Hori a tamara na prakseri

„NOITI un musu broko un ede nanga tamara.” Disi na san Yesus Krestes ben taki na ini a pôpi Bergitaki di a ben hori na ini Galilea. Yesus ben taki moro fara: „Tamara sa abi en eigi broko-ede.”​—Mateyus 6:34.

San yu denki Yesus ben abi na prakseri di a taki „tamara sa abi en eigi broko-ede”? Den wortu disi wani taki dati wi musu libi soso gi a dei fu tide èn taki wi no musu broko wi ede nanga tamara? Na a sani disi Yesus nanga den bakaman fu en ben e bribi?

„No broko un ede moro”

Leisi san Yesus ben taki na ini Mateyus 6:25-32. Disi na wan tu fu den sani di a ben taki na ini den tekst dati: „No broko un ede moro nanga un libi, iya, nanga san unu o nyan noso san unu o dringi noso san unu o weri na un skin. . . . Luku den fowru bun di e frei na loktu, bika den no e sai siri, den no e koti nyanyan èn den no e kibri nyanyan na ini maksin; toku un Tata na hemel e gi den nyanyan. . . . Suma fu unu di e broko en ede nanga sani, kan meki en libi kon pikinso moro langa? Sosrefi, fu san ede unu e broko un ede nanga san unu sa weri? Leri wan sani fu den bromki na ini a sabana èn luku fa den e gro; den no e wroko tranga èn den no e brei titei . . . Fu dati ede, noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu.”

Na a kaba fu a pisi disi, Yesus e taigi den bakaman fu en fu du tu sani. A fosi sani di a e taigi den, na disi: „Fu dati ede, tan suku [Gado en] kownukondre nanga En regtfardikifasi fosi, dan unu sa kisi ala den tra sani tu.” A di fu tu sani di a e taigi den, na: „Sobun, noiti  un musu broko un ede nanga tamara, bika tamara sa abi en eigi broko-ede. Ibri dei abi nofo fu en eigi ogri.”—Mateyus 6:33, 34.

Un Tata sabi san unu abi fanowdu

Yu denki taki Yesus ben e leri den disipel fu en, èn sosrefi gronman, fu no ’sai, fu no koti nyanyan, noso fu no kibri nyanyan na ini maksin’? Noso a ben e leri den fu no ’wroko tranga èn fu no brei titei’ fu meki krosi? (Odo 21:5; 24:30-34; Preikiman 11:4) Kwetikweti. Efu den no ben o du den sani disi, dan te fu kaba den ben o „begi sma sani na a ten fu a kotiwroko”, èn den no ben o abi noti fu nyan noso fu weri.—Odo 20:4.

Ma fa a de nanga a broko di sma e broko den ede? A de so taki Yesus ben wani taigi den sma taki den no ben o abi fu broko den ede nanga noti? Dati no kan. A neti di sma grabu Yesus, dan en srefi ben sari trutru èn a ben e broko en ede.—Lukas 22:44.

Yesus ben taki den sani dati fu di a ben wani leri wi wan prenspari sani. Te yu e broko yu ede tumusi nanga sani, dan dati no sa lusu den problema fu yu. Fu eksempre, a sani dati no sa ’meki yu libi pikinso moro langa’, soleki fa Yesus ben taki (Mateyus 6:27). Fu taki en leti, te wi e tan broko wi ede, dan dati kan meki wi dede moro esi.

Yesus gi kefalek bun rai. Te yu e luku en bun, dan nofo tron wi e broko wi ede nanga sani di noiti no o pasa. Winston Churchill, wan tiriman fu Ingrisikondre ben e agri nanga den wortu disi. Disi na san a e taki fu den broko-ede di a ben abi na a takru pisi ten fu a di fu Tu Grontapufeti: „Te mi e prakseri ala den sani di ben e gi mi broko-ede, dan mi e memre a tori fu wan owru man di ben de fu dede. A man disi ben e broko en ede nanga furu sani, aladi furu fu den sani dati noiti no pasa.” Iya, a bun fu teki ibri dei soleki fa a e kon, spesrutu te den tesi nanga den problema di wi e kisi kan gi wi furu broko-ede makriki.

