Wi kan kisi frulusu fu den trapu fu a sma di e fanga fowru
Wi kan kisi frulusu fu den trapu fu a sma di e fanga fowru
’[Yehovah] srefi sa frulusu yu fu a trapu fu a sma di e fanga fowru.’—PSALM 91:3.
1. Suma na „a sma di e fanga fowru”, èn fu san ede wi musu luku bun nanga en?
ALA tru Kresten musu hori na prakseri taki wan sma e suku fu kiri den, èn a sma dati koni moro libisma. Psalm 91:3 e kari a feanti disi „a sma di e fanga fowru”. Suma na a feanti disi? The Watchtower fu 1 yuni 1883 ben tyari kon na krin kaba taki a sma disi na Satan Didibri. Neleki fa wan sma e pruberi fu fanga fowru nanga wan trapu, na so a makti feanti disi e pruberi fu kori a pipel fu Yehovah so taki den e fadon na ini wan trapu.
2. Fu san ede Bijbel e agersi Satan nanga wan sma di e fanga fowru?
2 Sma na ini owruten ben e fanga fowru fu abi den leki singifowru, fu gebroiki den frei fu den di abi moi kloru, noso fu nyan den èn fu tyari den leki ofrandi. Ma nofo tron a no makriki fu fanga fowru, fu di den e lon gowe wantewante te den e yere wan sani. Dati meki wan sma di ben wani fanga fowru na ini Bijbel ten, ben musu luku bun san na den fasi nanga den gwenti fu a fowru di a ben wani fanga. Dan a ben e suku wan koni fasi fa a ben kan fanga den. Fu di Bijbel e agersi Satan nanga wan sma di e fanga fowru, meki wi man frustan moro bun fa a e wroko. Didibri e luku ibriwan fu wi. A e si den fasi nanga den gwenti fu wi èn a e seti trapu di wi no man si, so taki a kan fanga wi libilibi (2 Timoteyus 2:26). Te Satan fanga wi, dan dati kan meki wi lasi a grani di wi abi fu de wan anbegiman fu Gado, èn te fu kaba, wi kan kisi têgo pori. Dati meki, efu wi wani kibri wisrefi gi „a sma di e fanga fowru”, dan a bun fu kon sabi den difrenti fasi fa a e kori sma.
3, 4. Fa Satan e kori sma leki wan lew, èn fa a e du dati leki wan kobrasneki?
3 A psalm skrifiman e sori krin tu fa Satan de leki wan yongu lew, noso leki wan kobrasneki (Psalm 91:13). Son leisi, Satan de leki wan lew di e lon kon na wan sma tapu fu nyan en, fu di a e frufolgu a pipel fu Yehovah, noso a e meki tirimakti gens den (Psalm 94:20). Wan tu sma kan naki futu tu te Satan e frufolgu den na so wan ogri-ati fasi. Ma nofo tron, te Satan e frufolgu wi na a fasi disi, dan sani e waka heri tra fasi, fu di a wánfasi fu a pipel fu Gado e kon moro tranga. Ma fa a de te Satan e pruberi fu du wi ogri te wi no e fruwakti dati, soleki fa wan kobra e du dati?
4 Didibri de leki wan takru sneki di kibri na wan presi, fu di a e gebroiki a koni fu en fu kori èn fu kiri sma. Na so a ben man pori a frustan fu wan tu futuboi fu Gado, fu di a kori den fu du a wani fu en na presi fu du a wani fu Yehovah. A sani dati tyari takru bakapisi kon gi den sma disi. Wi musu breiti taki wi sabi den triki fu Satan (2 Korentesma 2:11). Meki wi luku fo fu den trapu di Satan, „a sma di e fanga fowru”, e gebroiki fu pori a bribi fu wi.
Wi no musu frede gi libisma
5. Fu san ede Satan man kori furu sma di e „frede gi libisma”?
5 „A sma di e fanga fowru” sabi taki ala libisma wani trawan fu lobi den. Kresten na sma di e broko den ede nanga a fasi fa trawan e denki èn e firi. Fu di Didibri sabi disi, meki a e suku fu meki den broko den ede tumusi nanga a fasi fa trawan e denki fu den. Fu eksempre, a e meki son futuboi fu Gado fadon na ini wan trapu, fu di a e meki taki den e „frede gi libisma” (Odo 29:25). Efu futuboi fu Gado e du sani di Yehovah no feni bun, èn efu den no e gi yesi na den komando na ini Gado Wortu, soso fu di den e frede gi libisma, dan fu taki en leti, den fadon na ini a trapu fu „a sma di e fanga fowru”.—Esekiel 33:8; Yakobus 4:17.
