Na ini december 2009, a Hei Krutubangi fu Rosiakondre horibaka gi wan bosroiti di meki taki den tapu a wroko fu Yehovah Kotoigi na ini Taganrog, Rosiakondre. Den teki a Kownukondre zaal fu den Kotoigi, èn fu sowan 34 buku fu wi den taki dati den e gi sma deki-ati fu abi bita-ati gi trawan. A website fu Yehovah Kotoigi ben taki fu a tori disi èn wan tu fowtow ben de tu fu Kotoigi na ini Taganrog, sosrefi fowtow fu pikin-nengre.

Wan tu mun baka dati, a kantoro di e orga a wroko fu Yehovah Kotoigi na ini Rosiakondre kisi wan dosu nanga wan brifi fu wan Kotoigi famiri na ini Queensland, Australia. Na osofamiri disi ben leisi tapu a website sortu bosroiti a Krutubangi teki. Den skrifi na ini a brifi: „Lobi Brada, den pikin fu wi, Cody nanga Larissa, kisi deki-ati di den leisi fu a bribi fu den brada nanga sisa na ini Rosiakondre èn fu den tesi di miti den. Den skrifi wan tu karta nanga brifi. Wi poti den na ini wan dosu makandra nanga wan tu kado di wi seni gi den pikin na ini Taganrog. Wi wani meki den pikin dati sabi taki na ini wan farawe kondre, tra pikin de di e prakseri den èn di e tan dini Yehovah tu awinsi san e pasa. Den pikin fu wi lobi den èn den e seni wan bigi brasa gi den.”

Di den pikin na ini Taganrog kisi den kado, den skrifi brifi èn den teken wan tu sani na tapu papira. Ne den seni disi gi na osofamiri na ini Australia fu sori den taki den de nanga tangi gi den kado di den kisi. A sani di Cody nanga Larissa du, naki na ati fu wan brada di e wroko na a bijkantoro fu Rosiakondre. Dati meki a seni wan brifi gi den pe a skrifi: „Yu kan frustan taki a no switi srefisrefi gi pikin-nengre nanga bigisma te den kisi strafu fu wan sani di den no du. Den brada nanga sisa fu wi na ini Taganrog no du nowan ogri, ma sma teki a Kownukondre zaal fu den. A sani disi e meki den sari srefisrefi. A o de wan deki-ati gi den trutru fu sabi taki na a tra sei fu grontapu, sma de di e prakseri den.” A taigi den tangi gi a lobi nanga switifasi di den sori.​—Ps. 8:2.

Wi alamala na heri grontapu na wán bigi famiri trutru èn a lobi di wi abi gi makandra e yepi wi alamala fu horidoro te wi e kisi tesi nanga problema. Sma taki dati Yehovah Kotoigi e gi sma deki-ati fu abi bita-ati gi makandra. Ma den pikin fu wi di de fu difrenti kondre èn fu difrenti kulturu sori taki den lobi makandra èn taki den e broko den ede nanga makandra. Den pikin disi sori taki den wortu fu Yesus tru di a taki: „Na a fasi disi ala sma o sabi taki unu na mi disipel, te unu lobi makandra.”​—Yoh. 13:35.