Yehovah e luku wi fu di a wani taki sani waka bun nanga wi

„Yehovah en ai e luku heri grontapu fu sori en krakti fu a bun fu den sma di lobi en nanga den heri ati.”—2 KRON. 16:9.

1. Fu san ede Yehovah e ondrosuku wi?

YEHOVAH na a moro bun Papa di de. A sabi wi so bun, taki a sabi srefi „ala sani di [wi] e prakseri fu go du” (1 Kron. 28:9). Ma a no e ondrosuku wi soso fu feni fowtu na wi (Ps. 11:4; 130:3). Na presi fu dati, a lobi wi, èn fu dati ede a wani kibri wi gi iniwan sani di kan pori a matifasi di wi abi nanga en. A wani kibri wi tu gi iniwan sani di kan meki taki wi no e kisi têgo libi.—Ps. 25:8-10, 12, 13.

2. Gi a bun fu suma Yehovah e gebroiki en krakti?

² Yehovah makti moro leki iniwan sma, èn a e si ala sani. Dati meki te den futuboi fu en di e anbegi en nanga den heri ati, e suku yepi na en, dan a kan yepi den. Boiti dati, a kan gi den deki-ati tu fu pasa den tesi fu den. „Yehovah en ai e luku heri grontapu fu sori en krakti fu a bun fu den sma di lobi en nanga den heri ati”, na so 2 Kroniki 16:9 e taki. Luku taki Yehovah e gebroiki a krakti fu en fu a bun fu den wan di e dini en nanga den heri ati, noso nanga wan ati di soifri èn di krin. A no e du dati gi den wan di e bedrigi trawan èn di e hoigri.—Yos. 7:1, 20, 21, 25; Odo 1:23-33.

 Waka nanga Gado

3, 4. San a wani taki fu ’waka nanga Gado’? Sortu Bijbel eksempre e yepi wi fu kon frustan a tori disi moro krin?

³ Furu sma no man frustan taki a Mekiman fu a bigi hemel nanga grontapu e gi libisma na okasi fu waka nanga en. Ma dati na soifri san Yehovah wani wi fu du. Na ini Bijbel ten, Heinok nanga Noa ben e ’waka nanga Gado’ (Gen. 5:24; 6:9). Moses „ben tan tanapu kánkan leki a ben si a Sma di wi no man si nanga ai” (Hebr. 11:27). Kownu David ben e waka nanga sakafasi nanga en hemel Tata. A ben taki: „Fu di [Yehovah] de na mi reti-anusei, meki den no sa meki mi degedege.”—Ps. 16:8.

⁴ A no de fu taki dati wi no kan hori Yehovah anu trutru èn waka nanga en. Ma wi kan du dati na wan agersi fasi. Fa so? A psalm skrifiman Asaf ben skrifi: „Mi de nanga yu doronomo; yu grabu mi reti-anu hori. Nanga yu rai yu sa tiri mi” (Ps. 73:23, 24). Fu taki en leti, wi e waka nanga Yehovah te wi e gi yesi na den rai di a e gi wi. Wi e kisi den rai disi nanga yepi fu a Wortu fu en, èn nanga yepi fu „a getrow èn koni srafu”. Disi na den moro prenspari fasi fa Yehovah e gi wi rai.—Mat. 24:45; 2 Tim. 3:16.

5. Fa Yehovah de leki wan papa di e luku den wan di e dini en nanga den heri ati? Fa wi musu firi gi en?

⁵ Fu di Yehovah lobi den wan di e waka nanga en, meki a e tan luku den neleki fa wan papa e du dati. Yehovah e sorgu den, a e kibri den, èn a e gi den leri. Gado e taki: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Ps. 32:8). Aksi yusrefi: ’Mi e waka nanga Yehovah, aladi mi e hori en anu? Mi e arki den koni sani di a e leri mi, aladi mi sabi taki a e luku mi fu di a lobi mi? Den sani di mi e denki, e taki, èn e du e sori taki mi sabi taki Yehovah de nanga mi? Èn te mi e meki fowtu, dan mi e si Yehovah leki wan Gado di no wani abi noti fu du nanga mi èn di no abi switifasi? Noso mi e si en leki wan papa di wani yepi sma di abi berow fu kon abi wan bun matifasi baka nanga en?’—Ps. 51:17.

6. Fa Yehovah bun moro leki wi trutru papa?

⁶ Son leisi, Yehovah kan yepi wi srefi bifo wi du wan ogri. Fu eksempre, kande a e si taki na ati fu wi di kan kori wi, e bigin angri gi sani di no fiti (Yer. 17:9). Te dati de so, dan a kan handri moro esi leki wi trutru papa. Dati e kon fu di en „ai di e brenki” man si te na ini wi ati fu ondrosuku den prakseri fu wi (Ps. 11:4; 139:4; Yer. 17:10). Luku fa Gado handri nanga Baruk di a ben kon abi wan fowtu denki. A man disi ben de a sekretarsi fu a profeiti Yeremia, èn a ben de sosrefi wan bun mati fu en.

