Bun nyunsu di ala sma musu yere

’Fu taki en leti, a bun nyunsu na a krakti di Gado e gebroiki fu frulusu sma.’​—ROM. 1:16.

1, 2. Fu san ede yu e preiki a „bun nyunsu fu a kownukondre”, èn fu sortu sani yu e taki moro furu?

’MI BREITI taki ibri dei mi kan fruteri sma a bun nyunsu.’ Kande yu ben taki a sani dati wan leisi. Leki wan Kotoigi fu Yehovah di e dini en fayafaya, yu sabi o prenspari a de fu preiki „a bun nyunsu disi fu a kownukondre”. Kande yu sabi a profeititori na ede pe Yesus e taigi wi fu du a wroko dati.​—Mat. 24:14.

² Te yu e preiki a „bun nyunsu fu a kownukondre”, dan yu e go doro nanga a wroko di Yesus ben bigin. (Leisi Lukas 4:43.) A no de fu taki dati wan sani di yu e taki furu fu en, na taki heri esi Gado o tyari wan kenki kon na ini a situwâsi fu libisma. Nanga yepi fu a „bigi banawtu”, a o tyari wan kaba kon na falsi bribi èn a o puru ogri na grontapu (Mat. 24:21). Kande yu e sori sma krin tu taki Gado Kownukondre o meki grontapu tron wan Paradijs baka, so taki vrede kan de na ala sei, èn so taki ala sma kan de koloku. Fu taki en leti, a „bun nyunsu fu a kownukondre” abi fu du nanga a ’bun nyunsu di Gado ben fruteri Abraham na fesi, taki: „Nanga yepi fu en, ala pipel o kisi blesi”’.​—Gal. 3:8.

3. Fu san ede wi kan taki dati na apostel Paulus ben poti furu prakseri na a bun nyunsu na ini a buku Romesma?

³ Ma kande wi no e poti nofo prakseri na wan prenspari sani fu a bun nyunsu di sma musu yere. Na ini a brifi di na apostel Paulus ben skrifi gi den Romesma, a gebroiki a wortu „kownukondre” wán leisi nomo, ma a ben gebroiki den wortu „bun nyunsu” 12 leisi. (Leisi Romesma 14:17.) Fu sortu sani fu „a bun nyunsu” Paulus ben taki so furu na ini a buku dati? Fu san ede a bun nyunsu dati prenspari so? Èn fu san ede wi musu hori a sani dati na prakseri te wi e preiki a bun nyunsu fu Gado gi sma na ini wi kontren?​—Mark. 1:14; Rom. 15:16; 1 Tes. 2:2.

A sani di den sma na ini Rome ben musu kon frustan

4. Fu sortu sani Paulus ben e preiki di a ben de na strafu-oso na ini Rome fu a fosi leisi?

⁴ A bun fu poti prakseri na den sani di Paulus ben taki di a ben de na strafu-oso na ini Rome fu a fosi leisi. Wi e leisi taki di wan tu Dyu ben kon na en, dan a ben gi den ’kotoigi finifini fu (1) a kownukondre fu Gado, èn a overtoigi den fu den sani di ben abi fu du nanga (2) Yesus’. San ben de a bakapisi? „Wan tu fu den bigin bribi den sani di  a ben taki; trawan no ben wani bribi.” Baka dati, Paulus ’sori switifasi gi ala den sma di ben kon na en; a ben e fruteri den fu (1) a kownukondre fu Gado, èn a taki nanga den fu den sani di abi fu du nanga (2) Masra Yesus Krestes’ (Tori. 28:17, 23-31). A de krin taki Paulus ben e poti prakseri na Gado Kownukondre. Ma fu sortu tra sani a ben taki? A ben taki fu wan prenspari sani di abi fu du nanga a Kownukondre. Dati na a frantwortu di Gado gi Yesus fu meki a wani fu En kon tru.

