Fu san ede wi musu poti a diniwroko fu Yehovah na a fosi presi?

„Mi eigi mofo o taki fu den reti sani di yu du. Heri dei mi o taki fa yu frulusu mi.”​—PS. 71:15.

SAN YU BEN O PIKI?

Fu san ede Noa, Moses, Yeremia, nanga Paulus poti a diniwroko fu Yehovah na a fosi presi na ini den libi?

San o yepi yu fu bosroiti san yu o du nanga yu libi?

Fu san ede yu o poti a diniwroko fu Yehovah na a fosi presi na ini yu libi?

1, 2. (a) San wan sma e sori te a gi ensrefi abra na Yehovah? (b) Fa den sani di Noa, Moses, Yeremia, nanga Paulus du kan yepi wi?

A MORO seryusu bosroiti di yu kan teki na ini yu libi, na fu gi yusrefi abra na Yehovah èn fu tron wan dopu bakaman fu Yesus. Te yu dopu, dan a de leki yu e taigi Yehovah: ’Yehovah, mi wani yu fu de mi Masra. Mi na yu futuboi. Mi wani yu fu taigi mi fa mi musu gebroiki mi ten, san musu de den moro prenspari sani na ini mi libi, èn fa mi musu gebroiki a koni di mi abi èn den sani di mi abi.’

² Efu yu na wan dopu Kresten, dan disi na san yu pramisi Yehovah. A de wan heri bun sani taki yu du disi. Yu teki a yoisti bosroiti, èn dati na a moro koni sani di yu du. Ma now di yu bosroiti taki Yehovah na yu Masra, dan fa yu e gebroiki yu ten? Te wi e luku san Noa, Moses, Yeremia, nanga na apostel Paulus du, dan disi sa yepi wi fu si efu trutru wi e gebroiki wi ten gi Yehovah. Den man disi du ala san den ben man gi Yehovah. A situwâsi fu wi na ini a ten disi de leki a di fu den. Den bosroiti di den teki ben sori san ben prenspari gi den èn disi musu meki wi prakseri fa wi e gebroiki wi ten.​—Mat. 28:19, 20; 2 Tim. 3:1.

A TEN FOSI A FRUDU

3. Fu san ede wi kan taki dati a ten fu wi de leki a ten fu Noa?

³ Yesus ben taki dati a ten fu Noa de leki a ten fu wi. „Neleki fa sani ben de na ini a ten fu Noa, na so a o de te a Manpikin fu libisma kon”, na so a taki. Den sma ben e „nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark. Ma den no ben poti prakseri na san ben e pasa, teleki a frudu kon èn a wai den alamala puru” (Mat. 24:37-39). Furu sma na  ini a ten disi no e arki den warskow di a pipel fu Gado e gi den. Den no e prakseri taki wi e libi na ini wan prenspari ten. Neleki den sma fu a ten fu Noa, furu sma na ini a ten disi no e bribi taki Gado o kiri den ogri sma. Den e lafu srefi te den yere disi! (2 Petr. 3:3-7) Ma fa Noa gebroiki en ten aladi den sma lontu en no ben e arki den warskow fu en?

4. Di Yehovah gi Noa wan spesrutu wroko fu du, dan fa Noa gebroiki a ten fu en? Fu san ede a du dati?

⁴ Gado taigi Noa taki a ben o kiri ala den ogri sma, èn a gi en wan spesrutu wroko fu du. Noa ben musu bow wan ark fu kibri libisma nanga meti (Gen. 6:13, 14, 22). A ben musu taigi sma tu san Yehovah ben o du. Na apostel Petrus e taki dati Noa ben de „wan preikiman fu retidu”. Disi e sori taki Noa ben du ala san a man fu yepi sma frustan o prenspari a ben de fu tyari kenki kon. (Leisi 2 Petrus 2:5.) Yu denki taki a ben o de wan koni sani na a ten dati efu Noa nanga en osofamiri ben o bigin wan bisnis, efu den ben o streilibi nanga trawan, noso efu den ben o feti baka gudu? Kwetikweti! Fu di Noa nanga en osofamiri ben sabi san ben o pasa, meki den no ben meki tra sani puru den prakseri na a wroko fu den.

DEN BOSROITI DI WAN HEIHEI MAN FU EGEPTE TEKI

5, 6. (a) Fu san ede den leri Moses „ala den koni fu den Egeptesma”? (b) Fu san ede Moses bosroiti fu no libi leki wan heihei man fu Egepte?

