Ondrofenitori

Na wan bigi grani fu dini Yehovah

Soleki fa Zerah Stigers fruteri

Mi masra di ben wroko makandra nanga mi na wan getrow fasi na ini a furuten diniwroko, dede na ini 1938. Na a ten dati mi ben abi wan beibi nanga wan boi fu tin yari di mi ben musu sorgu. Mi ben wani tan du a furuten diniwroko. Ma fa mi ben o du dati? Fosi mi fruteri fa mi ben man tan du a furuten diniwroko, meki mi fruteri yu pikinso fa mi libi ben de.

SYATU baka di mi gebore tapu 27 yuli 1907 na ini Alabama, Amerkankondre, mi papa nanga mama froisi nanga mi nanga den dri tra pikin fu wi osofamiri go na Georgia. Syatu baka dati wi go na Tennessee, èn bakaten wi froisi go na ini a birti fu a foto Tampa, na ini Florida. Na ini 1916 di wi ben de drape, mi si a felem di nen „Photo-Drama der Schepping”. Na a ten dati sma ben bigin meki felem, èn ala sma ben lobi a „Photo-Drama”!

Mi papa nanga mama ben lobi leisi A Waktitoren nanga tra Bijbel publikâsi. Aladi mi papa ben lobi leisi den buku, toku a no ben studeri Bijbel nanga den Bijbel Ondrosukuman, soleki fa Yehovah Kotoigi ben nen na a ten dati. Ma mi mama ben tyari wi go na den konmakandra. Syatu baka di wi froisi go na a dorpu Niles na ini Michigan, wi ben gwenti fu go na den konmakandra nanga loko sowan 16 kilometer na a foto South Bend na ini Indiana.

 Te fu kaba, tapu 22 yuli 1924, mi teki dopu fu sori taki mi gi mi libi abra na Yehovah. Syatu baka dati, mi mama seti sani fu dini leki wan furuten preikiman. A moi eksempre fu mi mama èn sosrefi fu tra furuten preikiman, meki taki mi ben wani du a srefi wroko dati.

Mi feni wan trowpatna

Na ini 1925, di mi ben de na wan bigi kongres na ini Indianapolis, na Indiana, mi miti James Stigers di ben de fu a foto Chicago. Wantewante mi lobi James, fu di a ben dini Yehovah fayafaya. Chicago ben de sowan 160 kilometer fara fu pe mi ben libi, èn dati meki a no ben makriki fu miti makandra. Na a ten dati, wán gemeente nomo ben de na ini a bigi foto dati, èn konmakandra ben hori na ini wan kamra na tapu sodro di den brada ben yuru. James ben gwenti skrifi brifi gi mi fu gi mi deki-ati. Wi trow na ini december 1926, èn pikinmoro wán yari baka dati, a fosi boi fu wi, Eddie, gebore.

Syatu baka dati, mi nanga James bigin pionier. Wi ben dini na ini aiti difrenti presi na ini Amerkankondre, namku Michigan, Louisiana, Mississippi, South Dakota, Iowa, Nebraska, California, nanga Illinois. Den yari dati wi ben ondrofeni den moro moi sani na ini wi libi. Di James ben kon siki, dan problema ben kon na ini wi osofamiri-libi.

Fu di wi ben musu pai furu moni di James ben kon siki, meki na ini 1936 wi ben musu go baka na Chicago fu tan nanga James en mama di ben de wan Kotoigi tu. Fosi James dede, mi ben de nanga bere baka, èn mi ben wroko wán Amerkandala wan dei na wan nyanyan-oso. A mama fu James ben sori switifasi trutru èn a ben sorgu taki wi ben abi nofo fu nyan, èn a no ben wani taki wi ben musu pai en gi dati. A sorgu heri bun gi wi.

James ben kisi wan siki na en ede-tonton, èn baka sowan tu yari a dede. Dati ben de na ini yuli 1938. Di a ben siki, a no ben man rèi oto èn a no ben man preiki oso fu oso, ma te a ben kisi na okasi fu gi kotoigi, dan a ben du dati. Mi no ben man du a furuten diniwroko moro, fu di mi ben musu sorgu gi wi osofamiri. Mi ben abi difrenti wroko, ma mi ben du den fu wan syatu pisi ten nomo.

Bobby, a boi fu wi, gebore tapu 30 yuli 1938, aiti dei baka di en papa dede. A mama fu James no ben wani meki mi go na wan pikin ati-oso. A seti sani so taki mi ben kan go na wan moro bun ati-oso fu meki a datra fu en luku mi. Boiti dati, a ben pai ala den kostu. Mi ben abi furu warderi gi a lobi di a sori mi.