’Tan suku Gado Kownukondre fosi’

Fu taki en leti, Yesus no ben wani sori den sma nomo san den ben musu du fu man tan gosontu èn fu man de koloku. A ben sabi taki te wan sma e broko en ede tumusi nanga a sorgu di a musu sorgu ensrefi, èn te a de  nomonomo fu kon gudu èn fu meki prisiri, dan a kan frigiti san na den moro prenspari sani (Filipisma 1:10). Kande yu e denki: ’San prenspari moro a sorgu di wi musu sorgu wisrefi?’ Fu taki en leti, a moro prenspari sani, na a anbegi di wi musu anbegi Gado. Yesus ben sori krin taki a moro prenspari sani di wi musu du, na fu „tan suku Gado kownukondre nanga En regtfardikifasi fosi”.—Mateyus 6:33.

Di Yesus ben de na grontapu, dan furu sma ben e feti baka gudu. Dati ben de a moro prenspari sani gi den. Ma Yesus ben wani yepi den sma dati fu kon si san moro prenspari. Fu di den ben de anbegiman fu Gado, meki den ben abi a „plekti” fu ’abi frede gi a tru Gado èn fu hori densrefi na den komando fu en’.—Preikiman 12:13.

Te den sma ben o poti tumusi furu prakseri na gudu, iya, te den ben o poti tumusi furu prakseri na „den broko-ede fu a grontapu sistema disi, nanga a bedrigifasi fu gudu”, dan den no ben o anbegi Gado nanga den heri ati moro (Mateyus 13:22). Na apostel Paulus ben skrifi: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu di e tyari den go pori krinkrin” (1 Timoteyus 6:9). Fu di Yesus ben wani yepi den bakaman fu en fu no fadon na ini a „trapu” disi, meki a memre den taki a hemel Tata fu den ben sabi taki den ben abi den sani disi fanowdu. Gado ben o sorgu gi den neleki fa a e sorgu gi „den fowru di e frei na loktu” (Mateyus 6:26, 32). Den no ben musu broko den ede tumusi nanga sani, ma na presi fu dati den ben musu du ala san den man fu sorgu densrefi, èn te den ben du dati, dan den ben musu abi a frutrow taki Yehovah ben o yepi den.—Filipisma 4:6, 7.

Fu taki leti, di Yesus ben taki „tamara sa abi en eigi broko-ede”, dan a ben wani leri wi taki wi no musu broko wi ede tumusi nanga san kan pasa tamara, fu di dati ben o gi wi moro broko-ede. Wan tra Bijbel e taki: „No broko yu ede nanga a dei fu tamara. Tamara sa abi en eigi broko-ede. Den broko-ede fu wan dei sari kaba.”—Mateyus 6:34, Nyun Testamenti.

„Meki yu kownukondre kon”

Ma di Yesus ben taki dati sma no musu broko den ede tumusi nanga a tamara, dan a no ben wani leri den taki den no musu broko den ede nanga noti. Yesus noiti no leri den disipel fu en fu no poti prakseri na a tamara. Na presi fu dati, a ben gi den a rai fu poti bun prakseri na a ten di e kon. A fiti te den e begi Gado fu gi den den sani di den abi fanowdu ibri dei, soleki brede. Ma den musu begi fosi gi den sani di ben musu kon ete, iya, den musu begi Gado fu meki a Kownukondre fu En kon, èn fu meki a wani fu En pasa na grontapu.—Mateyus 6:9-11.

Wi no musu de leki den sma fu a ten fu Noa. Den sma disi „ben e nyan, den ben e dringi, man ben e teki uma fu trow, èn uma ben e trow nanga man”. Den ben e poti so furu prakseri na den sani disi, taki den „no ben e poti prakseri” na san ben o pasa. San ben de a bakapisi? „A frudu kon, a wai den alamala puru” (Mateyus 24:36-42). Na apostel Petrus ben taki fu a tori dati fu di a ben wani sori wi taki wi musu hori a tamara na prakseri. A ben skrifi: „Fu di ala den sani disi o smèlter gowe na a fasi disi, meki un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi; boiti dati, un musu fruwakti a dei fu Yehovah èn un musu hori bun na prakseri taki a dei dati o kon!”—2 Petrus 3:5-7, 11, 12.

