De fayafaya gi a tru anbegi
De fayafaya gi a tru anbegi
„A kotiwroko bigi, ma furu wrokoman no de.”—MAT. 9:37.
1. Fruklari fa a de te yu musu du wan prenspari sani aladi yu no abi furu ten moro.
KON meki wi taki dati yu abi wan papira di wan spesrutu sma musu luku, fosi wroko tapu. San yu o du? Yu kan skrifi wan sani na tapu a papira fu aksi a sma fu luku en wantewante. San yu o du te yu musu miti wan sma, ma yu lati? A no de fu taki dati yu o bigin waka moro esi. Iya, te yu musu du wan sani èn a ten e gowe libi yu, dan yu e bigin broko yu ede, èn yu e bigin wroko so esi èn so tranga leki yu man. Na so a de te yu musu du wan prenspari sani aladi yu no abi furu ten moro!
2. San na a moro prenspari wroko di tru Kresten musu du na ini a ten disi?
2 A moro prenspari wroko di tru Kresten musu du na ini a ten disi, na fu preiki a bun nyunsu fu a Kownukondre èn fu meki disipel fu sma fu ala kondre (Mat. 24:14; 28:19, 20). Soleki fa a disipel Markus ben skrifi, dan Yesus ben taki dati a wroko disi musu du „fosi”. Dati wani taki, bifo a kaba kon (Mark. 13:10). A no de fu taki, dati a sani dati tru. Yesus ben taki: „A kotiwroko bigi, ma furu wrokoman no de.” Sma no kan draidrai fu du kotiwroko; den musu tyari a nyanyan kon na wán fosi a kotiten pasa.—Mat. 9:37.
3. San furu sma du di den kon si taki furu ten no de moro fu du a preikiwroko?
3 Fu di a preikiwroko prenspari so gi wi, meki wi musu teki prati na a wroko disi so furu leki wi man. A moi fu si taki furu sma e du dati kaba. Son sma tyari kenki kon na ini den libi fu man go dini leki pionier noso leki zendeling. Trawan go dini na wan fu den Bethel-oso di de na heri grontapu. Den abi furu fu du. Kande den libi furu sani na baka, èn kande furu tyalensi o miti den ete. Toku Yehovah e blesi den bogobogo. Wi breiti gi den sma dati. (Leisi Lukas 18:28-30.) Aladi trawan no man go dini leki furuten preikiman, toku den e gebroiki so furu ten leki den man fu du a wroko disi di e kibri sma libi. Disi wani taki tu dati den e yepi den pikin fu den fu kisi frulusu.—Deut. 6:6, 7.
4. Fu san ede a kan muilek gi son sma fu tan hori na prakseri taki a ten e kon syatu?
4 Soleki fa wi si kaba, dan nofo tron sma e bigin hasti densrefi fu du wan sani te den sabi taki a ten e gowe libi den. Wi e libi na ini a ten fu a kaba, èn furu buweisi de di e sori disi. Dati na buweisi na ini Bijbel, èn sosrefi sani di pasa na grontapu (Mat. 24:3, 33; 2 Tim. 3:1-5). Toku nowan sma sabi soifri o ten a kaba o kon. Di Yesus ben taki finifini fu „a marki” di ben o sori taki wi e libi na ini „a kaba fu a grontapu sistema disi”, dan a ben taki a sani disi tu: „Nowan sma sabi a dei nanga a yuru dati, iya, srefi den engel fu hemel nanga a Manpikin no sabi, ma soso a Tata sabi” (Mat. 24:36). Fu di dati de so, meki a muilek gi son sma fu du a preikiwroko yari go yari kon, aladi den e tan hori na prakseri taki a ten e kon syatu. Dati de so, spesrutu te den sma disi e du a wroko furu yari langa kaba (Odo 13:12). Na so yu e firi tu son leisi? Te a abi fu du nanga a wroko di Yehovah Gado nanga Yesus Krestes wani taki wi du na ini a ten disi, dan san kan yepi wi fu tan hori na prakseri taki a ten e kon syatu?
