1, 2. (a) Soleki fa Yesus taki, dan san na a di fu tu moro bigi komando? (b) Sortu aksi wi o luku now?

DI WAN Fariseiman aksi Yesus san na a moro bigi komando na ini a Wet, dan Yesus piki en: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.” Na ini a fosi artikel wi ben si kaba san disi wani taki. Baka dati Yesus taki tu: „A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi.’”—Mat. 22:34-39.

² Yesus ben taki dati wi musu lobi tra sma leki fa wi lobi wisrefi. Dati meki a bun fu aksi wisrefi: Suma na den tra sma di wi musu lobi? Fa wi kan sori taki wi lobi den?

3, 4. (a) San Yesus taki di wan sma aksi en: „Suma na den tra sma di mi musu lobi?” (b) Di fufuruman fon wan man èn den libi en fu dede, dan san wan Samaria man du fu yepi en? (Luku a prenki na a bigin fu na artikel.)

³ Wan leisi wan man, di ben denki taki a bun moro tra sma, kon na Yesus, dan a aksi en: „Suma na den tra sma di mi musu  lobi?” Di a man taki so, Yesus fruteri en wan agersitori fu wan Samaria man di ben sori lobi gi trawan. (Leisi Lukas 10:29-37.) A fruteri taki fufuruman ròs wan Dyu man. Den fon a man, dan den libi en fu dede. Now wan priester fu Israel nanga wan Leifisma pasa drape, ma den no yepi a man, aladi sma ben sa fruwakti taki den ben o du bun gi wan kondreman fu den. Na presi fu dati, wan Samaria man yepi en. Soleki fa wi sabi, dan Samariasma ben e lespeki a Wet fu Moses tu, ma den Dyu no ben lobi den Samariasma kwetikweti.—Yoh. 4:9.

⁴ Fu di a Samaria man ben wani yepi a man fu kon betre, meki a kanti oli nanga win na tapu den soro fu en. A go na wan sma di ben e yuru kamra gi trawan èn a libi tu solfru moni gi en fu sorgu gi a man di ben kisi mankeri. Na a ten dati, den tu solfru moni ben de a moni di sma ben e wroko na ini tu dei (Mat. 20:2). A de krin suma sori trutru lobi gi a man di kisi mankeri. Na agersitori fu Yesus e leri wi fu sori sari-ati nanga lobi gi tra sma.

5. Di wan rampu pasa, dan fa Yehovah Kotoigi sori taki den lobi tra sma?

⁵ Nofo tron a no makriki fu feni sma di e sori sari-ati gi trawan neleki fa a Samaria man ben du dati. Na so a de tu, spesrutu na ini den muilek „lasti dei” disi pe furu sma no lobi trawan, den e du ogri-ati sani èn den no lobi san bun (2 Tim. 3:1-3). Fu eksempre, wan muilek situwâsi kan opo kon te wan rampu de. Luku san pasa di wan bigi draiwinti wai na New York City na ini a lasti wiki fu oktober 2012. (Den kari a draiwinti disi Sandy.) Na ini wan pisi fu a foto furu oso ben broko. Wan lo sma no ben abi stroom noso tra sani di den ben abi tranga fanowdu. Aladi den sma disi ben e pina kaba, toku a de wan sari sani taki fufuruman go ròs den. Ma na ini a srefi birti Yehovah Kotoigi orga sani fu yepi den Kresten brada nanga sisa fu den èn fu yepi tra sma tu. Na den sortu sani disi tru Kresten e du fu di den lobi trawan. San na wan tu tra fasi fa wi kan sori lobi gi tra sma?

6. Fa wi kan gebroiki Bijbel fu yepi tra sma?

⁶ Gebroiki Bijbel fu yepi trawan. Te wi de na ini a preikiwroko, dan wi e gi sma „trowstu fu Gado Buku” (Rom. 15:4). Iya, te wi e taki fu Bijbel nanga trawan, dan na lobi wi e sori gi den (Mat. 24:14). Na wan bigi grani gi wi fu preiki a Kownukondre boskopu fu „a Gado di e gi sma howpu”.—Rom. 15:13.