A ben de wan trutru papa gi Baruk

7, 8. (a) Suma ben de Baruk, èn sortu fowtu denki a bigin kisi na ini en ati? (b) Fa Yehovah ben e broko en ede nanga Baruk, neleki wan lobi-ati papa?

⁷ Yeremia ben kisi a muilek wroko fu tyari krutuboskopu fu Yehovah gi den sma na ini Yuda. Baruk, wan heri bun skrifiman, ben e wroko makandra nanga Yeremia, èn a ben e du a wroko disi nanga en heri ati (Yer. 1:18, 19). Ma baka wan pisi ten, Baruk, di kande ben de fu wan prenspari famiri, bigin suku „bigi sani” gi ensrefi. Kande a bigin angri fu kisi biginen, noso kande a bigin angri fu kon gudu. Awansi fa a no fa, Yehovah ben si taki Baruk ben e bigin kisi wan takru denki. Nanga yepi fu Yeremia, Yehovah poti prakseri na a tori dati wantewante. A taigi Baruk: „Yu taki: ’Helu fu mi now, bika Yehovah poti sari na tapu a pen fu mi! Mi kon weri fu den soktu fu mi, èn wan rostupresi mi no feni.’” Ne Gado taigi en: „Yu e tan suku bigi sani gi yusrefi. No tan suku den.”—Yer. 45:1-5.

⁸ Aladi Yehovah piri-ai gi Baruk, toku A no ben atibron na en tapu. Yehovah ben e broko en ede nanga Baruk, neleki fa wan papa e broko en ede nanga a pikin fu en. Soleki fa a sori, dan Gado ben si taki den sani di a man disi ben wani, no ben e sori taki a ben abi wan takru ati. Yehovah ben sabi tu taki heri esi Yuda nanga Yerusalem ben o kisi pori, èn a no ben wani taki Baruk ben musu naki futu na a prenspari ten dati. Sobun, fu meki a futuboi fu en kon si sani krin baka, meki Gado e memre en taki A  ben o „tyari wan rampu kon na tapu ala skin”. Gado taigi Baruk tu taki efu a ben o handri nanga koni, dan a ben o tan na libi (Yer. 45:5). Fu taki en leti, Gado ben taki: ’Baruk, denki bun. Hori na prakseri san o pasa dyonsro nanga den trangayesi sma fu Yuda nanga Yerusalem. Tan gi yesi na mi so taki yu kan tan na libi! Mi sa kibri yu.’ Soleki fa a sori, dan Yehovah doro na ati fu Baruk, fu di Baruk gi yesi na en. Leki bakapisi fu dati, a tan na libi di Yerusalem kisi pori sowan 17 yari baka dati.

9. Fa yu ben o piki den aksi na ini a paragraaf?

⁹ Aladi yu e luku a tori fu Baruk, dan poti prakseri na den aksi nanga den bijbeltekst disi: Te yu e luku a fasi fa Yehovah handri nanga Baruk, dan san dati e sori fu Yehovah èn fu a fasi fa a e firi gi den futuboi fu en? (Leisi Hebrewsma 12:9.) Te wi e prakseri taki wi e libi na ini muilek ten, dan san wi kan leri fu a rai di Gado gi Baruk? San wi kan leri fu a fasi fa Baruk handri? (Leisi Lukas 21:34-36.) Fa Kresten owruman kan de leki Yeremia di ben e sori taki Yehovah e broko en ede nanga den futuboi fu En?—Leisi Galasiasma 6:1.

A fasi fa a Manpikin e handri e sori taki a Papa lobi wi

10. Fu san ede Yesus man tyari a frantwortu di a abi leki Edeman fu a Kresten gemeente?

¹⁰ Te wi e luku fa den profeiti nanga tra futuboi fu Yehovah ben e handri nanga a pipel fu en na ini a ten bifo Krestes, dan dati na wan buweisi taki A ben lobi den futuboi fu en. Na ini a ten disi, a moro prenspari sma di e sori a lobi disi, na Yesus Krestes, na Edeman fu a Kresten gemeente (Ef. 1:22, 23). Dati meki a buku Openbaring e agersi Yesus nanga wan pikin skapu di abi „seibi ai, èn den ai na den seibi yeye fu Gado di a seni go na heri grontapu” (Openb. 5:6). Iya, fu di Yesus kisi bogobogo fu a yeye fu Gado, meki a man si sani krin dorodoro. A e si tu suma wi de na ini wi ati, èn a sabi ala sani.

