DEN alayari konmakandra fu a Watch Tower Bible and Tract Society of Pennsylvania na wan span okasi ala ten. Na so a ben de tu tapu 1 oktober 2011 di a konmakandra disi hori fu a di fu 127 leisi. Sma fu heri grontapu ben kisi wan kari fu go na a Kongreshal fu Yehovah Kotoigi na ini Jersey City, na New Jersey, Amerkankondre.

Gerrit Lösch fu a Tiri Skin bigin a programa di a bari ala sma wan switikon. A taigi den sma drape di komoto fu 85 kondre taki den na memre fu wan bigi famiri di de na heri grontapu. Nowan tra grupu sma na grontapu abi a wánfasi di den abi. A wánfasi disi e sori krin taki den na trutru Kresten èn disi e gi Yehovah grani. Fu taki en leti, na a heri konmakandra disi den taki fu wánfasi.

BUN NYUNSU FU MEKSIKOW

A fosi pisi fu a programa ben tyari kon na krin taki a pipel fu Yehovah abi wánfasi trutru. Now a bijkantoro fu Meksikow abi a frantwortu fu luku a wroko fu siksi kondre na ini Mindri-Amerika. Brada Baltasar Perla fu a bijkantoro fu Meksikow taki nanga dri tra memre fu a Betelfamiri fu Meksikow èn a aksi den fa den feni den sani di kenki na a bijkantoro drape. Den taki dati a Betelfamiri fu Meksikow abi moro brada nanga sisa now fu difrenti kondre nanga kulturu èn ala sma e kisi deki-ati fu disi. A de leki Gado meki den kondre tron leki wán kondre nomo èn nowan sma e si ensrefi leki wan sma fu wan tra kondre.

Fu di den bijkantoro tapu na ini den kondre dati, meki den preikiman ben o firi kande leki Yehovah en organisâsi no ben o poti prakseri na den moro. Sobun, fu lusu a problema disi, ibri gemeente kisi wan e-mail adres di den kan gebroiki efu den wani aksi wan sani. Na a fasi disi srefi den Kotoigi na farawe presi kan taki nanga a bijkantoro langalanga.

NYUNSU FU YAPAN

James Linton fu a bijkantoro fu Yapan fruteri fa den brada drape du di gronseki nanga tsunami ben de na ini a kondre na ini maart 2011. Den famiri nanga mati fu furu Kotoigi lasi libi èn furu Kotoigi lasi den oso nanga tra sani di den ben abi. Den Kotoigi sorgu taki den sma di ben de na ini a rampu, ben abi moro leki 3100 presi fu tan èn den ben leni den hondrohondro wagi tu. Difrenti Bowkomte seni brada nanga sisa fu yepi meki den oso fu den Kotoigi na Yapan baka. Den wrokoman disi ben e wroko dei nanga neti. Moro leki 1700 brada nanga sisa go yepi na iniwan presi pe yepi ben de fanowdu. Yu ben abi 575 brada nanga sisa tu di ben yepi fu meki Kownukondre zaal èn sonwan fu den ben komoto na Amerkankondre.

Furu sani du tu fu trowstu èn fu tranga a bribi fu den sma di ben de na ini a rampu. Moro leki 400 owruman ben go luku den sma disi. A ben de krin taki a Tiri Skin ben broko den ede trutru nanga den. Dati meki den ben seni tu zone-opziener fu na edekantoro go na Yapan fu gi den brada nanga sisa deki-ati. Den brada nanga sisa fu Yapan ben kisi furu trowstu tu fu furu Kotoigi na heri grontapu.

KRUTU-AFERSI DI WI WINI

Baka dati, den arkiman poti ala prakseri na Stephen Hardy fu a bijkantoro fu Ingrisikondre  èn na tra brada di taki fu den krutu-afersi di wi wini. Fu eksempre, Fransikondre ben wani taki na organisâsi fu Yehovah Kotoigi na ini Fransikondre ben musu pai 58 milyun Euro belasting-moni. Ma a Hei Krutubangi fu Europa di e feti gi den reti fu libisma, bosroiti taki wi no abi fu pai, fu di Fransikondre ben pasa Artikel 9 fu a Konmakandra fu Europa di e taki dati ala sma abi a reti fu abi den eigi bribi. Ma na ini Fransikondre, lanti no ben wani si Yehovah Kotoigi leki wan trutru bribi, den ben wani tapu na organisâsi fu du a wroko fu den, den ben wani puru a bribi dati na ini a kondre èn den ben kosi den Kotoigi. Den sani di den skrifi na ini a bosroiti fu a Hei Krutubangi fu Europa sori tu taki a no tru taki den Kotoigi no ben wani pai belasting-moni.

