’Na Gado e meki a sani gro’!
’Na Gado e meki a sani gro’!
„A no a sma di e prani noso a sma di e gi watra de wan sani, ma na Gado di e meki a sani gro.”—1 KOR. 3:7.
1. Na sortu fasi wi e „wroko makandra nanga Gado”?
SMA di e „wroko makandra nanga Gado”. Na so na apostel Paulus ben kari a grani di wi alamala kan abi. (Leisi 1 Korentesma 3:5-9.) Paulus ben e taki fu a wroko di wi abi fu meki disipel. A ben agersi a wroko disi nanga a wroko di wan saiman abi fu sai siri èn fu gi den siri dati watra. Efu wi wani abi bun bakapisi na ini a tumusi prenspari wroko dati, dan wi abi a yepi fu Yehovah fanowdu. Paulus e memre wi taki na ’Gado e meki a sani gro’.
2. Te wi e frustan taki na ’Gado e meki a sani gro’, dan fa dati e yepi wi fu abi wan yoisti denki fu a diniwroko fu wi?
2 Te wi e frustan taki wi abi a yepi fu Gado fanowdu, dan dati e yepi wi fu kon abi wan yoisti denki fu a diniwroko fu wi. Kande wi e teki prati fayafaya na a wroko di wi abi fu preiki a bun nyunsu èn fu gi sma leri. Ma te fu kaba, na Yehovah musu kisi ala grani te wan sma tron wan nyun disipel. Fu san ede? Fu di awinsi omeni muiti wi e meki, nowan fu wi man frustan krin fa wan sma e go na fesi fu tron wan disipel te fu kaba. Sobun, a de krin taki wi no man abi krakti tapu a sani dati. Kownu Salomo ben sori krin fa a de nanga a tori disi. A ben skrifi: „Yu no sabi a wroko fu a tru Gado, di e du ala sani.”—Preik. 11:5.
3. Fa a wroko di wan saiman abi fu sai siri e kruderi nanga a wroko di wi abi fu meki disipel?
3 Wi musu lasi-ati fu di wi no man frustan krin fa wan sma e tron wan disipel? Nôno. Na presi fu dati, a sani dati e gi wi deki-ati fu du a diniwroko fu wi nanga moro faya. Kownu Salomo ben taki: „Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi, a kan de dyaso noso a kan de drape, noso taki ala tu sa bun a srefi” (Preik. 11:6). Iya, te wi sai trutru siri, dan wi no sabi pe den sa sproiti, noso efu den o sproiti. Furu sani de di wi no abi krakti na tapu. Na so a de tu nanga a wroko di wi abi fu meki disipel. Yesus ben poti prakseri na a tori disi na ini tu agersitori di skrifi na ini kapitel fo fu na Evangelietori fu Markus. Meki wi go luku san wi kan leri fu den tu agersitori disi.
Difrenti sortu gron
4, 5. Taki syatu fu na agersitori di Yesus ben fruteri fu a saiman di e sai siri.
4 Na ini Markus 4:1-9, Yesus e taki fu wan saiman di e sai siri di e fadon na difrenti presi. Yesus taki: „Un arki. Luku! A saiman go sai siri. Di a ben e sai, dan wan tu siri fadon na seipasi èn den fowru kon nyan den. Tra siri fadon na tapu ston-gron pe a gron no ben abi furu doti, soleki fa wi sabi; sobun den siri opo wantewante fu di a gron no ben dipi. Ma di son opo, a bron den pransun, èn fu di den no ben abi rutu, meki den drei teleki den kon dede. Tra siri fadon na mindri den makabon, èn den makabon gro kon èn den kiri den, dati meki den no ben gi froktu. Ma tra siri fadon na tapu bun doti, èn di den gro kon moro bigi, den bigin gi froktu dritenti tron, siksitenti tron, nanga wan hondro tron so furu.”
