„A e yepi mi fu doro na ati fu sma”

WAN pisi ten pasa, sma fu difrenti kondre ben kon na wan konmakandra di ben hori na ini Porto Alegre, wan foto na a zuidsei fu Brasyonkondre. Na a konmakandra dati, sma ben e taki fu den problema na grontapu. Dusundusun sma fu 135 kondre ben de na a konmakandra. Na ini den pauze, wan grupu Kotoigi fu wan gemeente na ini Porto Alegre go fruteri furu fu den sma di ben kon drape a Kownukondre boskopu fu Bijbel. Fa den ben taki nanga den sma?

Elisabete, wan pionier, e taki: „Wi gebroiki a pikin buku Goed nieuws voor mensen uit alle landen” (Bun nyunsu gi sma fu ala kondre). A ben taki moro fara: „Furu fu den sma di ben kon drape, noiti no ben yere fu a Kownukondre bun nyunsu, ma den ben de klariklari fu arki a boskopu fu wi. Wi taki nanga sma fu Bolifia, China, Fransikondre, India, Israel, nanga Nigeria. Wi gi sonwan fu den sma disi Bijbel publikâsi na ini den eigi tongo, èn den ben breiti nanga den.”

Na ini Meksikow, wan pionier di nen Raúl, abi bun bakapisi tu nanga a buku disi. Wan pisi ten pasa, a ben miti wan Arabiri man di ben abi 80 yari, èn no so langa na fesi a man disi ben lasi en wefi na ini dede. Baka di a man leisi a bladzijde pe a Kownukondre boskopu skrifi na ini Arabiatongo, dan a bigin krei fu di a ben breiti. Fu san ede a ben breiti? A pramisi di Gado e gi taki dede no o de moro, soleki fa a skrifi na Openbaring 21:3, 4, naki en ati trutru di a leisi en na ini en eigi tongo. Wan tra leisi, di Raúl ben e gi okasi kotoigi, dan a miti wan man di ben e taki Potogisitongo. A man dati sosrefi ben lasi wan lobiwan fu en na ini dede, èn dati ben de en manpikin. Raúl meki a leisi a bladzijde fu a buku pe a boskopu skrifi na ini Potogisitongo. Baka di a man leisi en, dan a sori taki a ben wani kon sabi moro fu Bijbel, èn a teki wan Bijbelstudie.

Raúl gebroiki a buku disi fu gi kotoigi na sma di e taki Armenitongo, Sneisitongo, Ingrisitongo, Fransitongo, Doisritongo, Hinditongo, Koreatongo, Mixetongo, Persiatongo, Rosiatongo, nanga Sapotektongo. A e taki: „Mi si o prenspari a de fu gebroiki a buku disi na ini a diniwroko fu mi. A e yepi mi fu doro na ati fu sma, awansi mi no e taki a tongo fu den.”

Fu di moro nanga moro sma e go koiri na tra kondre èn e go tan na tra kondre, meki wi e kisi moro okasi fu miti sma di e taki wan tra tongo. Wi o man fruteri den a Kownukondre boskopu te wi e gebroiki a pikin buku Goed nieuws voor mensen uit alle landen. Yu abi a buku disi na yu?

[Prenki na tapu bladzijde 32]

Raúl nanga a pikin buku di e yepi en fu doro na ati fu sma