5. Fu sortu prenspari sani Paulus ben taki na ini a buku Romesma?

⁵ Ala sma musu kon sabi fu Yesus èn den musu poti bribi na ini en. Na ini a buku Romesma, Paulus ben taki fu a prenspari sani dati. A ben skrifi na fesi kaba: „Nanga mi heri ati mi e du santa diniwroko gi Gado te mi e preiki a bun nyunsu di e taki fu en Manpikin.” A ben taki moro fara: „Mi no e syen gi a bun nyunsu; fu taki en leti, disi na a krakti di Gado e gebroiki fu frulusu ala sma di e bribi.” Bakaten, a taki fu a ten „te Gado o meki Krestes Yesus krutu den sani di libisma du na wan kibri fasi, soleki fa a bun nyunsu di mi e preiki e sori”. Èn a ben taki: „Mi ben bigin na ini Yerusalem fosi èn mi waka lontu go te na Iliria fu preiki a bun nyunsu fu Krestes finifini” (Rom. 1:9, 16; 2:16; 15:19). * Fu san ede yu denki taki Paulus ben taki so furu fu Yesus Krestes na ini a brifi di a ben skrifi gi den Romesma?

6, 7. San wi kan taki fu a fasi fa a gemeente na ini Rome ben bigin, èn san wi kan taki fu den sma di ben de memre fu a gemeente?

⁶ Wi no sabi fa a gemeente na ini Rome ben bigin. Bijbel e sori taki Dyu nanga sma di ben teki a Dyu bribi ben de na a Pinksterfesa fu a yari 33. A de so taki wan tu fu den sma disi ben drai go baka na Rome leki Kresten? (Tori. 2:10) Noso a de so taki Kresten bisnisman nanga Kresten di ben e go na tra kondre ben panya a bun nyunsu na ini Rome? Awansi fa a no fa, di Paulus skrifi a buku na a ten fu a yari 56, dan a gemeente ben seti langa ten kaba (Rom. 1:8). Sortu sma ben de memre fu a gemeente dati?

⁷ Sonwan fu den sma dati ben de Dyu. Paulus ben kari Andronikus nanga Yunias en „famiriman” di a ben seni taki den odi. Kande den sma disi ben de famiriman di ben de Dyu tu. Akwila, di ben e meki tenti, èn di ben de na ini Rome makandra nanga en wefi Preskela, ben de wan Dyu tu (Rom. 4:1; 9:3, 4; 16:3, 7; Tori. 18:2). Ma a kan taki furu fu den Kresten brada nanga sisa di Paulus ben seni taki odi, no ben de Dyu. Kande sonwan fu den sma disi ben de „fu na oso fu Caesar”, èn kande dati ben wani taki dati den ben de srafu fu Caesar, èn sosrefi sma di a ben gi spesrutu frantwortu.​—Fil. 4:22; Rom. 1:6; 11:13.

8. Sortu muilek situwâsi den sma na ini Rome ben de na ini?

⁸ Ibri Kresten na ini Rome ben de na ini wan muilek situwâsi, èn ibriwan fu wi de na ini a srefi situwâsi dati. Paulus ben taki en so: „Ala sma sondu èn den no man doro a glori fu Gado” (Rom. 3:23). A de krin taki ala den sma na ini a gemeente fu Rome ben musu frustan taki den ben de sondusma èn taki den ben musu poti bribi na ini a seti di Gado ben o gebroiki fu puru libisma na ini a nowtu dati.

Sma musu frustan taki den na sondusma

9. Sortu bun bakapisi a bun nyunsu kan tyari kon, soleki fa Paulus ben taki?

⁹ Na a bigin fu a brifi di Paulus ben skrifi gi den Romesma, a ben poti prakseri na den tumusi moi blesi di a bun nyunsu ben o tyari kon, èn di a ben e taki fu en doronomo. A ben taki: „Mi no e syen gi a bun nyunsu; fu taki en leti, disi na a krakti di Gado e gebroiki fu frulusu ala sma di e bribi, namku den Dyu fosi èn baka dati den Grikisma sosrefi.” Iya, libisma ben man kisi frulusu.  Ma wan sma ben o abi fu sori bribi, neleki fa Habakuk 2:4 e sori. Drape wi e leisi a tumusi prenspari tru tori disi: „A reti-ati sma o tan libi fu di a abi bribi” (Rom. 1:16, 17; Gal. 3:11; Hebr. 10:38). Ma san a bun nyunsu dati di kan meki sma kisi frulusu, abi fu du nanga a sondu di „ala sma sondu”?