5 Na ini Bijbel ten, furu sma ben e trowe den siri na so wan fasi, taki den ben e panya go na difrenti presi. A saiman ben e poti den siri na ini wan ploi fu en krosi, noso na ini wan baskita, èn a ben e wai en anu fu trowe den siri go na difrenti presi. Sobun, na ini na agersitori disi a saiman no e trowe den siri fu espresi na tapu den difrenti sortu gron. Ma na presi fu dati, den siri e fadon na difrenti presi.
6. Fa Yesus fruklari na agersitori fu a saiman?
6 A no muilek fu kon sabi san na agersitori disi wani taki, fu di Yesus fruklari en gi wi na ini Markus 4:14-20. A ben taki: „A saiman e sai a wortu. Fu dati ede, a siri di fadon na seipasi na a wortu di sai na ini den sma di yere en; ma te den yere a wortu, dan wantewante Satan e kon èn a e puru a wortu di ben sai na ini den. Sosrefi, yu abi sma di de leki den siri di sai na tapu ston-gron: te den yere a wortu, dan den e teki en wantewante nanga prisiri. Ma densrefi no abi rutu, fu dati ede den e tan wan pisi ten nomo; ma te banawtu kon, noso sma e frufolgu den fu a wortu ede, dan den e fadon wantewante. Trawan sai na mindri den makabon; den na den sma di yere a wortu, ma den broko-ede fu a grontapu sistema disi, a bedrigifasi fu gudu, nanga a wani di sma wani tra sani tu, e kon na ini den ati, èn dati e kiri a wortu èn a no kan meki froktu. Te fu kaba, den siri di sai na tapu bun doti, na den sma di e arki a wortu èn di e teki en nanga prisiri, dan den e gi froktu dritenti tron, siksitenti tron, nanga wan hondro tron so furu.”
7. San a siri èn den difrenti sortu gron e prenki?
7 Luku taki Yesus no e taki dati a saiman e sai difrenti sortu siri. Na presi fu dati, a taki fu wán spesrutu siri di e fadon na tapu difrenti sortu gron, èn na tapu ibri gron wan tra sani e pasa nanga a siri. A fosi gron tranga, a di fu tu gron no abi furu doti, a di fu dri gron lai nanga makabon, èn a di fu fo gron na bun gron pe sani e gro bun (Luk. 8:8). San na a siri? Dati na a Kownukondre boskopu di de fu feni na ini Gado Wortu (Mat. 13:19). San den difrenti gron e prenki? Den gron e prenki na ati fu den difrenti sma.—Leisi Lukas 8:12, 15.
8. (a) Suma a saiman e prenki? (b) Fu san ede sma e handri na difrenti fasi te den e yere a bun nyunsu fu a Kownukondre?
8 Suma a saiman e prenki? A saiman e prenki den sma di e wroko makandra nanga Gado, namku den wan di e preiki a bun nyunsu fu a Kownukondre. Neleki Paulus nanga Apolos, den e prani èn den e gi watra. Ma aladi den e wroko tranga, toku a wroko fu den no abi a srefi bakapisi. Fu san ede? Fu di na ati fu den sma di e yere a boskopu, e difrenti. Na ini na agersitori, a saiman no abi krakti tapu a fasi fa a wroko fu en sa waka. A sani disi de wan trowstu, spesrutu gi den getrow brada nanga sisa fu wi di wroko furu yari langa, sondro taki den ben abi furu bun bakapisi, èn sonwan fu den wroko omeni tenti yari langa! * Fu san ede disi de wan trowstu?