7. Sortu rai Yesus gi wi èn sortu blesi wi o kisi te wi du san a taki?

⁷ Du gi trawan san yu wani taki den du gi yu. Di Yesus hori a Bergitaki fu en, a gi sma a rai disi: „Ala sani di unu wani meki sma du gi unu, na dati un musu du gi den tu. Fu taki en leti, disi na san a Wèt nanga den leri fu den Profeiti wani taki” (Mat. 7:12). Te wi e du bun gi trawan, dan wi e du soleki fa skrifi na ini „a Wèt” èn soleki fa „den leri fu den Profeiti” e sori. „A Wèt” na den Bijbel buku Genesis te go miti Deuteronomium èn „den leri fu den Profeiti” na den buku di abi profeititori di skrifi na ini a Hebrew pisi fu Bijbel. Den buku dati e sori krin taki Gado e blesi sma di e sori lobi gi trawan. Fu eksempre, Yehovah ben meki Yesaya skrifi: „Du san bun èn du san reti. . . . Koloku fu a sma di e du disi” (Yes. 56:1, 2). Iya, wi o kisi blesi te wi e sori lobi gi trawan èn te wi e du san reti.

8. Fu san ede wi musu lobi wi feanti èn san kan pasa efu wi du disi?

⁸ Lobi yu feanti. Yesus ben taki: „Un yere taki den taki: ’Un musu lobi tra sma,  ma un no musu lobi un feanti kwetikweti.’ Ma mi e taigi unu: Tan lobi un feanti èn tan begi gi den sma di e frufolgu unu. Dan sma kan si taki unu na pikin fu un Tata di de na hemel” (Mat. 5:43-45). Na apostel Paulus ben skrifi wan srefi sortu sani: „Efu angri e kiri yu feanti, gi en nyanyan. Efu watra e kiri en, gi en wan sani fu dringi” (Rom. 12:20; Odo 25:21). Na ini owruten, Yehovah ben taigi den Israelsma taki den ben musu yepi wan feanti te a meti fu en ben fadon fu di a lai fu en ben hebi tumusi (Eks. 23:5). Disi ben kan meki taki tu sma di ben de feanti fosi, tron bun mati baka fu di den ben o abi fu wroko makandra. A lobi di wi leki tru Kresten sori gi trawan meki taki furu fu wi feanti kenki a fasi fa den ben e denki fu wi. Efu wi sori lobi gi den feanti fu wi, srefi te den e frufolgu wi na wan ogri-ati fasi, dan wi o breiti te sonwan fu den tron tru Kresten.

9. Sortu rai Yesus gi wi fu meki en bun baka nanga wi brada nanga sisa?

⁹ „Du muiti fu libi bun nanga ala sma” (Hebr. 12:14). Disi wani taki dati wi musu libi bun nanga wi Kresten brada nanga sisa tu. Fu kan du dati, Yesus ben taki: „Te yu e tyari yu ofrandi go na a altari èn drape yu e memre taki yu brada abi wan sani nanga yu, dan libi yu ofrandi drape na fesi na altari èn go meki en bun nanga yu brada fosi. Baka dati yu kan gi yu ofrandi te yu drai kon baka” (Mat. 5:23, 24). Gado o blesi wi te wi e sori lobi gi brada nanga sisa èn te wi e du sani wantewante fu meki en bun baka nanga den.

10. Fu san ede wi no musu krutu trawan?

¹⁰ No krutu trawan. Yesus ben taki: „No krutu sma moro, so taki Gado no krutu unu. Bika na a fasi fa unu e krutu trawan, na a srefi fasi dati Gado sa krutu unu. Na a fasi fa unu e libi nanga trawan, na a fasi dati den sa libi nanga unu tu. Fu san ede yu e luku a fini pisi udu na ini yu brada ai, ma yu no e si a postu na ini yu eigi ai? Noso fa yu kan taigi yu brada: ’Kon meki mi puru a fini pisi udu na ini yu ai’, aladi wan postu de na ini yu eigi ai? Hoigriman! Puru a postu na ini yu eigi ai fosi, dan yu sa si krin fa yu kan puru a fini pisi udu na ini yu brada ai” (Mat. 7:1-5). Disi na wan moi fasi fu sori taki wi no musu krutu trawan  te den e meki pikinpikin fowtu, fu di wi srefi e meki furu fowtu tu.

11, 12. Na sortu prenspari fasi wi e sori tra sma taki wi lobi den?

