„Mi o de nanga unu”
„Mi o de nanga unu”
„Furu sma o ondrosuku sani finifini èn den o kon sabi bun furu tru tori.”—DAN. 12:4.
SAN YU BEN O PIKI?
Fa sma na ini a ten fu wi kon sabi den „tru tori” fu Gado Wortu?
Fa a du kon taki „furu sma” e bribi den tru leri now?
Fa den tru tori fu Gado Wortu panya na ala sei?
1, 2. (a) Fa wi sabi taki Yesus de nanga den disipel fu en na ini a ten disi èn taki a o de nanga den na ini a ten di e kon? (b) Soleki fa Danièl 12:4 e sori, dan san ben o pasa te son sma ben o studeri Gado Wortu finifini?
PRAKSERI fa a o de na ini a paradijs. Ibri mamanten te yu opo yu o firi bun èn yu o prisiri taki wan nyun dei opo. Yu no o abi nowan skin-ati noso pen. Ala den siki di yu ben abi fosi, no o de moro. Yu o man si, yere, smeri, firi èn tesi heri bun. Yu o abi furu krakti, yu o lobi a wroko di yu e du, yu o abi furu mati èn yu no o abi nowan broko-ede moro. Na den blesi disi yu kan kisi te Gado Kownukondre o tiri. Wi Kownu Yesus Krestes o blesi libisma na a fasi disi èn a o sorgu taki ala sma na grontapu leri sani fu Yehovah.
2 Na a ten dati, Gado nanga en Manpikin o yepi den futuboi fu en fu gi trawan leri fu Yehovah. Fu taki en leti, ala ten Yehovah nanga Yesus yepi den tru Kresten. Fosi Yesus go na hemel, a taigi den disipel fu en: „Mi o de nanga unu.” Sobun, a ben o tan yepi den. (Leisi Mateyus 28:19, 20.) Meki wi poti prakseri na wan pisi fu wan profeititori di Yehovah meki Danièl skrifi na ini owruten Babilon moro leki 2500 yari pasa. Disi o tranga a bribi fu wi taki Yesus o du trutru san a pramisi. Danièl ben skrifi: „Furu sma o ondrosuku sani finifini èn den o kon sabi bun furu tru tori” (Dan. 12:4). Bigi blesi ben o kon fu a sani disi ede! Den sma di e ondrosuku Gado Wortu finifini ben o kon sabi den tru tori fu Gado. A profeititori taki tu dati furu sma ben o bribi den „tru tori” disi. Boiti dati, den tru tori fu Gado Wortu ben o panya na ala sei fu grontapu èn furu sma ben o man kon sabi den makriki. Meki wi luku now fa a profeititori disi kon tru. Disi o tranga a bribi fu wi taki Yesus de nanga den disipel fu en na ini a ten disi èn taki Yehovah o du ala san a pramisi fu du na ini a ten di e kon.
TRU KRESTEN E KON SABI DEN „TRU TORI” FU BIJBEL
3. San pasa baka di den apostel dede?
3 Paulus ben taki dati sma ben o drai baka gi a tru Kresten bribi. Baka a dede fu den apostel, disi pasa esi-esi na ala sei (Tori 20:28-30; 2 Tes. 2:1-3). Hondrohondro yari langa furu sma no ben sabi den „tru tori” fu Gado Wortu èn srefi den wan di ben e kari densrefi Kresten no ben sabi den tru tori disi finifini. Den kerki fesiman ben e taki dati den e bribi na ini Gado Wortu, ma toku den ben e fruteri sma „den leri fu ogri yeye” (1 Tim. 4:1). Den leri disi e gi Gado porinen. Fu dati ede, furu sma no ben sabi den tru tori fu Gado. Na presi fu dati, den ben leri leitori soleki a leri taki Gado, Yesus, nanga a santa yeye na wán sma, a leri taki a sili no e dede, èn a leri taki son sili e bron na ini hèl fu têgo.
4. Fa wan grupu Kresten na ini den yari baka 1870 bigin ondrosuku san Bijbel e leri trutru?
4 Ma sani kenki na ini den yari baka 1870, sowan 40 yari fosi „den lasti dei” bigin. Wan pikin grupu reti-ati Kresten na ini Pennsylvania, na Amerkankondre, ben e kon makandra fu studeri Bijbel finifini fu di den ben wani kon sabi san Bijbel e leri trutru (2 Tim. 3:1). Den sma disi ben e kari densrefi Bijbel Ondrosukuman. Den no ben de „koniman nanga sabiman” di no ben o man kon sabi den tru tori fu Gado, soleki fa Yesus ben taki (Mat. 11:25). Den sma disi ben abi sakafasi èn den ben wani du trutru san Gado wani. Den Bijbel Ondrosukuman ben abi a gwenti fu leisi wan pisi fu Bijbel bun, dan den ben e taki finifini fu en. Den ben e denki bun fu san den ben e leisi èn den ben e aksi Gado fu yepi den frustan a pisi tori dati. Boiti dati, den ben e luku san tra Bijbeltekst abi fu du nanga a pisi dati èn san tra sma di ben e ondrosuku Bijbel tu, taki fu a pisi dati. Safrisafri den Bijbel Ondrosukuman disi ben kon sabi tru leri fu Bijbel di furu sma no ben sabi hondrohondro yari langa.
