A Wortu fu Yehovah de libilibi

Edepenti fu den buku Nahum, Habakuk, nanga Sefanya

A GRONTAPUMAKTI Asiria pori Samaria, a mamafoto fu a tin lo kownukondre fu Israel kaba. Langa ten kaba, Asiria e suku fu teki Yuda abra. A profeiti Nahum fu Yuda abi wan boskopu gi Ninefei, a mamafoto fu Asiria. A boskopu dati de fu feni na ini a buku Nahum di skrifi fosi a yari 632 bifo Krestes.

A grontapumakti di opo kon baka Asiria, na a Gran Kownukondre Babilon, di den kownu fu Kaldea ben e tiri son leisi. A kan taki Habakuk klari a buku fu en na ini 628 bifo Krestes. A buku dati e taki fa Yehovah sa gebroiki a grontapu makti Babilon fu strafu a pipel fu en, èn a e sori tu san o pasa nanga Babilon te fu kaba.

A profeiti Sefanya fu Yuda ben e dini fosi a ten fu Nahum nanga Habakuk. A ben e dini leki profeiti moro leki 40 yari langa, bifo a ten di Yerusalem kisi pori na ini 607 bifo Krestes. A ben e meki bekènti taki Yuda ben o kisi pori, ma taki a foto ben o seti kon bun baka. A Bijbel buku Sefanya e sori tu fa Gado ben o strafu tra pipel.

„HELU FU A FOTO FU BRUDU”

(Nahum 1:1-3:19)

„A krutuboskopu gi Ninefei” e komoto fu Yehovah Gado, di ’no e kisi atibron esi-esi èn di abi bigi makti’. Aladi Yehovah na „wan fortresi na a dei fu banawtu” gi den wan di e suku kibri na en, toku Ninefei sa musu kisi pori.—Nahum 1:1, 3, 7.

„A no de fu taki dati Yehovah sa meki Yakob kisi glori baka.” Ma neleki fa ’wan lew e priti meti pisipisi’, na so Asiria kwinsi a pipel fu Gado. Yehovah „sa bron den fetiwagi fu [Ninefei] na mindri fu a smoko. Èn wan feti-owru sa kiri den yongu lew fu [en]” (Nahum 2:2, 12, 13). „Helu fu a foto fu brudu”, namku  Ninefei. „Den alamala di sa yere san pasa nanga [en], sa naki den anu trutru”, èn den sa prisiri.—Nahum 3:1, 19.

Piki tapu aksi fu Bijbel:

1:9​—Fa a sa de gi Yuda te Ninefei ’kisi pori krinkrin’? Te dati pasa, dan noiti moro Asiria sa kwinsi Yuda. Bijbel e sori taki „banawtu no sa opo kon wan di fu tu tron”. Nahum e skrifi: „Luku! Na tapu den bergi den futu fu wan sma de di e tyari bun nyunsu, wan sma di e meki vrede bekènti. O Yuda, hori den fesa fu yu.” Di Nahum skrifi den wortu disi, dan a ben e taki neleki Ninefei no ben de moro.—Nahum 1:15.

2:6​—San na „den portu fu den liba” di ben opo? Den portu disi abi fu du nanga na olo di a watra fu a Tigris-liba ben meki na ini den skotu fu Ninefei. Na ini 632 bifo Krestes, di den Babilonsma nanga den Mediasma span anu makandra fu go feti nanga Ninefei, dan Ninefei no ben frede. A ben denki taki den hei skotu fu en ben o tapu feanti fu broko kon na ini a foto. Ma hebi alen meki taki a watra fu Tigris-liba kren pasa en syoro. Diodorus, wan historia skrifiman, taki dati „a watra sungu wan pisi fu a foto èn a broko wan bigi pisi fu a skotu”. Na so den portu fu a liba ben kon opo, èn soleki fa Nahum ben taki, den feanti teki Ninefei abra esi-esi, neleki fa faya e bron drei grasi.—Nahum 1:8-10.