6. Sortu eksempre e sori fa wan yonguwan kan fadon na ini a trapu fu „a sma di e fanga fowru”?
6 Fu eksempre, wan yonguwan kan bosroiti fu smoko wan sikaret fu di den skoromati fu en dwengi en fu du dati. Kande a no ben prakseri srefisrefi fu smoko wan sikaret di a ben e go na skoro a dei dati. Ma fosi yu denki, a e du wan sani di no bun gi a gosontu fu en, èn di Gado no feni bun (2 Korentesma 7:1). Fa a du kon taki a fadon na ini a trapu disi? Kande a ben abi demakandra nanga takru kompe, èn a ben e frede taki den no ben o lobi en. Yongusma, un no musu meki „a sma di e fanga fowru” kori unu meki unu fadon na ini wan trapu! Efu yu no wani taki Satan kisi yu libilibi, dan sorgu taki yu noiti e bosroiti fu du ogri, awansi na wan pikin ogri nomo! Gi yesi na a warskow di Bijbel e gi fu wai pasi gi takru kompe.—1 Korentesma 15:33.
7. Fa Satan kan meki taki son papa nanga mama no e teki bun bosroiti te a abi fu du nanga na anbegi fu den?
7 Getrow Kresten papa nanga mama e si en leki wan seryusu sani fu sorgu gi na osofamiri fu den, soleki fa Bijbel e taigi den fu du (1 Timoteyus 5:8). Ma Satan wani taki Kresten e broko den ede tumusi nanga a tori disi, so taki den no e teki bun bosroiti te a abi fu du nanga na anbegi fu den. Kande den no e go na den konmakandra doronomo, fu di den wrokobasi fu den e dwengi den fu teki moro wroko na den tapu. Kande den e frede fu aksi a basi fu den fu gi den fri fu a wroko fu den, so taki den kan de ala dri dei na a distrikt kongres fu anbegi Yehovah makandra nanga den Kresten brada nanga sisa fu den. A sani di sa yepi yu fu no fadon na ini a trapu disi, na fu „frutrow tapu Yehovah” (Odo 3:5, 6). Boiti dati, te wi e hori na prakseri taki wi alamala na pikin fu Yehovah, èn taki a e si en leki wan plekti fu sorgu gi wi, dan dati sa yepi wi fu teki bun bosroiti. Papa nanga mama, yu e bribi taki Yehovah sa feni wan fasi fu sorgu gi yu nanga yu osofamiri te yu e du a wani fu en? Noso yu sa meki Didibri fanga yu libilibi fu meki yu du a wani fu en, soso fu di yu e frede gi libisma? Wi e gi yu a rai fu begi Gado fu meki yu kisi a yoisti denki ini a tori disi.
Wi no musu feti baka gudu
8. Fa Satan e kori sma fu feti baka gudu?
8 Satan e kori sma tu fu feti baka gudu. Nofo tron, den bisnisman fu a ten disi e kori sma fu di den e meki den denki taki den kan kon gudu esi-esi, èn son leisi wan tu futuboi fu Gado e fadon tu na ini a trapu disi. Son leisi, sma e taigi futuboi fu Gado: „Yu musu wroko tranga, èn te sani e go moro bun, dan yu sa abi wan switi libi. Yu kan pionier srefi.” A kan taki wan tu sma na ini a gemeente di no e si sani na a yoisti fasi, abi a denki disi. Den sma disi ben kan aksi brada noso sisa na ini a Kresten gemeente fu wroko gi den, soso fu meki moni na den tapu. Denki bun fosi yu teki wan bosroiti. A no so a don guduman na ini na agersitori fu Yesus ben e denki?—Lukas 12:16-21.
