Yu e meki a yeye fu Gado tiri yu?
Yu e meki a yeye fu Gado tiri yu?
„Na soso bun a yeye fu yu e du gi mi. Meki a yeye fu yu sori mi a pasi na ini a kondre fu den reti-ati sma.”—PS. 143:10.
1, 2. (a) Taki fu wan tu okasi pe Yehovah gebroiki en santa yeye fu yepi den futuboi fu en. (b) A de so taki a santa yeye kan abi krakti na wi tapu soso na spesrutu okasi? Fruklari dati.
SAN yu e prakseri te yu e luku fa a santa yeye e wroko? Yu e prakseri den bigi sani di Gideon nanga Simson du? (Krut. 6:33, 34; 15:14, 15) Kande yu e prakseri a deki-ati di den fosi Kresten ben sori, noso kande yu e prakseri a tiri fasi di Stefanus ben abi di a ben e tanapu na fesi a Sanhedrin (Tori. 4:31; 6:15). Yu e prakseri a bigi prisiri di de na den internationaal kongres fu wi di e hori na ini a ten disi? Fa a de nanga a tranga bribi fu wi Kresten brada nanga sisa di e koti strafu fu di den ben weigri fu teki sei na ini politiek afersi? Noso kande yu e prakseri a tumusi moi fasi fa a preikiwroko go na fesi. Ala den eksempre disi e sori fa a santa yeye e wroko.
2 A de so taki a santa yeye abi krakti tapu sma soso na spesrutu okasi, èn soso na ini aparti situwâsi? Nôno. Gado Wortu e taki dati Kresten e ’waka nanga a yeye’, den e ’meki a yeye tiri den’, èn den e ’meki a yeye tiri den libi’ (Gal. 5:16, 18, 25). Den wortu disi e sori taki a santa yeye kan abi krakti tapu wi libi doronomo. Ibri dei wi musu begi Yehovah fu tiri wi nanga yepi fu en santa yeye, so taki wi e taki, e denki, èn e handri na wan fasi di a feni bun. (Leisi Psalm 143:10.) Te wi e gi a yeye okasi fu abi krakti na wi tapu, dan wi sa kweki fasi di e gi trawan deki-ati, èn di sa gi Gado glori.
3. (a) Fu san ede wi musu meki a santa yeye tiri wi? (b) Na sortu aksi wi o poti prakseri?
3 Fu san ede a de tumusi prenspari taki a santa yeye e tiri wi? Fu di wan tra krakti e suku fu basi wi, èn a krakti dati e gens a santa yeye. Bijbel e kari a krakti dati „a sondu skin”, èn dati abi fu du nanga den sondu firi di wi kisi fu wi afo Adam. (Leisi Galasiasma 5:17.) Ma san wi musu du fu meki a santa yeye tiri wi? Sortu sani wi kan du fu basi wi sondu skin di e suku fu abi krakti na wi tapu? Wi sa poti prakseri na den aksi disi te wi o taki fu den tra siksi pisi fu a „froktu fu a yeye”. Dati na ’langa pasensi, bun-ati noso switifasi, bunfasi, bribi, safri-ati, èn a dwengi di wi musu dwengi wisrefi’.—Gal. 5:22, 23.
Safri-ati nanga langa pasensi e yepi fu tyari vrede kon na ini a gemeente
4. Te wi e sori safri-ati nanga langa pasensi, dan fa dati e yepi fu tyari vrede kon na ini a gemeente?
4 Leisi Kolosesma 3:12, 13. Na ini a gemeente, a de tumusi prenspari fu sori safri-ati nanga langa pasensi, so taki vrede kan de. Te wi e sori den tu fasi disi di de pisi fu a froktu fu a santa yeye, dan dati e yepi wi fu handri na wan lespeki fasi nanga trawan. Boiti dati, wi o hori wisrefi te trawan e suku trobi nanga wi, èn wi no o pai ogri nanga ogri te trawan e taigi wi hati sani, noso te den e du hati sani nanga wi. Te wi abi wan kesekese nanga wan tra Kresten, dan wi musu sori langa pasensi, fu di dati o yepi wi fu no drai baka gi wi Kresten brada nanga sisa. Na presi fu dati, wi o du san wi man du fu lusu a problema. Yu denki taki a prenspari trutru fu sori safri-ati nanga langa pasensi na ini a gemeente? Iya, a sani dati prenspari, fu di wi alamala na sondu libisma.