¹¹ Furu fasi de fa wi kan sori lobi gi tra sma. Ma Yesus ben leri wi taki a moro bun fasi fu sori lobi na te wi e preiki a bun nyunsu fu a Kownukondre (Luk. 8:1). Yesus taigi den bakaman fu en fu „go na sma fu ala kondre èn meki den tron disipel” (Mat. 28:19, 20). Te wi e du san Yesus taigi wi, dan wi e sori taki wi wani yepi sma fu komoto na a bigi bradi pasi di e tyari sma go na dede, fu kan go waka na tapu a smara pasi di e tyari sma go na libi (Mat. 7:13, 14). A no de fu taki dati Yehovah e blesi den muiti disi di wi e du.

¹² Yesus ben e yepi furu sma fu frustan taki den abi Yehovah fanowdu (Mat. 5:3). Neleki en, wi e fruteri sma fu „a bun nyunsu fu Gado” (Rom. 1:1). Den sma di e arki a Kownukondre boskopu e kon bun baka nanga Gado nanga yepi fu Yesus Krestes (2 Kor. 5:18, 19). A de prenspari trutru fu preiki a bun nyunsu so taki wi kan sori sma taki wi lobi den.

13. Fa yu feni en taki yu kan leri sma sani fu Yehovah?

¹³ Te wi e sreka wisrefi bun fosi wi tyari gobaka èn fosi wi e go studeri nanga sma, dan wi kan leri den fu gi yesi na Yehovah. Disi kan meki taki den kenki den heri libi (1 Kor. 6:9-11). A moi fu si fa Gado e yepi den sma ’di abi a yoisti denki fu man kisi têgo libi’, so taki den kan tyari kenki kon na ini den libi. Na a fasi disi den e tron bun mati fu en (Tori 13:48). Furu sma di ben lasi-ati kon de nanga prisiri baka èn den wan di ben abi broko-ede kon kisi moro frutrow na ini wi hemel Tata. A moi fu si fa nyun sma e go na fesi. Yu no feni taki a de wan blesi fu sori lobi gi tra sma nanga yepi fu a spesrutu wroko disi?

14. Kari wan tu sani di abi fu du nanga lobi, soleki fa a skrifi na 1 Korentesma 13:4-8.

¹⁴ Te wi wani libi bun nanga tra sma, dan wi musu du san Paulus taki fu lobi. Na a fasi disi wi no o kisi problema nanga sma so makriki, wi o de moro koloku èn Gado o blesi wi. (Leisi 1 Korentesma 13:4-8.) Meki wi go luku san Paulus ben taki fu lobi, èn luku fa wi kan teki a rai fu en efu wani libi bun nanga tra sma.

15. (a) Fu san ede wi musu abi pasensi nanga switifasi? (b) Fu san ede wi no musu dyarusu èn meki bigi?

¹⁵ „Lobi abi pasensi èn a abi switifasi.” Neleki fa Gado abi pasensi nanga sondu libisma èn a e sori switifasi gi den, na so wi musu abi pasensi nanga switifasi tu te trawan e meki fowtu, te den e hati wi firi, noso te den grofu srefi. „Lobi no e dyarusu.” Sobun, efu wi abi trutru lobi, dan wi no o abi bigi-ai te wi e si san tra sma abi, noso te den e kisi grani na ini a gemeente. Boiti dati, efu wi abi lobi, dan wi no o meki bigi èn wi no o abi heimemre. Bijbel e taki dati Yehovah no lobi sma di abi „heimemre nanga bigifasi”.—Odo 21:4.

16, 17. Fa wi kan du san skrifi na 1 Korentesma 13:5, 6?

¹⁶ Lobi o meki taki wi e tyari wisrefi na wan fasi di fiti. Wi no o lei gi sma, wi no o fufuru sani fu den èn wi no o du noti di o meki taki wi trangayesi den wet nanga den rai fu Yehovah. Lobi o meki tu taki wi no poti prakseri na un eigi afersi nomo, ma na den afersi fu trawan tu.—Fil. 2:4.