⁵ Meki wi luku na eksempre fu Moses now. A gro kon bigi na ini a kownu-oso fu Egepte leki a manpikin fu na umapikin fu Farao. Drape Moses leri „ala den koni fu den Egeptesma” (Tori 7:22; Eks. 2:9, 10). Kande a kisi a leri disi fu kan wroko na ini kownu-oso bakaten. A ben kan tron wan prenspari sma na ini a moro makti kondre fu a ten dati. Efu a ben abi a posisi dati, a ben o man abi furu moi sani èn sma ben o gi en furu grani. Ma yu denki taki den sani disi ben prenspari gi Moses?

⁶ Di Moses ben de wan pikin-nengre, en trutru papa nanga mama leri en fu Yehovah. Sobun, a musu de so taki a ben sabi san Yehovah ben pramisi Abraham, Isak nanga Yakob. Moses ben e bribi den pramisi fu Yehovah. A musu de so taki a ben e prakseri bun san a ben wani du nanga en libi èn fa a ben kan du a wani fu Yehovah. Sobun, di Moses ben musu bosroiti efu a ben o libi leki wan heihei man na ini Egepte noso leki wan Israel srafu, dan san a du? We, Moses bosroiti fu „nyan pina makandra nanga a pipel fu Gado, na presi fu nyan bun fu sondu fu wan pisi ten nomo”. (Leisi Hebrewsma 11:24-26.) Bakaten a gi yesi na Yehovah di ben sori en fa a ben musu libi (Eks. 3:2, 6-10). Fu san ede Moses du dati? Fu di a ben e bribi den pramisi fu Gado. A ben sabi taki a switi libi di a ben kan abi na ini Egepte, no ben o de fu ala ten. A ben abi leti. Syatu baka dati, Gado strafu a  kondre dati nanga tin rampu. San den sma di gi densrefi abra na Yehovah, kan leri fu a tori disi? Wi no musu feti fu meki en na ini a grontapu disi èn wi no musu feti baka den prisiri sani fu a grontapu disi. Na presi fu dati, wi musu poti prakseri na Yehovah èn na a diniwroko fu en.

YEREMIA BEN SABI SAN BEN O PASA

7. Fu san ede wi kan taki dati a ten fu Yeremia ben de leki a di fu wi?

⁷ Wan tra man di ben e poti a diniwroko fu Yehovah na a fosi presi, ben de a profeiti Yeremia. Yehovah ben teki Yeremia leki en profeiti èn a meki en tyari wan krutuboskopu gi den sma fu Yerusalem nanga Yuda di ben e anbegi falsi gado. A ten fu Yeremia ben de leki a di fu wi. En srefi ben e libi na wan ten pe sani ben o kenki heri esi (Yer. 23:19, 20). A ben de seiker taki wan kaba ben o kon.

8, 9. (a) Fu san ede Baruk ben musu kenki en denki? (b) San wi musu hori na prakseri te wi e seti sani gi a ten di e kon?

⁸ San Yeremia no du fu di a ben e bribi san Yehovah taki? A no pruberi fu meki en na ini wan libimakandra di ben o kon na wan kaba. Dati ben o de wan don sani fu du. Ma Baruk, a sekretarsi fu Yeremia, bigin denki tra fasi. Dati meki Gado taigi Yeremia fu taigi Baruk: „Luku, a sani di mi bow, mi o broko baka èn a sani di mi prani, mi o rutu puru. Iya, na dati mi o du nanga a heri kondre. Ma yu e tan suku bigi sani gi yusrefi. . . . Luku, mi o tyari rampu kon na tapu ala libisma.” Dan Yehovah pramisi Baruk taki a ben o tan na libi te Yerusalem ben o kisi pori.​—Yer. 45:4, 5.

⁹ Wi no sabi san na den „bigi sani” di Baruk ben e suku gi ensrefi. * Ma wi sabi taki den sani disi no ben o tan fu ala ten. Den sani disi kisi pori tu di den Babilonsma teki Yerusalem abra na ini 607 Fosi Krestes. San wi kan leri fu a tori disi? A tru taki wi musu seti sani na fesi fu kan abi den sani di de fanowdu na ini a libi (Odo 6:6-11). Ma yu denki taki a ben o koni fu gebroiki furu ten nanga krakti soso fu abi sani di no o tan fu ala ten? A tru taki Yehovah en organisâsi e sreka sani doronomo fu bow Kownukondre zaal, fu bow bijkantoro, èn fu du tra sani. Ma den sani disi na fu horibaka gi a Kownukondre. Sobun, te sma di gi densrefi abra na Yehovah o seti sani gi a ten di e kon, dan Gado Kownukondre musu de a moro prenspari sani di den o hori na prakseri. Yu de seiker taki yu e „suku fosi a Kownukondre nanga [Yehovah] en retidu”?​—Mat. 6:33.

