„Den kari a Sanhedrin kon makandra”

A GRANPRIESTER nanga den Dyu tiriman no ben sabi san fu du. San den ben kan du fu tyari wan kaba kon na a dyugudyugu di ben abi fu du nanga Yesus Krestes? Den ben kisi sma so fara taki den kiri en, ma now den disipel fu Yesus ben e fruteri sma na ini heri Yerusalem taki a kisi wan opobaka. Fa den ben kan tyari wan kaba kon na a sani disi? A granpriester nanga den tra tiriman „kari a Sanhedrin kon makandra”, fu kon sabi san fu du. A Sanhedrin disi ben de a gran krutu fu a Dyu pipel.—Tori fu den Apostel 5:21.

Na a ten dati, a tiriman fu Rome, namku Pontius Pilatus, ben abi a moro bigi makti na ini Israel. Ma fa a Sanhedrin ben e wroko makandra nanga Pilatus? Fa den ben e tiri? Fa a Sanhedrin ben seti? Èn fa a ben e wroko?

A fasi fa a Sanhedrin kon de

A Griki wortu di vertaal leki „Sanhedrin” trutru wani taki a „sidon di sma e sidon nanga makandra”. Sma ben gwenti fu gebroiki a wortu disi fu taki fu wan konmakandra. Na ini a Dyu kulturu, a wortu disi moro furu ben abi fu du nanga wan grupu fu kerki fesiman di ben abi a wroko fu krutu sani.

Skrifiman fu a Talmud, namku den owruten Dyu wet di ben tyari kon na wán na ini den hondrohondro yari baka di Yerusalem kisi pori na ini 70 G.T., ben sori taki a Sanhedrin ben de wan owruten seti. Soleki fa den skrifiman disi ben denki, dan na sabiman wawan ben de memre fu a Sanhedrin, èn den ben e kon makandra fu taki fu sani di ben abi fu du nanga den Dyu wet. Den skrifiman disi ben e bribi taki a seti disi de sensi a ten di Moses ben tyari 70 owru man kon na wán fu yepi en tiri Israel (Numeri 11:16, 17). Historia skrifiman no e agri nanga a sani disi. Den e taki dati a fosi leisi di wan seti ben kon de di ben gersi a Sanhedrin fu a fosi yarihondro, ben de na a ten di den Persiasma ben e tiri Israel. Historia skrifiman e taki tu dati a grupu sabiman di den Talmud skrifiman ben e taki fu en, no e kruderi nanga a Sanhedrin, ma a e kruderi moro furu nanga den konmakandra fu  den Dyu leriman. Sobun, o ten a Sanhedrin ben kon de?

Bijbel e tyari kon na krin taki den katiboman di ben drai go baka na Yuda, baka di den ben komoto na ini Babilon na ini 537 b.G.T., ben abi wan sistema fu tiri a heri pipel. Nehemia nanga Esra e taki fu granman, owru man, heihei sma, nanga tiriman di ben e teki presi gi kownu. A kan taki disi ben de a bigin fu a Sanhedrin di ben o seti bakaten.—Esra 10:8; Nehemia 5:7.

Na ini a pisi ten baka di ala den Hebrew Buku fu Bijbel skrifi, te go miti a ten di na Evangelietori fu Mateyus skrifi, wan lo sani miti den Dyu. Na ini 332 b.G.T., Aleksander a Bigiwan teki Yudea abra. Baka di Aleksander dede, dan Yudea kon de na ondro a makti fu den tiriman fu tu Griki famirilin. A fosi famirilin ben de a di fu Ptolomeus, èn a di fu tu ben de a di fu Seleikos. Den tiriman fu a famirilin fu Seleikos bigin tiri Yudea na ini 198 b.G.T. Den tori di sma ben skrifi fu a pisi ten disi, e taki fu a fosi leisi fu wan grupu sma di ben e tiri den Dyu. A kan taki a grupu disi no ben abi so furu makti, ma a ben e gi den Dyu a denki taki den ben abi den eigi tiri.

Na ini 167 b.G.T., Kownu Antiokus IV (Epifanes) fu a famirilin fu Seleikos, pruberi fu dwengi den Dyu fu teki a Griki kulturu abra. A afrontu a santafasi fu a tempel na ini Yerusalem, fu di a tyari wan agu leki ofrandi na tapu na altari fu a tempel, èn na ofrandi disi ben de gi a gado Zeus. A sani disi meki taki a pipel opo ensrefi teige a Griki tirimakti. Leki bakapisi fu dati, den Makabeisma tyari wan kaba kon na a tirimakti fu a famirilin fu Seleikos, èn den seti a tirimakti fu a famirilin fu den Hasmoneisma. * Na a srefi ten, den leriman fu Wet nanga den Fariseiman, di ben e teki fesi na ini na opruru dati, kon kisi moro makti fu tiri, di a priester grupu lasi a makti di den ben abi.

