Fa yu kan kon sabi Gado?

Son sma e tweifri kande efu Gado wani trutru taki libisma kon sabi en. Efu a de so taki a wani dati, dan fa a e meki libisma kon sabi en?

JOHANNES CALVIJN, wan Protestantsma di ben opo ensrefi teige a Lomsu Kerki na ini a di fu 16 yarihondro, ben abi leti di a taki dati libisma srefi no man kon sabi Gado, boiti efu Gado srefi e meki den kon sabi en. Ma son sma ben kan aksi densrefi efu Gado wani trutru taki libisma kon sabi en. Èn efu a wani dati, dan fa a e meki libisma kon sabi en?

Yehovah, a „Gran Mekiman”, e du ala sani nanga wan reide. Èn fu di a de „Gado na Almaktiwan”, meki noti no man tapu en fu du san a abi na prakseri (Preikiman 12:1; Exodus 6:3). Wi kan abi a dyaranti taki ala ten a de klariklari fu meki libisma kon sabi san a abi na prakseri, bika Amos, a profeiti fu en, ben skrifi nanga yepi fu santa yeye: „A Moro Hei Masra Yehovah no sa du noti, sondro fu tyari den afersi fu en kon na krin gi den futuboi fu en, namku den profeiti.” Ma luku taki a tekst e sori taki Gado tyari den sani di a abi na prakseri, kon na krin soso gi den futuboi fu en, iya gi den wan di lobi en trutru. A sani disi no e fruwondru wi, a no so? Suma yu e fruteri den kibritori fu yu? Yu e fruteri ala sma, noso yu e fruteri soso den bun mati fu yu?—Amos 3:7; Yesaya 40:13, 25, 26.

A koni nanga a sabi fu Gado e meki taki sakafasi sma abi lespeki gi en, èn a sani dati fiti. Ma efu wi wani kisi wini fu a koni nanga a sabi di Gado e tyari kon na krin, dan moro de fanowdu leki fu abi lespeki nomo gi den sani dati. Bijbel e sori krin taki efu wi wani leri sabi san Gado abi na prakseri, dan wi musu abi sakafasi: ’Kibri den komando fu mi leki wan gudu na yu. Kaka yu yesi arki koni. Sreka yu ati fu kisi a koni fu man si sani krin. Bari kari fu kisi frustan srefi, èn opo yu sten fu kisi a koni fu man si sani krin. Tan suku en neleki fa yu e suku solfru.’—Odo 2:1-4.

Wan sma di abi sakafasi èn di e meki a muiti disi trutru sa man kon sabi Gado. A vers dati na ini a Bijbel buku Odo e taki moro fara: „Yehovah srefi e gi koni; na en e gi sabi nanga a koni fu man si sani krin.” Iya, sma di trutru wani kon sabi san tru, noso san na a waarheid kan „frustan san na regtfardikifasi, retidu, nanga opregtifasi, iya, san bunfasi wani taki trutru”.—Odo 2:6-9.

Sma e suku fu kon sabi a waarheid

Wan buku e taki: „Ala libisma wani kon sabi san tru èn san no tru, san abi krakti èn san no abi krakti, san de tru èn san e kori sma, san soifri èn san no soifri, san de krin fu frustan èn san e bruya sma, èn sosrefi san fiti èn san no fiti” (The Encyclopedia of Religion). Fu di sma wani kon sabi den sani disi, meki langa ten kaba den e suku fu kon sabi a waarheid. O moro sma e meki Yehovah yepi den fu kon sabi a waarheid, o moro den sa kon sabi en, fu di en na „a Gado fu waarheid”, soleki fa a psalm skrifiman e kari en.—Psalm 31:5.

Na ini a Hebrewtongo fu owruten, a nen fu Yehovah wani taki „A e meki kon tron”. Sobun, den wortu disi e sori wi taki en na a Mekiman, èn taki a abi wan marki na prakseri. Fu taki en leti, sma di abi a tru anbegi sabi  a nen Yehovah, èn den e gebroiki en tu. Yesus ben sori krin taki den bakaman fu en e du dati. Di a ben begi Gado, dan a ben taki fu den bakaman fu en: „Mi meki yu nen bekènti na den èn mi sa meki en bekènti trutru, so taki den kan abi a srefi lobi di yu abi gi mi èn mi kan de wán nanga den.”—Yohanes 17:26.

Di Yosef, wan Hebrew man fu owruten, ben musu tyari kon na krin san wan tu dren ben wani taki, dan a poti en frutrow tapu Gado fu di a ben de wan mati fu En. Fu dati ede, a ben taki nanga overtoigi: „A no Gado e tyari dren kon na krin?”—Genesis 40:8; 41:15, 16.

Wan tu hondrohondro yari baka dati, Kownu Nebukadnesar fu Babilon kisi wan dren, èn den koniman fu en no ben man fruklari a dren disi. A profeiti Danièl ben taigi a kownu: „Wan Gado de na hemel di e tyari kibritori kon na krin, èn a meki Kownu Nebukadnesar kon sabi san o pasa na ini a kabapisi fu den dei.”—Danièl 2:28.