9. Fu san ede son Kresten di e angri fu kon abi sani, e fadon na ini wan trapu?
9 Satan e meki sani waka na so wan fasi na ini na ogri sistema disi, taki sma e bigin angri fu kon abi sani. Te fu kaba, na angri disi kan abi so wan krakti tapu a libi fu wan Kresten, taki a e kiri a wortu so taki a „no kan meki froktu” (Markus 4:19). Bijbel e gi wi a rai fu de tevrede te wi abi nyanyan, krosi nanga wan presi fu tan (1 Timoteyus 6:8). Ma furu sma e fadon na ini a trapu fu „a sma di e fanga fowru”, fu di den no e fiti a rai dati na ini den libi. A no fu di den sma disi e denki tumusi furu fu densrefi, meki den de nomonomo fu abi wan gudu libi? Fa a de nanga wi? Wi e angri so te fu abi sani, taki wi no e si na anbegi fu wi moro leki a moro prenspari sani na ini wi libi? (Hagai 1:2-8) A sari fu si taki son sma di ben abi moni problema, du ala san den ben man fu no lasi a switi libi di den ben abi. Te fu kaba den sma disi lasi bribi. „A sma di e fanga fowru” lobi te sma e feti fu kon gudu!
No abi prisiriten di no fiti
10. San ibri Kresten musu aksi ensrefi?
10 Ete wan fu den trapu fu „a sma di e fanga fowru”, na taki a e kori sma na so wan fasi taki den no sabi moro san bun èn san ogri. Den sani di wi e si noso e yere na ini furu fu den felem nanga poku di sma e meki, e sori taki den sma na ini a ten disi abi a srefi denki di den sma na ini Sodom nanga Gomora ben abi. Srefi a nyunsu di wi e si tapu telefisi noso na ini tijdschrift, abi fu du nanga ogridu, èn a e plisi sma di lobi sekstori. Furu fu den sani di wi e si noso e yere tapu telefisi noso radio, e meki taki sma no man si krin moro „san bun èn san no bun” (Hebrewsma 5:14). Ma memre san Yehovah ben taigi a profeiti Yesaya. A ben taki: „Helu fu den wan di e taki dati bun na ogri èn taki ogri na bun!” (Yesaya 5:20) „A sma di e fanga fowru”, kori yu fu luku noso fu arki sani di no fiti? A de prenspari taki wi e ondrosuku wisrefi.—2 Korentesma 13:5.
11. Fa The Watchtower ben warskow sma gi pôpi felem di e kon ibri wiki tapu telefisi?
11 Pikinmoro 25 yari pasa, The Watchtower warskow Kresten brada nanga sisa na wan lobi-ati fasi gi spesrutu telefisi programa. * Disi na san a tijdschrift ben taki fu sori fa den pôpi felem di e kon ibri wiki tapu telefisi e kori sma: „Den felem disi e sori taki sma kan du iniwan sani soso fu feni wan patna di lobi den. Fu eksempre, wan yonguwan di ben de nanga bere ma di no ben trow, ben taigi wan mati fu en: ’Ma mi lobi Victor. A no abi trobi san e pasa. . . . Mi breiti srefisrefi taki mi o meki wan pikin nanga en!’ A poku di e prei safrisafri na ini a felem e meki sma frigiti taki a sani di a yonguwan du na wan bigi ogri. Yu srefi lobi Victor. Yu e firi sari gi a meisje. Èn yu e frustan fa a e firi. Wan sma di ben gwenti luku den sortu felem disi fosi, e taki: ’Mi no ben man bribi taki mi ben e agri nanga den sani di ben e pasa na ini a felem. Wi sabi taki hurudu no bun. . . . Ma mi kon si taki mi ben e denki leki den sma na ini a felem.”
12. Fu san ede wi musu luku bun nanga spesrutu felem di wi e si tapu telefisi?
12 Sensi den artikel disi kon na doro, furu fu den sortu felem disi di e kori sma e drai tapu telefisi. Na ini furu kondre, den sortu felem disi de fu si heri dei tapu telefisi. Mansma, umasma, nanga yonguwan lobi fu luku den sortu felem disi. Ma wi no musu kori wisrefi taki den felem disi bun. A no ben o bun fu denki taki den sani di wi e si na ini den felem disi, no ogri fu di den srefi sani disi e pasa na ini na aladei libi. Fu dati ede, wan Kresten di noiti no ben o abi demakandra nanga den sma na ini den sortu felem dati, no kan bosroiti fu sidon luku den sortu felem disi.
