Leri fu a fasi fa Yesus tan na ai

„Un tan na ai èn begi doronomo.”​—MAT. 26:41.

SAN YU BEN O PIKI?

Fa begi e sori taki wi de na ai?

Fa wi kan sori taki wi de na ai na ini a preikiwroko?

Fu san ede a prenspari taki wi tan na ai te wi e kisi tesi, èn fa wi kan du dati?

1, 2. (a) Sortu aksi wi kan abi fu a fasi fa Yesus tan na ai? (b) Wan sondu libisma kan leri fu wan sma di no abi sondu? Gi wan eksempre.

KANDE yu e prakseri: ’Wan sma kan tan na ai trutru neleki Yesus? Yesus no ben abi nowan sondu! Boiti dati, Yesus ben kan si son tron san ben o pasa na ini a ten di e kon. A ben sabi srefi san ben o pasa dusundusun yari baka a ten fu en! Sobun, a ben de fanowdu trutru taki a tan na ai?’ (Mat. 24:37-39; Hebr. 4:15) Meki wi luku den aksi disi fosi, so taki wi kan si san disi abi fu du nanga wi èn fu san ede a prenspari gi wi.

² Wan sondu libisma kan leri fu wan sma di no abi sondu? Iya, bika wan sma kan leri sani fu wan bun leriman èn a kan luku san a leriman e du. Fu eksempre, prakseri wan man di o go leri fa fu sutu bo. A no man sutu a peiri go na a marki pe a musu go, ma a e tan teki leri èn a e tan pruberi. Fu leri sutu moro bun, a e luku san en leriman di sabi sutu bo heri bun, e du. A e luku fa en leriman e tanapu, fa a e poti en anu, èn fa a e gebroiki en finga fu hari a bo. Safrisafri a man e leri o tranga a musu hari a titei fu a bo, a e leri taki a musu luku fa a winti e wai, èn na so a e meki muiti fu go na fesi. Fu di a e luku san a leriman e du, meki te fu kaba a man sutu den peiri moro krosibei fu a marki. Na so a de tu taki te wi wani go na fesi leki Kresten, dan wi musu du san Yesus taki èn wi musu du san a ben e du.

3. (a) Fa Yesus sori taki a ben prenspari gi en fu tan na ai? (b) San wi o luku na ini na artikel disi?

³ Ma Yesus ben musu tan na ai tu. A ben de fanowdu trutru fu du disi? Iya, a ben prenspari gi en fu tan na ai. Fu eksempre, na a lasti neti di Yesus ben de na grontapu, a taigi den apostel di tan nanga en ala ten: „Tan na ai nanga mi.” A ben taki tu: „Un tan na ai èn begi doronomo, so taki unu no sondu te unu kisi tesi” (Mat.  26:38, 41). Ala ten a ben sori taki a ben de na ai, ma na den muilek lasti yuru dati Yesus ben wani de moro na ai èn a ben wani de moro krosibei fu en hemel Tata. A ben sabi taki den bakaman fu en ben musu tan na ai tu neleki en. A no na a ten dati nomo den ben musu tan na ai, ma den ben musu dati tu na ini a ten di ben o kon. Sobun, meki wi luku fu san ede Yesus wani wi fu tan na ai. Baka dati, wi o luku dri fasi fa wi kan tan na ai neleki Yesus na ini wi aladei libi.