3:4​—Fu san ede Ninefei ben de leki wan huru-uma? Ninefei ben kori tra pipel fu di a pramisi den taki a ben o horibaka gi den, ma fu taki en leti, a kwinsi den pipel disi. Fu eksempre, Asiria horibaka gi Kownu Akas fu Yuda di Israel nanga Siria ben span anu makandra fu feti nanga Yuda. Ma te fu kaba, „a kownu fu Asiria, hari go feti nanga [Akas] èn a tyari furu problema kon gi en”.—2 Kroniki 28:20.

Sani di wi kan leri:

1:2-6. Yehovah sa puru atibron tapu den feanti fu en, namku den wan di e weigri fu anbegi en wawan. Disi e sori taki Yehovah wani taki den anbegiman fu en no musu anbegi nowan tra gado, boiti En.—Exodus 20:5.

1:10. Aladi Ninefei ben abi bigi hei skotu nanga hondrohondro toren na tapu, toku a foto dati kisi pori soleki fa Yehovah ben taki. Na ini a ten disi, den feanti fu Yehovah en pipel no sa man wai pasi gi a strafu fu Gado.—Odo 2:22; Danièl 2:44.

’A REGTFARDIKIWAN SA TAN NA LIBI’

(Habakuk 1:1–3:19)

Den fosi tu kapitel fu a buku Habakuk na wan takimakandra na mindri a profeiti nanga Yehovah Gado. Fu di Habakuk e broko en ede nanga den sani di e pasa na ini Yuda, meki a e aksi Gado: „Fu san ede yu e meki mi si san ogri, èn fu san ede yu e tan luku ogridu nomo?” Yehovah e piki en: „Mi e meki den Kaldeasma opo kon, a pipel di abi bita-ati èn di e handri sondro fu denki fosi.” A profeiti e taki dati a no man bribi taki Gado o gebroiki „den wan di e handri na wan bedrigi fasi” fu strafu Yuda (Habakuk 1:3, 6, 13). Habakuk abi na overtoigi taki a regtfardikiwan sa tan na libi, ma taki a feanti no sa man wai pasi gi a strafu di a o kisi. Boiti dati, Habakuk e taki fu feifi rampu di sa miti den Kaldeasma, di de feanti fu Yuda.—Habakuk 2:4.

Te Habakuk e begi Yehovah fu sori sari-ati gi Yuda, dan a e fruteri „na ini kragisingi” fu den okasi pe Yehovah ben sori kaba taki a abi bigi makti. A ben du dati na a Redi Se, na ini a gran sabana, èn na Yerikow. A profeiti e fruteri tu taki Yehovah sa abi bigi atibron te a o tyari pori kon na Armagedon. Na a kaba fu a begi fu en, Habakuk e taki: „Yehovah, a Moro Hei Masra e gi mi krakti èn a sa meki mi futu kon de leki den futu fu dia, èn na tapu den hei presi a sa meki mi waka.”—Habakuk 3:1, 19.

Piki tapu den aksi fu Bijbel:

1:5, 6​—Fu san ede den Dyu no ben man bribi taki Yehovah ben o meki den  Kaldeasma kon feti nanga den? Na a ten di Habakuk bigin dini leki profeiti, Egepte ben abi furu krakti tapu Yuda (2 Kownu 23:29, 30, 34). Aladi Babilon ben e kisi moro makti, toku a legre fu en no ben wini Farao Neko ete (Yeremia 46:2). Boiti dati, a tempel fu Yehovah ben de na ini Yerusalem, èn den bakapikin fu David ben e tiri leki kownu furu yari langa. Na a ten dati, den Dyu noiti ben o wani bribi a „wroko” di Gado ben o du, namku taki a ben o gi pasi taki den Kaldeasma pori Yerusalem. Ma awinsi den no ben man bribi den wortu fu Habakuk, toku a fisyun di ben sori taki den Babilonsma ben o pori Yerusalem, ’kon tru’ na ini 607 bifo Krestes.—Habakuk 2:3.

