No ’luku go na den sani di de na yu baka’

„Efu wan sma e bigin plugu a gron èn a e luku go na den sani di de na en baka, dan a sma dati no fiti gi a Kownukondre fu Gado.”​—LUK. 9:62.

SAN YU BEN SA PIKI?

Fu san ede wi musu „memre a wefi fu Lot”?

Sortu dri sani wi no musu tan prakseri?

Fa wi kan tan go na fesi makandra nanga na organisâsi fu Yehovah?

1. Sortu warskow Yesus gi èn sortu aksi musu kisi piki?

„MEMRE a wefi fu Lot” (Luk. 17:32). A warskow disi de moro prenspari na ini a ten disi, leki di Yesus Krestes gi en pikinmoro 2000 yari pasa. Ma san Yesus ben wani taki nanga a seryusu warskow disi? Den Dyu di a ben taigi a sani disi ben sabi heri bun san a warskow disi ben wani taki. Den ben sabi san pasa nanga a wefi fu Lot. Di a ben e lon gowe libi Sodom makandra nanga en osofamiri, a trangayesi Gado èn a drai luku go na en baka. Dati meki a tron wan pilari fu sowtu.​—Leisi Genesis 19:17, 26.

2. San ben kan meki taki a wefi fu Lot drai luku go na baka, èn san pasa nanga en di a trangayesi Gado?

² Ma fu san ede a wefi fu Lot luku go na baka? Kande a ben wani sabi san ben e pasa na en baka. Noso kande en bribi ben swaki èn a no ben man bribi taki a foto ben e kisi pori trutru. A kan tu taki a ben wani go baka na den sani di a ben libi na ini Sodom (Luk. 17:31). Wi no sabi fu san ede a drai luku go na baka, ma di a drai a trangayesi Gado èn a dede. Denki a tori! A dede a srefi dei di den ogri sma fu Sodom nanga Gomora dede. Dati meki Yesus taki: „Memre a wefi fu Lot”!

3. Fa Yesus sori o prenspari a de taki wi no luku go na baka?

³ Wi srefi e libi na ini wan ten pe wi no musu luku go na baka. Sobun, wi no musu tan prakseri den sani di wi libi na baka. Yesus ben sori o prenspari disi de di a piki wan man di ben wani go taki en famiri odi, fosi a tron wan disipel fu en. Yesus taigi en: „Efu wan sma e bigin plugu a gron èn a e luku go na den sani di de na en baka, dan a sma dati no fiti gi a Kownukondre fu Gado” (Luk. 9:62). Son sma e denki kande taki Yesus no ben abi fu taki so seryusu nanga a man. Ma Yesus ben sabi taki a  man ben suku wan fasi fu no teki a frantwortu fu tron wan disipel fu en. A ben taki dati wan sma di no wani du den sani di a musu du gi Gado, e „luku go na den sani di de na en baka”. Son leisi a kan taki wan sma e drai luku go na baka aladi a e plugu, noso a kan taki a poti a plugu na gron fu drai luku go na baka. Ma efu a du wan fu den sani disi, a o puru en prakseri na san a musu du èn a no o man du en wroko bun.

4. Na sortu sani wi musu poti ala wi prakseri?

⁴ Na presi fu prakseri den sani di de na wi baka, wi musu poti ala wi prakseri na san de na wi fesi. Luku fa Odo 4:25 e tyari disi kon na krin: „Den ai fu yu musu luku go na fesi langalanga. Yu eigi brenki ai musu luku go na fesi nomo.”

5. Fu san ede wi no musu luku den sani di de na wi baka?

⁵ A prenspari fu no luku den sani di de na wi baka. Fu san ede? Wi e libi na ini „den lasti dei” (2 Tim. 3:1). Na ini a ten disi a no tu foto nomo o kisi pori, ma heri grontapu. San o yepi wi fu no luku go na baka, neleki a wefi fu Lot? Wi musu sabi fosi san na den sani di wi libi na baka (2 Kor. 2:11). Sobun, meki wi luku son sani di wi ben sa wani drai luku baka èn meki wi luku san wi kan du fu no poti prakseri na den sani dati.