FU SAN EDE YESUS WANI WI FU TAN NA AI

4. Sortu sani di wi no sabi, musu meki taki wi tan na ai?

⁴ Fu taki en syatu, Yesus wani wi fu tan na ai, fu di wi sabi son sani èn fu di wi no sabi son sani. Di Yesus ben de wan libisma na grontapu, yu denki taki a ben sabi ala sani di ben o pasa na ini a ten di e kon? Nôno, bika nanga sakafasi ensrefi ben taki: „Nowan sma sabi a dei nanga a yuru dati. Iya, srefi den engel fu hemel nanga a Manpikin no sabi, ma soso a Tata sabi” (Mat. 24:36). Na a ten dati, „a Manpikin” Yesus no ben sabi soifri o ten na ogri grontapu disi ben o kon na wan kaba. Fa a de nanga wi na ini a ten disi? Yu denki taki wi sabi ala sani di o pasa na ini a ten di e kon? Kwetikweti! Wi no sabi o ten Yehovah o seni en Manpikin fu tyari wan kaba kon na a ogri grontapu disi. Efu wi ben sabi disi, yu denki taki wi ben o abi fu tan na ai? Yesus ben taki dati a kaba fu grontapu o kon wantronso, sondro taki sma ben o fruwakti dati. Sobun, wi abi fu tan na ai moro leki iniwan ten bifo.​—Leisi Mateyus 24:43.

5, 6. (a) Sortu sani di wi sabi musu meki taki wi tan na ai? (b) Fu sani ede den sani di wi sabi fu Satan musu meki taki wi du moro muiti fu tan na ai?

⁵ Ma toku Yesus ben sabi furu tra moi sani di ben o pasa na ini a ten di e kon, sani di furu sma di ben de nanga en no ben sabi srefisrefi. Wi no sabi so furu leki Yesus, ma tangi fu en meki wi kon sabi furu fu Gado Kownukondre èn san a o du na ini a ten di e kon. Te wi e luku na wi lontu, awinsi wi de na skoro, na wrokope, noso na ini a kontren pe wi e preiki, dan wi e si krin taki furu sma de na ini dungru, fu di den no sabi den moi tru tori disi. We, disi na wan tra sani di e meki taki wi musu tan na ai. Neleki Yesus wi musu de na ai ala ten fu si iniwan okasi di wi ben o kisi fu fruteri sma san wi sabi fu Gado Kownukondre. Ibriwan fu den okasi disi de prenspari trutru èn wi no wani meki den pasa sondro fu du wan sani. Sma kan lasi den libi!​—1 Tim. 4:16.

⁶ Yesus ben sabi wan tra sani di ben meki taki a tan na ai. A ben sabi taki Satan ben de nomonomo fu tesi en, fu frufolgu en èn fu meki a trangayesi Gado. Na ogri-ati feanti dati ben de na ai doronomo fu feni „wan moro bun ten” fu tesi Yesus (Luk. 4:13). Ma noiti Yesus lasi ensrefi. A ben wani de srekasreka fu kakafutu gi iniwan tesi, awinsi sortu problema, gens, noso frufolgu a ben o kisi. Wi de na ini wan srefi sortu situwâsi leki Yesus. Wi sabi taki te now ete Satan de „leki wan lew di e bari, fu di a e suku fu swari wan sma”. Dati meki Gado Wortu e gi ala Kresten a deki-ati disi: „Tan nanga krin frustan. De na ai” (1 Petr. 5:8). Ma fa wi kan du disi?

FA BEGI KAN YEPI WI FU TAN NA AI

7, 8. Sortu rai di abi fu du nanga begi, Yesus gi wi? Fa Yesus de wan eksempre gi wi na ini a tori disi?

⁷ Bijbel e sori taki a de tumusi prenspari fu begi efu wi wani tan na ai (Kol. 4:2; 1 Petr. 4:7). Syatu baka di Yesus taigi den bakaman fu en fu tan na ai nanga en, a taki: „Un tan na ai èn begi doronomo, so taki unu no sondu te unu kisi tesi” (Mat. 26:41). Ma na soso na a muilek ten dati den ben musu begi doronomo èn tan na ai? Nôno, disi na sani di wi musu du ibri dei.