2:5​—Suma na a „tranga man”, èn fu san ede „a no sa doro en marki”? Babilon di ben gebroiki a makti legre fu en fu teki tra kondre abra, ben de leki wan „tranga man”. Fu di a ben teki furu tra kondre abra, meki a ben de leki wan drunguman di ben dringi tumusi furu win. Ma a no ben o man teki ala den kondre abra, fu di Yehovah ben o gebroiki den Mediasma nanga den Persiasma fu meki a fadon. Na ini a ten disi a „man” e prenki den politiek tirimakti. Den tirimakti disi drungu tu fu di den e denki tumusi furu fu densrefi èn fu di den abi heimemre. Boiti dati, den e tan du ala san den man fu teki tra kondre abra. Ma den tirimakti disi no sa man ’tyari ala kondre kon na wán gi densrefi’. Soso Gado Kownukondre sa tyari wánfasi kon na mindri libisma.—Mateyus 6:9, 10.

Sani di wi kan leri:

1:1-4; 1:12–2:1. Fu di Habakuk e broko en ede nanga wan tu sani, meki a e poti aksi gi Yehovah, èn Yehovah e piki en. A tru Gado e arki den begi fu den getrow futuboi fu en.

2:1. Neleki Habakuk, wi musu tan abi wan tranga bribi èn wi musu tan teki prati na a diniwroko. Boiti dati, wi musu de klariklari fu kenki wi denki te wi kisi „piri-ai” noso trangaleri.

2:3; 3:16. Aladi wi e wakti nanga bribi tapu a dei fu Yehovah, wi musu tan hori na prakseri taki wi e libi na ini wan tumusi prenspari ten.

2:4. A dei te Yehovah sa krutu grontapu e kon heri esi. Fu man pasa a dei dati, wi musu horidoro na wan getrow fasi.—Hebrewsma 10:36-38.

2:6, 7, 9, 12, 15, 19. Den wan di e feti fu kisi wini na wan bedrigi fasi, den wan di lobi fu du ogri, den wan di e du hurudu, èn den wan di e anbegi falsi gado, sa kisi strafu trutru. Wi musu luku bun taki wi no e kisi den fasi nanga den gwenti disi.

2:11. Efu wi no e meki trawan kon sabi taki a grontapu disi ogri, dan ’wan ston srefi sa bari kari’. A de prenspari fu tan preiki a Kownukondre boskopu nanga deki-ati.

3:6. Noti o man tapu Yehovah fu strafu libisma, srefi den organisâsi di sma e si leki bergi di de fu ala ten, no o man du dati.

3:13. Wi abi a dyaranti taki Yehovah no sa kiri ala sma na ini Armagedon. A sa frulusu den getrow futuboi fu en.

3:17-19. Aladi tesi kan miti wi fosi Armagedon doro èn srefi na a ten fu Armagedon, toku wi kan de seiker taki Yehovah sa gi wi „krakti” aladi wi e tan dini en nanga prisiri.

„A DEI FU YEHOVAH DE KROSIBEI”

(Sefanya 1:1–3:20)

Na ini heri Yuda sma e anbegi Bâal. Yehovah e meki en profeiti Sefanya taki: „Mi sa langa mi anu go teige Yuda èn teige ala den sma di e libi na Yerusalem.” Sefanya e warskow: „A dei fu Yehovah de krosibei” (Sefanya 1:4, 7, 14). Soso den sma di Gado feni bun sa „kisi kibri” na a dei dati.—Sefanya 2:3.

„Helu fu . . . a foto di e kwinsi sma”, namku Yerusalem! „’Tan fruwakti mi,’ na so Yehovah taki, ’teleki a dei doro taki mi e opo tanapu fu wini sani, bika a krutu bosroiti fu mi, na fu tyari den nâsi kon na makandra . . . so taki mi kan kanti a krutu fu mi kon na den  tapu.’” Ma Gado e pramisi: „Mi sa meki unu kon tron wan nen èn wan sani fu prèise na mindri ala den pipel fu grontapu, te mi sa meki den wan fu unu di de na ini katibo drai kon baka, èn unu sa si dati nanga un eigi ai.”—Sefanya 3:1, 8, 20.

Piki tapu den aksi fu Bijbel:

2:13, 14​—Sortu „sten sa tan singi” na ini Ninefei pe nowan sma e tan? Fu di Ninefei ben o tron wan presi pe busimeti nanga busi fowru ben o tan, meki a sten di ben o tan singi drape, na a di fu fowru di e singi, èn kande a abi fu du tu nanga a babari fu a winti di e wai pasa den fensre fu den leigi oso.