A Sanhedrin di den Griki Buku fu Bijbel e taki fu en, ben e bigin seti safrisafri. A ben o kon tron wan seti di ben o tiri a heri kondre, èn sosrefi a moro hei krutubangi di ben o bosroiti fa sma ben musu hori densrefi na den Dyu wet.

A fasi fa a Sanhedrin nanga Rome ben e tiri Yudea

Na a ten fu a fosi yarihondro, Rome ben abi a makti na ini Yudea. Ma den Dyu ben mag tiri son afersi. Den Romesma ben gwenti fu gi pasi taki den kondre di den ben teki abra, ben e seti den eigi tirimakti. Fu dati ede den tiriman fu Rome no ben e bumui na ini den afersi fu den krutubangi fu den kondre dati, èn den ben e luku bun taki a difrenti na mindri den kulturu no ben e tyari problema kon. Den Romesma ben e gi pasi taki den pipel fu den kondre di den ben teki abra ben abi den eigi gwenti nanga den eigi tiri. Na so fasi den ben e sorgu taki vrede de èn taki den pipel ben e tan getrow na Rome. Den Romesma ben e bumui na ini den afersi fu den Dyu soso te a ben gersi leki den ben o lasi makti, noso te sani no ben e waka bun nanga den afersi fu den. Boiti dati, den Romesma ben e poti èn den ben e puru a granpriester di ben de na edeman fu a Sanhedrin. Wan tra sani di den ben e du tu, na taki den ben e teki belasting moni. Soleki fa a kon na krin na ini a krutu-afersi fu Yesus, dan Rome no ben wani gebroiki a makti di den ben abi fu gi sma dedestrafu.—Yohanes 18:31.

Sobun, a Sanhedrin ben e tiri moro furu fu den afersi fu den Dyu. A ben e seni skowtu fu go grabu sma (Yohanes 7:32). Moro lagi krutubangi ben e  krutu sma di ben du pikinpikin ogri èn sosrefi afersi fu borgu, sondro taki Rome ben e bemui ini den tori disi. Te a lagi krutubangi no ben man teki wan bosroiti na ini wan afersi, dan na afersi dati ben e go na fesi a Sanhedrin, èn a Sanhedrin ben e bosroiti san ben musu pasa.

Efu a Sanhedrin ben wani tan abi a makti di a ben abi, dan a ben musu sorgu taki vrede de, èn a ben musu hori baka gi a tirimakti fu Rome. Ma efu Rome ben e si taki sma ben e opo densrefi teige a tirimakti fu den, dan den ben kon na ini a tori, èn den ben e handri na wan fasi di densrefi ben feni bun. Wan fu den sortu afersi disi na a grabu di den ben grabu na apostel Paulus.—Tori fu den Apostel 21:31-40.

Den memre fu a krutubangi

A Sanhedrin ben abi 71 memre, namku a granpriester, nanga 70 prenspari man fu a kondre. Na ini a ten di Rome ben e tiri Yudea, den memre fu a Sanhedrin ben de lespeki sma fu a priester famiri (moro furu den ben de Saduseiman), heihei sma, nanga Fariseiman di ben de sabiman fu a Wet. Den heihei sma ben e horibaka gi den lespeki sma fu a priester famiri di ben abi a moro hei makti na ini a krutubangi. * Den Saduseiman ben e tan hori densrefi na den wet di ben de kaba, ma den Fariseiman ben de tra fasi. Furu fu den Fariseiman no ben de heihei sma, èn den ben abi furu krakti tapu a pipel. Soleki fa a historia skrifiman Josephus taki, dan den Saduseiman ben e du san den Fariseiman ben wani, ma den no ben e du dati nanga den heri ati. Fu di Paulus ben sabi taki den tu grupu disi ben e gens makandra èn taki den no ben e bribi den srefi sani, meki a gebroiki den sani dati fu opo taki gi ensrefi na fesi a Sanhedrin.—Tori fu den Apostel 23:6-9.

