DI DEN brada meki Pisi 1 fu den Millennial Dawn-buku na a Bible House na ini a foto Allegheny, na Pennsylvania, Amerkankondre, den seni wán hondro fu den go na Chicago, Illinois, na ini 1886. Charles Taze Russell ben wani taki den buku disi ben musu seri na ini den bukuwenkri drape. Wan fu den moro bigi organisâsi di ben e seri kerkibuku na ini Amerkankondre ben agri fu seri den Millennial Dawn-buku. Ma baka tu wiki den seni ala den buku go baka na a Bible House.

Soleki fa a sori, dan wan barinen kerki fesiman ati bron di a si taki den ben e seri den Millennial Dawn-buku makandra nanga den buku fu en. Nanga atibron a taki dati efu na organisâsi disi no ben puru den Millennial Dawn-buku na ini den wenkri fu den, dan en nanga den tra kerkiman ben o teki den buku fu den baka èn den no ben o du bisnis nanga na organisâsi disi moro. Dati meki den sma fu na organisâsi seni den Millennial Dawn-buku kon baka, aladi den no ben wani du dati trutru. Den brada ben poti wan nyunsu na koranti tu taki den buku disi ben de fu kisi. Ma bakaten gensman meki taki den sma fu a koranti no poti a nyunsu disi na koranti moro. We, dan fa den sma di ben wani sabi sani fu a tru bribi ben o kisi a nyun buku disi?

Den bosroiti fu gebroiki kolporteur noso furuten preikiman fu du a wroko disi. * Na ini 1881, den brada skrifi na ini a tijdschrift Zion’s Watch Tower taki den e suku 1000 preikiman di ben wani teki en leki wroko fu prati buku di e taki fu Bijbel. Soso wan tu hondro furuten preikiman noso kolporteur ben de, ma toku den ben man prati den buku disi na ala sei. Na ini 1897, pikinmoro wán milyun fu den Millennial Dawn-buku ben prati na ala sei èn moro furu na den kolporteur ben du dati. Den kolporteur ben e seti sani gi sma, so taki den ben kan kisi a tijdschrift The Watch Tower doronomo. Ibri leisi te den ben du disi noso te den ben prati wan buku, den ben e kisi wan pikinso moni di den ben e gebroiki na ini na aladei libi.

Suma ben de den deki-ati sma disi di den ben e kari kolporteur? Sonwan fu den ben de yongu sma èn trawan ben de moro owru. Furu fu den no ben trow. Trawan ben trow, ma den no ben abi pikin. Furu tron na heriheri famiri srefi ben e du a wroko disi. Yu ben abi gewoon-kolporteur di ben e wroko langa ibri dei èn yepi-kolporteur di ben e wroko wán noso tu yuru ibri dei. A no ala sma ben man du a wroko disi fu di den ben abi tra frantwortu noso fu di den ben siki. Ma na wan kongres na ini 1906, den brada taigi ala sma di ben man du a wroko disi taki den no abi fu ’de sma di kisi furu skoroleri, sma di man du kefalek sani, noso sma di abi a mofo fu wan engel’.

Pikinmoro na ala sei fu grontapu ala sortu Kotoigi bigin du a spesrutu wroko disi. Wan brada taki dati a e  denki taki a prati sowan 15.000 buku na ini seibi yari. Ma toku a taki: „Mi no bigin du a kolporteur-wroko fu di mi ben wani seri buku. Mi bigin du en fu di mi ben wani fruteri sma fu Yehovah èn fu den tru tori fu en.” Na ala sei pe den kolporteur ben e go, den ben e panya a bun nyunsu èn na so yu ben kisi moro nanga moro grupu fu Bijbel Ondrosukuman.