Mi go baka na ini a furuten diniwroko

Mi ben tan nanga James en mama teleki Bobby ben abi pikinmoro tu yari èn Eddie ben abi 12 yari. Aladi mi ben musu gwenti a situwâsi pe mi ben de na ini, toku mi ben wani du a furuten diniwroko ete gi Yehovah. Na ini 1940 na wan kongres na ini a foto Detroit, Michigan, mi miti wan trowpaar di ben pionier èn den gi mi a deki-ati fu kon pionier na ini South Carolina. Dati meki mi bai wan Pontiac oto gi 150 Amerkandala, èn mi seti sani fu froisi go drape. Na ini 1941, di Amerkankondre ben go feti na a di fu Tu Grontapufeti, dan mi nanga den tu boi fu mi go na a zuidsei fu Amerkankondre pe mi bigin du a furuten diniwroko baka.

Di wi froisi go na South Carolina, wi go fosi na a foto Camden, baka dati wi go na a foto Little River, èn bakaten wi go na a foto Conway.  Na ini Conway mi ben bai wan wagi pe wi ben kan tan na ini. Wan man di ben abi wan station pe sma ben kan go lai oli, gi mi primisi fu poti a wagi krosibei fu a station. Mi ben mag hari stroom fu a station kon na a wagi fu mi, èn mi ben mag gebroiki a gas fu en tu. Boiti dati, mi ben mag gebroiki a toilet fu a station. Na a ten fu a di fu Tu Grontapufeti, gasoline no ben de fu feni. Fu dati ede mi bai wan baisigri na wan sma. Na ini 1943, di a ben gersi leki mi no ben man pionier go doro fu di wi no ben abi moni, mi kisi a kari fu go na ini a spesrutu pionierwroko. Na so mi ben kisi pikinso moni fu yepi pai den kostu. Ala den yari dati, Yehovah yepi mi trutru!

Na a ten dati, tra Kotoigi no ben libi na ini Conway, èn a ben muilek gi mi nanga den pikin fu go wi wawan na ini a preikiwroko. Fu dati ede, mi seni aksi fu wan spesrutu pionier kon yepi wi drape. Sobun, na ini 1944 wan bun spesrutu pionier kon yepi mi, namku Edith Walker. Wi ben wroko makandra 16 yari langa na difrenti kontren. Ma a de wan sari taki a ben kon siki, èn dati meki a ben musu drai go baka na Ohio.

Mi no sa frigiti den moi blesi di mi kisi

Wan fu den moi sani di mi kan memre fu a ten dati èn di mi no sa frigiti, abi fu du nanga a meisje Albertha di ben abi 13 yari. A meisje disi di ben libi na ini Conway ben sorgu gi en granmama di ben malengri èn gi den tu pikin brada fu en. A ben lobi den sani di mi ben leri en fu Bijbel, èn a ben wani fruteri tra sma den sani dati. Albertha ben lobi a pionierwroko tu èn baka di a klari heiskoro na ini 1950, a bigin pionier. Now a de na ini a furuten diniwroko moro leki 57 yari kaba!

Na ini 1951, mi nanga Edith ben musu go dini wan syatu pisi ten na ini a foto Rock Hill, na South Carolina, pe wan tu Kotoigi nomo ben libi. Baka dati wi dini dri yari na ini a foto Elberton na Georgia. Bakaten, wi drai go baka na South Carolina èn mi tan drape fu 1954 teleki 1962. Na ini a foto Walhalla mi ben miti wan owru uma di nen Nettie. Na uma disi di no man yere bun, ben tan en wawan na wan boitipresi. Te wi ben studeri Bijbel, dan a ben leisi wan paragraaf na ini a buku, mi ben sori en na aksi di ben skrifi na ondrosei fu a bladzijde, èn baka dati a ben sori mi a piki na ini a paragraaf.

Te a no ben frustan wan sani, dan a ben skrifi na aksi fu en na tapu wan papira, èn mi ben skrifi a piki baka na aksi. Te fu kaba, Nettie ben kisi so furu warderi gi den sani di a ben leri na ini Bijbel, taki a bigin go na den gemeente konmakandra èn a bigin du na oso-fu-oso preikiwroko. En wawan ben e go preiki gi den sma, èn ala ten mi ben de krosibei. Nofo tron mi ben de abrasei fu a strati so taki mi ben kan yepi en te a ben de fanowdu.

