Sani di wi musu du fu kan taki nanga a „Yereman fu begi”

„O Yereman fu begi, fu tru, ala sortu sma sa kon na yu.”—PSALM 65:2.

1. Fu san ede libisma e difrenti fu den tra libisani di de na grontapu, èn sortu okasi wi abi fu dati ede?

FU ALA den dusundusun libisani di de na grontapu, na libisma wawan man anbegi a Mekiman. Libisma wawan sabi taki den musu dini Gado, èn den wawan abi na angri fu du dati tu. Disi e gi ibriwan fu wi a tumusi moi okasi fu tron wan mati fu wi hemel Tata.

2. Fa sondu meki taki libisma no de mati nanga a Mekiman moro?

² Gado meki libisma na so wan fasi, dati den man taki nanga a Mekiman fu den. Di Gado meki Adam nanga Eva, den no ben abi sondu. Sobun, den ben kan taki fri nanga Gado, neleki fa wan pikin e taki nanga en papa. Ma Adam nanga Eva lasi a grani dati fu di den sondu. Den trangayesi Gado èn den no ben de bun mati nanga en moro (Genesis 3:8-13, 17-24). Ma disi wani taki dati den sondu bakapikin fu Adam no man taki nanga Gado moro? Nôno, te now ete Yehovah e gi libisma pasi fu taki nanga en, ma den musu hori densrefi na wan tu prenspari markitiki fosi. San na den markitiki dati?

Den markitiki di wi musu doro fu kan taki nanga Gado

3. Fa sondu sma kan tron mati fu Gado di kan taki fri nanga en? Sortu eksempre e sori dati?

³ Wan tori di abi fu du nanga tu fu den manpikin fu Adam, e yepi wi fu kon sabi san Gado wani taki wan sondu libisma musu du fu kan taki nanga En. Fu di Kain nanga Abel ben wani de mati nanga Gado, meki den ala tu ben tyari wan ofrandi gi en. Gado ben o breiti nanga na ofrandi fu Abel, ma a no ben prisiri nanga a di fu Kain (Genesis 4:3-5). Fu san ede disi ben de so? Hebrewsma 11:4 e taki: „Na fu di Abel ben abi bribi, meki a ben gi Gado wan srakti-ofrandi di ben warti moro di fu Kain; na a bribi dati, meki taki Gado taigi Abel taki a ben de wan regtfardikisma.” A de krin taki wi musu abi bribi, efu wi wani de wan mati fu Gado di kan taki fri nanga en. Boiti dati, Yehovah ben taigi Kain wan sani di e sori wi san na ete wan markitiki di wi musu doro: „Efu yu e du bun, mi no sa prisiri nanga yu dan?” Iya, efu Kain ben o bigin du bun baka, dan Gado ben breiti nanga na ofrandi fu en. Ma Kain no arki a rai fu Gado, a kiri Abel, èn a tron wan loweman (Genesis 4:7-12). Sobun, frukufruku kaba, Gado sori krin o prenspari a de fu sori bribi èn fu du bun wroko, efu wi wani de mati fu en di kan taki fri nanga en.

4. San wi musu hori na prakseri efu wi wani de mati fu Gado di kan taki fri nanga en?

⁴ Efu wi wani de mati fu Gado di kan taki fri nanga en, dan a de tumusi prenspari fu hori na prakseri taki wi na sondu sma. Ala libisma gebore leki sondu sma, èn sondu na wan sani di e tapu wi fu taki fri nanga Gado. A profeiti Yeremia ben skrifi fu Israel, taki: „Na wi sondu . . . Nanga wan bigi wolku yu tapu den begi fu wi, so taki den no kan pasa kon na yu” (Kragisingi 3:42, 44). Aladi wi alamala na sondu sma, toku Gado sori na ini a heri libisma historia taki a de klariklari fu arki den begi fu sma di ben e bribi na ini en èn di ben e hori densrefi na den komando fu en nanga den heri ati (Psalm 119:145). Suma ben de wan tu fu den sma disi, èn san wi kan leri fu den begi fu den?