Poti prakseri na Yesus, na Eksempre fu wi
5. Na sortu fasi Yesus sori taki a ben sabi taki furu ten no ben de gi en fu du a diniwroko?
5 A no de fu taki dati fu ala den futuboi fu Gado di ben tan hori na prakseri taki furu ten no de fu du a preikiwroko, Yesus Krestes na a moro bun eksempre. Wan reide fu san ede a ben de so fayafaya, na fu di a ben abi furu fu du na ini wan pisi ten fu dri nanga afu yari nomo. Toku nowan sma noiti no du moro gi a tru anbegi, leki Yesus. A meki sma kon sabi a nen fu en Tata, èn san a Tata o du. A preiki a bun nyunsu fu a Kownukondre, èn a tyari a hoigrifasi nanga den falsi leri fu den kerki fesiman kon na krin. Boiti dati, a tan gi yesi na Yehovah te na dede. A du ala san a ben man fu go na ala sei fu a kondre fu gi sma leri, fu yepi sma, èn fu dresi den sikiwan (Mat. 9:35). Nowan tra sma oiti du so furu na ini so wan syatu pisi ten. Yesus wroko so tranga leki a ben man.—Yoh. 18:37.
6. San ben de a moro prenspari sani gi Yesus?
6 Fu san ede Yesus ben e wroko so tranga na ini a diniwroko fu en? Nanga yepi fu a profeititori fu Danièl, Yesus ben kan sabi omeni ten a ben abi fu klari a diniwroko fu en na a ten di Yehovah ben poti (Dan. 9:27). Sobun, soleki fa a profeititori dati e taki, dan a diniwroko fu en ben o kon na wan kaba na a „afu fu a wiki”, noso baka dri nanga afu yari. Na a bigin fu a yari 33, Yesus go na ini Yerusalem, èn sma gi en bigi grani. Syatu baka dati, Yesus taki: „A yuru doro taki a Manpikin fu libisma musu kisi glori” (Yoh. 12:23). Aladi Yesus ben sabi taki heri esi sma ben o kiri en, toku a no poti ala en prakseri na a sani dati, iya, dati no ben de a moro prenspari reide fu san ede a ben e wroko tranga. Na presi fu dati, a ben e gebroiki ibri okasi fu du a wani fu en Tata, èn fu sori lobi gi tra sma. Fu di a ben abi a lobi dati, meki a tyari den disipel kon na wán, a gi den leri, èn a seni den fu go preiki gi sma. Yesus du dati, so taki den disipel ben kan go doro nanga a wroko di a ben bigin du, èn den ben o du moro bigi wroko leki san a ben du.—Leisi Yohanes 14:12.
7, 8. Sortu krakti a ben abi tapu den disipel di Yesus puru den bedrigiman na ini a tempel? Fu san ede Yesus handri na a fasi dati?
7 Wan sani di ben pasa na ini a libi fu Yesus, e sori krin taki a ben de fayafaya gi a diniwroko fu Gado. A sani dati pasa na a bigin fu a diniwroko fu en, na a ten fu a Paskafesa fu a yari 30. Di Yesus nanga den disipel fu en ben doro na ini Yerusalem, dan den go na ini a tempel. Drape den si sma ’di ben e seri kaw, skapu, nanga doifi; den si sma tu di ben e sidon na tapu den sturu fu den e broko moni’. San Yesus du, èn san den disipel fu en leri fu a sani dati?—Leisi Yohanes 2:13-17.
8 Na a okasi dati, Yesus du èn taki sani di meki taki den disipel fu en memre den profeiti wortu fu a psalm disi di David ben skrifi: „A lobi di mi lobi yu oso, de leki wan faya di e bron na ini mi” (Ps. 69:9). A ben fiti taki den ben memre den wortu disi. Fu san ede? Fu di a sani di Yesus du ben kan tyari bigi problema kon gi en. Te yu luku en bun, dan den man di ben e teki fesi na ini a tempel, namku den priester, den leriman fu wet, nanga tra sma, ben e horibaka gi a kruka bisnis di sma ben e du drape èn di ben e tyari furu wini kon gi den. Yesus tyari a krukafasi fu den man dati kon na krin èn a gens a bisnis fu den. Na so a kon tron wan feanti fu den kerki fesiman fu a ten dati. Soleki fa den disipel ben kon frustan, dan Yesus trutru ben abi ’faya gi na oso fu Gado’, noso gi a tru anbegi. Ma san a wani taki fu de fayafaya?
San a wani taki fu de fayafaya?
9. San a wani taki te wan sma de fayafaya gi wan sani?
9 Te wan sma e wroko fayafaya fu klari wan wroko, dan wi kan taki dati a sma disi e du a wroko nanga en heri ati èn nanga prisiri. A no de fu taki dati na so Yesus ben e du a diniwroko fu en. Dati meki a no e fruwondru wi taki den disipel ben e memre den wortu fu David, di den si san Yesus ben du na a tempel. Ma fu san ede Yesus ben de so fayafaya, èn san meki taki a handri na a fasi dati?