„MI KON SI DEN LEKI WAN IPI DOTI”

10, 11. (a) San ben prenspari gi Paulus, fosi a tron wan Kresten? (b) Fu san ede tra sani ben kon moro prenspari gi Paulus bakaten?

¹⁰ Meki wi luku na eksempre fu na apostel Paulus now. Bifo a tron wan Kresten, ala sma ben denki taki a ben o meki en na ini a grontapu. Wan fu den moro bigi leriman fu a ten dati ben leri en sani fu den wèt fu den Dyu. A granpriester fu den Dyu ben e frutrow en so te, taki a gi en wan prenspari wroko fu du. A ben go na fesi na ini a Dyu bribi, moro leki furu fu den speri fu en (Tori 9:1, 2; 22:3; 26:10; Gal. 1:13, 14). Ma Paulus en heri libi kenki di a kon frustan taki Yehovah no ben si den Dyu leki en pipel moro.

¹¹ Paulus ben sabi taki efu a ben o suku fu meki en na ini a Dyu libimakandra, dan Yehovah ben o si dati leki wan soso sani. Sani no ben o waka bun gi  a Dyu libimakandra (Mat. 24:2). Paulus ben sabi san Gado ben o du, èn a ben sabi taki a de wan bigi grani fu du a preikiwroko. A ben taki srefi dati den sani di a ben e si leki prenspari sani fosi, de leki „wan ipi doti”. Paulus gowe libi a Dyu bribi, èn a gebroiki en heri libi na grontapu fu preiki a bun nyunsu.​—Leisi Filipisma 3:4-8, 15; Tori 9:15.

SAN PRENSPARI GI YU?

12. San ben de a moro prenspari sani gi Yesus baka di a teki dopu?

¹² Noa, Moses, Yeremia, Paulus, nanga furu tra anbegiman fu Yehovah gebroiki furu fu den ten nanga krakti gi a diniwroko fu Yehovah. Den de bun eksempre gi wi. A no de fu taki dati Yesus na a moro bun eksempre gi ala den futuboi fu Yehovah (1 Petr. 2:21). Baka di Yesus teki dopu, a gebroiki en heri libi na grontapu fu preiki a bun nyunsu èn fu gi grani na Yehovah. Sobun, a moro prenspari sani gi wan Kresten di e teki na eksempre fu Yesus èn di e si Yehovah leki a Masra fu en, na fu dini Yehovah. Na so a de nanga yu? Fa wi kan du moro gi Yehovah aladi wi abi tra frantwortu tu?​—Leisi Psalm 71:15; 145:2.

13, 14. (a) Sortu deki-ati ala dopu Kresten e kisi? (b) San o gi a pipel fu Gado furu prisiri?

¹³ Na ini den yari di pasa, na organisâsi fu Yehovah gi Kresten deki-ati fu luku efu den man pionier èn fu begi fu a tori disi. A situwâsi fu son futuboi fu Yehovah e meki taki den no man preiki 70 yuru wan mun. Den brada nanga sisa disi di e dini Yehovah nanga den heri ati no musu firi leki den no warti noti (1 Tim. 5:8). Ma fa a de nanga yu? A de so trutru taki yu no man pionier?

¹⁴ Prakseri a prisiri di furu futuboi fu Gado ben abi na a pisi ten fu a Memrefesa fu a yari disi. Na ini a mun maart, wan spesrutu seti ben de taki yepipionier ben kan preiki 30 noso 50 yuru (Ps. 110:3). Milyunmilyun brada nanga sisa du a yepi-pionierwroko. Yu ben kan si bigi prisiri na ini den gemeente. Yu kan seti yu libi na so wan fasi, taki yu kan du a yepipionier wroko moro furu? Te wan dopu Kresten e pionier, dan na a kaba fu ibri dei a e firi koloku, èn a kan taki: „Yehovah, mi du ala san mi man du gi yu.”