5, 6. San wi kan leri fu a fasi fa Abraham ben e du muiti fu kon krosibei na Gado?

⁵ Wan fu den sma disi ben de Abraham.  Gado ben feni en bun taki Abraham ben e du muiti fu kon krosibei na en, èn dati meki A ben kari Abraham „mi mati” (Yesaya 41:8). San wi kan leri fu a fasi fa Abraham ben du muiti fu kon krosibei na Gado? Fu eksempre. A getrow famiri-edeman disi ben taki nanga Gado fu sani di ben abi fu du nanga a sma di ben o kisi den gudu fu en: „Te now ete mi no abi pikin . . . Sobun, san yu sa gi mi dan?” (Genesis 15:2, 3; 17:18) Na wan tra okasi, Abraham taki nanga Gado fu di a ben e broko en ede nanga den sma na ini den foto Sodom nanga Gomora. A ben wani sabi efu sma ben o kisi frulusu te Gado ben o pori den ogrisma na ini den foto dati (Genesis 18:23-33). Abraham ben e begi gi tra sma tu (Genesis 20:7, 17). Èn neleki Abel, dan son leisi Abraham ben e tyari wan ofrandi gi Yehovah fu sori taki a ben wani kon krosibei na En.—Genesis 22:9-14.

⁶ Na ala den okasi disi, Abraham no ben frede fu taki nanga Yehovah. Ma aladi a no ben frede fu taki nanga a Mekiman fu en, toku a ben abi sakafasi fu di a ben sabi taki a musu abi lespeki gi Gado. Luku fa a ben e taki na wan lespeki fasi, soleki fa a skrifi na ini Genesis 18:27: „Grantangi, arki mi Yehovah. Mi sabi taki mi na noti èn taki mi na wan soso sma.” Dati na wan moi eksempre gi wi trutru!

7. Fu sortu sani den famiri-edeman ben e taki nanga Yehovah te den ben e begi?

⁷ Difrenti famiri-edeman na ini owruten ben begi fu difrenti sani, èn Yehovah ben de klariklari fu arki te den ben e begi. Wan leisi Yakob ben begi Gado. Na ini a begi dati a meki wan sweri na Gado. Baka di a aksi Gado fu horibaka gi en, dan na wan seryusu fasi a ben pramisi en taki: „Mi o gi yu wan di fu tin pisi baka fu ala sani di yu sa gi mi” (Genesis 28:20-22). Bakaten, di Yakob ben o miti en brada, a begi Yehovah fu kibri en. A taki: „Mi e begi yu fu puru mi na ini na anu fu mi brada Esau, bika mi frede taki a sa kon du ogri nanga mi” (Genesis 32:9-12). A famiri-edeman Yob ben begi Yehovah gi na osofamiri fu en, èn a ben e tyari ofrandi na Gado fu den ede. Di den dri mati fu Yob sondu fu di den ben taki sani di no tru, dan Yob begi gi den, èn „Yehovah ben arki a begi fu Yob” (Yob 1:5; 42:7-9). Den tori disi e yepi wi fu kon sabi fu sortu sani wi kan taki te wi e begi Yehovah. Wi e si tu taki Yehovah de klariklari fu arki den begi fu den wan di e taki nanga en na wan yoisti fasi.

A fasi fa a Wetfrubontu ben e yepi sma fu kon krosibei na Yehovah

8. Fa sani ben seti na ondro a Wetfrubontu, so taki sma ben kan begi Yehovah gi a pipel?

⁸ Baka di Yehovah frulusu a pipel fu Israel komoto na Egepte, a gi den a Wetfrubontu. A  Wet ben e sori fa a pipel ben kan kon krosibei na Gado nanga yepi fu den priester. Son Leifisma ben kisi a wroko fu dini leki priester gi a pipel. Te prenspari sani ben de di ben abi fu du nanga a heri pipel, dan wán sma ben e teki fesi fu go begi Gado gi a pipel. Son leisi dati ben de wan kownu, noso wan profeiti (1 Samuel 8:21, 22; 14:36-41; Yeremia 42:1-3). Fu eksempre, di den Israelsma ben gi a tempel abra na Gado, dan Kownu Salomo begi Yehovah nanga en heri ati. Yehovah fu en sei gi piki tapu a begi fu Salomo, èn a furu a tempel nanga a glori fu En. Yehovah ben taki: „Mi o arki den sma di sa kon begi na a presi disi.”—2 Kroniki 6:12–7:3, 15.