5. San ben pasa nanga Paulus nanga Barnabas, èn san disi e sori?
5 Luku san ben pasa nanga Paulus nanga Barnabas. Den ben e wroko skinskin nanga makandra furu yari langa fu preiki a bun nyunsu. Ibriwan fu den ben abi bun fasi. Ma wán leisi, den kisi „bun bigi trobi, èn dati meki taki ibriwan fu den go den eigi pasi” (Tori. 15:36-39). A sani disi e sori taki srefi fayafaya futuboi fu Gado e kisi kesekese nanga makandra son leisi. Efu wan Kresten abi wan kesekese nanga wan trawan, dan san a kan du fu sorgu taki a situwâsi no e tron wan bigi trobi di kan pori a matifasi fu den?
6, 7. (a) Sortu rai fu Bijbel wi kan fiti fu sorgu taki wan takimakandra nanga wan Kresten brada noso sisa no e tron wan bigi trobi? Fu san ede a bun te wi ’de gaw fu yere, te wi no de gaw fu taki, èn te wi no e atibron esi-esi’?
6 Soleki fa den wortu „bun bigi atibron” e sori, dan a kesekese di Paulus nanga Barnabas ben abi, ben pasa wantronso, èn den ben atibron srefisrefi nanga makandra. Efu wan Kresten e kon si taki a e kisi atibron te en nanga wan tra Kresten e taki fu wan tori, dan a bun te a e teki a rai disi di skrifi na Yakobus 1:19, 20: „Ibri sma musu gaw fu yere, ma a no musu gaw fu taki, èn a no musu atibron esi-esi; bika te wan sma abi bigi atibron, dan a no sa du sani di regtfardiki na ini Gado ai.” Kande a kan pruberi fu drai a tori, kande a kan pruberi fu taki fu a tori wan tra leisi, noso kande a kan waka gowe fosi den e bigin meki trobi.—Odo 12:16; 17:14; 29:11.
7 Sortu wini wan sma sa kisi te a e gi yesi na a rai disi? Te wan Kresten e du muiti fu hori ensrefi, te a e begi Gado fu yepi en, èn te a e denki bun san na a moro bun fasi fu piki, dan na so a e meki a yeye fu Gado tiri en (Odo 15:1, 28). A santa yeye kan yepi en fu sori safri-ati èn fu abi langa pasensi. Na so a o man fiti a rai di skrifi na Efeisesma 4:26, 29: „Unu kan kisi atibron, ma toku un no musu du sondu . . . No taki takru sani nanga un mofo, ma taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den.” Iya, te wi e sori safri-ati èn te wi abi langa pasensi, dan wi e yepi fu sorgu taki vrede nanga wánfasi de na ini a gemeente.
Sori switifasi nanga bunfasi gi yu osofamiri fu gi den deki-ati
8, 9. San a wani taki fu sori switifasi nanga bunfasi, èn sortu krakti den fasi disi abi tapu na osofamiri libi?
8 Leisi Efeisesma 4:31, 32; 5:8, 9. Neleki fa wan switi winti nanga wan grasi kowru watra e gi sma krakti baka te a weer faya, na so sma e firi bun te trawan e sori switifasi nanga bunfasi gi den. Te wi e sori den fasi dati na ini wi osofamiri, dan den memre fu wi osofamiri o libi switi nanga makandra. Te wan sma abi switifasi, dan trawan o lobi en fu di a sma dati e broko en ede trutru nanga den. A sma dati de klariklari fu yepi trawan, èn te a e taki, a e hori den firi fu trawan na prakseri. Neleki fa a de te wan sma e sori bunfasi, na so wan sma di e sori switifasi e du bun gi trawan. A sma disi lobi fu gi sma sani (Tori. 9:36, 39; 16:14, 15). Ma wan sma di abi bunfasi e du moro leki dati.