¹⁷ Trutru lobi no e mandi esi èn „a no e tan memre na ogri di trawan du”. Noso a o de leki wi e skrifi ala den fowtu di trawan  meki fu di wi no wani frigiti den fowtu dati (1 Tes. 5:15). Efu wi hori sma na ati, dan wi no e du san Gado wani. Fu taki en leti, a o de leki wan faya di ben kan dede langaten kaba efu wi no ben suku fu meki a tan bron. So wan faya kan kon bigi èn a kan gi yu nanga tra sma mankeri (Lef. 19:18). Lobi e meki taki wi e prisiri nanga sani di tru. A no e meki wi „prisiri nanga sani di no bun”, srefi te ogri e pasa nanga wan sma di no lobi wi kwetikweti noso te a sma disi e pina.—Leisi Odo 24:17, 18.

18. San wi e leri fu lobi te wi e leisi 1 Korentesma 13:7, 8?

¹⁸ Luku san Paulus e taki moro fara fu lobi. A taki dati lobi „e frudrage ala sani”. Efu wan sma hati wi firi, ma a e aksi wi pardon, dan lobi o meki taki wi gi en pardon. Lobi „e bribi ala sani” di skrifi na ini Gado Wortu èn a e meki taki wi breiti nanga den sani di Yehovah en organisâsi e leri wi. Lobi „e howpu ala sani” di skrifi na ini Bijbel èn a e meki taki wi du ala san wi man fu fruteri trawan a howpu dati (1 Petr. 3:15). Te wi de na ini muilek situwâsi, dan wi e howpu taki sani waka bun èn wi e begi fu dati tu. Lobi „e horidoro awansi san e pasa”, awinsi sma du ogri nanga wi, awinsi sma e frufolgu wi noso awinsi wi e kisi tra problema. Wan tra sani na taki „lobi no e kaba noiti”. Fu ala ten libisma di e gi yesi na Gado, o sori a lobi dati.

19, 20. Sortu rai fu Bijbel musu yepi wi fu sori lobi gi tra sma?

¹⁹ Te wi e teki a rai fu Bijbel, dan wi kan tan lobi tra sma. Wi no o sori lobi nomo gi den sma di de fu a srefi ras leki wi, ma wi o sori lobi gi ala sma. Wi musu hori na prakseri tu san Yesus taki: „Yu musu lobi tra sma leki fa yu lobi yusrefi” (Mat. 22:39). Gado nanga Krestes wani taki wi lobi tra sma. Efu wi no sabi fa fu sori lobi gi tra sma na ini son situwâsi, dan wi musu aksi Gado meki a santa yeye fu en yepi wi. Te wi e du disi, dan Yehovah o blesi wi èn a o yepi wi fu sori lobi gi tra sma.—Rom. 8:26, 27.

²⁰ A wet di e taki dati wi musu lobi tra sma leki fa wi lobi wisrefi na „a moro hei wèt” (Yak. 2:8). Baka di Paulus kari wan tu sani fu a Wet fu Moses, a taki: „Ala tra komando di de, unu kan feni na ini a wán komando disi: ’Un musu lobi tra sma leki fa unu lobi unsrefi.’ Efu unu abi lobi, dan unu no o du tra sma ogri. Fu dati ede, te unu abi lobi, dan unu man du san a Wèt e taki” (Rom. 13:8-10). Sobun, wi musu tan sori lobi gi tra sma.

21, 22. Fu san ede wi musu lobi Gado nanga tra sma?

²¹ Te wi e sidon prakseri fu san ede wi musu lobi tra sma, dan a bun fu luku tu san Yesus taki fu en Tata. A taki dati a Tata „e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti” (Mat. 5:43-45). Wi musu sori lobi gi tra sma, awinsi den e du san reti noso den no e du san reti. Soleki fa wi ben taki kaba, dan wan prenspari fasi fa wi kan sori lobi gi sma na te wi e preiki a Kownukondre boskopu gi den. Den sma di e arki a bun nyunsu nanga den heri ati o kisi furu blesi.

²² Furu sani de di e meki taki wi musu lobi Yehovah nanga wi heri ati, wi heri libi èn nanga wi heri frustan. Wan lo fasi de fa wi kan sori lobi gi tra sma tu. Te wi e sori lobi gi Gado èn gi tra sma, dan wi e gi yesi na den tu moro bigi komando. Ma a moro prenspari sani na taki wi e plisi wi hemel Tata Yehovah di lobi wi.