⁸ Yesus ben de wan heri bun eksempre  fu wan sma di ben e begi doronomo. Kande yu e memre taki wan leisi a begi heri neti fu taki nanga en Papa. Pruberi fu si na yu fesi fa a ben de na neti dati. (Leisi Lukas 6:12, 13.) Soleki fa a sori, dan Yesus ben de krosibei fu a fisiman dorpu Kaperna-um pe a ben gwenti tan te a ben e preiki na ini a kontren dati. Na a ten di son ben e dongo, Yesus kren go na tapu wan fu den bergi pe yu ben man si a Se fu Galilea. Kande a ben e luku fa a presi e bigin dungru safrisafri èn a si fa den sma e bigin leti den lampu na ini Kaperna-um èn na ini den tra dorpu na ini a birti. Ma te Yesus bigin taki nanga Yehovah, a e poti ala prakseri na a begi fu en. Safrisafri den miniti e pasa èn srefi omeni yuru e pasa. Kande a no e si srefi fa wan-fru-wan den sma e kiri den lampu fu den fu go sribi èn fa munkenki e waka safrisafri na hemel. Kande a no e poti prakseri srefi na a babari fu den meti di e waka na neti. Soleki fa a sori, a e taki nanga Yehovah fu a prenspari bosroiti di a musu teki. A musu suku 12 sma fu tron en apostel. Prakseri nomo fa Yesus e fruteri en Papa finifini san a e denki èn sortu broko-ede a abi te a e prakseri ibriwan fu den disipel. Wi kan frustan taki a e begi en Papa fayafaya fu tiri en èn fu gi en koni.

9. San wi kan leri fu a begi di Yesus begi heri neti?

⁹ San wi kan leri fu na eksempre fu Yesus? A de so taki wi musu begi omeni yuru langa? Nôno, bika na wan switi fasi, ensrefi ben taki fu den bakaman fu en: „A tru taki na ati wani, ma a skin swaki” (Mat. 26:41). Toku sani de di wi kan leri fu a fasi fa Yesus ben e begi. Fu eksempre, wi kan leri taki a bun fu suku rai na wi hemel Tata fosi wi teki iniwan bosroiti di o abi krakti tapu a fasi fa wi, wi osofamiri, noso wi Kresten brada nanga sisa e dini Yehovah. Wi e begi gi den Kresten brada nanga sisa fu wi fu di wi e broko wi ede nanga den? Wi e begi nanga wi heri ati, na presi fu taki den srefi sani ibri tron baka? Luku sosrefi taki a ben prenspari gi Yesus fu de en wawan, so taki a ben kan fruteri en Papa ala san de na tapu en ati. Na ini a grontapu fu disiten, so furu sani de fu du èn ala sani e go so esi, taki wi kan frigiti makriki sortu sani musu de den moro prenspari sani na ini wi libi. Efu wi e teki ten fu de wi wawan, so taki wi kan fruteri wi Tata ala san de na tapu wi ati, dan dati o yepi wi fu de na ai moro (Mat. 6:6, 7). Na so wi o kon moro krosibei na Yehovah, wi o wani tron moro bun mati fu en, èn wi o wai pasi gi iniwan sani di kan pori a matifasi di wi abi nanga en.​—Ps. 25:14.

FA WI MUSU DE NA AI NA INI A PREIKIWROKO

10. Sortu tori e sori wi taki ala ten Yesus ben de na ai fu si okasi fu preiki a bun nyunsu?

¹⁰ Yesus ben de na ai tu na ini a wroko di Yehovah ben gi en fu du. Na son wroko, nowan ogri o pasa te wan wrokoman no e poti ala en prakseri na san a e du. Ma na furu wroko, a wrokoman musu poti ala prakseri na san a e du èn na so a de tu nanga a preikiwroko di Kresten musu du. Yesus ben poti ala prakseri na a wroko fu en, fu di a ben suku iniwan okasi fu prati a bun nyunsu. Fu eksempre, wan leisi en nanga den disipel fu en waka heri mamanten, dan den doro na a foto Sikar èn den disipel gowe fu bai nyanyan. Yesus ben tan na a peti fu a foto fu di a ben wani rostu pikinso. Ma fu di a ben de na ai, a si wan okasi fu preiki gi wan Samaria uma di kon fu teki watra na a peti. Yesus ben kan prakseri fu sribi pikinso. A ben kan prakseri tra sani tu fu san ede a no ben abi fu taki nanga na uma. Ma na presi fu dati, a bigin taki nanga na uma. A ben man preiki so bun gi en, taki bakaten furu sma fu a foto bigin bribi na ini Yesus (Yoh. 4:4-26, 39-42). Wi kan du moro fu de leki Yesus na ini a tori disi? Kande wi kan de na ai fu si moro okasi fu preiki a bun nyunsu gi sma di wi e miti na ini wi aladei libi.