NO DENKI TAKI YU LIBI FU FOSI BEN MORO BUN

6. Fu san ede wi no musu denki ala ten taki den sani fu fosi de soifri soleki fa wi memre den?

⁶ Son leisi wi kan abi a denki taki a libi di wi ben abi fosi, ben moro bun. Ma a denki disi no bun, fu di wi frustan kan kori wi son leisi èn wi kan memre sani tra fasi leki fa den ben de trutru. Sondro fu sabi, wi kan bigin denki taki den problema di wi ben abi fosi, no ben de so bigi èn a kan gersi leki wi ben abi moro prisiri na a ten dati. Na so wi kan kisi a denki taki sani ben de moro bun na a ten dati. Efu wi abi a fowtu denki disi, a kan taki wi sa wani libi baka leki fa wi ben e libi fosi. Ma Bijbel e warskow wi: „No taki: ’Fosi, sani ben betre moro now’, bika a no wan koni sani fu taki so” (Preik. 7:10). Fu san ede wi musu luku bun nanga a denki disi?

7-9. (a) San ben pasa nanga den Israelsma na ini Egepte? (b) Sortu sani ben meki den Israelsma de nanga bigi prisiri? (c) Fu sortu sani den Israelsma bigin krutukrutu?

⁷ Luku san pasa nanga den Israelsma na ini a ten fu Moses. Di den go tan na Egepte, den Egeptesma gi den wan switikon. Ma baka di Yosef dede, den Egeptesma „poti basya gi den Israelsma fu kwinsi den. Den ben musu wroko bun tranga” (Eks. 1:11). Sani ben kon moro ogri di a kownu fu Egepte gi a komando bakaten fu kiri ala den beibi di ben de boi, fu di a no ben wani taki den Israelsma ben kon moro furu (Eks. 1:15, 16, 22). Dati meki Yehovah taigi Moses: „Mi si fa mi pipel e pina na ini Egepte, èn mi yere fa den e bari e suku yepi, fu di sma e dwengi den fu wroko. Iya, mi sabi heri bun fa den e pina.”​—Eks. 3:7.

⁸ Yu kan frustan taki den Israelsma ben de nanga bigi prisiri di den ben kan waka gowe libi Egepte leki wan pipel di fri. Den ben si den bigi wondru di Yehovah du èn fa a gebroiki en bigi krakti fu tyari den Tin Rampu  kon gi a heimemre kownu fu Egepte nanga a pipel fu en. (Leisi Eksodes 6:1, 6, 7.) Te fu kaba den Egeptesma no taki nomo dati den Israelsma fri, ma den begi den srefi fu gowe libi a kondre. Den gi den Israelsma so furu gowtu nanga solfru taki den no ben abi noti moro (Eks. 12:33-36). Den Israelsma ben de nanga bigi prisiri tu di den si fa a kownu fu Egepte nanga a legre fu en dede na ini a Redi Se (Eks. 14:30, 31). Disi ben musu fu tranga a bribi fu den wan di si ala den sani disi nanga den eigi ai!

⁹ Aladi den Israelsma ben kisi frulusu na so wan wondru fasi, toku a no teki langa fosi a srefi pipel disi bigin krutukrutu. Fu san den ben e krutukrutu? Nyanyan! Den no ben lobi a nyanyan di Yehovah ben e gi den èn den bigin taki: „Wi sabi ete fa wi ben e nyan furu fisi na ini Egepte fu di a ben bunkopu so. Wi ben e nyan komkomro, watramun, ayun, nanga knofroku! Ma now wi e mangri e gowe. Na soso mana wi e si” (Num. 11:5, 6). Iya, den ben frigiti fa sani ben de trutru. A fowtu denki fu den ben meki taki den ben wani drai go baka na Egepte srefi, pe den ben de srafu! (Num. 14:2-4) Fu di den Israelsma luku go na den sani di ben de na den baka, meki Yehovah ati bron nanga den.​—Num. 11:10.

10. San wi kan leri fu den sani di pasa nanga den Israelsma?

¹⁰ San wi na ini a ten disi kan leri fu a tori disi? Te wi abi problema, dan wi musu luku bun taki wi no kisi a denki taki sani ben de moro bun fosi, noso taki wi libi ben de moro bun na a ten di wi no ben sabi a tru bribi ete. A no fowtu fu prakseri san wi leri fu den sani di wi ondrofeni na ini a libi, èn a no fowtu fu prakseri den prisiri ten di wi ben abi. Ma wi musu si a libi di wi ben e libi fosi, leki fa a ben de trutru. Efu wi no du dati, dan a fasi fa wi e libi now o gersi wan hebi trutru. Te disi pasa, dan wi o wani libi baka leki fa wi ben e libi fosi.​—Leisi 2 Petrus 2:20-22.

