Yepi den pikin fu yu nanga den someni problema di e miti den

DEN yonguwan fu wi e kisi hebi tesi. Den e kisi fu du nanga a yeye fu na ogri grontapu fu Satan, èn den musu meki tranga muiti fu basi „den lostu di yongusma abi” (2 Tim. 2:22; 1 Yoh. 5:19). Èn fu di den e meki muiti fu ’memre a Gran Mekiman fu den’, meki sma di no e agri nanga den leri fu Bijbel e spotu den, èn son leisi den e du ogri tu nanga den (Preik. 12:1). Wan brada di nen Vincent e memre fa a ben de di a ben yongu. A e taki: „Fu di mi na wan Kotoigi, meki ala ten sma ben e muilek mi, den ben wani tapu skreki gi mi, noso den ben e suku trobi nanga mi. Son leisi, a ben hebi so te gi mi, taki mi no ben wani go na skoro.” *

Boiti taki den manpikin nanga den umapikin fu wi e kisi fu du nanga den tesi fu grontapu, den musu meki tranga muiti tu fu basi a firi di den e kisi fu de leki tra yonguwan. Cathleen, wan sisa di abi sowan 16 yari, e taki: „A no makriki te trawan feni taki yu de heri tra fasi leki  den.” Wan yongu brada di nen Alan e taki: „Den skoromati fu mi ben gwenti aksi mi fu go koiri nanga den te satra nanga sonde, èn mi ben e angri fu go nanga den.” Boiti dati, son yonguwan e angri fu prei sport na skoro, èn fosi yu denki, a sani disi kan meki taki den e kon abi takru kompe. Wan yongu sisa di nen Tanya, e taki: „Mi lobi prei sport. Den trainer na skoro ben e aksi mi ibri tron baka fu prei gi a skoro. Mi weigri fu prei, ma a no ben makriki gi mi fu du dati.”

Fa yu kan yepi den pikin fu yu nanga den someni problema di den abi? Yehovah gi papa nanga mama a frantwortu fu kweki den pikin fu den èn fu gi den leri (Odo 22:6; Ef. 6:4). Papa nanga mama di abi frede gi Gado, wani yepi den pikin fu den fu kisi na angri fu gi yesi na Yehovah (Odo 6:20-23). A sani disi o gi den pikin deki-ati fu kakafutu gi den tesi fu grontapu, srefi na ten te den papa nanga mama no de makandra nanga den fu si san den e du.

A no makriki gi papa nanga mama fu sorgu gi na osofamiri fu den èn fu tyari den frantwortu di den abi na ini a gemeente na a srefi ten. Son papa noso mama musu kweki den pikin den wawan, èn son papa nanga mama e du dati aladi den e kisi gens fu a patna fu den di no de na bribi. Toku Yehovah wani taki papa nanga mama musu meki ten fu yepi den pikin fu den èn fu gi den leri. Sobun, fa yu kan yepi yu pikin fu kakafutu gi speri di e dwengi den fu du sani di no fiti? Fa yu kan yepi den fu kakafutu gi tesi, èn gi sma di e muilek den ibri dei?

Yepi den fu kon abi wan matifasi nanga Yehovah

Na a fosi presi, den yonguwan fu wi musu kon si Yehovah leki wan trutru Sma. Wi musu yepi den fu ’si a Sma di wi no man si nanga ai’ (Hebr. 11:27). Vincent, di wi ben taki fu en kaba, e memre fa en papa nanga mama yepi en fu kon abi wan matifasi nanga Yehovah. A e taki: „Den leri mi o prenspari a de fu begi. Mi e memre ete taki yonguyongu kaba, mi ben e begi Yehovah ibri neti fosi mi ben e go sribi. Yehovah ben de wan trutru sma gi mi.” Yu e begi nanga den pikin fu yu? Arki san den e taki te den e begi Yehovah. Den e taki densrefi sani ibri tron baka? Den begi fu den e sori fa den e  denki trutru fu Yehovah? Te yu e arki fa den pikin fu yu e begi, dan yu kan kon sabi efu trutru den e kon abi wan matifasi nanga Yehovah.

Wan tra prenspari fasi fa yonguwan kan kon abi wan matifasi nanga Yehovah, na te den e leisi Gado Wortu doronomo. Cathleen, di wi ben taki fu en na a bigin, e taki: „Mi ben leisi a heri Bijbel di mi ben yongu ete, èn dati ben de wan bigi yepi gi mi. Mi kon abi a frutrow taki Yehovah ben o horibaka gi mi ala ten, srefi te sma ben e gens mi.” Den pikin fu yu e leisi Bijbel doronomo?—Ps. 1:1-3; 77:12.

A tru taki ibri pikin e teki a tiri fu en papa nanga mama na wan tra fasi. Èn son leisi te a pikin yongu ete, dan kande a no man frustan spesrutu sani ete di abi fu du nanga na anbegi. Ma efu yonguwan no kisi leri èn efu den no e kweki bun, dan a o muilek gi den fu kon sabi Yehovah leki wan trutru Sma. Papa nanga mama musu poti Gado wortu na ini na ati fu den pikin fu den. Na so den pikin o man sabi fa Yehovah e denki fu wan tori, awinsi pe den de (Deut. 6:6-9). Den pikin fu yu musu bribi taki Yehovah e broko en ede nanga den.