11, 12. (a) San Yesus ben e du te sma ben wani taki a du sani di ben o puru en prakseri fu a wroko fu en? (b) Fa Yesus sori taki a ben abi ten gi tra sma nanga tra sani tu, aladi en wroko ben de a moro prenspari sani gi en?

 ¹¹ Son leisi sma di ben lobi Yesus ben wani taki a du son sani, ma disi ben o puru en prakseri na a wroko fu en. Wan leisi di Yesus ben de na Kaperna-um a dresi furu siki sma na wan wondru fasi. A sani disi ben naki na ati fu den sma drape trutru èn wi kan frustan taki den no ben wani taki Yesus gowe. Ma a wroko fu Yesus ben de fu preiki gi ala „den lasi skapu fu a pipel fu Israel” (Mat. 15:24). A no ben musu preiki gi den lasi skapu na ini wán foto nomo. Dati meki a taigi den: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:40-44). A de krin taki a moro prenspari sani na ini Yesus libi, ben de a preikiwroko fu en. A no ben gi pasi taki wan sani puru en prakseri fu dati.

¹² Ma a de so taki Yesus ben poti so furu prakseri na a wroko fu en, taki a no ben abi ten gi tra sani noso taki a ben e pina ensrefi fu a wroko fu en ede? A de so taki a ben poti so furu prakseri na a wroko fu en, taki a no ben e si san den sma abi fanowdu? Nôno, wi kan leri furu fu Yesus na ini a tori disi. Aladi a preikiwroko ben de a moro prenspari sani gi en, toku a ben abi ten gi tra sma nanga tra sani. A ben abi prisiri na ini a libi èn a ben lobi fu de nanga den mati fu en. A ben a e frustan san osofamiri abi fanowdu, a ben sabi den problema fu den, èn a ben e broko en ede nanga den. A ben sori tu taki a no ben e syen fu sori taki a lobi pikin.​—Leisi Markus 10:13-16.

13. Te wi wani tan na ai neleki Yesus, dan fa wi kan sori taki wi abi ten gi tra sma nanga tra sani, aladi a Kownukondre preikiwroko na a moro prenspari sani gi wi?

¹³ Te wi wani tan na ai neleki Yesus, dan fa wi kan sori taki wi abi ten gi tra sma nanga tra sani, aladi a preikiwroko na a moro prenspari sani gi wi? Wi no musu meki nowan sani puru wi prakseri na a wroko di wi musu du. Son leisi mati nanga famiriman wani taki wi abi wan switi libi èn dati meki den e taigi wi kande fu no preiki so furu noso fu libi leki fa tra sma e libi. Ma efu wi wani du leki Yesus, dan wi o si wi diniwroko leki nyanyan (Yoh. 4:34). A diniwroko fu wi e tranga a bribi fu wi èn a e gi wi prisiri. Ma wi no wani du en na so wan fasi taki wi no abi ten gi tra sma noso tra sani, wi no musu gi sma a firi taki wi bun moro den, èn wi no musu pina wisrefi fu a wroko fu wi ede. Neleki Yesus, wi leki futuboi fu „a koloku Gado” wani abi prisiri aladi wi e poti den moro prenspari sani na a fosi presi na ini wi libi.​—1 Tim. 1:11.

FA WI MUSU TAN NA AI TE TESI E MITI WI

14. Sortu sani wi no musu du te tesi e miti wi, èn fu san ede wi no musu du dati?

¹⁴ Soleki fa wi si, dan den moro prenspari rai di Yesus gi fu tan na ai, ben de di a ben e kisi hebi tesi. (Leisi Markus 14:37.) Spesrutu te wi e kisi tesi, wi musu poti prakseri na a eksempre fu en. Te sma e kisi tesi, dan nofo tron den e frigiti wan prenspari sani. A sani disi de so prenspari, taki a buku Odo e  taki en tu leisi: „Wan pasi de di wan man e si leki a reti pasi, ma dede na a kaba fu a pasi dati” (Odo 14:12; 16:25). Efu wi wani du sani soleki fa wi e denki, spesrutu te wi e kisi seryusu problema, dan nofo tron sani no o waka bun gi wi nanga den lobiwan fu wi.