10, 11. Fu san ede son sma man frustan den wortu na Romesma 3:23, aladi trawan no man frustan den wortu dati?

¹⁰ Fosi wan sma kan kon abi a bribi di sa kibri en libi, a musu frustan taki en na wan sondu sma. A sani disi no de wan nyun sani gi den sma di e bribi na ini Gado sensi di den ben pikin èn di sabi Bijbel pikinso. (Leisi Preikiman 7:20.) Kande den sma disi e agri nanga Paulus te a e taki dati „ala sma sondu”, noso kande den e tweifri fu a sani dati (Rom. 3:23). Ma awansi fa a no fa, den e frustan pikinso san Paulus ben wani taki. Ma te wi e du a preikiwroko fu wi, dan a kan taki wi e miti furu sma di no e frustan a tori dati.

¹¹ Na ini son kondre, furu sma no kweki nanga a denki taki den gebore leki sondusma, noso taki den kisi sondu. Kande den sma disi sabi taki den e meki fowtu, taki den abi swakifasi, èn taki den du wan tu sani di no bun. Èn den e si tu taki tra sma de na ini a srefi situwâsi leki den. Ma fu di den kweki na wan tra fasi, meki den no man frustan krin fu san ede den nanga tra sma de so. Fu taki en leti, na ini son tongo a de so taki te yu e taki dati wan sma na wan sondu sma, dan trawan ben kan denki taki a sma dati na wan ogri sma, noso taki a du wan tu ogri. A de krin taki te wan sma kweki nanga a denki disi, dan a no sa si ensrefi leki wan sondu sma na a fasi fa Paulus ben tyari dati kon na krin.

12. Fu san ede furu sma no e bribi taki ala sma na sondusma?

¹² Srefi na ini kondre pe a Krestenhèit na a moro prenspari bribi, furu sma no e bribi taki libisma na sondusma. Fu san ede dati de so? Awansi den e go na kerki son leisi, toku den e si a Bijbel tori fu Adam nanga Eva leki wan anansitori. Tra sma kweki nanga a denki taki Gado no de. Fu di den bigin tweifri taki Gado de, meki den no man frustan taki a Moro Heiwan poti wet di e sori libisma fa den musu tyari densrefi. Den no e frustan tu taki te den no e hori densrefi na den wet dati, dan dati na sondu. Fu taki en leti, den sma disi de leki den sma na ini a fosi yarihondro di Paulus ben taki fu den taki den ben abi „nowan howpu” èn taki den ben e „libi sondro Gado”. ​—Ef. 2:12.

13, 14. (a) Fu san ede den sma di no e bribi taki Gado de èn taki libisma abi sondu, no kan taki dati den no sabi san no bun? (b) San furu sma du fu di den no e bribi na ini Gado?

¹³ Na ini a brifi di Paulus ben skrifi gi den Romesma, a ben poti prakseri na tu reide fu san ede sma fu a ten dati èn sma fu now, musu bribi taki wan Gado de, awansi fa den kweki. A fosi reide, na taki den sani na grontapu e sori taki wan Mekiman de. (Leisi Romesma 1:19, 20.) Disi e kruderi nanga wan sani di Paulus ben taki na ini a brifi di a ben skrifi gi den Hebrewsma di a ben de na ini Rome. A ben skrifi: „Ibri oso abi wan sma di bow en, ma a sma di bow ala sani na Gado” (Hebr. 3:4). Den sani di Paulus taki e sori taki wan Mekiman de di meki ala sani na hemel èn na grontapu.