9. San ben de fanowdu efu den Israelsma ben wani go anbegi Yehovah na a santa presi?

⁹ Na ini a Wet di Yehovah ben gi Israel, a ben sori den wan spesrutu sani di den ben musu du efu den ben wani go anbegi Yehovah na a santa presi dati, na wan fasi di a feni bun. San den ben musu du? Boiti den srakti-ofrandi di den ben musu tyari, dan ibri mamanten èn ibri neti a granpriester ben musu bron switismeri gi Yehovah. Bakaten, den tra priester, ben e du a wroko disi tu, boiti tapu a dei pe a granpriester ben tyari wan ofrandi fu tapu den sondu fu a pipel. Efu den priester no ben sori lespeki gi Yehovah na a fasi disi, dan A no ben o breiti nanga a wroko fu den.—Exodus 30:7, 8; 2 Kroniki 13:11.

10, 11. Sortu buweisi wi abi di e sori taki Yehovah ben e arki te sma ben e begi gi densrefi?

¹⁰ A de so taki den Israelsma na ini owruten ben kan kon krosibei na Gado soso nanga yepi fu wan priester noso kownu? Nôno, den Buku fu Bijbel e sori taki Yehovah ben de klariklari fu arki te sma ben e begi gi densrefi. Di Salomo ben begi na a dei di den gi a tempel abra na Yehovah, dan a ben aksi Yehovah: „Awinsi san wan sma e begi, awinsi sortu grani wan sma, noso a pipel Israel ben sa aksi, . . . te a e opo en anu go na a sei fu na oso disi, dan yu fu yu sei sa yere na ini hemel” (2 Kroniki 6:29, 30). Na evangelie fu Lukas e sori taki di Sakaria, a papa fu Yohanes a Dopuman, ben e bron switismeri na ini a santa presi, dan wan bigi grupu anbegiman fu Yehovah di no ben de priester, ben e „begi na dorosei” fu a santa presi. Soleki fa a sori, den sma ben kon abi a gwenti fu kon makandra fu begi na dorosei fu a santa presi, aladi den priester ben e bron switismeri gi Yehovah na tapu a gowtu altari.—Lukas 1:8-10.

¹¹ Sobun, efu sma ben e begi Yehovah na a yoisti fasi, dan a ben de klariklari fu arki den begi fu den wan di ben e teki presi gi a pipel, èn den begi fu ibriwan sma aparti. Na ini a ten disi, wi no abi fu hori wisrefi moro na a Wetfrubontu. Toku a de so taki, te wi e luku den sani di den Israelsma fu owruten ben e du fu begi Gado, dan wi kan leri wan tu prenspari sani di e sori wi fa wi kan kon krosibei na Gado.

A fasi fa sma kan kon krosibei na Gado nanga yepi fu a Kresten gemeente

12. Sortu sani seti, so taki Kresten kan kon krosibei na Yehovah na ini a ten disi?

¹² Na ini a ten disi wi musu hori wisrefi na den sani di Krestes seti gi wi. Wi no abi wan tempel moro pe priester e teki fesi gi ala den  anbegiman fu Gado, noso pe wi kan luku go te wi e begi Gado. Ma toku, Yehovah seti sani ete so taki wi kan kon krosibei na en. San a seti? Di Gado salfu Krestes na ini 29 G.T., dan a tron Granpriester fu wan nyun tempel. * A tempel disi na den nyun sani di Yehovah seti, so taki wi kan kon krosibei na en fu anbegi en nanga yepi fu na ofrandi fu Yesus Krestes di e tapu den sondu fu wi.—Hebrewsma 9:11, 12.