Fu di moro furu heihei sma ben de na ini a Sanhedrin, meki a kan taki wan sma ben e tron wan nyun memre soso te wan fu den memre dede, noso te a Sanhedrin ben puru wan sma leki memre. Soleki fa a Misjna e sori, dan nyun memre ben musu de „priester, Leifisma, nanga Israelsma di ben abi umapikin di ben mag trow nanga priester”, èn dati ben de Dyu di ben kan buweisi taki trutru den ben de fu a priester famirilin. Fu di a gran krutu ben e tiri ala den krutubangi na ini a kondre, meki a no de fu fruwondru taki mansma di ben abi wan bun nen na ini den lagi krutubangi ben o tron memre fu a Sanhedrin.

A makti di a Sanhedrin ben abi

Den Dyu ben abi bigi lespeki gi a Sanhedrin, èn den krutuman na ini den lagi krutubangi ben musu handri akruderi den bosroiti di a Sanhedrin ben teki. Efu den no ben e du dati, dan den ben o kisi dedestrafu. Moro furu na a Sanhedrin ben e bosroiti suma ben mag tron priester, èn a ben e poti prakseri na den afersi di ben abi fu du nanga Yerusalem, a tempel, nanga na anbegi na ini a tempel. Fu taki en leti, a Sanhedrin ben abi a reti fu krutu den afersi fu den sma na ini Yudea wawan. Ma fu di den Dyu ben e si a Sanhedrin leki a moro hei krutubangi di ben e sori sma fa den ben musu hori densrefi na a Wet, meki a ben abi krakti tapu ala den Dyu libimakandra na heri grontapu, te a ben abi fu du nanga san bun èn san ogri. Fu eksempre, a granpriester nanga den tra memre fu a Sanhedrin ben taigi den fesiman fu den snoga na ini Damaskus fu wroko makandra nanga den so taki den ben kan grabu den bakaman fu Krestes (Tori fu den Apostel 9:1, 2; 22:4, 5; 26:12). A kan de so tu taki den Dyu di ben go na Yerusalem fu hori den fesa, ben tyari den boskopu fu a Sanhedrin go baka na den presi pe den ben e tan.

Soleki fa a Misjna e taki, dan a Sanhedrin wawan ben kan bosroiti san ben musu pasa te a ben abi fu du nanga afersi di ben o abi krakti tapu a heri kondre, sosrefi san ben musu pasa nanga krutuman di no ben hori densrefi na den bosroiti fu a Sanhedrin, èn san ben musu pasa nanga falsi profeiti. Fu di sma ben feni taki Yesus nanga Stefanus ben taki ogri fu Gado, meki den tu man disi ben kon na fesi krutu. Petrus nanga Yohanes ben kon na fesi krutu fu di sma ben taki dati den ben gi trawan deki-ati fu drai baka gi a Dyu bribi. Paulus ben kon na fesi krutu fu di sma ben taki dati a ben afrontu a santafasi fu a tempel.—Markus 14:64; Tori fu den Apostel 4:15-17; 6:11; 23:1; 24:6.

A fasi fa den krutu Yesus nanga den disipel fu en

Ibri dei a Sanhedrin ben e kon makandra fu krutu afersi. Den ben e bigin na a ten te sma ben e tyari  ofrandi na a mamanten, èn den ben kaba na a ten te sma ben e tyari ofrandi na a mofoneti. Den no ben e kon makandra tapu den Sabatdei nanga den santa dei. Krutu ben e hori na deiten wawan. Te wan krutu ben hori èn a Sanhedrin ben bosroiti taki a sma ben musu kisi dedestrafu, dan den ben e meki dati bekènti a dei baka dati. Fu dati ede, a Sanhedrin no ben e krutu den sortu afersi dati wán dei bifo a Sabatdei noso wan fesadei. Den sma di ben e kotoigi na ini wan krutu-afersi ben e kisi a seryusu rai fu luku bun taki a kotoigi di den ben e gi no ben abi leki bakapisi taki wan sma kisi dedestrafu aladi a no du nowan ogri, bika a sani dati ben de wan seryusu sani. Fu dati ede, di sma krutu Yesus na a oso fu Kayafas a neti bifo wan fesa, dan den no handri akruderi a wet. Ma san ben moro ogri, na taki den krutuman srefi ben suku falsi kotoigi, èn den kisi Pilatus so fara taki a gi sma a komando fu kiri Yesus.—Mateyus 26:57-59; Yohanes 11:47-53; 19:31.

