Abi prisiri na ini a wroko di yu e du fu meki disipel
Abi prisiri na ini a wroko di yu e du fu meki disipel
„Fu dati ede, go na sma . . . èn meki den tron disipel.”—MAT. 28:19.
1-3. (a) Fa furu preikiman feni en fu hori wan bijbelstudie? (b) Na sortu aksi wi sa poti prakseri?
„DEN erfu wiki di pasa, mi studeri Bijbel nanga wan osofamiri fu Pakistan”, na so wan sisa ben skrifi. A sisa disi e dini na ini wan Hindi grupu na ini Amerkankondre. A sisa disi e taki moro fara: „Yu kan frustan taki mi nanga den sma disi kon tron mati. Mi ai e furu nanga watra te mi e prakseri taki dyonsro den sma disi o drai go baka na Pakistan. Mi no e krei soso fu di mi o misi den te den gowe, ma mi e krei tu fu di a ben gi mi prisiri taki mi ben man yepi den sma disi fu kon sabi Yehovah.”
2 Oiti yu prisiri tu fu di yu studeri Bijbel nanga wan sma? Yesus nanga den disipel fu en fu a fosi yarihondro ben e kisi furu prisiri fu a wroko di den ben e du fu meki disipel. Di den 70 disipel di Yesus ben gi leri, drai kon baka na en fu fruteri en taki den ben abi bigi prisiri na ini a preikiwroko, dan Yesus srefi „ben prisiri pasa marki nanga yepi fu a santa yeye” (Luk. 10:17-21). Na so a de tu na ini a ten disi taki furu preikiman abi bigi prisiri na ini a wroko di den e du fu meki disipel. Na ini 2007, den preikiman wroko tranga èn den ben abi prisiri na ini a preikiwroko. Te yu e luku en bun, dan den hori sowan siksi nanga afu milyun bijbelstudie ibri mun!
3 Ma son preikiman no tesi a switi ete fu hori wan bijbelstudie. Kande trawan fu den no hori wan bijbelstudie wan tu yari langa kaba. Sortu tyalensi kan miti wi te wi e pruberi fu hori wan bijbelstudie nanga wan sma? San wi kan du te den tyalensi dati e miti wi? Sortu blesi wi sa kisi te wi e du ala san wi man fu gi yesi na a komando disi di Yesus ben gi fu „go na sma fu ala kondre èn meki den tron disipel”?—Mat. 28:19.
Tyalensi di kan meki wi lasi prisiri
4, 5. (a) Fa furu sma na son presi fu grontapu feni a Bijbel boskopu fu wi? (b) Sortu tyalensi e miti preikiman na ini son kondre?
4 Na son kontren fu grontapu, a makriki fu feni sma di wani teki den publikâsi fu wi, èn di de klariklari fu studeri Bijbel nanga wi. Wan trowpaar fu Australia ben e dini wan pisi ten na ini Sambia, èn den sma disi ben skrifi: „Den sani di wi yere fu a kondre dati tru. A switi srefisrefi fu preiki na ini Sambia. A stratiwroko e gi prisiri trutru! Sma e kon taki nanga wi, èn sonwan fu den e aksi wi tijdschrift di e taki fu spesrutu tori.” Wan tu yari pasa, den brada nanga sisa na ini Sambia hori moro leki 200.000 bijbelstudie. Te yu e luku en bun, dan ibri preikiman ben hori moro leki wán bijbelstudie.
5 Ma na tra presi, a no makriki gi preikiman fu feni sma di wani teki den publikâsi fu wi, noso di wani studeri Bijbel doronomo. Fu san ede? Nofo tron den preikiman no e miti sma na oso, èn den sma di de na oso, nofo tron no wani taki fu kerkitori. Kande den sma disi kweki na ini wan osofamiri pe sma no e go na kerki, noso kande den e tegu gi na hoigrifasi di den e si na ini den falsi bribi. Furu sma ondrofeni taki kerki fesiman fu falsi bribi pina den fu di den libi den meki den waka bruyabruya neleki skapu sondro skapuman (Mat. 9:36). Dati meki wi kan frustan fu san ede den sma disi no wani taki fu Bijbel.
6. Fu san ede son preikiman no man du so furu moro na ini a preikiwroko?
6 Son preikiman di e wroko tranga na ini a preikiwroko, e kisi fu du nanga wan tra tyalensi di kan meki den lasi prisiri. Den preikiman disi ben e wroko tranga fosi na ini a preikiwroko, ma now den no man du so furu moro fu di den kon siki, noso fu di den kon owru. Ma son leisi, wisrefi kan meki taki wi e lasi prisiri na ini a preikiwroko. Fu eksempre, yu feni taki yu no abi a koni fu hori wan bijbelstudie? Kande yu e firi leki Moses di Yehovah ben seni en fu go taki nanga Farao. Moses ben taki: „Ma Yehovah, mi no man taki grati. Noiti mi ben man taki grati” (Ex. 4:10). Wan reide fu san ede son sma feni taki den no man du spesrutu sani, na fu di den frede taki den no sa abi bun bakapisi. Kande na fu di wi e frede taki wan sma no sa tron wan disipel, meki wi e bosroiti fu no hori wan bijbelstudie nanga sma. San wi musu du te den sortu tyalensi disi e miti wi?
