Fu san ede ogridu de ete?

„YEHOVAH [GADO] de regtfardiki na ini ala den pasi fu en”, na so Bijbel e taki (Psalm 145:17; Openbaring 15:3). Moses ben taki fu Gado: „Den sani di a e du, bun dorodoro, bika a e du ala sani na wan reti fasi. Wan Gado fu getrowfasi, di no e du kruktudu; a de regtfardiki èn opregti” (Deuteronomium 32:4). Yakobus 5:11 e taki: „Yehovah lobi sma trutru èn taki a abi sari-ati.” Gado no man du ogri, èn a no En e meki taki ogri e pasa.

A disipel Yakobus ben skrifi: „Te tesi miti wan sma, no meki a taki: ’Na Gado e tesi mi.’ Bika nowan sma kan tesi Gado nanga ogri sani, èn Gado srefi no e tesi sma tu” (Yakobus 1:13). Yehovah Gado no e tesi sma nanga ogri, èn a no e kori sma tu fu du ogri-ati sani. We, dan suma na a sma di e meki taki ogri e pasa èn taki sma e pina leki bakapisi fu dati?

Suma e meki taki ogri e pasa?

A Bijbel skrifiman Yakobus e sori taki son leisi na libisma srefi e meki taki ogri e pasa. A e taki: „Ibri sma e kisi tesi fu di en eigi lostu e hari en èn e kori en. Dan te a lostu kon lepi, a e tyari sondu kon; te a sondu du kaba, dan dati e tyari dede kon” (Yakobus 1:14, 15). Son leisi, sma e du ogri fu di den abi takru lostu. Boiti dati, libisma gebore tu nanga sondu. A krakti di sondu abi na wi tapu kan meki taki den takru lostu fu wi e kon moro tranga, èn dati kan abi kefalek takru bakapisi (Romesma 7:21-23). Iya, sondu „tiri leki kownu”, èn a meki libisma du takru sani di e meki den pina srefisrefi (Romesma 5:21). Boiti dati, ogri-atisma kan gi trawan deki-ati fu du ogri.—Odo 1:10-16.

Ma a moro prenspari sma di e meki taki ogri e pasa, na Satan Didibri. Na en meki taki sma bigin du ogri na grontapu. Yesus Krestes ben kari Satan „na ogriwan” èn sosrefi „a tiriman fu grontapu”, noso fu den onregtfardiki libisma. Furu libisma e gi yesi na Satan fu di den no e du den bun sani di Yehovah Gado wani den fu du (Mateyus 6:13; Yohanes 14:30; 1 Yohanes 2:15-17). Luku san 1 Yohanes 5:19 e taki: „Heri grontapu de na ini a makti fu na ogriwan.” Fu taki en leti, Satan nanga den ogri yeye fu en e „kori sma na  heri grontapu”, èn den e tyari soso bigi problema kon (Openbaring 12:9, 12). Sobun, Satan Didibri na a moro prenspari sma di e meki taki ogri e pasa.

Preikiman 9:11 e taki fu ete wan reide fu san ede libisma e pina. Drape skrifi: „Ten nanga sani di e pasa sondro fu sma fruwakti dati, e miti [wi] alamala.” Yesus Krestes ben taki fu wan rampu di ben miti 18 sma. Den sma disi dede fu di wan toren fadon na den tapu (Lukas 13:4). A sani disi ben miti den sma fu di den ben de drape leti na a momenti di a toren fadon. Den srefi sani disi e pasa na ini a ten disi. Fu eksempre, wan ston kan lusu fadon fu wan hei gebow, èn a kan fadon na tapu wan sma di e waka pasa. Na Gado meki a ston fadon? Nôno. Nowan sma ben fruwakti taki a sani disi ben o pasa. Na so a de tu te wan famiriman e kon siki wantronso, noso te dede e meki taki wantronso wan pikin e lasi en papa nanga mama, èn taki wan uma e lasi en masra.

We, a de krin taki a no Gado e meki taki ogri e pasa, èn a no en e meki sma pina. Na presi fu dati, Yehovah o tyari wan kaba kon na ogridu èn na den sma di e du ogri (Odo 2:22). Fu taki en leti, a sa du moro sani srefi. Bijbel e taki dati Gado o meki Krestes „tyari wan kaba kon na den wroko fu Didibri” (1 Yohanes 3:8). Na a ten dati, a seti fu sani disi di lai nanga sma di gridi, di abi bita-ati, èn di e du ogri-ati sani, no sa de moro. Wan tra sani di Gado sa du tu, na taki a sa ’figi ala watra puru na den ai fu ala sma’ èn na so a tyari wan kaba kon na pina (Openbaring 21:4). Ma kande yu e aksi yusrefi: ’Fu san ede Gado no du a sani disi ete? Fu san ede a gi pasi taki sma na ini a ten disi e tan du ogri èn taki sma e tan pina?’ A Bijbel tori fu Adam nanga Eva sa piki na aksi disi.