¹⁴ Sobun, Paulus ben abi leti di a skrifi den Romesma taki iniwan sma di ben e anbegi popki fu falsi gado, „no man taki dati den no sabi” san no bun. Na so a ben de tu nanga den Israelsma fu owruten. Wi kan taki a srefi fu den  mansma nanga umasma di abi seks na wan fasi di no e kruderi nanga a fasi fa Gado meki den (Rom. 1:22-27). A de krin taki Paulus ben abi leti di a taki dati „Dyu èn sosrefi Grikisma abi sondu”.​—Rom. 3:9.

’Wan sani di de leki wan buweisi’

15. San ala sma abi, èn sortu krakti dati abi na den tapu?

¹⁵ A buku Romesma e taki fu wan tra reide fu san ede sma musu frustan taki den na sondusma èn taki den musu feni wan lusu gi a problema dati. Paulus ben taki disi fu a wet di Gado ben gi na owruten pipel fu Israel: „A wet o krutu ala den sma di de na ondro a wet èn di du sondu” (Rom. 2:12). Paulus sori moro fara taki sma fu tra kondre noso fu tra kulturu di no sabi a wet fu Gado, nofo tron e „du den sani di a wet e taki, sondro taki wan sma taigi den”. Fu san ede den sma dati nofo tron no feni en bun taki sma abi seks nanga famiriman, taki sma e kiri trawan, èn taki den e fufuru? Paulus ben taki fu san ede: Na fu di den abi wan konsensi.​—Leisi Romesma 2:14, 15.

16. Fu san ede a de so taki aladi wi abi wan konsensi, toku dati no wani taki dati wi sa wai pasi gi sondu?

¹⁶ Ma kande yu si taki awansi wan sma abi wan konsensi di e warskow en gi sani di no bun, toku dati no wani taki dati a sma sa arki en konsensi. Na eksempre fu Israel fu owruten e sori dati. Den Israelsma ben abi wan konsensi di Gado ben gi den, èn sosrefi wet di ben e sori den taki den no ben mag fufuru èn taki den no ben mag du sutadu. Ma toku den no ben e arki a konsensi fu den, èn den ben gwenti fu pasa a Wet fu Yehovah (Rom. 2:21-23). A no de fu taki dati den ben o tyari bigi frantwortu na Gado. A ben de krin taki den ben de sondusma, fu di den no ben e hori densrefi na den markitiki fu Gado, èn den no ben e du a wani fu en. A sani disi meki taki a Mekiman fu den no ben feni den bun moro.​—Lef. 19:11; 20:10; Rom. 3:20.

17. Sortu deki-ati wi e kisi na ini a buku Romesma?

¹⁷ Te wi e luku den sani di wi leri fu a buku Romesma, dan a kan gersi leki libisma no man abi wan bun nen na a Almaktiwan kwetikweti. Iya, a gersi leki wi srefi no man abi wan bun nen na En. Ma na apostel Paulus no ben poti prakseri na den sani dati wawan. A ben gebroiki den srefi wortu di David ben taki na ini Psalm 32:1, 2: „Koloku fu den sma di kisi pardon fu den kruktudu fu den èn koloku fu den sma fu suma Gado tapu den sondu fu den; koloku fu a sma fu suma Yehovah no e prakseri den sondu fu en moro” (Rom. 4:7, 8). Iya, sondro taki a pasa den markitiki fu en, Gado seti sani so taki libisma man kisi pardon fu den sondu fu den.

Bun nyunsu di abi fu du nanga Yesus

18, 19. (a) Na sortu sani fu a bun nyunsu Paulus ben poti prakseri na ini Romesma? (b) San wi musu frustan fu man kisi wini fu den blesi fu a Kownukondre?

¹⁸ Kande yu sa taki: „Dati na bun nyunsu trutru!” Na so a de, èn a sani disi e meki wi prakseri a sani di Paulus ben taki fu a bun nyunsu na ini a buku Romesma. Soleki fa wi sabi, dan Paulus ben skrifi: ’Mi no e syen gi a bun nyunsu; fu taki en leti, disi na a krakti di Gado e gebroiki fu frulusu sma’.​—Rom. 1:15, 16.

