1, 2. Fu san ede a bun fu luku efu yu na wan sma di de klariklari fu gi trawan pardon?

BIJBEL e leri wi fa Yehovah e denki fu sondu èn san a e du te wi e sondu. Bijbel e fruteri wi furu tu fu a fasi fa a e gi sma pardon. Na ini na artikel fosi a wan disi wi si taki a fasi fa David nanga Manase tyari densrefi, meki taki Yehovah gi den pardon. Den ben sari fu den sondu di den du, den ben taigi Yehovah krin san den du èn den bosroiti fu no du den sondu moro. Fu di den ben abi berow trutru, meki Yehovah ben de klariklari fu gi den pardon.

² Meki wi luku now fu san ede wi musu de klariklari fu gi trawan pardon. Fa yu ben o firi efu wan famiri fu yu ben lasi libi fu wan sani di Manase du? Yu ben o man gi Manase pardon? Na ini a ten disi furu sma no e gi yesi na wèt, den e du ogri èn den e denki densrefi nomo. Sobun, fu san ede wi musu leri fu gi sma pardon? Efu sma du ogri nanga yu, san kan yepi yu fu hori yusrefi? San kan yepi yu fu gi den sma dati pardon soleki fa Yehovah wani yu fu du?

3-5. (a) Sortu tori di Yesus fruteri e yepi wi fu si fu san ede wi musu gi trawan pardon? (b) San Yesus ben wani leri wi nanga a pisi tori di skrifi na Mateyus 18:21-35?

³ Te wan sma du wi wan ogri, wi musu de klariklari fu gi en pardon, awinsi na wan sma na ini a gemeente noso awinsi a de wan tra sma. Te wi e du disi, dan wi o abi freide nanga wi famiri, nanga wi mati, nanga tra sma èn nanga Yehovah. Bijbel e sori wi taki wi musu fu gi trawan pardon, awinsi omeni leisi den du wan sani nanga wi. Wan leisi Yesus fruteri wan tori fu wan srafu di ben abi wan bigi paiman na en masra di ben de wan kownu. A tori disi e yepi  wi fu si fu san ede wi musu gi trawan pardon.

⁴ A srafu ben musu pai a kownu someni moni taki a ben o abi fu wroko 60 milyun dei fu pai a paiman. Bakaten a kownu taigi en taki a no ben abi fu pai a moni moro. Ma san a srafu disi ben o du efu wan sma ben musu pai en now? We, wan tra srafu ben musu pai en. A tra srafu ben o abi fu wroko 100 dei nomo fu pai a fosi srafu. Toku a fosi srafu ben de nomonomo taki a tra srafu pai en. A tra srafu begi a fosiwan fu gi en moro ten fu pai a paiman, ma toku a fosi srafu meki sma poti en na strafu-oso. Di a kownu yere san a fosi srafu du, a mandi. Ne a taki: „Yu no ben musu abi sari-ati nanga a tra srafu tu, neleki fa mi ben abi sari-ati nanga yu?” Bijbel e taki moro fara: „Ne a kownu ati bron srefisrefi èn a meki den tyari a [fosi] srafu go na den waktiman fu strafu-oso fu poti en na strafu-oso teleki a pai ala paiman.”​—Mat. 18:21-34.

⁵ San Yesus ben wani leri wi nanga a tori disi? A taki: „Na so mi Tata na hemel o du tu nanga unu te unu no e gi un brada pardon nanga un heri ati” (Mat. 18:35). A de krin san Yesus ben wani sori wi. Wi no man gi yesi na Yehovah ala ten fu di wi na sondusma. Ma toku Yehovah de klariklari fu gi wi pardon. Fu taki en leti, te a gi wi pardon, dan gi en a de leki noiti wi no sondu. Fu dati ede, efu wan sma wani de wan mati fu Yehovah, a musu fu gi tra sma pardon te den meki wan fowtu. Na ini a Bergitaki Yesus taki: „Efu unu e gi sma pardon fu den sondu fu den, dan un Tata na hemel o gi unu pardon tu. Ma efu unu no e gi sma pardon fu den sondu fu den, dan un Tata no o gi unu pardon fu den sondu fu unu.”​—Mat. 6:14, 15.