5. Fu san ede den Bijbel Ondrosukuman prati den traktaat di nen ’Den fosi leri fu Gado’?
5 Den Bijbel Ondrosukuman ben breiti srefisrefi nanga den sani di den ben kon sabi, ma disi no meki den kisi heimemre. Den ben e frustan taki ala ten den tru tori disi ben skrifi kaba na ini Bijbel. Sobun, den no ben e du leki na nyun sani den ben kon sabi (1 Kor. 8:1). Na presi fu dati, den ben e meki traktaat di nen The Old Theology (Den fosi leri fu Gado). Den ben e prati den traktaat fu di den ben wani yepi trawan fu kon sabi den tru tori disi di skrifi na ini Bijbel. A fosiwan fu den traktaat disi ben e yepi sma fu studeri Bijbel. Na so den sma ben o man tapu nanga „ala falsi leri fu libisma” èn den ben o man bribi „den fosi leri fu Gado”, sobun den tru leri fu Yesus nanga den apostel fu en.—The Old Theology, nr. 1, april 1889, blz. 32.
6, 7. (a) Sortu tru tori Yehovah Kotoigi kon sabi sensi den yari baka 1870? (b) Sortu tru tori di yu kon sabi meki yu prisiri srefisrefi?
6 Sensi den yari baka 1870, Yehovah Kotoigi leri furu moi tru tori fu Gado Wortu. * Te wi e ondrosuku den tru tori disi, wi no e leri nomo fa sani de trutru. Ma wi e leri moi sani di kan yepi wi fu libi moro bun. Den tru tori disi e meki wi de koloku èn den e gi wi howpu. Den e yepi wi fu kon sabi wi lobi-ati Gado Yehovah èn wi e kon frustan san na a wani fu en. Wi e kon sabi tu suma na Yesus, fu san ede a kon na grontapu, fu san ede a dede, èn san a e du now. Den prenspari tru tori disi e yepi wi fu frustan fu san ede Gado e gi pasi taki ogri e pasa, fu san ede wi e dede, fa wi musu begi èn fa wi kan de koloku trutru.
7 Now wi kan frustan profeititori di sma no ben man frustan hondrohondro yari langa, ma di e kon tru na ini a ten fu a kaba (Dan. 12:9). Den profeititori disi skrifi na ini heri Bijbel, spesrutu na ini a buku Openbaring èn na ini den Bijbel buku di e taki fu a libi fu Yesus. Yehovah yepi wi srefi fu sabi san pasa na hemel, aladi libisma no ben man si dati. Fu eksempre, wi sabi taki Yesus tron Kownu, taki wan feti ben de na hemel, èn taki den trowe Satan kon na grontapu (Openb. 12:7-12). Gado yepi wi fu sabi tu fu san ede son sani di wi man si na wi lontu, e pasa. Wi sabi fu san ede someni feti, gronseki, siki nanga angri de na grontapu. Wi sabi tu fu san ede sma e du someni ogri di e meki taki wi e libi na ini „muilek ten”.—2 Tim. 3:1-5; Luk. 21:10, 11.
8. Suma na a sma di meki wi frustan den tru tori fu Bijbel?
8 Yesus taigi den disipel fu en: „Koloku fu den ai di si den sani disi di unu e si. Bika mi e taigi unu: Furu profeiti nanga kownu ben wani si den sani di unu e si, ma den no si den, èn den ben wani yere den sani di unu e yere, ma den no yere den” (Luk. 10:23, 24). Na ini a ten disi, Yehovah Gado meki wi „si” èn „yere”, noso frustan den tru tori fu Bijbel. Wi de nanga tangi trutru taki a gi wi „a yepiman” noso a santa yeye di e yepi wi fu frustan den tru tori fu Bijbel moro bun. (Leisi Yohanes 16:7, 13.) Noiti wi musu frigiti taki den tru tori disi prenspari srefisrefi èn taki wi musu yepi trawan fu kon sabi den tu.