DEN SANI DI WI LIBI NA BAKA

11. Fa son sma e denki fu den sani di den libi na baka?

¹¹ A de wan sari sani taki son sma e prakseri fu sani di den libi na baka èn a e hati den taki den no du den sani dati. Kande yu ben kan go na wan moro hei skoro, kande yu ben kan kisi biginen, noso kande yu ben kan meki furu moni, ma yu bosroiti fu no du dati. Furu brada nanga sisa ben e meki furu moni fu di den ben abi wan bun bisnis, den ben de pôpi singiman, den ben de professor na hei skoro, noso sportman di abi biginen. Ma den bosroiti fu libi den sani disi. Now wan heri pisi ten pasa èn a kaba no kon ete. A de so taki yu e prakseri now o bun yu libi ben kan de efu yu no ben libi den sani disi na baka?

12. Fa Paulus ben e si den sani di a libi na baka?

¹² Na apostel Paulus libi furu sani na baka fu tron wan bakaman fu Krestes (Fil. 3:4-6). Fa a ben si den sani disi di a ben libi na baka? A taki: „Fu Krestes ede, meki mi kon si den sani di ben e tyari wini kon gi mi, leki soso sani.” Fu san ede a taki disi? A taki: „Iya, fu dati ede mi kan taki dati mi e si ala sani leki soso sani trutru, fu di den sani di mi kon sabi fu Krestes Yesus, mi Masra, warti moro ala sani. Fu en ede mi drai baka gi ala den sani  dati. Mi kon si den leki wan ipi doti, so taki Krestes kan feni mi bun” (Fil. 3:7, 8). * Te wan sma trowe doti, a no e hati en bakaten taki a trowe en. Na so a no ben hati Paulus taki a libi son grontapu sani na baka èn taki a no du son sani. A no ben e si den moro leki prenspari sani.

13, 14. Fa wi kan du san Paulus du?

¹³ San kan yepi wi efu wi bigin prakseri den sani di wi libi na baka noso den sani di wi ben kan du? Du san Paulus du. Luku sortu bun yu abi na ini yu libi now. Yu tron wan mati fu Yehovah èn a sabi yu leki wan sma di e tai hori na en (Hebr. 6:10). Grontapu no kan gi wi nowan sani di warti leki den blesi di Yehovah e gi wi now èn di a o gi wi na ini a ten di e kon.​—Leisi Markus 10:28-30.

¹⁴ Baka di Paulus taki fu den sani di a libi na baka, a taki fu wan sani di kan yepi wi fu tan dini Gado ala ten. A taki dati a ben ’frigiti den sani di de na en baka èn a ben e langa en anu fu grabu den sani di de na en fesi’ (Fil. 3:13). Luku taki Paulus e taki fu tu prenspari sani di wi musu du. A fosi sani, na taki wi musu frigiti den sani di wi libi na baka. Wi no musu lasi wi ten nanga krakti fu prakseri den sani dati doronomo. A di fu tu sani, na taki wi musu de leki wan lonman di de fu kaba wan streilon èn di e du ala muiti fu wini. Na so wi musu poti ala wi prakseri na den sani di de na wi fesi.

15. Fu san ede a bun fu prakseri a libi fu den sma di tan dini Gado ala ten?

¹⁵ Prakseri den sma fu owruten èn den sma fu disiten di tan dini Gado ala ten. A fasi fa den ben e libi o gi yu deki-ati fu tan go na fesi na presi fu luku den sani di de na yu baka. Fu eksempre, efu Abraham nanga Sara ben tan prakseri Ur, „den ben o abi na okasi fu drai go baka” (Hebr. 11:13-15). Ma den no drai go baka na Ur. Di Moses gowe libi Egepte a fosi leisi, a ben libi moro sani na baka leki san den Israelsma ben libi na baka di den gowe libi Egepte. Ma Bijbel no e taki dati a ben wani den sani dati baka. Na presi fu dati, Bijbel e taigi wi taki „a ben si a syen di en leki a Salfuwan ben kisi, leki wan gudu di bigi moro den gudu fu Egepte. A ben poti ala en prakseri na a pai di a ben o kisi.”​—Hebr. 11:26.

PROBLEMA DI MITI WI NA INI A TEN DI PASA

16. Fa den sani di wi ondrofeni na ini a ten di pasa kan abi krakti na wi tapu?

¹⁶ Son sani di pasa nanga wi na ini a ten di pasa kan hati wi trutru. Kande wi ben du sondu noso tra sani di no bun èn wi e prakseri den sani dati ala ten (Ps. 51:3). Kande wi ati e bron ete noso wi e firi sari ete fu di wan sma ben gi wi rai noso piri-ai (Hebr. 12:11). Te sani no pasa nanga reti noso te wi denki taki sani no pasa nanga reti, dan disi kan trobi wi te wi tan prakseri en ala ten (Ps. 55:2). Den sani disi kan meki taki wi go luku den sani di wi libi na baka. San wi kan du fu no prakseri den sani disi doronomo? Meki wi luku dri eksempre di kan yepi wi.