9 Wan sma di abi bunfasi e tyari ensrefi na wan fasi di fiti. A sani disi no abi fu du nomo nanga san wi e du, ma moro furu a abi fu du nanga a sma di wi de. A de neleki wan lepi froktu di switi srefisrefi èn di no abi nowan enkri pori. Na so a de tu taki a bunfasi di Kresten e kon abi nanga yepi fu santa yeye, abi krakti tapu den heri libi.
10. San osofamiri edeman kan du fu yepi den memre fu den osofamiri fu kweki a froktu fu a yeye?
10 San kan yepi memre fu wan Kresten osofamiri fu sori switifasi nanga bunfasi gi makandra? A de tumusi prenspari taki den e kisi soifri sabi fu Gado Wortu (Kol. 3:9, 10). Son osofamiri edeman e poti prakseri na a froktu fu a yeye te den e studeri nanga na osofamiri fu den ibri wiki. A no muilek fu studeri a tori dati. Wi kan gebroiki den publikâsi di de fu kisi na ini a tongo fu wi, fu ondrosuku ibri pisi fu a froktu fu a yeye finifini. Kande yu kan poti prakseri na wan tu paragraaf nomo ibri wiki, èn na so yu sa poti prakseri wan tu wiki langa na ibri pisi fu a froktu fu a yeye. Te yu e studeri den tori dati, dan leisi den Bijbeltekst di kari, èn taki fu den. Luku fa yu kan fiti den sani di yu leri, èn begi Gado fu blesi a muiti di yu e du (1 Tim. 4:15; 1 Yoh. 5:14, 15). Yu denki taki a studie dati kan yepi yu trutru fu tyari wan kenki kon na ini a fasi fa den memre fu yu osofamiri e handri nanga makandra?
11, 12. Fa tu Kresten trowpaar ben kisi wini di den studeri a tori fu switifasi?
11 Wan yongu trowpaar ben wani taki a trowlibi fu den waka bun. Fu dati ede, den bosroiti fu studeri a froktu fu a yeye finifini. Fa a sani dati yepi den? A wefi e taki: „Wi leri taki trowpaar di e sori switifasi gi makandra, man frutrow makandra èn den e tan horibaka gi makandra. A sani dati tyari bigi kenki kon na ini a fasi fa wi ben e handri nanga makandra, èn dati de so te na a dei fu tide. Wi leri fu frudrage makandra èn fu gi makandra pardon. Èn a sani dati yepi wi fu leri taki sani soleki ’grantangi’ nanga ’mi e aksi yu pardon’ te dati fiti.”
12 Wan tra Kresten trowpaar di ben abi problema na ini a trowlibi fu den, kon si taki den no ben abi switifasi gi makandra. Den bosroiti fu studeri a tori fu switifasi nanga makandra. San ben de a bakapisi? A masra e taki: „Di wi studeri a tori fu switifasi, dan dati yepi wi fu kon si taki wi musu frutrow makandra na presi taki wi e denki takru fu makandra. Iya, wi bigin luku den bun fasi fu makandra. Wi bigin poti moro prakseri na makandra. Wan fasi fa mi ben e sori switifasi gi mi wefi, na taki mi ben e aksi en san a ben prakseri, sondro taki mi ben e mandi nanga den sani di a ben e taigi mi. Dati ben wani taki dati mi no ben musu abi heimemre moro. Di mi nanga mi wefi bigin sori switifasi gi makandra, dan safrisafri wi no ben e krutu makandra moro. A sani dati ben de wan bigi frulekti.” Yu denki taki yu osofamiri ben o kisi wini te unu e studeri a froktu fu a yeye?