Ma a Hei Krutubangi fu Europa teki wan bosroiti tu na ini wan afersi di ben abi fu du nanga Yehovah Kotoigi na ini Armeinia. Sensi 1965 a Hei Krutubangi fu Europa taki dati a Konmakandra fu Europa no e gi wan sma a reti fu weigri te en kondre e kari en fu du srudatiwroko. Ma den moro prenspari krutuman na ini a Hei Krutubangi fu Europa bosroiti taki wan sma abi a reti fu weigri fu du srudatiwroko gi en kondre, efu a e du dati fu en bribi ede. A bosroiti disi meki taki Armeinia nanga tra kondre soleki Aserbadyan nanga Torkukondre no kan dwengi sma fu du srudatiwroko efu den e weigri fu du dati fu den bribi ede.

BOW-WROKO

Baka dati, Brada Guy Pierce fu a Tiri Skin hori a lezing fu en. A ben taki dati a e frustan taki ala sma drape ben wani sabi fu den bow-wroko fu wi na ini New York State. A meki den arkiman luku wan video di sori fa a bow-wroko e go na Wallkill, na Patterson èn na den nyun gron di den bai na Warwick nanga Tuxedo, na New York. Na Wallkill den e bow 300 kamra èn den wani kaba a wroko na ini 2014.

Den brada e seti sani fu du bow-wroko na tapu a pisi gron na Warwick di bigi 100 hectare. Brada Pierce taki: „Wi no sabi krin san Yehovah wani wi fu du nanga a pisi gron na Warwick, ma wi e bigin seti sani fu di wi wani froisi na edekantoro fu Yehovah Kotoigi go drape.” Den brada abi na prakseri tu fu poti den masyin nanga den sani di den o gebroiki fu bow, na wan pisi gron di bigi 20 hectare èn di de 10 kilometer na noordsei fu Warwick. Brada Pierce taki: „Te ala bow-papira seti, wi wani kaba bow ala sani na ini fo yari. Baka dati wi o seri den presi di wi abi na ini Brooklyn.”

Dan Brada Pierce aksi: „Ma disi wani taki dati a Tiri Skin no e denki moro taki a bigi banawtu de krosibei? Kwetikweti! A ben o switi efu a bigi banawtu kon fosi wi kaba bow. A ben o switi trutru!”

LUKU BUN NANGA A LEW DI E BARI

Stephen Lett, wan tra memre fu a Tiri Skin, taki fu 1 Petrus 5:8 pe skrifi: „Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.” Brada Lett taki dati wi kan frustan moro bun fu san ede Petrus gebroiki na agersitori disi, te wi e prakseri fa wan lew e tyari ensrefi.

Lew tranga moro libisma èn den esi moro libisma. Sobun, wi no musu denki taki wi wawan kan feti nanga Satan noso taki wi kan lowe gi en. Wi abi a yepi fu Yehovah fanowdu (Yes. 40:31). Nofo tron wan lew e onti na neti, so taki den meti no e si en. Efu wi no wani taki Satan kisi wi, dan wi musu man si noso frustan fa a wani kisi wi. Te wan lew feni wan dia noso wan pikin asi di e sribi, a no o sari en, ma a o kiri en nomonomo. Na so Satan no o sari wi èn a o wani kiri wi tu. Te wan lew kaba  nyan, dan nofo tron a priti a meti so te, taki yu no man si srefi sortu meti a ben de. Na so a de tu taki te Satan kisi wan Kresten, dan a situwâsi fu en kon moro ogri leki fosi a ben sabi a tru bribi (2 Petr. 2:20). Sobun, wi musu feti nanga Satan èn wi musu tan du san Bijbel e leri wi.​—1 Petr. 5:9.

DE NANGA TANGI TAKI YU ABI WAN PRESI NA INI YEHOVAH EN OSO

A tra takiman, Samuel Herd fu a Tiri Skin, taki: „Wi alamala abi wan presi na ini na oso fu Yehovah.” Disi wani taki dati ala Kresten di e bribi na ini na frulusu-ofrandi fu Yesus, man anbegi Gado na wan fasi di a feni bun. Wi alamala musu de nanga tangi taki wi abi wan presi na ini na oso fu Yehovah. David ben wani „tan na ini na oso fu Yehovah” en heri libi langa. Neleki David, wi srefi wani dini Yehovah wi heri libi langa.​—Ps. 27:4.

Brada Herd taki fu Psalm 92:12-14 èn a sori fa Yehovah e meki en pipel „gro bun”. Gado e trowstu wi, a e kibri wi èn a e gi wi leri fu Bijbel di de leki watra. Brada Herd ben taigi den arkiman taki den musu taki Yehovah tangi fu ala den sani disi. Dan a gi den deki-ati fu de nanga tangi taki den kan anbegi Yehovah na ini en oso fu têgo.

TRU KRESTEN E LESPEKI GADO WORTU

David Splane di de wan memre fu a Tiri Skin tu, fruteri na ini en lezing taki ala ten tru Kresten abi lespeki gi Gado Wortu. Na ini a fosi yarihondro, den gebroiki Gado Wortu fu bosroiti efu wan sma musu besnèi noso efu a no musu besnèi (Tori 15:16, 17). Ma na ini a di fu tu yarihondro, son sma di ben taki dati den na Kresten, bigin si den leri fu den Griki sabiman moro prenspari leki den leri fu Bijbel. Bakaten, son sma bigin leri trawan taki den denki fu den grankownu fu Rome èn fu den sma di den ben kari Kerki Tata, prenspari moro den leri fu Bijbel. Na so furu falsi leri kon na ini a Kresten bribi.