Den eksempre fu Yosef nanga Danièl e sori taki soso den sma di e dini Yehovah Gado kan kon sabi a koni nanga a sabi fu Gado. A no de fu taki, dati efu wi wani taki Gado feni wi bun, dan a kan de fanowdu taki wi kenki son denki di wi abi. Na dati den fosi yarihondro Dyu di ben tron Kresten, ben musu du. Fu di den Dyu ben leri fu lespeki èn fu gi yesi na den wet fu a Dyu sistema, meki den ben abi ten fanowdu fu kon bribi taki Yesus na a Mesias. Yesus ben kon fu meki a Wet di Gado gi Moses kon tru. A Wet dati ben de leki „wan skaduw fu den bun sani di musu kon ete” (Hebrewsma 10:1; Mateyus 5:17; Lukas 24:44, 45). Na presi fu a Wet dati, Gado gi den „a wet fu Krestes”, di trutru ben hei moro a Wet di Gado gi Moses.—Galasiasma 6:2; Romesma 13:10; Yakobus 2:8.

Wi alamala gebore na ini wan grontapu pe sma no sabi Gado. Fu di wi kisi sondu fu a fosi libisma trowpaar, meki wi gebore leki feanti fu Gado, bika wi no sabi soifri san a abi na prakseri fu du. Boiti dati, wi gebore nanga wan ati di e kori wi (Yeremia 17:9; Efeisesma 2:12; 4:18; Kolosesma 1:21). Efu wi wani tron mati fu Gado, dan wi musu leri fu denki neleki fa Gado e denki. A sani disi no makriki kwetikweti.

A kan muilek srefisrefi fu kenki son denki noso fu tapu nanga son sani di abi fu du nanga falsi anbegi, spesrutu efu wi leri den sani disi sensi di wi ben pikin. Ma a de wan koni sani fu tan denki èn tan du sani di Gado no feni bun? Kwetikweti! A no de fu taki, dati a moro bun fu kenki wi denki, so taki Gado kan feni wi bun.

 Fa Gado e meki wi kon sabi en?

Pe wi kan feni yepi fu man frustan a Wortu fu waarheid èn fu man libi akruderi a Wortu dati? Na ini owruten Israel, Gado ben gi man di a ben frutrow èn di ben de loyaal na en, a frantwortu fu tiri a pipel. Na ini a ten disi, Krestes, na Edeman fu a Kresten gemeente, e tiri den wan tu di trutru wani kon sabi a waarheid. A e du dati nanga yepi fu den bakaman fu en di a e frutrow èn di de loyaal na en. Den bakaman disi kisi a frantwortu fu tiri èn fu kibri sma di trutru wani kon sabi a waarheid (Mateyus 24:45-47; Kolosesma 1:18). Ma fa wan sma kan kon sabi na sortu fasi Gado e meki libisma kon sabi en?

Tru bakaman fu Yesus Krestes e meki tranga muiti fu sori den srefi fasi di Yesus ben sori di a ben de wan libisma. Na ini wan grontapu di e kon ogri dei fu dei, sma kan kon sabi moro makriki suma na den bakaman disi, fu di den e sori na wan tumusi moi fasi taki den abi den fasi fu Krestes (Luku a faki na tapu bladzijde 6). Yu e si taki sma na ini yu kerki, noso sma na ini a kerki fu den birtisma fu yu, abi den fasi disi? A ben o bun fu ondrosuku a tori disi nanga yepi fu Bijbel.

Wi e aksi yu di e leisi na artikel disi, fu teki wan bijbelstudie so taki yu kan ondrosuku a tori disi. A yari di pasa, moro leki 6.000.000 sma na ini 235 kondre ben e studeri Bijbel nanga Yehovah Kotoigi, èn a sani disi tyari wini kon gi den sma disi. Wi sa de koloku, èn wi sa kisi wini te wi e tan meki muiti fu kon sabi a koni nanga a sabi fu Gado. Fu san ede yu no e meki muiti fu kon sabi a koni nanga a sabi fu Gado? A no sa hati yu noiti taki yu du dati. Iya, wi kan kon sabi Gado trutru!

[Faki na tapu bladzijde 6]

DEN WAN DI E WROKO MAKANDRA NANGA GADO . . .

no e teki sei na ini politiek afersi.—Yesaya 2:4.

e meki bun froktu fu di den e du a wani fu Gado.—Mateyus 7:13-23.

e sori taki den lobi makandra trutru.—Yohanes 13:35; 1 Yohanes 4:20.

e taki na ini wánfasi ala ten.—Mika 2:12.

no e teki na eksempre fu den grontapusma di abi fowtu denki èn di e tyari densrefi na wan fasi di no fiti.—Yohanes 17:16

e gi kotoigi fu a waarheid èn den e meki disipel.—Mateyus 24:14; 28:19, 20.

lobi fu kon makandra doronomo, so taki den kan gi makandra deki-ati.—Hebrewsma 10:25.

e prèise Gado leki wan grupu fu brada nanga sisa na heri grontapu.—Openbaring 7:9, 10.

[Prenki na tapu bladzijde 7]

Ibri sma, ibri osofamiri, nanga ibri gemeente kan kon sabi Gado