15. Sortu bun bosroiti wan yongu Kresten di e go na skoro kan teki?

¹⁵ Kande yu na wan yongu Kresten di de fu kaba skoro, di de gosontu èn di no abi furu frantwortu. Yu prakseri seryusu kaba fu tron gewoon pionier? A kan taki den leriman na skoro feni taki a moro bun sani di yu kan du fu abi wan bun tamara, na fu go na heiskoro noso universiteit. Den sma disi e frutrow tapu libisma organisâsi nanga moni. Ma den sani disi no o tan fu ala ten. Efu yu bosroiti fu du furuten diniwroko gi Yehovah, dan yu o gebroiki yu ten bun èn yu o du wan sani di o meki yu kisi blesi fu ala ten. Yu o teki a heri bun eksempre fu Yesus. Dati na wan koni bosroiti èn yu sa de koloku trutru. A bosroiti di yu teki o de wan kibri gi yu. Yu o sori taki yu no o meki noti tapu yu fu du san yu pramisi Yehovah.​—Mat. 6:19-21; 1 Tim. 6:9-12.

16, 17. Sortu sani di abi fu du nanga a diniwroko fu Yehovah, Kresten musu aksi densrefi?

¹⁶ Furu fu den futuboi fu Gado na ini a ten disi e wroko furu yuru fu sorgu gi na osofamiri fu den. Ma a kan taki sonwan fu den e wroko moro langa leki san de fanowdu (1 Tim. 6:8). Grontapu e du ala san a man fu meki wi bribi taki wi musu bai ibri nyun sani di de, fu di wi no man libi sondro en. Ma tru Kresten no  wani taki Satan nanga a grontapu fu en bosroiti gi den san prenspari (1 Yoh. 2:15-17). Fa a de nanga den wan di de nanga pensyun? A moro bun sani di den kan du, na fu gebroiki den ten fu pionier èn fu poti a diniwroko fu Yehovah na a fosi presi.

¹⁷ Ala futuboi fu Yehovah di gi densrefi abra na en musu aksi densrefi: San na a moro prenspari sani gi mi? Mi e poti a diniwroko fu Yehovah na a fosi presi na ini mi libi? Mi wani gebroiki mi ten nanga mi krakti fu dini Gado neleki fa Yesus ben e du dati? Mi e gi yesi na a rai di Yesus gi fu waka na en baka doronomo? Mi kan seti mi libi na so wan fasi taki mi man du moro na ini a preikiwroko èn taki mi man du tra sani gi Yehovah tu? Kande mi no man du moro now, ma a de so taki mi e gebroiki mi ten nanga mi krakti gi Yehovah so furu leki mi man?

„A WANI NANGA A KRAKTI”

18, 19. San yu kan aksi Gado na ini begi? Fu san ede Yehovah o breiti te yu e aksi en dati?

¹⁸ A moi fu si fa a pipel fu Gado e dini en so fayafaya. Ma kande son sma di man pionier no wani du dati, noso kande den denki taki den no man preiki so bun fu man de wan pionier (Eks. 4:10; Yer. 1:6). San yu kan du efu yu e denki so? Begi Yehovah fu yepi yu. Paulus taigi den Kresten brada nanga sisa fu en taki Yehovah ’e gi wi a wani nanga a krakti fu du den sani san e gi En prisiri’ (Fil. 2:13; Nyun Testamenti). Efu yu no abi a firi fu du moro na ini a diniwroko, dan aksi Yehovah fu gi yu a wani nanga a koni fu du dati.​—2 Petr. 3:9, 11.

¹⁹ Noa, Moses, Yeremia, Paulus nanga Yesus ben e dini Gado fayafaya. Den gebroiki den ten nanga krakti fu preiki den krutuboskopu fu Yehovah. Den no ben meki tra sani puru den prakseri na a wroko fu den. A kaba fu a grontapu disi de krosibei. Fu dati ede, wi alamala di gi wisrefi abra na Gado, musu de seiker taki wi e du ala san wi man fu dini Yehovah neleki den man disi di Bijbel e taki fu den èn di de heri bun eksempre gi wi (Mat. 24:42; 2 Tim. 2:15). Te wi e du disi, dan wi o plisi Yehovah èn wi o kisi furu blesi fu en.​—Leisi Maleaki 3:10.

[Futuwortu]

[Aksi fu a tori disi]

[Prenki na tapu bladzijde 21]

Sma no ben e poti prakseri na a warskow fu Noa

[Prenki na tapu bladzijde 24]

Yu prakseri seryusu kaba fu tron gewoon pionier?