6. Fu san ede a no makriki ala ten fu gi trawan pardon?

⁶ Kande yu e prakseri: ’Mi sabi taki mi musu gi trawan pardon, ma a no ala ten a makriki fu du.’ A no switi srefisrefi te wan sma du yu wan hati sani. Kande yu ati e bron èn yu e firi leki a sma bedrigi yu.  Kande yu wani du wan ogri sani nanga en tu noso kande yu wani taki a e firi san yu e firi. Son sma feni taki noiti den o man gi so wan sma pardon. Efu na so yu e firi, dan fa yu kan leri fu gi trawan pardon soleki fa Yehovah wani?

7, 8. San kan yepi yu fu gi sma pardon te den du hati sani nanga yu?

⁷ Te wan sma du wan sani nanga wi noso te wi denki taki wan sma du wan sani nanga wi, dan wi ati kan bron trutru. Wan leisi wan yongu man kisi wán bigi atibron, dan a gowe libi oso. A taki: ’Mi ben taki dati noiti moro mi ben o drai kon baka. Ma a ben de wan moi dei èn mi ben waka na wan moi pasi. Di mi si fa a presi moi èn fa ala sani ben de so tiri, mi ati kon kowru. Di mi drai go na oso baka, mi ben firi sari taki mi kisi so wan bigi atibron.’ A tori disi e sori taki a bun fu teki ten fu kisi yusrefi baka, so taki yu man denki moro krin fu a tori. Dati o yepi yu fu no du wan sani di kan hati yu bakaten.​—Ps. 4:4; Odo 14:29; Yak. 1:19, 20.

⁸ Ma fa a de efu a sani e hati yu ete? Pruberi fu frustan fu san ede yu e firi so. Na fu di a sma du wan ogri nanga yu, noso fu di a taki grofu nanga yu? Noso na fu di yu feni taki a sma du wan hati sani nanga yu fu espresi? A sani ogri so, taki yu no man gi a sma pardon? Te yu e prakseri fu a tori èn yu e pruberi fu frustan fu san ede yu e firi so, dan dati o yepi yu fu luku san na a moro bun sani fu du soleki fa Bijbel e sori. (Leisi Odo 15:28; 17:27.) Te yu denki so, dan dati kan yepi yu fu si a tori moro krin èn yu o de klariklari fu gi a sma pardon. Kande disi no makriki fu du, ma Gado Wortu kan yepi yu fu ’si krin san yu e denki na ini yu ati èn san yu abi na prakseri fu du’. Na so fasi yu o man gi sma pardon, neleki fa Yehovah e du dati.​—Hebr. 4:12.

9, 10. (a) Fa yu kan denki son leisi te yu feni taki wan sma du yu wan hati sani? (b) Fa yu o firi te yu leri fu no mandi esi èn fu gi trawan pardon?

⁹ Furu sani kan pasa di kan meki wi ati bron. Fu eksempre, kande yu de na strati e rèi wagi èn wan wagi misi fu naki yu. San yu o du? Furu tron wi e leisi na koranti taki wan sma ati bron so te, taki a du ogri nanga a trawan di misi fu naki en. Ma wan Kresten no kan du so wan sani kwetikweti.

¹⁰ A ben o moro bun fu prakseri, fosi yu du wan sani. Kande yu srefi no ben rèi bun, fu di yu ben prakseri wan tra sani. Noso kande wan sani no ben bun na a wagi fu a trawan. Te wi frustan fu san ede a problema pasa, te wi e hori na prakseri taki wi no sabi ala sani èn te wi de klariklari fu gi sma pardon, dan kande wi ati no o bron so furu. „No de wan sma di e mandi esi, bika na soso don sma e mandi esi”, na so Preikiman 7:9 e taki. Sobun, wi no musu mandi so gaw. Furu leisi te sma e du sani nanga wi, wi e denki taki na fu espresi den du en. Ma den srefi na sondusma èn den e meki fowtu tu. A kan tu taki wi no sabi a heri tori. Sobun, hori na prakseri taki awinsi yu no sabi fu san ede a sma taki noso du wan hati sani nanga yu, toku yu musu de klariklari fu sori lobi èn fu gi en pardon. Yu o de moro koloku te yu e du disi.​—Leisi 1 Petrus 4:8.