Kibri gudu na ini hemel

Iya, meki wi hori a dei fu Yehovah „bun na prakseri”. Te wi e du dati, dan dati sa yepi wi fu gebroiki wi ten, wi krakti, wi koni, nanga wi gudu, na wan bun fasi. Wi no musu poti tumusi furu prakseri na a sorgu di wi musu sorgu wisrefi èn na prisiriten, fu di den sani dati kan meki taki wi no sa man „dini Gado na wan getrow fasi”. Te wi e poti prakseri soso na a dei fu tide, dan kande dati sa tyari wini kon, ma a sa de fu wan syatu pisi ten. Yesus ben taki dati a moro bun fu „kibri gudu na ini hemel”, na presi fu kibri gudu na grontapu.—Mateyus 6:19, 20.

 Fu yepi wi fu kon frustan a tori dati moro bun, meki Yesus gi wan agersitori fu wan man di ben prakseri fu du bigi sani gi a ten di ben o kon. Ma a man disi no ben prakseri Gado. A gron fu a man disi ben e gi bun nyanyan. A man bosroiti fu broko den maksin fu en fu bow moro bigiwan, fu man libi wan switi libi, èn fu man nyan, dringi, èn prisiri. Sortu fowtu a man disi ben meki? A man disi dede fosi a ben kan kisi wini fu a tranga wroko fu en. Ma san moro ogri, na taki a no ben kon abi wan bun nen na Gado. Na a kaba fu na agersitori Yesus ben taki: „Na so a sa waka nanga a sma di wani moro nanga moro gudu, ma di no gudu na ini Gado ai.”—Lukas 12:15-21; Odo 19:21.

San yu kan du?

No meki a srefi fowtu di a man na ini na agersitori ben meki. Kon sabi san Gado sa du na ini a ten di e kon, èn meki a sani dati tron a moro prenspari sani gi yu. Gado e gi libisma na okasi fu kon sabi san a o du. A profeiti Amos fu owruten ben skrifi: „A Moro Hei Masra Yehovah no sa du noti, sondro fu tyari den afersi fu en kon na krin gi den futuboi fu en, namku den profeiti” (Amos 3:7). Na ini a ten disi, yu kan kon sabi den sani di Yehovah meki den profeiti tyari kon na krin, fu di den sani dati skrifi na ini Gado Wortu, Bijbel.—2 Timoteyus 3:16, 17.

Wan sani di Bijbel e tyari kon na krin, na taki heri esi wan sani o pasa di sa abi krakti tapu ala sma na grontapu. Yesus ben taki: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mateyus 24:21). Nowan sma kan drai a sani dati. Iya, tru anbegiman no ben o wani du dati tu. Fu san ede? Fu di a sani disi di o pasa o tyari wan kaba kon na ala ogridu, èn a o tyari „nyun hemel nanga wan nyun grontapu” kon. Dati wani taki dati wan nyun tirimakti sa de na hemel, èn wan nyun libimakandra na grontapu. Na ini a nyun grontapu dati, Gado „o figi ala watra puru na den ai [fu sma], èn dede no sa de moro; nowan sari, noso krei, noso pen no sa de moro”.—Openbaring 21:1-4.

We, yu no e agri taki wi no musu draidrai fu ondrosuku san Bijbel e taki fu a tori disi? Yu abi yepi fanowdu? Aksi Yehovah Kotoigi fu yepi yu. Noso skrifi den sma di tyari a tijdschrift disi kon na doro. Iya, sorgu taki yu no e libi soso gi a dei fu tide, ma libi na wan fasi di e sori taki yu e fruwakti wan moi tamara.

[Prenki na tapu bladzijde 7]

„No broko un ede moro . . . Tamara sa abi en eigi broko-ede”