Fa yu kan taki bun nanga den pikin fu yu?

Ete wan tumusi prenspari fasi fa yu kan yepi den pikin fu yu, na te yu e taki nanga den. Ma a no taki yu musu taki nomo nanga yu pikin. Nôno, yu musu poti aksi tu gi den, èn yu musu arki nanga pasensi te den e piki yu, awinsi yu no e agri nanga san den e taki. Anne, wan mama di abi tu boi, e taki: „Mi e poti aksi gi den teleki mi si taki mi e frustan fa den e denki èn san e miti den na ini den libi.” Den pikin fu yu e firi taki yu e arki den te den e taki nanga yu? Tanya, di wi kari na a bigin, e taki: „Mi papa nanga mama ben e arki mi trutru, èn den no ben frigiti den tori di wi ben taki nanga makandra. Den ben sabi den nen fu den pikin na ini mi klas. Den ben gwenti aksi fa a ben de nanga den pikin dati, èn fa a ben de nanga tra tori di wi ben taki kaba nanga makandra.” Fu man  taki bun nanga pikin, dan a de tumusi prenspari fu arki san den e taki, èn yu musu hori den sani dati na prakseri.

Furu osofamiri kon si taki te den e nyan nanga makandra, dan dati na wan bun okasi fu taki bun nanga makandra. Vincent e taki: „Na osofamiri fu wi ben si en leki wan prenspari sani fu nyan nanga makandra. Wi alamala ben musu sidon na a tafra leki osofamiri, solanga dati ben man. Te wi ben e nyan, dan wi no ben mag luku telefisi, wi no ben mag arki radio, èn wi no ben mag leisi buku. Nofo tron, wi ben e taki fu aladei sani, èn ibri dei, dati ben e yepi mi fu blo mi ede pikinso, baka te mi ben kisi fu du nanga den fruferi sani èn nanga den tesi na skoro.” Vincent e taki moro fara: „Fu di mi ben gwenti taki nanga mi papa nanga mama te wi ben e nyan, meki mi no ben e frede fu taki nanga den fu moro seryusu tori.”

Aksi yusrefi a sani disi: ’Omeni leisi na ini wan wiki wi e nyan nanga makandra leki osofamiri?’ Kande yu musu tyari wan tu kenki kon. Dati ben o gi yu moro okasi fu taki nanga den pikin fu yu, a no so?

Fu san ede a bun fu oefen sani nanga den pikin fu yu?

Te yu e hori na Osofamiri Anbegi ibri wiki, dan dati e gi yu okasi tu fu taki nanga den pikin fu yu èn fu yepi den nanga spesrutu problema. Alan, di wi ben kari kaba, e taki: „Te mi papa nanga mama ben e studeri nanga wi, dan den ben e pruberi fu kon sabi fa wi e denki fu sani. Den ben e taki fu sani di ben fiti gi a situwâsi fu wi.” A mama fu Alan e taki: „Son leisi, wi ben e oefen wan tu sani nanga den pikin. A sani disi yepi den pikin fu wi fu kon sabi fa den kan opo taki gi a bribi fu den, èn fa den kan sori trawan taki den sani di den e bribi, na tru tori. Boiti dati, den ben sabi soifri san fu du te den ben e kisi fu du nanga problema.”

Iya, te tra yonguwan e dwengi den pikin fu yu fu du sani di no fiti, dan nofo tron den musu du moro leki fu weigri nomo èn waka gowe. Den musu man sori trawan fu san ede den e du son sani èn fu san ede den no e du son sani. Den musu sabi tu san fu du te trawan e spotu den fu di den na Yehovah Kotoigi. Efu den no man sori trawan fu san ede den e bribi son sani, dan  a o muilek gi den fu horibaka fayafaya gi a tru anbegi. Te yu e oefen nanga den pikin fu yu, dan dati kan gi den deki-ati fu horibaka gi a bribi fu den.

A  faki na tapu bladzijde 18 e taki fu wan tu sani di yu kan oefen te yu e hori na Osofamiri Anbegi. Te yu e oefen nanga den pikin fu yu, dan poti aksi gi den di sa dwengi den fu denki bun fosi den e gi piki, so taki den kan sabi san fu du te den situwâsi disi e miti den trutru. Te yu e oefen nanga den pikin fu yu, dan a bun fu poti prakseri na wan tu Bijbel eksempre, èn luku san den pikin kan leri fu den tori dati. Te yu e gi den pikin leri na so wan fasi te den de na oso, dan dati sa yepi den fu kakafutu gi den tesi di den e kisi na skoro, èn na tra presi.

Den pikin e firi koloku te den de na oso?