Sori bribi te yu de yu wawan
13. Sortu sani kan pori a matifasi di wi abi nanga Gado?
13 Kresten musu meki a yeye fu Gado tiri den te den de na mindri trawan èn te den de den wawan. Na ini a ten disi, fisti prenki de fu si na ala sei na ini a grontapu fu Satan, èn sma na ala sei abi prisiriten di no fiti. A sani disi kan pori a matifasi di wi abi nanga Gado. San wan Kresten musu du? Gado Wortu e gi a rai disi: „Puru ala morsufasi èn sosrefi a sani di no de fanowdu, namku takrufasi; èn na wan safri-ati fasi un musu gi a wortu na okasi fu prani dipi na ini unu, bika dati sa man frulusu unu” (Yak. 1:21). Meki wi luku fa a bribi fu wi, di de ete wan pisi fu a froktu fu a yeye, kan yepi wi fu anbegi Yehovah na wan krin fasi.
14. Te sma no abi bribi na ini Gado, dan fa dati kan meki taki den du sani di no fiti?
14 Te wi abi bribi, dan dati wani taki dati wi e si Yehovah Gado leki wan trutru sma. Efu wi no e si Gado leki wan trutru sma, dan makriki wi kan du sani di no fiti. Luku san ben pasa nanga a pipel fu Gado na ini owruten. Yehovah ben meki a profeiti Esekièl kon sabi taki den Israelsma ben e du tumusi takru sani te den ben de na ini den oso fu den. Yehovah ben taki: „Manpikin fu libisma, yu si san den owru man fu Israel e du na ini a dungru, te den de na ini den kamra fu den di furu nanga popki di den e anbegi? Den e taki: ’Yehovah no e si wi. Yehovah gowe libi a kondre’” (Esek. 8:12). Yu no si san meki taki a problema disi kon de? Den no ben e bribi taki Yehovah ben sabi san den ben e du. Den no ben e si Yehovah leki wan trutru sma.
15. Te wi abi wan tranga bribi na ini Yehovah, dan fa dati e kibri wi?
15 Ma luku na eksempre fu Yosef. Aladi a ben de farawe fu en famiri èn fu a pipel fu en, toku Yosef ben weigri fu du sutadu nanga a wefi fu Potifar. Fu san ede? A ben taki: „Fa mi kan du so wan bigi ogri? A no sondu mi ben o sondu teige Gado?” (Gen. 39:7-9) Iya, Yosef ben e si Yehovah leki wan trutru sma. Efu wi e si Gado leki wan trutru sma, dan wi no o luku felem noso telefisi programa di no krin, èn te wi de wi wawan, dan wi no o du nowan enkri sani di Gado no feni bun. Wi sa abi a srefi fasti bosroiti fu a psalm skrifiman di ben singi: „A fasi fa mi o tyari misrefi te mi de na ini mi oso, o sori taki mi ati krin. Mi no o meki mi ai si sani di no fiti. Den sani di sma e du te den gowe libi Gado, mi no lobi kwetikweti. Mi no wani abi noti fu du nanga den sani dati.”—Ps. 101:2, 3.
Dwengi yusrefi so taki yu kan kibri yu ati
16, 17. (a) Soleki fa a buku Odo e sori, dan fa ’wan yonkuman ben meki en ati kori en’ fu du sondu? (b) Soleki fa a prenki na tapu bladzijde 26 e sori, dan fa wan srefi sortu sani kan pasa na ini a ten disi, awansi omeni yari wan sma abi?
16 A lasti pisi fu a froktu fu a yeye, na a dwengi di wi e dwengi wisrefi. Te wi abi a fasi disi, dan wi no sa du sani di Gado no feni bun. A fasi disi kan yepi wi fu kibri wi ati (Odo 4:23). Prakseri a tori di skrifi na ini Odo 7:6-23, di e taki fu ’wan yonkuman di e du dondon sani fu di en ati kori en’. A yonkuman disi e brokokindi gi a trikifasi fu wan huru-uma. A e fadon na ini wan trapu te a e ’waka krosibei fu a strati pe na uma e tan’. Kande a go na ini a birti fu na uma disi fu di a wani sabi san a e du. Ma heri esi a no man si moro taki a e du wan don sani di kan meki a „lasi en libi”.