13, 14. Fa son sma kisi wini fu di den gi yesi na warskow di abi fu du nanga felem tapu telefisi?
13 Furu sma kisi wini di den gi yesi na a warskow di „a getrow èn koni srafu” ben gi (Mateyus 24:45-47). Son sma di ben e leisi a rai disi di ben komoto fu Bijbel, ben seni brifi fu sori fa den artikel yepi den. * Wan fu den sma disi ben taki: „Tinadri yari langa mi no ben misi nowan fu den den felem disi. Mi ben denki taki mi no ben e du nowan ogri, fu di mi ben e go na den Kresten konmakandra, èn fu di mi ben e go na ini a preikiwroko ten na ten. Ma mi bigin denki neleki den sma na ini den felem. Iya, mi ben feni taki efu wan masra no ben e handri bun nanga a wefi fu en, noso efu a wefi ben feni taki en masra no ben lobi en nofo, dan a wefi dati ben kan du sutadu, fu di na a masra srefi ben suku a sani dati. Sobun, di mi ben feni taki mi ben abi a reti fu du sutadu, dan mi du dati èn mi sondu teigi Yehovah èn teige mi trowpatna.” Den puru na uma disi fu a gemeente. Te fu kaba, a kisi ensrefi, a sori berow, èn a tron wan memre baka fu a gemeente. Den artikel di ben e warskow sma gi den pôpi felem di e kon tapu telefisi ibri wiki, gi na uma disi a krakti fu no luku felem di Yehovah no feni bun.—Amos 5:14, 15.
14 Wan tra sma di ben leisi den artikel dati, ben feni yepi tu. A ben taki: „Mi krei di mi leisi den artikel, fu di mi kon si taki mi no ben e anbegi Yehovah moro nanga mi heri ati. Mi pramisi mi Gado taki mi no ben o de wan srafu moro fu den felem disi.” Baka di wan Kresten uma taki fa a e warderi den artikel disi, dan a skrifi taki ensrefi ben abi a gwenti fu luku den sortu felem dati. A ben skrifi: „Mi ben e aksi misrefi . . . efu den sortu felem disi ben o pori a matifasi di mi abi nanga Yehovah. Fa mi ben kan tan wan mati fu Yehovah efu mi ben lobi den sma na ini den felem?” Efu den felem dati ben e kori sma 25 yari pasa, dan den sa du dati tu na ini a ten disi, a no so? (2 Timoteyus 3:13) Wi musu luku bun taki Satan no kori wi nanga prisiriten di no fiti, awinsi na pôpi felem tapu telefisi, ogri-ati video game, noso video clip di e sori fa sma e tyari densrefi na wan fasi di no fiti.
Luku bun nanga kesekese
15. Fa Didibri e fanga son sma libilibi?
15 Te sma abi kesekese nanga trawan, dan Satan e gebroiki dati fu tyari pratifasi kon na mindri a pipel fu Yehovah. Wi kan fadon na ini a trapu disi, awinsi sortu diniwroko wi e du gi Yehovah. Son sma e fadon na ini wan trapu fu Didibri, fu di den e meki den kesekese di den abi nanga trawan pori a vrede nanga a wánfasi fu a gemeente, èn den tyari bruya kon tu na ini na tumusi moi organisâsi di Yehovah seti.—Psalm 133:1-3.
16. Fa Satan pruberi fu pori a wánfasi fu wi na wan triki fasi?
16 Na a ten fu a Fosi Grontapufeti, Satan frufolgu den futuboi fu Yehovah na grontapu krinkrin, fu di a ben wani pori na organisâsi fu den. Ma a no ben abi bun bakapisi (Openbaring 11:7-13). Sensi a ten dati, a gebroiki ala sortu triki fu pori a wánfasi fu wi. Te wi e meki den kesekese di wi abi nanga trawan tyari pratifasi kon na wi mindri, dan na so wi e meki „a sma di e fanga fowru” abi krakti na wi tapu. A sani dati kan tapu a santa yeye fu Gado fu abi krakti na wi tapu èn tapu a gemeente. Satan ben o lobi dati, bika te wánfasi no de na ini a gemeente, dan dati sa gens a preikiwroko.—Efeisesma 4:27, 30-32.