9. Na apostel Paulus nanga Yesus ben poti prakseri na wan tori di e gi wi trowstu. San na a tori dati?
9 A no den bakapisi fu a wroko fu a saiman e sori efu a de getrow. Paulus ben poti prakseri na a sani disi, di a taki: „Ibriwan fu den o kisi en eigi pai fu a wroko di a du” (1 Kor. 3:8). A no a bakapisi fu a wroko di a saiman e du sa sori sortu pai a sa kisi, ma na a wroko di a saiman e du sa sori dati. Yesus ben tyari disi kon na krin tu di den disipel fu en ben drai kon baka na en, baka di den ben go preiki. Den ben prisiri trutru fu di den ogri yeye ben gi yesi na den, di den gebroiki a nen fu Yesus. Aladi den ben prisiri srefisrefi, toku Yesus taigi den: „No prisiri te den ogri yeye e du san unu e taki, ma prisiri fu di un nen skrifi na ini hemel” (Luk. 10:17-20). Awinsi a wroko fu wan saiman no abi furu bun bakapisi, toku dati no wani taki dati a no e wroko fayafaya leki tra sma, noso taki a no de getrow leki den. A moro prenspari sani di sa meki taki wan sma tron wan disipel te fu kaba, na a fasi fa a sma dati en ati tan. Ma te fu kaba, na Gado e meki taki a sma tron wan disipel!
A frantwortu fu den wan di e yere a Wortu
10. San e sori efu wan sma de leki bun gron, noso leki gron di no bun?
10 Fa a de nanga den wan di e yere a wortu? A de so taki Gado seti na fesi fa den o handri te den yere a bun nyunsu? Nôno. Na den srefi e bosroiti efu den o de leki bun gron, noso leki gron di no bun. Iya, na ati fu a sma kan kenki, èn dati kan meki taki a teki a bun nyunsu, noso taki a no teki en (Rom. 6:17). Na ini na agersitori fu en, Yesus ben taki dati „te [son sma] yere” a wortu, dan wantewante Satan e kon puru a wortu. Ma a sani disi no abi fu pasa. Na ini Yakobus 4:7, Kresten e kisi a deki-ati fu „kakafutu gi Didibri”, dan a sa lon gowe fu den. Yesus ben taki dati trawan ben o teki a wortu nanga prisiri, ma te fu kaba den ben o naki futu fu di „densrefi no abi rutu”. Ma futuboi fu Gado e kisi a rai fu „de leki rutu di beri dipi èn leki sma di e tanapu steifi na tapu a fondamenti”, so taki den kan kon frustan krin ’san na a bradi nanga a langa nanga a hei nanga a dipi fu den sani di abi fu du nanga Gado, èn so taki den sa man kon sabi a lobi fu Krestes di bigi moro sabi’.—Ef. 3:17-19; Kol. 2:6, 7.
11. Fa wan sma kan sorgu taki broko-ede nanga lobi gi gudu no e kiri a wortu?
11 Yesus e sori moro fara taki trawan di yere a wortu e gi pasi taki ’den broko-ede fu a grontapu sistema disi, èn a bedrigifasi fu gudu’ e kon na ini den ati èn e kiri a wortu (1 Tim. 6:9, 10). Fa den kan sorgu taki dati no pasa? Na apostel Paulus e piki: „No meki a fasi fa unu e libi sori taki unu lobi moni, ma un musu de tevrede nanga den sani di unu abi now. Bika a taki: ’Mi no sa libi yu kwetikweti èn noiti mi no sa gowe fu yu.’”—Hebr. 13:5.
12. Fu san ede son preikiman di de leki bun gron, no e meki so furu froktu leki trawan?
12 Te fu kaba, Yesus e taki dati den siri di sai na tapu bun gron, „e gi froktu dritenti tron, siksitenti tron, nanga wan hondro tron so furu”. Son sma di e teki a wortu e meki a wortu abi krakti tapu na ati fu den, èn den e meki froktu. Ma toku den sma disi no man du so furu na ini a preikiwroko leki trawan, fu di a situwâsi fu den de tra fasi. Fu eksempre, son preikiman no man du so furu na ini a preikiwroko fu di den owru, noso fu di den siki (Luku Markus 12:43, 44). A preikiman no man du noti na a sani disi, ma a e prisiri te a si taki Yehovah sorgu taki wan sma tron wan disipel.—Leisi Psalm 126:5, 6.
A saiman di e sribi
13, 14. (a) Taki syatu fu na agersitori di Yesus ben fruteri fu a man di e trowe siri. (b) Suma a saiman e prenki, èn san na a siri?