11. Fa wi musu tyari wisrefi na ini a preikiwroko, awinsi san sma e du?

¹¹ Fa yu kan dwengi yusrefi efu wan sma taki grofu nanga yu te yu de na ini a preikiwroko? Di Yesus seni 70 disipel fu  go preiki, a taigi den fu blesi den sma fu ibri oso pe den ben e go. Yesus taki: „Efu wan sma di lobi freide de drape, dan a freide fu unu o kon na en tapu. Ma efu nowan sma di lobi freide de drape, dan a freide fu unu o drai kon baka na unu tapu” (Luk. 10:1, 5, 6). Wi breiti te sma e arki a bun nyunsu di wi e preiki, bika den kan kisi wini fu a boskopu dati. Ma son leisi den e sori taki den no lobi wi srefisrefi. San wi musu du dan? Yesus taki dati toku wi ati no musu bron. Noiti wi musu gowe libi den sma oso nanga atibron, awinsi san den du nanga wi. Efu wi ben o mandi te wan sma taki grofu nanga wi noso du wan tra ogri nanga wi, dan wi no o abi a freide di Yesus ben taki fu en.

12. Sortu rai Paulus gi wi na ini Efeisesma 4:31, 32?

¹² A no na ini a preikiwroko wawan wi musu abi freide, ma wi musu meki muiti fu abi freide na ini ala situwâsi. Te sma du wan ogri nanga yu, dan kande yu de klariklari fu gi den pardon. Toku disi no wani taki dati yu musu du neleki a no e hati yu, noso taki a sani di den du na wan bun sani. Ma te yu e gi sma pardon, dan yu no musu hori den na ati fu na ogri di den du. No meki a sani di den du pori yu prisiri. Son sma e tan prakseri den ogri di trawan du nanga den èn dati e meki taki den no e prisiri moro. No meki disi pasa nanga yu. Hori na prakseri taki yu no kan de koloku te yu e hori sma na ati. Fu dati ede yu musu de klariklari fu gi sma pardon.​—Leisi Efeisesma 4:31, 32.

13. (a) Fa wan Kresten e ’poti wan ipi faya krofaya na tapu na ede’ fu en feanti? (b) San kan pasa te wi e tan sori switifasi, awinsi sma e du hati sani nanga wi?

¹³ Son leisi te sma di no de Kresten e du hati sani nanga wi èn wi no e mandi, dan disi kan meki taki den wani sabi moro fu Bijbel. Na apostel Paulus ben skrifi: „’Efu angri e kiri yu feanti, gi en nyanyan. Efu watra e kiri en, gi en wan sani fu dringi, bika te yu e du den sani disi, dan dati o safu en ati. A o de neleki yu poti wan ipi faya krofaya na tapu en ede’. No meki ogri wini yu, ma tan du bun fu kan wini na ogri” (Rom. 12:20, 21). Te yu e sori sma lespeki awinsi den ati e bron nanga yu, dan den kan kenki èn den kan sori switifasi srefi. Pruberi fu sori taki yu e frustan fu san ede a sma e denki so èn sori switifasi gi en. Disi kan meki taki a wani kon sabi den tru tori fu Bijbel. Efu yu tan sori switifasi, awinsi san a sma e du, dan kande a sma o aksi ensrefi fu san ede yu de so.​—1 Petr. 2:12; 3:16.