17. San kan yepi den wan di abi kesekese nanga wan trawan, fu lusu a problema dati?
17 San yu kan du te yu abi wan kesekese nanga wan tra Kresten? A no de fu taki, dati ibri situwâsi de tra fasi. Ma awinsi fa a kesekese du kon, wi musu du ala muiti fu lusu a problema di wi abi nanga wan brada noso wan sisa (Mateyus 5:23, 24; 18:15-17). A rai di Gado e gi na ini en Wortu, bun dorodoro. Te wi e fiti Bijbel gronprakseri na ini wi libi, dan ala ten wi sa abi bun bakapisi!
18. Fu san ede wi musu teki na eksempre fu Yehovah te wi wani lusu den kesekese di wi abi nanga trawan?
18 Yehovah de „klariklari fu gi pardon”, èn a e gi „pardon trutru” (Psalm 86:5; 130:4). Te wi e teki na eksempre fu Yehovah, dan wi e sori taki wi na pikin di A feni bun (Efeisesma 5:1). Wi alamala na sondu libisma, èn a de fanowdu trutru taki Yehovah e gi wi pardon. Dati meki, a no bun te wi no lobi fu gi trawan pardon. Wi kan kon tron leki a srafu na ini na agersitori fu Yesus. A srafu dati ben weigri fu gi wan tra srafu pardon, aladi a masra fu en ben gi en pardon gi wan moro bigi paiman. Di a masra kon yere fu a tori disi, dan a meki sma poti na ogri srafu na ini strafu-oso. Na a kaba fu na agersitori, Yesus taki: „Na so mi Tata na hemel sa du tu nanga unu te unu no e gi un brada pardon nanga un heri ati” (Mateyus 18:21-35). Te wi e denki dipi fu na agersitori disi èn fu den someni leisi di Yehovah ben de klariklari fu gi wi pardon, dan dati sa yepi wi fu lusu den kesekese di wi abi nanga trawan!—Psalm 19:14.
Wi e kisi kibri na ini „a kibripresi fu a Moro Heiwan”
19, 20. Fa wi musu si „a kibripresi” nanga „a kowrupresi” fu Yehovah na ini a ten disi pe ogri kan miti wi makriki?
19 Na ini a ten disi ogri kan miti wi makriki. Efu Yehovah no ben kibri wi na wan lobi-ati fasi, dan a no de fu taki dati Satan ben o pori wi alamala kaba. Sobun, efu wi no wani fadon na ini a trapu fu „a sma di e fanga fowru”, dan wi musu tan na a presi pe wi e kisi kibri, iya, wi musu tan na ini „a kibripresi fu a Moro Heiwan”. Dati wani taki, dati wi sa tan „na ini a kowru presi fu na Almaktiwan”.—Psalm 91:1.
20 Noiti wi musu si den rai fu Yehovah leki wan hebi, ma na presi fu dati wi musu frustan taki den rai disi e kibri wi. Wi alamala sabi taki wan feanti di koni moro wi, wani du wi ogri. Dati meki wi breiti taki Yehovah e yepi wi na wan lobi-ati fasi, bika efu a no ben e du dati, dan a feanti disi ben o fanga wi alamala (Psalm 124:7, 8). Fu dati ede, meki wi begi Yehovah fu frulusu wi fu den trapu fu „a sma di e fanga fowru”!—Mateyus 6:13.
[Futuwortu]
^ paragraaf 11 The Watchtower fu 1 december 1982, bladzijde 3-7.
^ paragraaf 13 De Wachttoren fu 1 mei 1984, bladzijde 30.
Yu e memre disi ete?
• Fu san ede a no bun srefisrefi fu „frede gi libisma”?
• Fa Didibri e kori wi fu feti baka gudu?
• Fa Satan kori son sma nanga prisiriten di no fiti kwetikweti?
• Sortu trapu Didibri e gebroiki fu pori a wánfasi fu wi?
[Aksi fu a tori disi]
[Prenki na tapu bladzijde 27]
Son sma fadon na ini wan trapu, fu di den e „frede gi libisma”
[Prenki na tapu bladzijde 28]
Yu lobi luku noso arki sani di Yehovah no feni bun kwetikweti?
[Prenki na tapu bladzijde 29]
San yu kan du te yu abi wan kesekese nanga wan Kresten brada noso sisa?