Sreka yu ati
7. Fu san ede Yesus ben de fayafaya na ini a diniwroko fu en?
7 A fosi sani di wi musu du, na taki wi musu sreka wi ati. Yesus ben taki: „San furu na ati, na dati mofo e taki” (Luk. 6:45). A sani di ben e meki taki Yesus ben de fayafaya na ini a preikiwroko fu en, na fu di a ben e broko en ede trutru nanga sma. Fu eksempre, di a ben si taki den Dyu ben lasi bribi na ini Gado, dan „a ben sari den”. Yesus ben taigi den disipel fu en: „A kotiwroko bigi . . . Begi a Masra fu a kotiwroko meki a seni wrokoman fu go du a kotiwroko fu en.”—Mat. 9:36-38.
8. (a) Fu sortu sani wi musu prakseri bun? (b) San wi kan leri fu den sani di wan bijbelstudie taki?
8 Te wi e teki prati na a wroko fu meki disipel, dan wi musu prakseri bun fa wisrefi kisi wini fu di wan sma ben teki en ten fu studeri Bijbel nanga wi. Prakseri den sma tu di wi sa miti na ini a preikiwroko, èn fa den sa kisi wini te den e yere a boskopu di wi e preiki. Wan uma ben skrifi wan brifi seni go gi a bijkantoro fu a kondre pe a e tan. Na ini a brifi dati a ben e taki: „Mi wani taigi unu taki mi abi bigi warderi gi den Kotoigi di e kon gi mi leri na mi oso. Mi sabi taki son leisi den no sabi san fu du nanga mi, fu di mi e poti so furu aksi gi den, èn ala ten mi e hori den tumusi langa. Ma den abi pasensi nanga mi, èn den de klariklari fu meki mi kon sabi den sani di den leri. Mi e taki Yehovah nanga Yesus tangi taki mi kon leri sabi den sma disi.”
9. Na sortu sani Yesus ben poti prakseri, èn fa wi kan teki na eksempre fu en?
9 A no de fu taki dati a no ala sma ben teki a kari di Yesus ben gi fu tron wan bakaman fu en (Mat. 23:37). Son sma ben e waka na en baka fu wan pisi ten, ma te fu kaba den no ben wani bribi den sani di a ben e leri den, èn den „no ben wani waka moro nanga en” (Yoh. 6:66). Ma Yesus no meki a sani dati gi en a firi taki a boskopu fu en no ben de prenspari. Aladi furu fu den siri di Yesus sai no meki froktu, toku a tan poti prakseri na a bun wroko di a ben e du. A ben si taki a nyanyan na ini den gron ben lepi kaba fu koti, èn a kisi furu prisiri fu di a ben man yepi fu du a kotiwroko. (Leisi Yohanes 4:35, 36.) Na presi taki wi e luku soso a drei gron pe noti no e gro, a ben o moro bun fu luku a nyanyan di de na den bon. A ben o bun te wi e du a preikiwroko fu wi nanga a denki dati, a no so? Meki wi go luku fa wi kan du dati.
Preiki nanga a marki fu bigin wan bijbelstudie
10, 11. San yu kan du fu tan abi prisiri na ini a diniwroko?
10 Nofo tron wan gronman e sai siri nanga a marki fu koti nyanyan. Na so a de tu taki wi musu preiki nanga a marki fu bigin bijbelstudie. Ma san yu kan du te yu e preiki doronomo, ma yu e miti wan tu sma nomo na oso, noso yu no e miti den moro te yu e tyari gobaka? A sani disi kan meki yu lasi-ati. Yu musu tapu fu preiki oso fu oso? Kwetikweti! Te nanga now, a de so taki a wroko disi di wi e du langa ten kaba, na a moro prenspari fasi fa wi e miti furu sma.
11 Ma fu man tan abi prisiri na ini a preikiwroko, dan kande yu kan pruberi fu preiki na tra fasi. Fu eksempre, oiti yu pruberi fu du stratiwroko, noso fu gi kotoigi na sma na den wrokope? Kande yu kan gi kotoigi nanga yepi fu telefon, noso kande yu kan aksi den sma di yu gi kotoigi kaba fu gi yu a telefon-nomru fu den. Na so yu kan bèl den ten na ten fu taki nanga den. Te yu e horidoro na ini a diniwroko fu yu èn te yu e pruberi fu fiti yusrefi, dan yu sa feni sma di wani arki a Kownukondre boskopu. A sani disi sa gi yu prisiri.