„FURU SMA” E BRIBI DEN „TRU TORI” FU GADO WORTU
9. Sortu kari sma ben kisi na ini wan artikel fu a Watch Tower fu april 1881?
9 Na ini a Watch Tower fu april 1881, pikinmoro tu yari baka di a tijdschrift disi kon na doro, wan artikel ben de di nen „Wi e suku 1000 preikiman”. Na artikel disi ben gi sma wan kari fu wroko afudei noso moro langa na ini a preikiwroko leki kolporteur noso pionier. Den brada aksi den sma disi fu go na ala sei fu suku reti-ati Kresten di lobi Gado, ma di no ben sabi den tru leri fu Bijbel finifini. Den preikiman disi ben musu leri den sma dati den tru tori fu Gado èn fu Bijbel.
10. San furu sma ben wani du, baka di den leisi a kari fu tron pionier?
10 Den Bijbel Ondrosukuman ben gi tra sma wan kari fu preiki, fu di den ben e frustan taki tru Kresten musu preiki a bun nyunsu. Ma na a ten dati, wan tu hondro sma nomo ben e go na den konmakandra fu den Bijbel Ondrosukuman. Sobun, den no feni so furu preikiman leki fa den ben fruwakti. Toku furu sma di ben leisi wan traktaat noso wan tijdschrift kon frustan taki den feni a tru bribi èn den sma disi ben wani yepi trawan tu. Fu eksempre, na ini 1882, wan man na ini Londen, na Ingrisikondre, ben leisi wan Watch Tower nanga wan tra pikin buku fu den Bijbel Ondrosukuman. Baka dati a skrifi: „Grantangi, leri mi fa fu preiki èn san mi musu preiki, so taki mi kan du a moi wroko di Gado wani wi fu du.”
11, 12. (a) Fu san ede den pionier fu fosi ben e du a preikiwroko? (b) Fa den pionier ben e seti nyun gemeente?
11 Na ini 1885, sowan 300 Bijbel Ondrosukuman ben e du a pionierwroko. Neleki wi na ini a ten disi, den furuten dinari dati ben e du a preikiwroko fu meki disipel fu Yesus Krestes. Ma den ben e du a wroko tra fasi leki wi. Nofo tron, wi e studeri Bijbel nanga wán sma nomo. Dan wi e gi a Bijbelstudenti a kari fu kon na den konmakandra fu a gemeente. Ma fosi, den kolporteur ben e studeri Bijbel nanga wan heri grupu sma. Den ben e prati den buku, dan den ben e gi den sma di ben wani sabi moro wan kari fu kon makandra fu studeri Bijbel. Na so den pionier disi ben e seti nyun gemeente di den ben e kari klas.
12 Fu eksempre, na ini 1907, wan grupu fu den pionier disi ben go na wan foto fu suku den sma di ben abi wan fu den buku di ben nen Millennial Dawn (bakaten den buku disi kisi a nen Schriftstudiën). Den pionier gi den sma wan kari fu kon na wan konmakandra di ben hori sonde na ini na oso fu wan fu den sma di ben wani sabi moro. A sonde dati, wan pionier hori wan lezing di ben abi fu du nanga den sani di Gado ben abi na prakseri fu du sensi a bigin. A sonde baka dati, a brada gi den sma na a konmakandra a deki-ati fu hori konmakandra doronomo. Na ini 1911 den brada pruberi fu meki disipel na wan tra fasi. Feifitenti na aiti brada go na difrenti kontren na ini Amerkankondre nanga Kanada fu hori publikitaki. Den ben e skrifi den nen nanga den adres fu den sma di ben wani sabi moro èn di ben kon na den konmakandra. Baka dati, den ben orga den sma disi na ini grupu di ben e kon makandra na ini na oso fu wan fu den. Na so den ben seti nyun gemeente. Na ini 1914, yu ben abi 1200 gemeente fu Bijbel Ondrosukuman na heri grontapu.
13. Sortu sani fu a preikiwroko yu feni so moi?
13 Na ini a ten disi, sowan 109.400 gemeente de na heri grontapu èn sowan 895.800 brada nanga sisa e pionier. Now pikinmoro aiti milyun sma e bribi den „tru tori” fu Gado Wortu èn den e du san den leri. (Leisi Yesaya 60:22.) * A moi fu si taki so furu sma tron disipel fu Yesus, aladi furu sma abi bita-ati gi den, soleki fa Yesus ben taki na fesi. Yesus ben taki tu dati den bakaman fu en ben o kisi frufolgu, sma ben o poti den na strafu-oso èn den ben o kiri den tu (Luk. 21:12-17). Satan, den ogri yeye nanga furu libisma pruberi fu tapu a preikiwroko, ma toku a pipel fu Yehovah e tan meki disipel èn den abi moi bakapisi. Now den e preiki „gi sma na heri grontapu”, awinsi den e tan na presi di faya srefisrefi noso na presi di kowru srefisrefi, èn awinsi den e tan na tapu bergi, na ini sabana, na ini foto, noso na presi pe furu sma no de (Mat. 24:14). Den ben man du ala den sani disi soso nanga a yepi fu Yehovah.