Di mi ben de na ini Walhalla, na owru oto fu mi no ben rèi moro. Mi ben kisi na okasi fu bai wan oto gi 100 Amerkan dala, ma mi no ben abi a moni. Mi aksi wan Kotoigi di ben abi wan bisnis fu leni mi a moni, èn a du dati. Syatu baka dati, mi kisi wan brifi fu mi pikin sisa. A ben skrifi taki den brada fu mi kon sabi taki mi papa di dede, ben abi moni na bangi ete. Den ben taki san den ben o du nanga a moni, èn den alamala bosroiti fu seni a moni gi mi. A moni ben de 100 Amerkan dala!

Mi pionier nanga den boi fu mi

Di Eddie nanga Bobby ben yongu, den ben de ala ten nanga mi na ini na oso-fu-oso preikiwroko. Na ini a ten dati, furu sma no ben abi  problema nanga drugs, èn furu sma no ben libi wan yayolibi leki na ini a ten disi. Fu di wi ben pruberi fu abi soso den sani di wi abi trutru fanowdu na ini a libi èn fu di wi ben tan poti prakseri na a preikiwroko, meki mi no ben abi furu fu den problema di papa nanga mama abi na ini a ten disi te den e leri den pikin fu dini Yehovah.

Eddie ben go na mulo skoro na ini a foto Camden, èn baka dati a ben wani pionier makandra nanga mi. A ben de wan prisiri sani fu pionier wan tu yari nanga makandra. Baka dati a ben wani go wroko na a edekantoro fu Yehovah Kotoigi na ini Brooklyn, New York. Drape a wroko fu 1947 teleki 1957. Na ini 1958 a trow nanga Albertha, a meisje di mi ben studeri nanga en, èn den ben pionier makandra. A ben de wan prisiri sani taki wi ala dri ben go na a Pionierskoro na ini 2004!

Mi man memre ete taki furu yari pasa, mi ben yere taki Bobby ben aksi Yehovah na ini begi fu yepi mi feni nofo gasoline gi na oto, so taki mi kan go na den bijbelstudie fu mi. Bobby sori na ini en heri libi taki a lobi a diniwroko èn a ben pionier furu yari langa. A de wan sari taki Bobby kisi bigi problema na ini en libi neleki mi. Na ini 1970, di a ben trow 22 mun nomo, en wefi dede di a ben e meki a twelengi fu den. Den twelengi srefi lasi libi. Ala ten Bobby ben libi krosibei fu mi, èn wi abi wan bun matifasi.

Mi e pionier te now ete!

Na ini 1962, mi ben musu go dini na ini a gemeente pe mi de now, na ini Lumberton na North Carolina. Now mi de drape 45 yari kaba. Di mi ben abi pikinmoro 84 yari, mi ben rèi na oto fu mi ete. Now wan osofamiri di de Kotoigi èn di e libi krosibei, e tyari mi go na den konmakandra nanga a preikiwroko.

Mi abi wan wakatiki nanga wan rolsturu, ma mi no abi fu gebroiki den fu di mi man waka sondro den. Mi de Yehovah tangi taki mi abi wan bun gosontu. Ma now mi no man si so bun moro. Noiti mi e misi den konmakandra, boiti te mi siki srefisrefi, èn mi e wroko ete leki wan gewoon pionier di mag du san a man fu di a siki.

Moro leki 70 yari mi e prisiri fu dini leki pionier, èn mi kan taki dati Yehovah yepi mi na ini mi heri libi. * Mi sabi taki mi no de wan kefalek koni sma èn taki mi no man wroko esi, ma Yehovah sabi san mi man du èn san mi no man du. Mi de nanga tangi taki a sabi taki mi e du ala san mi man, èn taki a gebroiki mi na ini a diniwroko.

Mi feni taki a de prenspari fu du ala san wi man na ini a diniwroko fu Yehovah, fu di a gi wi ala san wi abi. Solanga mi man, mi no wani du nowan tra sani leki fu pionier. A de wan bigi grani taki mi man du disi! Mi e begi taki Yehovah kan gebroiki mi fu têgo.

[Futuwortu]

[Prenki na tapu bladzijde 13]

Mi nanga mi masra ben gebroiki a wagi disi fu du a furuten diniwroko

[Prenki na tapu bladzijde 14]

Mi nanga den boi fu mi na ini 1941

[Prenki na tapu bladzijde 15]

Mi, Eddie, nanga Bobby, no so langa pasa