A Talmud e taki dati den krutuman di ben e krutu afersi di ben abi fu du nanga bigi ogri, ben e luku den buweisi finifini fu man sori taki a sma di trawan ben kragi, no ben du so wan ogri. Ma den no ben krutu Stefanus na a fasi dati, neleki fa dati ben pasa nanga Yesus. Fu di Stefanus opo taki gi ensrefi na fesi a Sanhedrin, meki wan grupu sma ston en kiri. Efu a tirimakti fu Rome no ben kon ini a tori, dan kande na apostel Paulus ben o kon de na ini wan srefi sortu situwâsi, èn sma ben o kiri en. Fu taki en leti, den krutuman fu a Sanhedrin ben span anu makandra fu kiri en.—Tori fu den Apostel 6:12; 7:58; 23:6-15.

Toku a ben de so taki wan tu memre fu a Sanhedrin ben de opregti man. A kan de so taki wan yongu Dyu tiriman di ben taki nanga Yesus, ben de wan memre fu a Sanhedrin. Aladi a man no ben man libi den gudu fu en fu tron wan bakaman fu Yesus, toku a ben musu fu de so taki a ben de wan bun man, fu di Yesus ben aksi en fu tron En bakaman.—Mateyus 19:16-22; Lukas 18:18, 22.

A kan taki Nikodeimus, „wan tiriman fu den Dyu”, ben e frede san den tra krutuman ben o taki, èn fu dati ede a go na Yesus na neti so taki sma no si en. Toku Nikodeimus opo taki gi Yesus na fesi a Sanhedrin, èn a aksi: „A Wet fu wi no e krutu wan sma efu wi no yere en fosi èn efu wi no kon sabi fosi san a du, a no so?” Bakaten, Nikodeimus tyari „wan lolo mirre nanga aluwe kon” fu sreka a skin fu Yesus fosi den beri en.—Yohanes 3:1, 2; 7:51, 52; 19:39.

Yosef fu Arimatea, wan tra memre fu a Sanhedrin, no ben frede fu aksi Pilatus a dedeskin fu Yesus, èn a poti a dedeskin na ini a nyun grebi fu en. Yosef ben e „fruwakti a kownukondre fu Gado”, ma fu di a ben e frede den Dyu, meki a no taigi sma taki a ben de wan disipel fu Yesus. Ma wan bun sani di Yosef ben du, na taki a no ben agri nanga a Sanhedrin di den span anu makandra fu kiri Yesus.—Markus 15:43-46; Mateyus 27:57-60; Lukas 23:50-53; Yohanes 19:38.

Gamalièl, di ben de wan memre fu a Sanhedrin, ben gi den tra krutuman a koni rai fu no fruferi den disipel fu Yesus. A ben taki: „Un musu luku bun taki unu no e feti nanga Gado srefi” (Tori fu den Apostel 5:34-39). Fu san ede a gran krutu no ben man si taki Gado ben e horibaka gi Yesus nanga den disipel fu en? Na presi taki a Sanhedrin ben poti bribi na ini den wondru fu Yesus, den ben abi a denki disi: „San wi musu du, bika a man disi e du someni wondru? Efu wi meki a go doro na a fasi disi, dan ala sma o bribi na ini en; dan den Romesma o kon puru wi tempel nanga wi kondre na wi anu” (Yohanes 11:47, 48). Fu di den memre fu a gran krutu fu den Dyu ben gridi fu abi makti, meki den no krutu Yesus na wan reti fasi. Na so a ben de tu taki di den disipel fu Yesus meki sma kon betre, dan den kerki fesiman no ben breiti, ma na presi fu dati den „kon dyarusu srefisrefi” (Tori fu den Apostel 5:17). Leki krutuman, den ben musu abi frede gi Gado èn den ben musu de opregti, ma na presi fu dati furu fu den ben kruka èn den ben abi bedrigifasi.—Exodus 18:21; Deuteronomium 16:18-20.

Gado e krutu den

Fu di Israel ben trangayesi den Wet fu Gado, èn fu di den no ben poti bribi na ini a Mesias, meki te fu kaba Yehovah no ben e si den moro leki a pipel fu en. Na ini 70 G.T. den Romesma pori Yerusalem nanga a tempel fu en, èn den tyari wan kaba kon na a heri Dyu sistema, èn na a Sanhedrin te fu kaba.

Yesus Krestes, a Krutuman di Yehovah poti, sa bosroiti sortuwan fu den memre fu a fosi yarihondro Sanhedrin warti fu kisi wan opobaka, èn sortuwan fu den sondu teige a santa yeye (Markus 3:29; Yohanes 5:22). Wi kan abi a dyaranti taki Yesus sa teki den bosroiti dati na wan reti fasi trutru.—Yesaya 11:3-5.

[Futuwortu]