben taki: „Unu kan ati bron, ma un no musu sondu. Taki san unu abi fu taki na ini un ati, na tapu un bedi, dan un tan tiri.”—Ps. 4:4.

18. Fu san ede a prenspari fu tan lobi makandra?

¹⁸ Leisi 1 Korentesma 13:4-7. Lobi na a moro prenspari fasi di trowpatna musu abi. Bijbel e taki: „Dati meki un musu abi trutru sari-ati, bun-ati, sakafasi, safri-ati, nanga pasensi. Den fasi disi musu de leki wan krosi na un skin.” Ma a e taki tu: „Boiti den sani disi, un musu meki lobi kon de leki wan krosi na un skin, bika lobi e meki sma kon de wán trutru” (Kol. 3:12, 14). Masra nanga wefi no musu denki densrefi nomo. Den musu du muiti fu de leki Krestes di ben de klariklari fu dede gi sma. Efu masra nanga wefi lobi makandra na so wan fasi, dan a trowlibi fu den no o broko, awinsi den abi fruferi gwenti, awinsi den siki, noso awinsi den abi moni problema. Den o tan lobi makandra tu awinsi den abi problema nanga a famiri fu den patna.

19, 20. (a) Fa trowpaar kan abi wan bun èn koloku trowlibi? (b) San wi o luku na ini a tra artikel?

¹⁹ Fu man abi wan koloku trowlibi, trowpatna musu lobi makandra, den musu tai hori na makandra èn den musu du muiti fu meki a trowlibi kon moro tranga. Na presi fu gowe libi den patna te problema opo kon, den musu du muiti fu meki a trowlibi kon moro bun. Den no musu tan nanga makandra nomo, ma den musu du muiti fu lobi makandra moro nanga moro. Kresten masra nanga wefi di lobi Yehovah nanga a trowpatna fu den trutru, o pruberi fu lusu den problema fu den fu di „lobi no e kaba noiti”.—1 Kor. 13:8; Mat. 19:5, 6; Hebr. 13:4.

²⁰ Na ini a „muilek ten” disi, a no makriki srefisrefi fu abi wan bun èn koloku trowlibi (2 Tim. 3:1). Nanga yepi fu Yehovah yu kan abi wan bun trowlibi. Ma trowpaar abi fu kakafutu gi a grontapu disi di e poti furu prakseri na seks. Na ini a tra artikel wi o si fa masra nanga wefi kan kakafutu gi hurudu, so taki a trowlibi fu den no kon pori.