Den pikin fu yu e prisiri fu kon na oso baka te den komoto na skoro? Efu dati de so, dan dati sa yepi den fu kakafutu gi den tesi di den e kisi ibri dei. Wan sisa di de wan memre fu wan Bethelfamiri, e taki: „Di mi ben yongu ete, dan a ben de wan bigi yepi gi mi taki mi ben e firi switi te mi ben de na oso. Awinsi o takru a situwâsi ben de na skoro, mi ben sabi taki te mi ben kon na oso, ala sani ben o bun baka.” Fa sani de na yu oso? A de wan presi pe ’faya-ati, trobi, nanga pratifasi’ de, noso a de wan presi pe ’lobi, prisiri, nanga vrede’ de? (Gal. 5:19-23) Efu a de so nofo tron taki vrede no de na yu oso, dan yu e meki tranga muiti fu kon sabi sortu kenki yu musu tyari kon so taki den pikin fu yu kan firi switi te den de na oso?

Wan tra fasi fa yu kan yepi yu pikin nanga den tesi di den e kisi, na te yu e seti sani so taki den kan abi demakandra nanga sma di kan gi den deki-ati. Fu eksempre, kande yu kan gi wan tu lepi brada nanga sisa wan kari fu abi prisiriten makandra nanga yu osofamiri. Noso kande yu kan kari a kring-opziener noso tra furuten dinari fu kon nyan na yu oso. Kande yu sabi wan tu brada noso sisa di e dini leki zendeling noso di e dini na Bethel. A ben o bun te yu e meki den pikin fu yu tron mati nanga den brada nanga sisa dati. Kande den kan skrifi brifi seni gi makandra, kande den kan seni brifi gi makandra nanga yepi fu Internet, noso kande den kan bel makandra. Den sortu mati dati kan yepi den pikin fu yu fu meki reti pasi gi den futu èn fu du muiti fu doro marki na ini a tru anbegi. Prakseri fa Paulus ben de wan deki-ati gi Timoteyus (2 Tim. 1:13; 3:10). Paulus ben de wan bun mati fu Timoteyus, èn dati yepi Timoteyus fu tan du muiti fu doro marki na ini a tru anbegi.—1 Kor. 4:17.

Prèise den pikin fu yu

Yehovah breiti te yonguwan e du san reti, awinsi sortu tesi den e kisi fu a grontapu fu Satan (Ps. 147:11; Odo 27:11). A no de fu taki, dati yu e prisiri tu te yu e si taki den yonguwan fu wi e teki koni bosroiti (Odo 10:1). Meki den pikin fu yu sabi taki yu lobi den, èn de klariklari fu prèise den na wan lobi-ati fasi. Yehovah e gi papa nanga mama wan bun eksempre. Di Yesus teki dopu, dan Yehovah taki: „Yu na mi Manpikin, a lobiwan; na yu mi feni bun” (Mark. 1:11). A ben musu de so taki a dyaranti disi di en Tata ben gi en, ben gi Yesus a krakti fu kakafutu gi den tesi di a ben o kisi ibri tron baka! Meki den pikin fu yu sabi tu taki yu lobi den, èn prèise den gi den sani di den e du.

A tru taki a no ala ten yu o man kibri den pikin fu yu gi sma di wani dwengi den fu du sani di no fiti, gi sma di wani du ogri nanga den, noso gi sma di e spotu den. Ma toku yu kan de wan bigi yepi gi yu pikin. Fa yu kan yepi den? We, yu kan yepi den fu kon abi wan matifasi nanga Yehovah. Gi den pikin a firi taki den kan taki nanga yu fu iniwan sani di e hari den prakseri. Hori na Osofamiri Anbegi na wan fasi di e tyari wini kon gi den, èn meki den pikin fu yu firi koloku te den de na oso. Te yu e du den sani disi, dan dati sa yepi den pikin fu kakafutu gi den someni tesi di den e kisi.

[Futuwortu]

[Faki/​Prenki na tapu bladzijde 18]

 OEFEN NANGA DEN PIKIN FU YU

Disi na wan tu situwâsi di kan miti den yonguwan fu wi. A ben o bun te yu e oefen wan tu fu den eksempre disi te yu e hori na Osofamiri Anbegi.

▸ Wan trainer e aksi yu umapikin fu prei sport gi a skoro.

▸ Te a boi fu yu e komoto na skoro wan dei, dan sma wani gi en wan sikaret fu smoko.

▸ Wan tu boi e taigi a boi fu yu taki den o fon en efu den e si taki a e preiki baka.

▸ Te yu umapikin e preiki oso fu oso, dan a e miti wan pikin fu en skoro.

▸ Yu umapikin musu tanapu na fesi a klas, èn a musu fruteri fu san ede a no e gi a fraga odi.

▸ Doronomo wan boi e spotu yu manpikin fu di a de wan Kotoigi.

[Prenki na tapu bladzijde 17]

Den pikin fu yu e leisi Bijbel doronomo?

[Prenki na tapu bladzijde 19]

Yu e kari lepi brada nanga sisa fu kon abi prisiriten makandra nanga yu osofamiri?