10. Te Bijbel e taki dati wan sma de nanga „faya” gi wan sani, dan san dati wani taki?
10 A wortu di vertaal nanga „faya” na ini a psalm fu David, komoto fu wan Hebrew wortu di nofo tron vertaal nanga „dyarusu” na ini tra Bijbel buku. Son leisi a Nieuwe-Wereldvertaling (Nyun Grontapu-vertaling) vertaal a wortu dati nanga „anbegi [noso dini] en wawan”. (Ex. 20:5; 34:14; Yos. 24:19.) Nofo tron sma e gebroiki a wortu dati te a abi fu du nanga a trowlibi. Neleki fa wan man abi a reti fu fruwakti taki en wefi lobi en wawan, na so Gado abi a reti fu fruwakti taki wi e anbegi en wawan, èn a sa aksi frantwortu fu iniwan sma di e anbegi wan tra gado. Sobun, te Bijbel e taki dati wan sma de nanga faya, dan dati no wani taki nomo dati a sma disi lobi wan sani srefisrefi, neleki fa son sma lobi wan spesrutu sport. A faya di David ben abi gi na oso fu Gado, ben sori taki a no ben lobi te sma ben e anbegi tra gado, noso te den ben e gi Yehovah porinen. David ben e angri fu kibri a bun nen fu Gado, èn fu opo taki gi Gado.
11. San meki taki Yesus handri nanga faya?
11 Di den disipel fu Yesus ben si san a ben du na a tempel, dan den ben sabi wantewante taki a sani dati ben abi fu du nanga den wortu fu David. Yesus no ben e wroko tranga soso fu di a ten ben kon syatu gi en, ma a ben e du dati fu di a ben de nanga faya gi a nen fu en Tata èn gi a tru anbegi. Di a si fa sma ben e gi Gado porinen, èn fa den ben e spotu En, dan a ben abi bun reide fu de fayafaya, èn fu tyari wan kenki kon wantewante. Di Yesus ben si fa den kerki fesiman ben e kwinsi den sakafasi sma, dan a faya di a ben abi meki taki a tyari frulekti kon gi den sma disi. Boiti dati, a krutu den ogri-ati kerki fesiman na wan krakti fasi.—Mat. 9:36; 23:2, 4, 27, 28, 33.
De nanga faya gi a tru anbegi
12, 13. San den kerki fesiman fu Krestenhèit na ini a ten disi du nanga (a) a nen fu Gado? (b) a Kownukondre fu Gado?
12 Na ini a ten disi, sma di e taki dati den e anbegi Gado abi a srefi denki leki den kerki fesiman fu a ten fu Yesus, èn den e du den srefi sani tu. Fu eksempre, hori na prakseri taki a fosi sani di Yesus ben leri den bakaman fu en fu begi gi, abi fu du nanga a nen fu Gado. A ben taki: „Meki yu nen kon santa” (Mat. 6:9). A de so taki den kerki fesiman, spesrutu den wan fu Krestenhèit, e leri sma a nen fu Gado? Den e leri den fu santa a nen dati, noso fu gi a nen grani? Na presi fu dati, den kon nanga falsi leri soleki a leri fu a Dri-wánfasi, a leri di e taki dati a sili fu libisma no man dede, èn a leri fu helfaya. Na so den meki sma kisi wan fowtu denki fu Gado, iya, den meki sma kon denki taki den noiti no o man kon sabi Gado, èn taki a abi ogri-ati fasi. Den kerki fesiman dati gi Gado porinen fu di den du wan lo syen sani èn fu di den e hoigri. (Leisi Romesma 2:21-24.) Boiti dati, den du ala san den man fu no meki sma kon sabi a nen fu Gado, èn den puru a nen dati na ini a Bijbelvertaling fu den. Na so fasi den e tapu sma fu kon krosibei na Gado èn fu tron mati fu en.—Yak. 4:7, 8.
13 Yesus ben leri den bakaman fu en tu fu begi gi Gado en Kownukondre. A ben taki: „Meki yu kownukondre kon. Meki yu wani pasa na grontapu soleki fa a e pasa na hemel” (Mat. 6:10). Aladi den kerki fesiman fu Krestenhèit e taki a begi dati ibri tron baka, toku den e gi sma deki-ati fu horibaka gi politiek organisâsi èn gi tra organisâsi fu libisma. Boiti dati, den e wisiwasi den wan di e meki muiti fu preiki a bun nyunsu èn fu gi kotoigi fu a Kownukondre disi. Leki bakapisi fu dati, furu sma di e taki dati den na Kresten, no wani taki moro fu Gado Kownukondre, èn den no e bribi srefi moro na ini.