San fu du te sma no wani arki?
12. San wi kan du te furu sma na ini a kontren fu wi no wani arki a boskopu fu wi?
12 Fa a de te furu sma na ini a kontren fu yu no wani taki fu kerkitori? Kande yu kan opo wan tori di sa hari den prakseri. Luku san na apostel Paulus ben skrifi gi den Kresten brada nanga sisa fu en na ini Korente: „Gi den Dyu mi kon de leki wan Dyu . . . Gi den sma di no abi wet, mi kon de leki wan sma di no abi wet, aladi mi no de sondro a wet fu Gado.” Fu san ede Paulus ben fiti ensrefi na den sma disi? A ben taki: „Mi tron ala sani gi ala sortu sma, so taki mi kan du iniwan sani di de fanowdu fu frulusu awinsi wan tu sma nomo” (1 Kor. 9:20-22). Neleki Paulus wi kan taki tu fu sani di e hari a prakseri fu den sma na ini a kontren fu wi. Furu sma di no e go na kerki wani kon abi wan moro bun osofamiri-libi. Kande den wani kon abi wan bun marki na ini a libi. Kande wi kan fruteri den sma disi a Kownukondre boskopu na so wan fasi, taki a sa hari den prakseri.
13, 14. San wi kan du fu kisi moro prisiri na ini a wroko di wi e du fu meki disipel?
13 Furu preikiman kon abi moro prisiri na ini a wroko di den e du fu meki disipel. Dati de so srefi na ini kontren pe a gersi leki furu sma no wani arki a boskopu. Fa dati du kon? Fu di den preikiman disi leri wan tra tongo. Wan trowpaar di pasa 60 yari kaba, kon si taki dusundusun Sneisi studenti nanga den osofamiri fu den ben e libi na ini a kontren pe a gemeente ben e preiki. A masra e taki: „A sani disi gi wi deki-ati fu leri taki Sneisitongo. Disi ben wani taki dati wi ben abi fu teki ten ibri dei fu leri a tongo. Ma now wi e hori furu bijbelstudie nanga Sneisi na ini a kontren fu wi.”
14 Awansi yu no man leri wan tra tongo, toku yu kan abi bun bakapisi. Kande yu kan gebroiki a buku Goed nieuws voor mensen uit alle landen (Bun nyunsu gi sma fu ala kondre) fu gi kotoigi na sma di e taki wan tra tongo. Nofo tron yu kan kisi publikâsi tu di skrifi na ini a tongo di den sma di yu e miti e taki. A no de fu taki dati wi musu meki moro muiti fu taki nanga sma di e taki wan tra tongo èn di abi wan tra kulturu. Ma no frigiti a gronprakseri disi di skrifi na ini Gado Wortu: „A sma di e sai bogobogo, sa koti bogobogo tu.”—2 Kor. 9:6.
A heri gemeente e yepi
15, 16. (a) Fu san ede wi kan taki dati a heri gemeente e yepi fu meki disipel? (b) Fa den owrusma na ini a gemeente e yepi nanga a wroko di wi e du fu meki disipel?
15 Ma a no wán sma nomo e meki wan disipel. Fu taki en leti, a heri gemeente e yepi fu du dati. Fu san ede dati de so? Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Èn a tru taki te bijbelstudie e go na den konmakandra fu wi, dan a e naki den ati fu si fa den sma drape e sori lobi gi makandra. Wan bijbelstudie ben skrifi: „Mi trutru lobi fu go na den konmakandra. Den sma drape abi switifasi trutru!” Yesus ben taki dati den sma di e tron bakaman fu en, kande sa kisi gens fu den famiriman fu den. (Leisi Mateyus 10:35-37.) Ma a ben pramisi taki den ben o feni bun furu ’brada, sisa, mama, nanga pikin’ na ini a gemeente.—Mark. 10:30.
16 Spesrutu den owru brada nanga sisa fu wi e yepi bijbelstudie fu go na fesi. Fa so? Srefi te wan tu owrusma no man hori bijbelstudie, toku den moi piki di den e gi na den konmakandra, e tranga a bribi fu ala sma di e yere den. A bun nen di den abi leki sma di „e libi na wan regtfardiki fasi” omeni yari langa, de wan blesi gi a gemeente, èn a e hari reti-atisma kon na ini na organisâsi fu Gado.—Odo 16:31.
San kan yepi wi fu no frede moro?