13. San na wan fu den seti na ini a tempel fu Yerusalem, di yu kan teki gersi nanga den begi fu sma na ini a Kresten gemeente?

¹³ Furu fu den sani na ini a tempel fu Yerusalem, abi fu du nanga a fasi fa sani ben o seti na ini a Kresten gemeente. Disi de so tu nanga sani di abi fu du nanga begi (Hebrewsma 9:1-10). Fu eksempre, ibri mamanten èn ibri neti, den priester ben e bron switismeri na tapu na altari na ini a Santa pisi fu a tempel. San disi e prenki? Soleki fa a buku Openbaring e sori, dan „a switismeri na den begi fu den santawan” (Openbaring 5:8; 8:3, 4). Nanga yepi fu santa yeye David ben skrifi: „Meki a begi fu mi de leki switismeri na yu fesi” (Psalm 141:2). Sobun, a switismeri na wan moi fasi fu agersi den sortu begi di Yehovah e arki na ini a ten disi èn a fasi fa sma e prèise en na ini a Kresten gemeente.—1 Tesalonikasma 3:10.

14, 15. San wi kan taki fu a fasi fa (a) den salfu Kresten nanga (b) den „tra skapu” kan kon krosibei na Yehovah?

¹⁴ Suma kan anbegi Gado na ini a nyun tempel disi? Na ini a tempel fu Yerusalem, den priester nanga den tra Leifisma ben abi a grani fu dini na ini na inisei fesidyari. Ma den priester wawan ben kan go na ini a santa presi. Neleki fa a ben de wan spesrutu grani fu dini na ini na inisei fesidyari nanga a santa presi, na so salfu Kresten de mati fu Gado na wan aparti fasi tu. Dati meki den salfu Kresten disi, di abi a howpu fu go na hemel, man begi èn prèise Gado.

¹⁵ Fa a de nanga den „tra skapu” di abi a howpu fu libi fu têgo na grontapu? (Yohanes 10:16) A profeiti Yesaya ben sori taki sma fu someni difrenti kondre ben o kon makandra fu anbegi Yehovah „na ini a kabapisi fu den dei” (Yesaya 2:2, 3). A ben skrifi tu taki „freimdesma” ben o kon anbegi Yehovah tu. Fu sori taki a de klariklari fu arki den begi fu den, dan Gado taki: „Mi wani . . . meki den prisiri na ini mi oso fu begi” (Yesaya 56:6, 7). Openbaring 7:9-15 e taki moro fini fu a tori. A tekst e taki dati „wan bigi ipi sma” di „komoto fu ala kondre” e konmakandra fu anbegi Gado, èn taki den e begi en „dei nanga neti”, aladi den e tanapu na ini a dorosei fesidyari fu a nyun tempel. A e gi wi trowstu trutru fu sabi taki den futuboi fu Gado na ini a ten disi kan taki fri nanga En, èn taki den abi a dyaranti dati a e arki den!

Sortu begi Gado e arki?

16. San wi kan leri fu a fasi fa den fosi Kresten ben e begi?

¹⁶ Den fosi Kresten ben e begi furu. Fu sortu sani den ben e begi? Kresten owruman ben aksi Gado fu tiri den te den ben e suku mansma fu tyari frantwortu na ini na organisâsi (Tori fu den Apostel 1:24, 25; 6:5, 6). Epafras ben e begi gi tra bribiman (Kolosesma 4:12). Den memre fu a gemeente na ini Yerusalem  ben e begi gi Petrus di a ben de na strafu-oso (Tori fu den Apostel 12:5). Den fosi Kresten ben aksi Gado fu gi den deki-ati te den ben e kisi gens. Den ben taki: „Yehovah, luku fa den e tapu skreki gi wi; grantangi, meki den srafu fu yu tan taki a wortu fu yu sondro frede” (Tori fu den Apostel 4:23-30). A disipel Yakobus ben gi Kresten deki-ati fu begi Gado fu gi den koni te den ben kisi tesi (Yakobus 1:5). Yu e taki fu den sani disi te yu e begi Yehovah?