11. Sortu frantwortu Krestes abi? Fa a e handri na a srefi fasi nanga wi leki fa en Tata ben du dati?

¹¹ Ma neleki Yehovah, Yesus a no wan skowtu na hemel. A e luku wi na wan lobi-ati fasi. Wan fu den nen di Yesus abi, na „Têgo Tata”. A nen disi e meki wi prakseri a frantwortu di a sa abi fu gi têgo libi na ala sma di e bribi na ini en (Yes. 9:6). Boiti dati, te lepi Kresten de klariklari fu yepi trawan, dan leki Edeman fu a Kresten gemeente, Krestes kan meki den Kresten disi trowstu den wan di de na nowtu, noso den kan gi den rai. Moro furu a e meki owruman du dati.—1 Tes. 5:14; 2 Tim. 4:1, 2.

12. (a) San den brifi gi den seibi gemeente na ini Pikin Asia e tyari kon na krin? (b) Fa owruman e sori den fasi fu Krestes te den e handri nanga den skapu fu Gado?

 ¹² Den brifi gi den owruman fu den seibi gemeente na ini Pikin Asia, e sori fa Krestes e broko en ede nanga den skapu (Openb. 2:1–3:22). Na ini den brifi dati, Yesus e sori taki a sabi san e pasa na ini ibri gemeente. A e sori tu taki a e broko en ede trutru nanga den bakaman fu en. Na ini a ten disi, den wortu dati de moro prenspari srefi, fu di a fisyun na ini Openbaring e kon tru na ini „a dei fu Masra” * (Openb. 1:10). Nofo tron a lobi fu Krestes de fu si na ini den owruman di e dini leki skapuman fu a gemeente. Yesus kan gebroiki den brada disi di de leki „presenti”, fu trowstu wi, èn fu gi wi deki-ati nanga rai te dati de fanowdu. (Ef. 4:8; Tori. 20:28; leisi Yesaya 32:1, 2.) Yu e si a muiti di den e meki, leki wan buweisi taki Krestes e broko en ede nanga yu?

Yepi na a yoisti ten

13-15. Fa Gado kan piki den begi fu wi? Gi wan tu eksempre.

¹³ Oiti yu begi Gado fayafaya fu yepi yu? Kande yu kisi piki tapu a begi dati di wan lepi Kresten kon gi yu deki-ati (Yak. 5:14-16). Kande yu kisi yepi di yu arki wan spesrutu lezing na wan fu den Kresten konmakandra. Noso kande yu kisi yepi di yu leisi wan fu den publikâsi fu wi. Nofo tron, Yehovah e piki begi na den fasi disi. Fu eksempre, baka di wan owruman ben hori wan lezing, dan wan sisa go na en. Wan tu wiki na fesi, wan sma ben du wan tumusi hati sani nanga a sisa disi. Ma a sisa no go kragi fu a problema fu en. Na presi fu dati, a taigi a brada taki a ben de nanga tangi trutru gi wan tu fu den sani di a ben taki nanga yepi fu Bijbel. Den sani dati ben abi fu du nanga a sani di miti en, èn den ben de wan bigi trowstu gi en. A sisa ben breiti srefisrefi taki a ben go na a konmakandra dati!

¹⁴ Luku na eksempre fu dri strafuman di ben kisi piki tu tapu den begi fu den. Den strafuman disi ben kon leri sabi den tru tori fu Bijbel na strafu-oso. Te fu kaba den tron preikiman di no dopu ete. Fu di wan ogri-ati sani ben pasa, meki den strafuman no ben mag du spesrutu sani moro. A sani dati meki taki den strafuman bigin opo densrefi teige den fesiman fu a strafu-oso. Den strafuman bosroiti taki a mamanten baka dati, den no ben o gi den waktiman den preti fu den baka, te den ben kaba nyan. Na so den ben o sori taki den no ben e agri nanga a situwâsi. Den dri preikiman di no ben dopu ete ben de na ini wan muilek situwâsi now. Efu den ben o horibaka gi den strafuman, dan den no ben o gi yesi na a rai di Yehovah e gi na Romesma 13:1. Ma efu den preikiman no ben o horibaka gi den, dan den strafuman ben o atibron na den tapu, èn den ben o du ogri nanga den.

¹⁵ Fu di den dri man no ben kisi okasi fu taki nanga makandra, meki den begi Gado fu gi den koni. A mamanten baka dati, den ala dri kon si taki den ben teki a srefi bosroiti. Den no ben o teki nyanyan. Di den waktiman kon bakaten fu teki den preti, dan den dri man disi no ben abi preti fu gi den. Den ben breiti srefisrefi taki a „Yereman fu begi” ben de nanga den!—Ps. 65:2.