SMA E KON SABI „BUN FURU TRU TORI” FU GADO WORTU
14. Fa den buku nanga tijdschrift fu wi meki taki den tru tori fu Gado Wortu panya na ala sei?
14 Fu di furu sma e preiki a bun nyunsu, meki den tru tori fu Gado Wortu panya na ala sei. Den tru tori disi de fu feni sosrefi na ini furu buku nanga tijdschrift. Na ini yuli 1879, den Bijbel Ondrosukuman tyari a fosi Waktitoren kon na doro. Na a ten dati den ben e kari a tijdschrift disi Zion’s Watch Tower and Herald of Christ’s Presence. Den Bijbel Ondrosukuman ben e pai sma fu meki 6000 fu a fosi tijdschrift disi na ini Ingrisitongo. Charles Taze Russell, di ben abi 27 yari na a ten dati, ben de a moro prenspari skrifiman fu a tijdschrift èn ete 5 tra lepi brada ben e skrifi artikel na ini tu. Na ini a ten disi, 42.182.000 Waktitoren e meki na ini 195 tongo. A tijdschrift disi prati na grontapu moro leki iniwan tra tijdschrift. Baka a Waktitoren, na Ontwaakt! na a tijdschrift di prati moro furu na grontapu. Wi e meki 41.042.000 Ontwaakt! na ini 84 tongo. Boiti dati, wi e meki sowan 100 milyun buku nanga Bijbel ibri yari.
15. Fa wi e kisi moni fu meki den buku fu wi?
15 Wi man du a bigi wroko disi fu di sma e gi moni nanga den heri ati fu horibaka gi a wroko di wi e du. (Leisi Mateyus 10:8.) Den sma di e wroko na presi pe buku e meki, e fruwondru fu disi fu di den sabi taki den masyin, a papira, na enki nanga den tra sani di de fanowdu fu meki buku diri srefisrefi. Wan brada di e bai sani gi den presi pe den e meki buku na Betel, taki dati den bisnisman di e kon na Betel e fruwondru fu den sani di wi man du nanga a moni di sma e gi fu horibaka gi a wroko. Den no man bribi taki sma e gi someni moni taki wi man bai nyun sortu masyin di kan meki so furu buku na ini wán leisi. Den e fruwondru tu taki someni yongu sma e wroko na Betel nanga prisiri.
HERI GRONTAPU O FURU NANGA A SABI FU YEHOVAH
16. Fu san ede Yehovah sorgu taki den „tru tori” fu Bijbel panya na ala sei?
16 Yehovah sorgu taki den „tru tori” fu Bijbel panya na heri grontapu fu di a wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:3, 4). Yehovah wani taki sma musu sabi den tru leri so taki den kan dini en na a yoisti fasi èn so taki a kan blesi den. Nanga yepi fu a preikiwroko, a tyari den salfu Kresten di e tai hori na en kon na wán. Boiti dati, a e tyari „wan bigi ipi sma” kon na wán di komoto fu „ala kondre, lo, pipel, nanga tongo” èn di abi a howpu fu libi fu têgo na grontapu.—Openb. 7:9.
17. Te wi e luku omeni sma tron anbegiman fu Yehovah, dan san dati e sori?
17 Na ini den 130 yari di pasa, tru anbegiman kon moro furu na heri grontapu. Disi e sori krin taki Yehovah nanga Yesus Krestes di a poti leki Kownu de trutru nanga den futuboi fu Yehovah na grontapu. Den e tiri den, den e kibri den, den e sorgu taki ala sani orga bun, èn den e gi den leri. Yehovah yepi furu sma na ini a ten disi fu feni a tru bribi soleki fa a ben pramisi. Sobun, wi kan de seiker taki a o du ala tra sani tu di a pramisi fu du na ini a ten di e kon. „Heri grontapu o furu nanga a sabi fu Yehovah, neleki fa a se furu nanga watra” (Yes. 11:9). Prakseri omeni moi blesi libisma o kisi na a ten dati!
[Futuwortu]
^ paragraaf 6 Yu kan kon sabi moro te yu e luku a DVD di nen Jehovah’s Getuigen — Geloof in actie, Deel 1: Uit het duister, nanga a DVD Jehovah’s Getuigen — Geloof in actie, Deel 2: Laat het licht schijnen.
^ paragraaf 13 Luku Jesaja’s profetie — Licht voor de hele mensheid II, bladzijde 320, nanga A Waktitoren fu 1 yuli 2002, bladzijde 19, par. 16.
[Aksi fu a tori disi]
[Prenki na tapu bladzijde 6]
Den Bijbel Ondrosukuman ben abi sakafasi èn den ben wani du trutru san Gado wani
[Prenki na tapu bladzijde 7]
Yehovah e warderi en taki yu e du muiti fu fruteri trawan den „tru tori” fu Bijbel