Wan tumusi prenspari afersi e opo kon

Den sani di pasa na a bigin fu grontapu, e sori fu san ede Gado gi pasi taki sma e tan du ogri te na a dei fu tide. Wan sani di ben pasa na a ten dati, meki taki wan prenspari afersi opo kon di ben abi fu du nanga a Mekiman. Iya, a problema dati no ben o lusu esi-esi. Meki wi luku moro fini san ben pasa.

Yehovah Gado ben meki a fosi man nanga uma na wan volmaakti fasi èn a poti den na ini a Paradijs. Den ben kisi wan sani di meti no abi. Iya, den ben kisi a reti fu teki den eigi bosroiti (Genesis 1:28; 2:15, 19). Fu di Adam nanga Eva ben man teki den eigi bosroiti, meki den ben kan bosroiti fu lobi, fu dini, èn fu gi yesi na a Mekiman fu den. Noso, den ben kan bosroiti fu libi sondro Gado èn fu trangayesi en fu espresi.

Fu di a tru Gado ben wani gi Adam nanga Eva na okasi fu sori taki den lobi en, meki den ben mag du ala sani, boiti wán spesrutu sani. A ben gi Adam a komando disi: „Fu ala den bon na ini a dyari yu kan nyan teleki yu bere furu. Ma fu a bon fu sabi san na bun èn san na ogri, yu no musu nyan, bika na a dei di yu o nyan fu en, na dede yu o dede” (Genesis 2:16, 17). Efu Adam nanga Eva ben wani taki Gado ben tan feni den bun, so taki sani ben kan waka bun nanga den èn nanga den bakapikin fu den, dan den no ben musu nyan a froktu fu wán spesrutu bon. Den ben o gi yesi na a komando disi?

Bijbel e sori wi san ben pasa. Satan Didibri go na Eva, èn nanga yepi fu wan sneki a taigi den: „A de so trutru taki Gado taki dati un no musu nyan fu nowan fu den bon na ini a dyari?” Di Eva taigi Satan sortu komando Gado ben gi den, dan Satan taigi en: „Unu no sa dede kwetikweti. Bika Gado sabi taki na a dei di unu o nyan fu den froktu, un ai o opo èn unu o de leki Gado. Unu o sabi san na bun èn san na ogri.” Ne, na uma kon lobi a bon so te, taki „a puru wan froktu fu a bon, dan a nyan fu en”. A tori e taki moro fara: „Baka dati a gi en masra wan pisi tu di a ben de nanga en, èn a masra srefi nyan tu” (Genesis 3:1-6). Ma a fasi fa Adam nanga Eva  gebroiki a reti di den ben abi fu teki den eigi bosroiti, no ben fiti, fu di a trangayesi fu den meki taki den sondu teige Gado.

A no de fu taki dati a sani disi na wan seryusu tori. Didibri ben taki wan heri tra sani leki san Gado ben taigi Adam. Den sani di Satan taki, ben e sori taki Adam nanga Eva no ben o abi Yehovah fanowdu fu man bosroiti san bun èn san no bun. Fu taki en leti, Satan krutu a reti di Yehovah abi fu tiri libisma. Disi na a tumusi prenspari afersi di ben opo kon. San a tru Gado ben o du?

Nofo ten de fanowdu

Yehovah ben abi a makti fu kiri Satan, Adam, nanga Eva, fu di den ben opo densrefi teige en. A no de fu taki dati Gado ben makti moro den. Ma Satan no krutu a makti fu Gado. Na presi fu dati, a krutu a reti di Yehovah abi fu tiri sani. Na afersi disi ben abi fu du nanga ala engel èn nanga libisma. Den ben musu kon si taki den bosroiti di den ben e teki, ben musu kruderi nanga den rai di Gado gi libisma fu meki taki den tan gosontu, taki den e tyari densrefi na wan fasi di fiti, èn taki den e anbegi en na a yoisti fasi. Efu den no ben e fiti den rai disi, dan ogri ben o miti den, neleki fa ogri sa miti wan man di e dyompo komoto fu wan hei gebow sondro fu hori na prakseri taki a o kisi mankeri (Galasiasma 6:7, 8). Ala libisma nanga engel ben o kisi wini te densrefi ben e kon si sortu takru bakapisi a e tyari kon te wan sma e libi sondro Gado. Ma a sani disi ben o teki ten.