 Abi a frutrow taki sani sa waka bun nanga yu

16. Fa a preikiwroko na wan buweisi taki Yehovah e broko en ede nanga den sma di de leki skapu?

¹⁶ A preikiwroko di e du na heri grontapu, na ete wan buweisi taki Yehovah e broko en ede nanga sma di abi wan krin ati, awansi pe den e tan (Gen. 18:25). Nofo tron, Yehovah e gebroiki engel fu tyari den futuboi fu en go na sma di de leki skapu, awansi den sma disi e libi na ini kontren pe a bun nyunsu no preiki ete (Openb. 14:6, 7). Fu eksempre, nanga yepi fu wan engel, Gado seni Filipus, wan preikiman fu a fosi yarihondro, go na wan heiman fu Etiopia. Di a feni a man disi, dan a fruklari den Buku fu Bijbel gi en. San ben de a bakapisi? A man disi teki a bun nyunsu èn a tron wan dopu bakaman fu Yesus. *—Yoh. 10:14; Tori. 8:26-39.

17. Fu san ede wi no musu broko wi ede tumusi nanga a ten di e kon?

¹⁷ Fu di a sistema disi heri esi sa kon na wan kaba, meki wi sa tan ondrofeni „den banawtu di de leki a hebi pen fu wan uma di e kisi en pikin” (Mat. 24:8). Fu eksempre, nyanyan kan kon moro diri, fu di nofo nyanyan no o de gi ala sma. Boiti dati, a weer na grontapu sa kon takru moro nanga moro, èn na ekonomia no sa drai bun. Kande a sa kon moro muilek gi sma fu feni wroko, èn kande wrokobasi sa dwengi wrokoman fu wroko moro langa. Awinsi san e pasa, ala sma di e tan poti yeye afersi na a fosi presi, èn e tan ’hori den ai krin’, no abi fu broko den ede tumusi. Den sabi taki Gado lobi den èn taki a sa sorgu gi den (Mat. 6:22-34). Fu eksempre, luku fa Yehovah sorgu gi Yeremia na a muilek pisi ten di Yerusalem ben o kisi pori na ini 607 bifo Krestes.

18. Fa Yehovah sori lobi gi Yeremia na a pisi ten di den Babilonsma ben kon fu teki Yerusalem abra?

¹⁸ Syatu fosi den Babilonsma pori Yerusalem, Yeremia ben de na strafu na ini a Fesidyari fu den Waktiman. Fa a ben o feni nyanyan? Efu a no ben de na strafu, dan ensrefi ben o go suku nyanyan. Na presi fu dati, na den sma na en lontu ben musu gi en nyanyan, ma furu fu den sma dati ben abi bita-ati gi en! Toku Yeremia no ben e frutrow tapu libisma, ma a ben e frutrow tapu Gado, a Sma di ben pramisi en taki a ben o sorgu gi en. Yehovah du san a ben pramisi? Iya! Yehovah sorgu taki ibri dei, Yeremia ben e kisi „wan lontu brede . . . teleki ala brede ben kaba na ini a foto” (Yer. 37:21). Na a ten dati, angriten ben de, sma ben e kisi siki, èn furu sma ben e dede. Ma toku Yeremia, Baruk, Ebed-Meilek, èn sosrefi tra sma, pasa a muilek pisi ten dati libilibi.—Yer. 38:2; 39:15-18.

19. Sortu fasti bosroiti wi musu teki now, awinsi san e pasa na ini a ten di e kon?

¹⁹ Iya, „den ai fu Yehovah de na tapu den regtfardikisma, èn den yesi fu en opo gi den fayafaya begi fu den” (1 Petr. 3:12). Yu breiti taki yu hemel Tata e luku yu? Yu abi a frutrow taki sani sa waka bun nanga yu fu di yu sabi taki Yehovah e luku yu fu di a wani taki sani waka bun nanga yu? Efu dati de so, dan teki a fasti bosroiti fu tan waka nanga Gado, awinsi san e pasa na ini a ten di e kon. Wi kan de seiker taki ala ten Yehovah sa de leki wan papa di e luku den futuboi fu en di e dini en nanga den heri ati, fu di a wani taki sani waka bun nanga den.—Ps. 32:8; leisi Yesaya 41:13.

[Futuwortu]

Yu kan tyari disi kon na krin?

• Fa wi kan sori taki wi e ’waka nanga Gado’?

• Fa Yehovah sori taki a ben lobi Baruk?

• Leki Edeman fu a Kresten gemeente, fa Yesus e sori den fasi fu en Tata?

• Na sortu fasi wi kan sori taki wi e frutrow tapu Gado na ini muilek ten?

[Aksi fu a tori disi]

[Prenki na tapu bladzijde 9]

Neleki fa Yeremia handri nanga Baruk, na so Kresten owruman e sori taki Yehovah e broko en ede nanga den futuboi fu en

[Prenki na tapu bladzijde 10]

Fa Yehovah kan yepi wi na a yoisti ten?