¹⁹ A bun nyunsu dati ben abi fu du nanga a frantwortu di Gado ben gi Yesus fu meki a wani fu En kon tru. Paulus ben kan fruwakti „a dei te Gado o meki Krestes Yesus krutu den sani di libisma du na wan kibri fasi, soleki fa a bun nyunsu” ben taki (Rom. 2:16). Di Paulus taki dati, dan a no ben wani sori taki „a kownukondre fu Krestes èn fu Gado” no prenspari. A no ben wani sori tu taki den sani di Gado sa du nanga yepi fu a  Kownukondre dati no prenspari (Ef. 5:5). Ma a sori taki efu wi wani tan na libi fu man kisi wini fu den blesi di Gado Kownukondre o tyari kon, dan (1) wi musu frustan taki Gado e si wi leki sondusma, èn (2) wi musu frustan tu fu san ede wi musu sori bribi na ini Yesus Krestes efu wi wani kisi pardon fu sondu. Te wan sma e frustan den sani dati di abi fu du nanga a wani fu Gado, te a e bribi den sani disi, èn te a e si fa a sani dati e gi en howpu, dan a kan bari kari nanga leti: „Iya, dati na bun nyunsu trutru!”

20, 21. Te wi e du a diniwroko, dan fu san ede wi musu hori a bun nyunsu na prakseri di Paulus tyari kon na krin na ini a buku Romesma? Sortu blesi wi kan kisi te wi e preiki a bun nyunsu dati?

²⁰ A no de fu taki dati wi musu hori a sani disi fu a bun nyunsu na prakseri te wi e du a Kresten diniwroko fu wi. Paulus ben gebroiki den wortu fu Yesaya di a ben taki: „Nowan sma di e bribi na ini en, sa kisi syen” (Rom. 10:11; Yes. 28:16). Kande den sma di sabi pikinso san Bijbel e taki fu sondu, sabi a boskopu di abi fu du nanga Yesus. Ma gi tra sma, a boskopu disi sa de wan nyun sani, fu di den no sabi en, èn fu di den no kweki nanga a bribi dati. Te den sortu sma dati e bigin poti bribi na ini Gado èn na ini den Buku fu Bijbel, dan wi sa musu yepi den fu frustan sortu frantwortu Yesus abi. Na ini a tra artikel wi sa poti prakseri na Romesma kapitel 5, di e tyari a tori dati kon na krin. Kande yu sa man gebroiki den sani di yu e leri na ini na artikel dati, na ini a preikiwroko fu yu.

²¹ A e gi prisiri trutru fu yepi reti-ati sma fu kon frustan a bun nyunsu di a buku Romesma e taki so furu fu en. ’Fu taki en leti, a bun nyunsu disi na a krakti di Gado e gebroiki fu frulusu ala sma di e bribi’ (Rom. 1:16). Boiti taki wi sa kisi den blesi fu a Kownukondre, wi o si taki tra sma o bribi den wortu di Paulus ben taki na Romesma 10:15: „O moi den futu de fu den sma di e preiki bun nyunsu di abi fu du nanga bun sani!”​—Yes. 52:7.

[Futuwortu]

Yu e memre disi ete?

• Na sortu sani fu a bun nyunsu a buku Romesma e poti prakseri?

• Sortu tru tori wi musu yepi tra sma fu kon frustan?

• Fa „a bun nyunsu fu Krestes” kan tyari blesi kon gi wi nanga tra sma?

[Aksi fu a tori disi]

[Prenspari pisi na tapu bladzijde 8]

A bun nyunsu di tyari kon na krin na ini Romesma, ben e sori taki Yehovah gi Yesus wan prenspari frantwortu fu meki a wani fu En kon tru

[Prenki na tapu bladzijde 9]

Wi alamala gebore nanga wan bigi swakifasi, èn dati na sondu!