3:9​—San na a „soifri tongo” èn fa sma e taki a tongo dati? A tongo disi na den tru tori fu Gado di de fu feni na ini Bijbel, a Wortu fu en. A abi fu du nanga ala Bijbel leri. Wi e taki a tongo disi te wi e bribi den tru tori fu Gado, te wi e leri sma soifri san Bijbel e taki, èn te wi e libi soleki fa Gado wani.

Sani di wi kan leri:

1:8. Soleki fa a sori, dan son sma na ini a ten fu Sefanya ben wani taki den pipel di ben libi na ini a kontren fu den, ben musu feni den bun. Dati meki den ben e weri „krosi fu tra kondre”. A ben o de wan don sani te anbegiman fu Yehovah na ini a ten disi ben o weri den krosi di grontapusma e weri, soso fu di den wani de leki den!

1:12; 3:5, 16. Yehovah ben e tan seni den profeiti fu en fu warskow a pipel fu en taki a ben o strafu den. A ben tan du dati, aladi furu Dyu ben kon gwenti libi na wan spesrutu fasi, èn den no ben e poti prakseri na a boskopu fu en. Den Dyu disi ben de leki sakasaka na ondrosei fu wan winbari. Now di a bigi dei fu Yehovah e doro, wi no musu meki ’wi anu kon swaki’ awinsi sma no e poti prakseri na a boskopu fu wi. Na presi fu dati, wi musu tan preiki a Kownukondre boskopu.

2:3. Yehovah wawan kan frulusu wi na a dei fu en atibron. Efu wi wani taki Yehovah tan feni wi bun, dan wi musu „suku Yehovah”. Dati wani taki dati wi musu studeri Bijbel, a Wortu fu en, finifini. Boiti dati wi musu begi Yehovah fu tiri wi, èn wi musu kon krosibei na en. Wi musu „suku regtfardikifasi”. Dati wani taki dati wi musu libi wan krin libi. Wan tra sani di wi musu du, na taki wi musu „suku safri-atifasi”, èn dati wani taki dati wi musu tron sma di abi safri-atifasi nanga sakafasi.

2:4-15; 3:1-5. A srefi sani di pasa nanga Yerusalem fu owruten èn nanga den kondre na ini a kontren dati, o pasa nanga Krestenhèit èn nanga ala pipel di kwinsi a pipel fu Gado, te a dei fu Yehovah doro fu strafu den ogrisma (Openbaring 16:14, 16; 18:4-8). Wi musu tan meki den krutu boskopu fu Gado bekènti sondro frede.

3:8, 9. Aladi wi e wakti a dei fu Yehovah, wi e leri fu taki a „soifri tongo” èn wi e gi wisrefi abra na Gado fu sori taki wi ’e kari a nen fu En’. Na so fasi wi e sreka wisrefi fu kisi frulusu. Boiti dati, wi e dini Yehovah „leki wán man” makandra nanga a pipel fu en, èn wi e gi en „wan srakti-ofrandi fu prèise” leki wan presenti.—Hebrewsma 13:15.

„A e hasti ensrefi”

A psalm skrifiman ben singi: „Ete wan syatu pisi ten èn na ogrisma no sa de moro; èn yu sa luku seiker na a presi pe a ben de, èn a no sa de” (Psalm 37:10). Te wi e prakseri fu den sani di a buku Nahum e taki fu Ninefei, èn san a buku Habakuk e taki fu Babilon nanga Yuda di fadon komoto na bribi, dan wi sa kisi na overtoigi taki den wortu fu a psalm skrifiman sa kon tru. Ma o langa wi musu wakti ete?

Sefanya 1:14 e taki: „A bigi dei fu Yehovah de krosibei. A de krosibei, èn a e hasti ensrefi fu tru.” A buku Sefanya e sori tu fa wi sa kisi kibri na a dei dati, èn a e sori tu san wi musu du fu kan kisi kibri. Iya, ’a wortu fu Gado de na libi, èn a abi krakti’.—Hebrewsma 4:12.

[Prenki na tapu bladzijde 8]

Aladi Ninefei ben abi bigi hei skotu, toku a profeititori fu Nahum kon tru

[Sma di abi a reti fu a prenki]

Randy Olson/National Geographic Image Collection