14. Fu san ede yu no musu hori wan sma na ati, awinsi a du yu wan hati sani?

¹⁴ Na ini son situwâsi a no ben o fiti fu moksi nanga son sma, soleki den wan di no de brada noso sisa fu wi moro. A kan taki den sma disi puru fu a gemeente fu di den sondu èn den no sori berow. Kande a sani di a sma du, e hati yu ete. Ma kon meki wi taki dati a sma disi e sori berow èn toku a hebi gi yu fu gi en pardon. Te dati de so, a bun fu tan aksi Yehovah fu yepi yu fu gi a sma dati pardon. Hori na prakseri taki yu no man si na ini a sma ati. Ma Yehovah man du dati. A sabi fa a sma di sondu e firi èn a abi pasensi nanga en (Ps. 7:9; Odo 17:3). Fu dati ede Bijbel e taki: „Te wan sma du unu wan ogri, un no musu du a sma dati ogri baka. Pruberi fu du sani di ala sma feni bun. Du ala san yu man fu libi bun nanga ala sma. Lobiwan, no pai wan sma gi na ogri di a du nanga yu, ma libi en meki Gado puru atibron na en tapu, bika Gado Buku taki: ’Na mi o puru atibron na den tapu. Mi o pai den baka gi den ogri di den du, na so Yehovah  taki’” (Rom. 12:17-19). Sobun, yu abi a reti fu krutu wan sma? Kwetikweti (Mat. 7:1, 2). Ma yu kan de seiker taki Yehovah o krutu sani na wan reti fasi.

15. San o yepi wi fu no ati bron moro nanga wan sma di du wan hati sani nanga wi?

¹⁵ Efu wan sma du yu wan hati sani èn a hebi gi yu fu gi en pardon aladi a sori berow, dan a ben o bun fu hori na prakseri taki en srefi e feti nanga wan bigi problema. A de wan sondu sma neleki wi (Rom. 3:23). Yehovah e firi gi ala sondu libisma. Fu dati ede a fiti fu begi gi a sma di hati wi. Te wi e begi gi wan sma, dan disi kan yepi wi fu no ati bron nanga en moro. Yesus ben taki tu: „Tan lobi un feanti èn tan begi gi den sma di e frufolgu unu” (Mat. 5:44). Disi e sori wi taki wi no musu hori sma na ati, srefi te den du wi wan ogri.

16, 17. San yu musu du te den Kresten owruman bosroiti taki wan sma abi berow èn fu san ede yu musu du dati?

¹⁶ Te wan sma na ini gemeente du wan seryusu sondu, dan Kresten owruman musu luku efu a abi berow trutru. Den kisi a frantwortu dati fu Yehovah. Den owruman disi no sabi ala den sani di Gado sabi, ma den e pruberi fu teki wan bosroiti di e kruderi nanga Gado Wortu èn den e meki Gado en santa yeye tiri den. Sobun, te den begi Yehovah fu yepi den fu teki wan bosroiti, dan wi kan de seiker taki a bosroiti dati e kruderi nanga a fasi fa Yehovah e denki.​—Mat. 18:18.

¹⁷ Disi wani taki dati a prenspari fu horibaka gi den seti fu Gado. Efu den owruman bosroiti taki wan sma abi berow, yu o de klariklari fu gi en pardon? Yu o sori a sma disi taki yu lobi en ete? (2 Kor. 2:5-8) A kan taki disi no de so makriki, spesrutu efu a sondu di a sma du, hati yu noso wan famiri fu yu. Ma te yu e frutrow na tapu Yehovah èn yu no tweifri taki a sabi fa lusu den problema na ini a gemeente, dan yu o du a yoisti sani. Yu o sori taki yu de klariklari fu gi pardon.​—Odo 3:5, 6.

18. Sortu wini yu kan kisi te yu de klariklari fu gi sma pardon?

¹⁸ Luku sortu takru bakapisi wi kan kisi te wi no wani gi sma pardon. Wi kan kon siki, wi kan lasi mati, wi kan kisi a firi taki wan hebi de na wi tapu èn a kan muilek gi wi fu taki switi nanga sma. Ma datra kon si taki a e tyari wini kon te wi e meki muiti fu gi sma pardon. Wi no o kuku fu inisei moro èn wi no o firi brokosaka moro. Boiti dati, wi o man libi bun nanga trawan. Ma a moro prenspari wini di wi e kisi te wi e gi sma pardon, na taki wi o de wan bun mati fu wi hemel Tata Yehovah.​—Leisi Kolosesma 3:12-14.