15. Sortu tesi wan osofamiri-edeman kan kisi te a kisi moni problema?

¹⁵ Son leisi a kan muilek srefisrefi gi wan osofamiri-edeman fu „sorgu gi den sma fu en” (1 Tim. 5:8). Kande a kan kisi wan bun wroko, ma dan a o abi fu misi den Kresten konmakandra, a no o man studeri nanga en osofamiri, noso a no o man teki prati na a preikiwroko. Efu a e prakseri a tori disi libisma fasi, dan kande a no o si en leki wan problema fu teki a wroko. Kande a e denki srefi taki disi na a yoisti sani fu du. Ma disi kan meki taki a bribi fu en kon swaki èn kande a o gowe libi a tru bribi srefi. A moro bun fu du san Salomo taki na ini Odo 3:5, 6: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.”

16. (a) Fa Yesus sori taki a moro bun fu gebroiki a koni fu Yehovah na presi fu yu eigi koni? (b) Fa osofamiri-edeman e sori taki den e frutrow tapu Yehovah na ini muilek ten, neleki fa Yesus ben du dati?

¹⁶ Di tesi ben e miti Yesus, a ben weigri fu du sani soleki fa en e denki. Prakseri nomo: A moro koni man di libi na grontapu no ben e du sani soleki fa en e denki! Fu eksempre, di Satan ben e tesi en, dan ibri tron baka a taki: „Gado Buku taki” (Mat. 4:4, 7, 10). Fu man kakafutu gi tesi, a ben e suku rai na en Papa di abi ala koni. Disi e sori taki a abi sakafasi, wan sani di Satan no lobi èn no abi srefisrefi. Wi e frutrow tu tapu Yehovah di abi ala koni? Wan osofamiri-edeman di e tan na ai neleki Yesus e meki Gado Wortu tiri en, spesrutu te tesi e miti en. Na heri grontapu, dusundusun osofamiri-edeman e du dati. Den e meki muiti fu sorgu den osofamiri, ma toku den e poti Gado Kownukondre nanga a tru anbegi na a fosi presi na ini den libi. Na so fasi, den e sorgu gi den osofamiri na a moro bun fasi. Te Yehovah e si dati, a e yepi den fu kisi san den abi fanowdu soleki fa a pramisi na ini Bijbel.​—Mat. 6:33.

17. Fu san ede yu wani tan na ai neleki Yesus?

¹⁷ A no de fu taki dati Yesus na a moro bun eksempre fu wan sma di tan na ai. Wi kan gebroiki na eksempre fu en na ini wi aladei libi èn a kan meki wi tan na libi srefi. Hori na prakseri taki Satan wani dodoi wi meki wi sribi. Iya, a wani meki wi bribi kon swaki, a wani taki wi no e anbegi Gado fayafaya moro, èn a wani taki wi trangayesi Gado (1 Tes. 5:6). No meki a kisi yu! Begi doronomo fu man tan na ai neleki Yesus. Tan na ai na ini a preikiwroko èn te yu e kisi tesi. Te yu e du disi, dan yu o abi wan switi èn koloku libi nownow kaba. Fu tru, yu no o mankeri noti na ini a grontapu disi di e dede gowe. Te yu tan na ai na ini yu aladei libi, dan yu kan de seiker tu taki te a Masra fu yu kon fu tyari wan kaba kon na a grontapu disi, dan a o si taki yu de na ai èn taki yu e du a wroko di en Tata gi yu fu du. Yehovah o breiti srefisrefi fu blesi yu fu di yu tan dini en!​—Openb. 16:15.

[Aksi fu a tori disi]

[Prenki na tapu bladzijde 6]

Yesus ben e preiki gi na uma na a peti. Sortu okasi yu e suku fu man preiki ibri dei?

[Prenki na tapu bladzijde 7]

Te yu e yepi yu osofamiri fu tan dini Yehovah, dan dati e sori taki yu e tan na ai