Soleki fa wi si, dan a e teki ten fu lusu son problema. Wi kan agersi dati na a fasi disi: Kon meki wi taki dati wan papa e strei nanga wan tra papa fu luku suma moro tranga. A sa kon na krin heri esi suma moro tranga. Kande den sa opo bigi ston. A papa di opo a moro hebi ston, sa de a moro trangawan. Ma a ben o de heri tra fasi efu den papa ben musu strei fu luku suma abi moro lobi gi en eigi pikin, èn efu den pikin abi moro lobi gi den eigi papa. Noso kande den ben o strei fu luku sortu papa e sorgu en osofamiri moro bun. Den no ben o man sori dati nanga a krakti fu den, noso nanga den sani di den e taki. Fu man kon si sortuwan fu den papa na a moro bunwan, dan nofo ten ben o de fanowdu fu kon si fa den tu papa disi e handri nanga den pikin fu den. Na so sma ben o man bosroiti sortu papa na a moro bun wan.

San kon na krin na ini a ten di pasa?

Sowan 6000 yari pasa sensi Satan ben krutu a reti di Gado abi fu tiri. San kon na krin na ini a pisi ten dati? Luku tu lei di Satan fruteri fu Gado. Satan ben abi a deki-ati fu taigi Eva: „Unu no sa dede kwetikweti” (Genesis 3:4). Di Satan taki dati Adam nanga Eva no ben o dede efu den ben e nyan fu a froktu di den no ben mag nyan, dan fu taki en leti, a kari Yehovah wan leiman. A sani dati a no wan pikin sani! Efu Gado ben lei, dan fa wi ben o man frutrow na en tapu? Ma san kon na krin na ini a ten di pasa?

Adam nanga Eva kon siki, den pina, den kon owru, èn te fu kaba den dede. Bijbel e taki: „Ala nanga ala, Adam libi neigi hondro dritenti yari, dan a dede” (Genesis 3:19; 5:5). Èn ala den bakapikin fu Adam e ondrofeni den takru bakapisi disi (Romesma 5:12). A ten di pasa sori taki Satan na „wan leiman èn a tata fu ala lei”, èn taki Yehovah na „a Gado fu waarheid”.—Yohanes 8:44; Psalm 31:5.

Satan ben taigi Eva tu: „Gado sabi taki na a dei di unu o nyan fu [a bon di yu no mag nyan fu en], un ai o opo èn unu [Adam nanga Eva] o de leki Gado. Unu o sabi san na bun èn san na ogri” (Genesis 3:5). Nanga yepi fu a lei disi, Satan kori libisma fu tiri densrefi. Na wan triki fasi Satan gi libisma a denki taki sani ben o waka moro bun gi den te Gado no ben o tiri den. Satan ben abi leti?

Na ini ala den hondrohondro yari di pasa, kownukondre opo kon èn den fadon baka.  Sma tiri densrefi na ala sortu fasi. Ma ibri tron baka, ogri-ati sani pasa nanga a libisma famiri. Sowan 3000 yari pasa, wan koni Bijbel skrifiman ben taki: „A wan libisma tiri a trawan na wan fasi di e tyari takru bakapisi gi en” (Preikiman 8:9). A profeiti Yeremia ben skrifi: „A no de na wan libisma di e waka srefi fu taki pe a wani poti en futu” (Yeremia 10:23). Aladi sabiman meki so furu nyun sani na ini a ten disi, toku a de so ete taki libisma no man tiri densrefi. Na ini a ten di pasa, a kon na krin taki den sani di Bijbel e taki, na tru tori.

San yu o du?

Na ini den yari di Gado gi pasi taki ogridu e pasa, a kon na krin taki Satan no ben abi leti di a taki dati Yehovah no abi a reti fu tiri ala sani. Yehovah Gado na a wan-enkri Sma di abi a reti fu tiri hemel nanga grontapu. A abi a reti fu tiri den sani di a meki, èn nowan enkri tiri bun moro a di fu en. Den engel di e libi bun langa na hemel, sabi heri bun fa Gado e tiri, èn fu dati ede den e taki: „Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.”—Openbaring 4:11.

Fa a de nanga yu? Yu feni taki Gado abi a reti fu tiri yu? Efu dati de so, dan yu musu si Yehovah leki a sma di abi a reti fu tiri ala sani. Fu man du disi, dan yu musu sori na ini ala san yu e du, taki yu e fiti den tru gronprakseri nanga den rai di skrifi na ini Bijbel, a Wortu fu En. „Gado na lobi”, èn a gi libisma nanga engel wet, fu di a lobi den (1 Yohanes 4:8). Yehovah e gi wi ala san wi abi fanowdu. Fu dati ede yu kan bribi a rai disi di Bijbel e gi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.”—Odo 3:5, 6.

[Prenki na tapu bladzijde 7]

Yu kan meki Gado tiri yu te yu e studeri Bijbel èn te yu e du san yu leri

[Sma di abi a reti fu a prenki na tapu bladzijde 4]

© Jeroen Oerlemans/Panos Pictures