17. San wi kan du te wi feni taki wi no abi a koni fu hori bijbelstudie?
17 Fa a de te yu feni taki yu no abi a koni fu du a wroko? Memre fa Yehovah ben yepi Moses. Yehovah ben gi Moses en santa yeye èn sosrefi wan sma di ben o wroko makandra nanga en. A sma dati ben de en brada, Aron (Ex. 4:10-17). Yesus ben pramisi taki a yeye fu Gado ben o horibaka gi wi na ini a preikiwroko (Tori. 1:8). Boiti dati, Yesus ben seni den disipel fu en fu go preiki tu na tu (Luk. 10:1). Dati meki te yu feni en muilek fu hori wan bijbelstudie, dan begi Gado fu gi yu koni nanga yepi fu en santa yeye. Te yu du dati, dan wroko makandra nanga wan lepi preikiman di kan gi yu deki-ati, èn teki leri fu a preikiman dati. Te yu e prakseri taki Yehovah bosroiti fu meki „den swaki sma fu grontapu” du a tumusi aparti wroko disi, dan dati sa tranga a bribi fu yu.—1 Kor. 1:26-29.
18. San wi kan du te wi frede taki wi no sa abi bun bakapisi?
18 San wi kan du te wi e frede taki wi no sa abi bun bakapisi? A bun te wi e memre taki a wroko di wi e du fu meki disipel, a no a srefi leki te wi e bori wan nyanyan. Nofo tron wán sma nomo e bori a nyanyan dati. Ma te wi e meki disipel, dan nofotron dri sma abi wan prati na ini a wroko dati. Yehovah e du a moro prenspari wroko, fu di a e hari sma kon na en (Yoh. 6:44). Wi nanga tra sma na ini a gemeente e du ala san wi man fu gi a bijbelstudie bun leri, so taki a kan go na fesi. (Leisi 2 Timoteyus 2:15.) Èn a bijbelstudie musu du den sani di a e leri (Mat. 7:24-27). Te wan sma e tapu fu studeri Bijbel, dan a sani dati kan meki wi firi brokosaka. Wi e howpu taki den bijbelstudie e teki a yoisti bosroiti, ma ibri sma sa musu „gi Gado frantwortu”.—Rom. 14:12.
Sortu blesi wi sa kisi?
19-21. (a) Sortu blesi wi sa kisi te wi e hori bijbelstudie? (b) Fa Yehovah e si ala Kresten di e teki prati na a preikiwroko?
19 Te wi e studeri Bijbel nanga sma, dan dati e yepi wi fu tan suku a Kownukondre fosi. A sani disi e yepi wi tu fu frustan Gado Wortu moro bun, èn wi e kisi moro warderi tu gi a Wortu disi. Fu san ede dati de so? Wan pionier di nen Barak e fruteri: „Te yu e hori bijbelstudie, dan dati e dwengi yu fu studeri Gado Wortu moro bun. Mi kon si taki misrefi musu abi wan tranga bribi, fosi mi kan gi wan tra sma bun leri.”
20 Efu yu no abi wan bijbelstudie, dan dati wani taki dati Gado no e warderi a diniwroko fu yu? Kwetikweti! Yehovah trutru e warderi a muiti di wi e du fu prèise en. Ala den Kresten di e teki prati na a preikiwroko, e „wroko makandra nanga Gado”. Ma te wi e hori wan bijbelstudie, dan wi sa si fa Gado e meki a siri di wi sai gro kon tron wan bon. A sani dati sa meki wi kisi moro prisiri na ini a diniwroko fu wi (1 Kor. 3:6, 9). Wan pionier di nen Amy, ben taki: „Te yu e si fa wan bijbelstudie e go na fesi, dan yu de nanga tangi trutru taki Yehovah gebroiki yu fu gi a sma dati wan tumusi moi presenti. Iya, yu gi a sma dati na okasi fu kon sabi Yehovah èn fu kisi têgo libi.”
21 Te wi e du ala san wi man fu hori bijbelstudie, dan dati sa yepi wi fu tan dini Gado na ini a ten disi, èn a sa tranga a howpu di wi abi fu libi na ini a nyun grontapu. Te wi e meki a muiti disi, dan Yehovah sa horibaka gi wi, èn kande wi sa man yepi den wan di e arki wi fu kisi kibri. (Leisi 1 Timoteyus 4:16.) A sani dati ben o gi wi prisiri trutru!
Yu e memre disi ete?
• Sortu tyalensi kan tapu son sma fu hori bijbelstudie?
• San wi kan du te furu sma na ini a kontren fu wi no wani arki a boskopu fu wi?
• Sortu blesi wi sa kisi te wi e hori bijbelstudie?
[Aksi fu a tori disi]
[Prenki na tapu bladzijde 9]
Yu e pruberi fu preiki na tra fasi, fu man feni reti-atisma?