Brada Splane ben taki dati wan agersitori fu Yesus e sori taki ala ten tru salfu Kresten ben o de na grontapu di ben o opo taki gi a tru bribi (Mat. 13:24-30). Wi no kan taki krin suma ben de den sma disi. Ma na ini den hondrohondro yari di pasa, furu sma sori taki den no e agri nanga den falsi  kerkileri nanga gwenti. Wan tu fu den sma disi ben de granbeskopu Agobard fu Lyon di ben e libi na ini a di fu 9 yarihondro, Petrus fu Bruys nanga Hendrik fu Lausanne, Valdès (noso Waldus) di ben e libi na ini a di fu 12 yarihondro, John Wycliffe di ben e libi na ini a di fu 14 yarihondro, William Tyndale di ben e libi na ini a di fu 16 yarihondro, èn Henry Grew nanga George Storrs di ben e libi na ini a di fu 19 yarihondro. Yehovah Kotoigi na ini a ten disi e tan du san Bijbel e taki èn den e bribi taki na Bijbel wawan e taki san tru. Dati meki a Tiri Skin bosroiti taki a yaritekst fu 2012 na Yohanes 17:17: „Yu wortu e taki san tru.”

MOI KENKI FU GI SMA LERI ÈN FU DU A WROKO MORO BUN

Anthony Morris, wan memre fu a Tiri Skin, fruteri sortu kenki kon gi den zendeling nanga spesrutu pionier. Na ini september 2012 den o bigin hori a Bijbelskoro gi Kresten trowpaar na ini son kondre. Den o gebroiki a Gileadskoro gi wan tra sani now. Sensi oktober di pasa, ala den sma di kisi leri na a Gileadskoro na sma di du furuten wroko kaba. Sobun, den sma disi na zendeling di no go na a Gileadskoro ete, spesrutu pionier, kring-opziener, distrikt-opziener, noso sma di wroko na Betel. Den o seni den sma di kaba a Gileadskoro fu gi brada nanga sisa na difrenti presi deki-ati nanga yepi. Den o wroko na bijkantoro, den o dini leki kring-opziener noso distrikt-opziener, noso den o go preiki nanga gemeente na ini bigi foto.

Na a konmakandra den taki tu dati bigin nanga 1 yanuari 2012, son sma di go na a Bijbelskoro gi brada di no trow èn na a Bijbelskoro gi Kresten trowpaar, o tron spesrutu pionier fu wan pisi ten. Den o preiki na kontren pe furu preikiman no de, noso pe nowan preikiman de. Den o de spesrutu pionier fu wán yari, tu yari, noso dri yari. Efu den du den wroko bun, dan baka dri yari den brada kan aksi den fu tan wroko leki spesrutu pionier.

Na alayari konmakandra fu 2011 ben de wan prisiri konmakandra. Na organisâsi fu Gado e du muiti fu preiki na moro presi na grontapu èn fu yepi den brada nanga sisa na heri grontapu fu de wán. Wi e begi taki Yehovah o blesi a wroko fu wi èn taki disi o gi en furu glori nanga grani.

[Faki/​Prenki na tapu bladzijde 18, 19]

WI KON LERI SABI DEN MORO BUN

Na a konmakandra den taki nanga den wefi fu feifi brada fu a Tiri Skin di dede kaba. Sisa Marina Sydlik, Sisa Edith Suiter, Sisa Melita Jaracz, Sisa Melba Barry, nanga Sisa Sydney Barber fruteri fa den kon na ini a tru bribi èn fa den bigin nanga a furuten diniwroko. Ibriwan fu den taki fu den prisiri sani di den ondrofeni na ini den libi. Den taki tu fu den bun fasi fu den masra fu den èn fu den blesi di den ben abi leki trowpaar. Baka dati ala sma singi, singi nomru 86 di nen „Wi Kresten sisa na getrow uma”, èn disi naki na ati fu furu sma.

[Prenki]

(Na tapusei) Daniel nanga Marina Sydlik; Grant nanga Edith Suiter; Theodore nanga Melita Jaracz

(Na ondrosei) Lloyd nanga Melba Barry; Carey nanga Sydney Barber

[Karta na tapu bladzijde 16]

(Efu yu wani si pe den sani disi skrifi, luku a tijdschrift)

A bijkantoro fu Meksikow e luku a wroko fu den siksi kondre disi

MEKSIKOW

GWATEMALA

HONDURAS

EL SALVADOR

NIKARAGWA

KOSTA RIKA

PANAMA

[Prenki na tapu bladzijde 17]

Wan prenki fu na edekantoro fu Yehovah Kotoigi di den o bow na Warwick, New York