13 Na Markus 4:26-29 wi kan leisi wan tra agersitori fu wan saiman. Drape skrifi: „A kownukondre fu Gado de neleki te wan man e trowe siri na tapu a gron; te neti a man e sribi, èn na deiten a e opo, a siri bigin gro èn a e gro kon bigi, ma a man no sabi fa dati pasa. Safrisafri, a gron e gi nyanyan fu ensrefi: fosi, a pransun e opo kon, a e gro kon bigi èn a e gi bromki; te fu kaba na aleisi lepi. Ma te a froktu lepi kaba, dan a man e koti en nanga wan grasinefi, bika kotiten doro kaba.”
14 Suma na a saiman disi, noso a man di e trowe siri? Son sma fu Krestenhèit e bribi taki a man disi e prenki Yesus srefi. Ma a tru taki Yesus e sribi, èn taki a no sabi fa a siri e gro? A no de fu taki dati Yesus sabi fa a siri e gro! Ma neleki a saiman na ini a fosi agersitori, a saiman disi e prenki den preikiman di e wroko fayafaya fu preiki a Kownukondre boskopu. A siri di a saiman e trowe e prenki a wortu di den preikiman e preiki. *
15, 16. Sortu tru tori Yesus tyari kon na krin na ini na agersitori fu a saiman, te a abi fu du nanga a fasi fa wan siri e gro èn nanga a fasi fa wan sma e go na fesi fu tron wan disipel?
15 Yesus e taki dati a saiman e ’sribi te neti èn te deiten a e opo’. Disi no wani taki dati a saiman no e poti prakseri na den sani di a prani. A sani disi e prenki nomo fa a libi fu furu sma e waka te dei opo. Den sani di Yesus taki na ini a vers disi e prenki a gwenti di a saiman abi na ini wan pisi ten fu a yari, fu wroko te deiten èn fu sribi te neti. Yesus ben sori san ben e pasa na a ten dati. A taki: „A siri bigin gro èn a e gro kon bigi.” Yesus e taki moro fara: „Ma a man no sabi fa dati pasa.” San prenspari, na taki a siri e gro „fu ensrefi”. *
16 San Yesus ben wani leri wi nanga a tori disi? Hori na prakseri taki a moro prenspari sani, na taki a siri e gro, èn taki a e gro safrisafri. Yesus ben taki: „A gron e gi nyanyan fu ensrefi: fosi, a pransun e opo kon, a e gro kon bigi èn a e gi bromki; te fu kaba na aleisi lepi” (Mark. 4:28). A sani disi e pasa safrisafri èn ibri leisi a pransun e gro kon moro bigi. A saiman no man du noti fu meki a siri gro moro esi. Na so a de tu te wan sma e go na fesi fu tron wan disipel. Safrisafri Yehovah e sorgu taki a sma di abi wan opregti ati e kon frustan den tru tori fu Bijbel moro bun.—Tori. 13:48; Hebr. 6:1.
17. Suma e prisiri tu te a Kownukondre siri e gi froktu?
17 Na sortu fasi a saiman e teki prati na a kotiwroko „te a froktu lepi kaba”? Te Yehovah e meki wan sma kon frustan den tru tori fu a Kownukondre moro bun, dan te fu kaba a lobi di den abi gi Gado e meki taki den e gi densrefi abra na en. Den sma disi e teki dopu fu sori taki den gi densrefi abra na Gado. Brada di e tan go na fesi teleki den tron lepi Kresten, e kisi moro grani na ini a gemeente te fu kaba. A sma di sai a siri, a no a wan-enkri sma di e koti den froktu fu a Kownukondre siri. Te wan sma tron wan disipel, dan den tra Kownukondre preikiman e prisiri tu, awansi den srefi no sai a siri. (Leisi Yohanes 4:36-38.) Iya, ’a saiman nanga a sma di e du a kotiwroko, den ala tu breiti’.
Sani di wi kan leri na ini a ten disi
18, 19. (a) Sortu deki-ati yu kisi di yu poti prakseri na den agersitori disi di Yesus ben fruteri? (b) San wi sa go luku na ini a tra artikel?