17. (a) Fu san ede Paulus taki dati en na „a moro pikinwan fu ala den santawan”? (b) San yepi Paulus fu no tan prakseri den ogri di a du?

 ¹⁷ Fowtu di yu meki. Na apostel Paulus ben taki dati en na „a moro pikinwan fu ala den santawan” (Ef. 3:8). Fu san ede a ben e si ensrefi na a fasi disi? A taki: „Bika mi ben frufolgu a gemeente fu Gado” (1 Kor. 15:9). Prakseri nomo fa Paulus ben sa firi di a miti son sma di a ben e frufolgu fosi. Ma a no tan prakseri den ogri di a du. Na presi fu dati Paulus tan prakseri fa Gado sori en sari-ati nanga bun-ati (1 Tim. 1:12-16). Dati meki a ben de nanga tangi trutru èn a ben man go doro nanga a diniwroko fu en. Den ogri di Paulus ben du fosi, ben de wan tu fu den sani di a ben wani frigiti nomonomo. Wi no kan kenki den fowtu di wi meki na ini a ten di pasa. Sobun, na fu soso wi ben o tan prakseri den sani dati, èn wi no o abi krakti fu du tra sani. Na presi fu du disi wi musu hori na prakseri taki Yehovah sori wi sari-ati èn wi musu gebroiki wi krakti fu dini en now.

18. (a) San kan pasa efu wi tan prakseri wan rai noso piri-ai di hati wi? (b) Fa wi kan du san Salomo taki te wi e kisi rai?

¹⁸ Rai noso piri-ai di hati yu. Kande wi kisi wan rai noso piri-ai di hati wi, èn te now ete wi no man frigiti en. Efu wi tan nanga a prakseri disi, dan a kan meki wi „lasi-ati” (Hebr. 12:5). Son sma no lobi fu teki rai kwetikweti. Trawan e teki rai, ma bakaten den e „lasi-ati” èn den e tapu fu du san den musu du. Den tu grupu sma disi e kisi a srefi bakapisi. Den no e meki a rai yepi den fu tron moro bun sma. Dati meki a ben o moro bun fu du san Salomo taki: „Teki a piri-ai di yu kisi, grabu en hori steifi. No lusu en. Kibri en bun, bika na dati o gi yu libi” (Odo 4:13). Wan sma di e rèi na strati e luku den bord, a e du san den e taki, èn a e rèi go doro. Na so a musu de te wi e kisi rai. Wi musu gi yesi na a rai di wi e kisi, èn wi musu go doro nanga wi libi.​—Odo 4:26, 27; leisi Hebrewsma 12:12, 13.

19. Fa wi kan abi bribi neleki Habakuk nanga Yeremia?

¹⁹ Te sani no pasa nanga reti noso te yu e denki taki sani no pasa nanga reti. Son leisi wi kan firi leki a profeiti Habakuk di ben bari kari Yehovah meki a koti krutu. A no ben frustan fu san ede Yehovah gi pasi taki son ogri miti sma aladi den no du nowan ogri (Hab. 1:2, 3). A prenspari srefisrefi fu abi bribi leki Habakuk di taki: „Toku mi o de nanga bigi prisiri fu Yehovah ede. Mi o prisiri nanga a Gado di o frulusu mi” (Hab. 3:18). Wan tra moi eksempre gi wi, na Yeremia fu owruten. A ben tan „wakti” Yehovah, fu di a ben sabi taki Yehovah na wan Gado fu retidu. Wi kan de seiker tu taki Yehovah o seti ala sani kon bun baka na a reti ten.​—Sari 3:19-24.

20. Fa wi kan sori taki wi e „memre a wefi fu Lot”?

²⁰ Wi e libi na ini wan span ten. Ala sortu moi sani e pasa now èn moi sani de fu pasa ete. Yehovah en organisâsi e go na fesi èn wi musu go na fesi tu. Meki wi tan hori a Bijbel rai na prakseri fu tan luku go na fesi èn fu no luku go na den sani di de na wi baka. Na so wi o sori taki wi e „memre a wefi fu Lot”!

[Futuwortu]

[Aksi fu a tori disi]