17 Fa a yonguman ben kan wai pasi gi a bigi fowtu disi? A ben musu gi yesi na a warskow disi: ’No go pe na uma disi e go’ (Odo 7:25). Wi e leri wan moi sani fu a tori disi: Efu wi wani taki a yeye fu Gado tiri wi, dan wi no musu poti wisrefi na ini situwâsi di kan de wan tesi gi wi. Wan fasi fa wan sma ben kan meki a srefi fowtu fu a ’yonkuman di meki en ati kori en’, na te a e sidon luku ala sortu sani tapu telefisi noso Internet. Awansi a e du dati fu espresi, noso awansi dati no de so, toku a ben kan si prenki di e wiki den seksfiri fu en. Safrisafri a ben kan kon abi a takru gwenti fu luku porno. A sani dati kan trobi a konsensi fu en, èn a kan pori sosrefi a matifasi di a abi nanga Gado. A sma disi kan lasi en libi srefi.—Leisi Romesma 8:5-8.
18. Sortu sani wan Kresten ben kan du fu kibri en ati, èn fa den sani disi e sori taki a e dwengi ensrefi?
18 A no de fu taki dati wi kan dwengi wisrefi, èn wi musu du dati tu. Iya, te wi e si wan prenki di kan wiki den seksfiri fu wi, dan wi no musu tan luku a sani dati kwetikweti. Ma a ben o moro bun te wi no e poti wisrefi na ini a situwâsi dati! (Odo 22:3) Te wi e du san de fanowdu fu kibri wi ati, èn te wi e hori wisrefi na den bosroiti dati, dan na so wi e dwengi wisrefi. Fu eksempre, poti yu computer na wan presi pe tra sma man si yu te yu e wroko na en tapu. A sani dati kan de wan kibri gi wi. Son sma e bosroiti fu gebroiki a computer, noso fu luku telefisi soso te trawan de drape nanga den. Tra sma bosroiti fu no abi Internet tapu den computer. (Leisi Mateyus 5:27-30.) Meki wi du iniwan sani di wi musu du fu kibri wisrefi nanga wi osofamiri, so taki wi kan anbegi Yehovah ’nanga wan krin ati, nanga bun konsensi, èn nanga trutru bribi sondro fu hoigri’.—1 Tim. 1:5.
19. Sortu wini wi sa kisi te wi e meki a santa yeye tiri wi?
19 Den fasi di wi kan kon abi nanga yepi fu a santa yepi e tyari furu wini kon gi wi. Te wi e sori switifasi nanga bunfasi na ini na osofamiri, dan dati o yepi na osofamiri fu wi fu de koloku. Te wi abi bribi èn te wi e dwengi wisrefi, dan dati e yepi wi fu tan krosibei fu Yehovah èn fu anbegi en na wan krin fasi. Boiti dati, Galasiasma 6:8 e gi wi a dyaranti disi: „A sma di e du san a yeye wani, sa kisi têgo libi fu a yeye.” Iya, nanga yepi fu a lusu-paiman fu Krestes, Yehovah o gebroiki en santa yeye fu gi têgo libi na den wan di e meki a santa yeye tiri den.
San yu ben sa piki?
• Te Kresten e sori safri-ati èn te den abi langa pasensi, dan fa dati e yepi fu sorgu taki vrede de na ini a gemeente?
• San kan yepi Kresten fu sori switifasi nanga bunfasi na ini na osofamiri?
• Te wan Kresten abi bribi èn te a e dwengi ensrefi, dan fa dati o yepi en fu kibri en ati?
[Aksi fu a tori disi]
[Prenki na tapu bladzijde 24]
Fa yu kan sorgu taki wan takimakandra no e tron wan bigi trobi?
[Prenki na tapu bladzijde 25]
Yu osofamiri o kisi wini te unu e studeri den froktu fu a yeye
[Prenki na tapu bladzijde 26]
Te wi e sori bribi èn te wi e dwengi wisrefi, dan gi sortu sani wi sa man wai pasi?