Den kerki fesiman ben wisiwasi den kolporteur taki den e waka e seri buku nomo. Na ini 1892, The Watch Tower taki: „A no furu sma sabi [den kolporteur] leki trutru bakaman fu Masra èn furu sma no e frustan taki Masra e warderi den fu di den e sori sakafasi èn fu di den no e denki densrefi nomo.” Iya, wan fu den ben taki srefi dati a libi fu den no ben makriki. Den moro prenspari sani fu den ben de bun steifi susu nanga baisigri. Te den no ben abi moni, dan den ben e gi sma buku fu kisi nyanyan. Ibri dei baka a preikiwroko, den kolporteur ben weri, ma den ben breiti tu. Den ben gwenti tan na ini tenti noso na ini kamra di den ben e yuru. Bakaten den ben abi Kolporteur-wagi. Den wagi disi ben de leki oso pe den ben kan tan na ini. Na so den no ben abi fu pai yuru-oso èn den ben kan du moro na ini wan syatu pisi ten. *

Na a kongres di ben hori na Chicago na ini 1893, den bigin gi lezing spesrutu gi den kolporteur. Na ini den lezing disi den ben e fruteri fu den ondrofenitori fu den, den ben sori fa den ben kan preiki moro bun èn den gi den rai di den ben kan gebroiki na ini den libi. Wan leisi Brada Russell taigi den preikiman disi di ben e wroko bun tranga, fu nyan bun na mamanten, fu dringi wan grasi merki moro lati na mamanten èn efu a ben faya, dan den ben kan nyan wan ice-cream soda tu.

Den kolporteur di ben e suku wan patna gi a preikiwroko ben e weri wan geri lenti na den krosi. Den nyun kolporteur ben e kisi patna di ben abi moro ondrofeni. Disi ben de wan bun sani, fu di wan leisi wan nyun kolporteur ben senwe so te, taki di a ben musu gi wan uma wan buku, a taki: „Mi sabi taki yu no wani den buku disi.” Koloku na ososma ben wani den buku èn bakaten a tron wan sisa.

Wan brada prakseri: ’Mi abi wan wroko di e pai furu moni èn mi man gi na organisâsi 1000 Amerkan dala ibri yari. Mi e aksi misrefi efu mi musu hori a wroko disi noso efu mi musu tron wan kolporteur.’ Den brada taigi en taki Masra feni ala tu sani bun, ma efu a ben o tron wan kolporteur èn gebroiki en ten gi Masra, dan a ben o kisi bigi blesi. Mary Hinds taki dati a kolporteur-wroko na „a moro bun fasi fu du a moro bun sani gi moro furu sma”. Alberta Crosby, wan sisa di ben e syensyen, taki: „Ibri dei mi e kon lobi a kolporteur-wroko moro nanga moro.”

Na ini a ten disi, furu pikin nanga bakapikin fu den kolporteur èn sma di den kolporteur yepi fu teki a tru bribi, na anbegiman fu Yehovah te now ete. A tru bribi de leki wan bigi gudu di den kolporteur libi na baka gi den. Efu nowan famiri fu yu ben de wan kolporteur noso wan pionier, a ben o moi efu yu bigin nanga a wroko disi. Na so yu srefi o man libi wan bigi gudu gi den wan di e kon baka yu. Yu srefi o si taki ibri dei yu o lobi a furuten diniwroko moro nanga moro.

[Futuwortu]

[Prenspari pisi na tapu bladzijde 32]

Den no abi fu ’de sma di kisi furu skoroleri, sma di man du kefalek sani, noso sma di abi a mofo fu wan engel’

[Prenki na tapu bladzijde 31]

Kolporteur A. W. Osei na ini Gana, na a pisi ten fu 1930

[Prenki na tapu bladzijde 32]

Na tapusei: Den kolporteur Edith Keen nanga Gertrude Morris na ini Ingrisikondre, na a pisi ten fu 1918; na ondrosei: Stanley Cossaboom nanga Henry Nonkes na ini Amerkankondre, nanga den leigi dosu pe den ben poti den buku di den ben prati