14. Fa den kerki fesiman fu Krestenhèit meki a Wortu fu Gado kon swaki?
14 Di Yesus ben e begi Gado, dan a taki krin: „Yu wortu na waarheid” (Yoh. 17:17). Èn bifo Yesus ben go na hemel, a ben sori taki a ben o gi „a getrow èn koni srafu” a frantwortu fu gi a pipel fu en yeye nyanyan (Mat. 24:45). Den kerki fesiman fu Krestenhèit de gaw fu taki dati den e leri sma Gado Wortu, ma a tru taki den du a wroko di a Masra gi den fu du? Nôno. Nofo tron den e leri sma taki den tori na ini Bijbel na anansitori. Na presi taki den kerki fesiman e trowstu den sma nanga yepi fu Gado Wortu, èn na presi taki den e yepi sma fu frustan Bijbel moro bun, den e switi sma yesi nanga leri fu libisma. Boiti dati, den meki a Wortu fu Gado kon swaki, fu di den no wani afrontu den bakaman fu den di e denki taki den e libi na wan fasi di fiti.—2 Tim. 4:3, 4.
15. Fa yu e denki fu ala den ogri di den kerki fesiman du na ini a nen fu Gado?
15 Fu di den kerki fesiman du ala den sani disi na ini a nen fu a Gado fu Bijbel, meki furu reti-ati sma kon bruya, noso den lasi bribi krinkrin na ini Gado èn na ini Bijbel. Den fadon na ini a trapu fu Satan, èn fu na ogri grontapu fu en. Te yu e si èn e yere fu den sani disi di e pasa ibri dei, dan fa yu e firi? Te yu leki futuboi fu Yehovah, e si fa sma e gi Gado porinen èn fa den e spotu en, dan a sani dati e gi yu deki-ati fu du wan sani, a no so? Te yu e si fa sma e bedrigi èn e kwinsi reti-ati sma, dan a sani dati no e gi yu deki-ati fu trowstu den sortu sma dati? Di Yesus ben si fa den sma fu a ten fu en ’ben e pina, èn ben e waka bruyabruya leki skapu di no abi skapuman’, dan a no ben e firi sari nomo gi den sma disi. A „bigin leri den furu sani” (Mat. 9:36; Mark. 6:34). Wi abi ala reide fu de fayafaya gi a tru anbegi, neleki Yesus.
16, 17. (a) San musu gi wi a fasti bosroiti fu wroko tranga na ini a diniwroko? (b) San wi sa luku na ini a tra artikel?
16 Te wi e denki so fu a diniwroko fu wi, dan wi o frustan moro bun san den wortu di na apostel Paulus skrifi na 1 Timoteyus 2:3, 4 wani taki. (Leisi en.) Wi no e wroko tranga na ini a diniwroko soso fu di wi sabi taki wi e libi na ini den lasti dei. Ma wi e wroko tranga fu di wi sabi taki na dati Gado wani. A wani taki sma kon sabi den tru tori fu Bijbel, so taki den kan leri fu dini en, èn kisi blesi. Wi abi a fasti bosroiti fu wroko tranga na ini a diniwroko, ma wi no e du dati soso fu di a ten e kon syatu, ma fu di wi wani gi glori na a nen fu Gado, èn fu di wi wani yepi sma fu kon sabi a wani fu en. Wi de fayafaya gi a tru anbegi.—1 Tim. 4:16.
17 Yehovah blesi wi leki a pipel fu en, iya, a meki wi kon sabi san a o du gi libisma èn gi grontapu. Wi man yepi sma fu kon de koloku, èn fu kon abi wan trutru howpu gi a ten di e kon. Wi kan sori den fa den kan kisi kibri te a sistema fu Satan o kisi pori (2 Tes. 1:7-9). Wi no musu bruya èn wi no musu lasi-ati te a gersi leki a dei fu Yehovah no e doro. Na presi fu dati, wi musu breiti taki ten de ete gi wi fu de fayafaya gi a tru anbegi (Mika 7:7; Hab. 2:3). Fa wi kan kon de fayafaya? Wi sa luku a tori dati na ini a tra artikel.
Yu kan tyari disi kon na krin?
• Fu san ede Yesus ben e wroko tranga na ini a diniwroko fu en?
• Te Bijbel e taki dati wan sma de nanga „faya” gi wan sani, dan san dati wani taki?
• Sortu sani na ini a ten disi musu gi wi deki-ati fu de fayafaya gi a tru anbegi?
[Aksi fu a tori disi]
[Prenki na tapu bladzijde 8]
A moro prenspari sani gi Yesus ben de fu du a wani fu en Tata, èn fu sori lobi gi tra sma
[Prenki na tapu bladzijde 10]
Wi abi ala reide fu de fayafaya gi a tru anbegi