18 San wi leri fu den tu agersitori disi di skrifi na ini Markus kapitel fo? Wi kan si krin taki wi abi wan wroko fu du, namku wi musu sai siri. Noiti wi musu suku reide fu tapu nanga a preikiwroko, èn awinsi problema nanga tesi e miti wi, toku wi musu tan go doro nanga a wroko disi (Preik. 11:4). Ma na a srefi ten, wi e hori na prakseri taki wi abi wan tumusi moi grani fu de sma di e wroko makandra nanga Gado. Yehovah na a Sma di e meki taki trawan e tron disipel, fu di a e blesi a muiti di wi e meki, èn sosrefi a di fu den sma di e teki a boskopu. Wi e frustan taki wi no man dwengi nowan sma fu tron wan disipel. Wi e frustan tu taki wi no abi fu lasi-ati efu sma no e go na fesi esi-esi, noso efu den no e go na fesi srefisrefi. A e gi wi trowstu trutru fu sabi taki wan fu den sani di e sori taki wi abi bun bakapisi, na a getrow fasi fa wi e dini Yehovah. Wan tra sani di e sori dati tu, na a getrow fasi fa wi e preiki a ’bun nyunsu fu a kownukondre gi sma na heri grontapu’.—Mat. 24:14.
19 Sortu tra sani Yesus leri wi te a abi fu du nanga a fasi fa wan sma e go na fesi fu tron wan disipel èn te a abi fu du nanga a Kownukondre wroko? Wi kan feni piki tapu na aksi disi na ini tra agersitori di skrifi na ini den Evangelietori. Na ini a tra artikel, wi sa poti prakseri na wan tu fu den agersitori disi.
[Futuwortu]
^ paragraaf 8 Luku na eksempre fu Brada Georg Fjölnir Lindal di ben e dini na ini IJsland, soleki fa skrifi na ini a Jaarboek van Jehovah’s Getuigen 2005, bladzijde 210, 211. Luku sosrefi den ondrofenitori fu getrow futuboi na ini Ierland di horidoro furu yari langa, sondro taki den ben abi bun bakapisi wantewante. Den sani disi skrifi na ini a Jaarboek van Jehovah’s Getuigen 1988, bladzijde 82-99.
^ paragraaf 14 Na ini a ten di pasa, A Waktitoren ben tyari kon na krin taki a siri e prenki den fasi di wan sma musu kweki fu man kon tron wan lepi sma, èn taki difrenti sani kan abi krakti tapu a sani disi. Ma wi musu hori na prakseri taki na ini na agersitori fu Yesus a siri no e kenki kon tron wan siri di no bun, èn a no e gro kon tron wan pori froktu. Na agersitori e sori nomo taki a e gro kon lepi.—See De Wachttoren fu 15 yuni 1980, bladzijde 17-19.
^ paragraaf 15 A wan-enkri tra presi pe Bijbel e gebroiki den wortu disi, na Tori fu den Apostel 12:10, pe skrifi taki wan isri portu e opo „fu ensrefi”.
Yu e memre disi ete?
• Fa a sai di wan saiman e sai siri e kruderi nanga a preiki di wi e preiki a Kownukondre boskopu?
• O ten wan Kownukondre preikiman de getrow na ini Yehovah ai?
• Fa Yesus sori taki a fasi fa wan siri e gro e kruderi nanga a fasi fa wan sma e go na fesi fu tron wan disipel?
• Fu san ede wi kan taki dati ’a saiman nanga a sma di e du a kotiwroko, den ala tu breiti’?
[Aksi fu a tori disi]
[Prenki na tapu bladzijde 13]
Fu san ede Yesus e agersi wan preikiman fu Gado Kownukondre nanga wan saiman di e sai siri?
[Prenki na tapu bladzijde 15]
Den sma di de leki bun gron, e teki prati fayafaya na a Kownukondre preikiwroko awansi na ini sortu situwâsi den de
[Prenki na tapu bladzijde 16]
Na Gado e tan meki a sani gro