17. Den begi fu suma Yehovah e arki?

¹⁷ Gado no e arki ala begi. Fa wi musu begi dan, so taki Gado sa arki den begi fu wi? Gado ben arki den begi fu den getrow sma na ini owruten, fu di den ben anbegi en na wan opregti fasi èn nanga wan krin ati. Den ben abi bribi, èn den sani di den ben e du ben e sori taki den ben abi bribi. Wi kan abi a dyaranti taki Yehovah sa arki den begi fu den wan di e tyari densrefi na a fasi dati tu na ini a ten disi.

18. Sortu markitiki Kresten musu doro efu den wani taki Gado arki den begi fu den?

¹⁸ Wi musu hori wisrefi na ete wan tra markitiki tu. Disi na san na apostel Paulus ben fruklari di a taki: ’Nanga yepi fu en, wi man kon na a Tata nanga wán yeye.’ Fu suma Paulus ben e taki di a skrifi den wortu, „nanga yepi fu en”? A ben e taki fu Yesus Krestes (Efeisesma 2:13, 18). Iya, soso nanga yepi fu Yesus wi kan taki fri nanga a Tata.—Yohanes 14:6; 15:16; 16:23, 24.

19. (a) O ten Yehovah ben e tegu fu den switismeri di den Israelsma ben e bron gi en? (b) Fa wi kan sorgu taki den begi fu wi de leki switismeri gi Yehovah?

¹⁹ Soleki fa wi taki na fesi kaba, dan a switismeri di den priester fu Israel ben e bron, e agersi den begi fu den getrow futuboi fu Gado. Ma son leisi, Yehovah ben e tegu fu a switismeri di den Israelsma ben e bron gi en. Disi ben de so di den Israelsma ben e bron switismeri na ini a tempel, aladi den ben e boigi gi kruktugado na a srefi momenti (Esekièl 8:10, 11). Na so a de tu na ini a ten disi, taki yu abi sma di e taki dati den e anbegi Yehovah, ma di e du sani di no e kruderi nanga den wet fu en. Den begi fu den sma disi de leki wan tingi smeri tu gi Yehovah (Odo 15:8). Fu dati ede, meki wi tan tyari wisrefi na wan krin fasi na ini ala sani di wi e du na ini wi libi, so taki den begi fu wi kan de leki switismeri gi Gado. Yehovah e prisiri srefisrefi nanga den begi fu den wan di e hori densrefi na den regtfardiki markitiki fu en (Yohanes 9:31). Ma toku wi musu poti prakseri na wan tu tra aksi ete. Fa wi musu begi? Fu san wi kan begi? Èn fa Gado e piki den begi fu wi? Na ini a tra artikel wi sa poti prakseri na den aksi disi, èn na tra aksi tu.

[Futuwortu]

Yu kan tyari disi kon na krin?

• Fa sondu sma kan kon krosibei na Gado na wan fasi di a feni bun?

• Te wi e begi, dan fa wi kan waka baka na eksempre fu den famiri-edeman fu owruten?

• San wi e leri fu den begi fu den fosi Kresten?

• O ten den begi fu wi de leki switismeri gi Gado?

[Aksi fu a tori disi]

[Prenki na tapu bladzijde 23]

Fu san ede Gado ben breiti nanga na ofrandi fu Abel, aladi a no ben prisiri nanga a di fu Kain?

[Prenki na tapu bladzijde 24]

„Mi sabi taki mi na noti èn taki mi na wan soso sma”

[Prenki na tapu bladzijde 25]

’Fu tru mi o gi yu wan di fu tin pisi baka fu ala sani di yu sa gi mi’

[Prenki na tapu bladzijde 26]

Den begi fu yu de leki switismeri gi Yehovah?