San sa yepi yu fu frustan Bijbel?

„YU KIBRI den sani disi bun gi den koniman nanga den sabiman, ma yu meki den nyofiwan kon sabi disi” (Lukas 10:21). Den wortu disi di Yesus ben taigi a hemel Tata fu en, e sori taki wi musu abi a yoisti fasi fu denki efu wi wani frustan Bijbel. Wi kan si krin taki Yehovah na wan koni Gado, fu di a gi libisma wan buku di soso sma di abi sakafasi èn di de klariklari fu teki leri, man frustan.

Furu fu wi feni en muilek fu sori sakafasi. Wi alamala abi en na ini wi fu sori bigifasi. Boiti dati, wi e libi na ini „den lasti dei”, na mindri sma di „lobi densrefi nomo”, . . . di e ’du san densrefi wani, èn di abi bigimemre’ (2 Timoteyus 3:1-4). Disi na fasi fu denki di e meki taki wi no man frustan a Wortu fu Gado. A de wan sari sani taki, a bigifasi fu sma na wi lontu abi krakti tapu wi alamala, awinsi fa a no fa. Ma fa yu kan kisi a fasi fu denki di de fanowdu fu man frustan Bijbel?

Sreka na ati èn a frustan

Esra, wan owruten fesiman fu a pipel fu Gado, „ben sreka na ati fu en fu go suku rai na ini a wet fu Yehovah” (Esra 7:10). Wan fasi de fa wi kan sreka na ati fu wi? Iya. A fosi sani di wi musu du, na taki wi musu kisi wan yoisti denki fu den Buku fu Bijbel. Na apostel Paulus ben skrifi gi en Kresten brada nanga sisa: „Di unu yere Gado wortu di wi preiki gi unu, dan unu no ben teki a wortu leki a wortu fu libisma, ma leki a wortu fu Gado” (1 Tesalonikasma 2:13). Aladi Gado ben gebroiki sma fu skrifi Bijbel, toku den sani di den ben skrifi, ben komoto fu Yehovah. Te wi e agri nanga a tumusi prenspari sani dati, dan wi sa opo wi ati moro esi gi den sani di wi e leisi.—2 Timoteyus 3:16.

Wan tra fasi fa wi kan sreka wi ati, na fu begi Gado. Fu di Gado meki sma skrifi Bijbel nanga yepi fu santa yeye, meki a yeye dati kan yepi wi fu frustan a boskopu dati moro bun. Wi musu begi Gado fu yepi wi nanga yepi fu en santa yeye. Luku fa a psalm skrifiman ben broko en ede nanga disi. A ben skrifi: „Meki mi frustan, so taki mi kan hori yu wet èn so taki mi kan du en nanga mi heri ati.” (Psalm 119:34). Wi no musu begi Gado soso fu yepi wi fu frustan san Bijbel e taki, ma wi musu begi en tu fu yepi wi fu sreka wi ati, so taki wi kan gi yesi na den sani di skrifi na ini a Wortu fu en. Fu man frustan Bijbel, wi musu opo wi ati gi san de tru.

Aladi yu e denki dipi fu man abi a yoisti fasi fu denki, poti prakseri na den wini di yu kan kisi te yu e studeri Bijbel. Wi abi furu bun reide fu leisi a Wortu fu Gado, ma a moro prenspari reide, na taki a wortu disi e yepi wi fu kon krosibei na Gado (Yakobus 4:8). Te wi e leisi fa Yehovah e handri na ini difrenti situwâsi, fa a e  warderi den wan di lobi en, èn fa a e handri nanga sma di e drai baka gi en, dan wi e kon si fa a de. A moro prenspari reide di wi musu abi ala ten fu leisi Bijbel, na fu kon sabi Gado moro bun, so taki wi kan kisi wan moro tranga banti nanga en.

Den sani di kan tapu wi fu abi a yoisti fasi fu denki

San kan tapu wi fu frustan Gado Wortu? Wán sani di kan tapu wi fu frustan Gado Wortu na te wi e agri nanga den denki fu trawan di wi e lespeki noso lobi. Ma san yu ben o du te den sma disi no e lespeki a waarheid fu Gado Wortu? Te dati de so, dan a kan muilek gi wi fu frustan san Bijbel e leri trutru. Fu dati ede, Bijbel e gi wi deki-ati fu ondrosuku finifini san wi leri.—1 Tesalonikasma 5:21.

Maria, a mama fu Yesus, ben abi a srefi problema dati. A ben kweki akruderi den gwenti fu den Dyu. A ben e hori ensrefi finifini na a Wet fu Moses, èn a ben de sondro tweifri taki a ben gwenti fu go na a snoga. Bakaten a kon si taki a fasi fa a ben e anbegi Gado, soleki fa en papa nanga en mama ben leri en, no ben bun moro na Gado ai. Leki baka pisi fu dati, Maria bribi den sani di Yesus ben e leri, èn a ben de wan fu den fosi memre fu a Kresten gemeente (Tori fu den Apostel 1:13, 14). Disi no ben wani taki dati a no ben abi lespeki gi en papa nanga en mama, noso gi den gwenti fu den; na presi fu dati, a bosroiti di a teki, ben sori taki a lobi Gado. Efu wi wani kisi wini fu Bijbel, dan neleki Maria wi musu si en leki a moro prenspari sani fu de getrow na Gado, na presi na iniwan tra sma.

A de wan sari sani, taki furu sma no e warderi a waarheid fu Bijbel. Son sma no abi muiti fu hori densrefi na kerki gwenti di abi fu du nanga falsi leri. A fasi fa trawan e taki, èn a fasi fa den e libi e sori taki den no e lespeki a waarheid. Fu dati ede, wi sa kisi problema te wi e teki a waarheid fu Bijbel: Kande yu e kisi trobi nanga mati, birtisma, sma na yu wrokope, èn srefi famiriman (Yohanes 17:14). Ma toku a koniman Salomo ben skrifi: „Bai waarheid srefi èn no seri en” (Odo 23:23). Te yu abi bigi lespeki gi a waarheid, dan Yehovah sa yepi yu fu frustan Bijbel.

Ete wan tra sani di kan tapu wi fu frustan a boskopu fu Bijbel, na te wi no de klariklari fu du san Bijbel e taki. Yesus ben taigi den disipel fu en: „Na unu kisi a grani fu kon frustan den santa kibritori fu a kownukondre fu hemel, ma den sma disi no kisi a grani dati. Bika na ati fu a pipel disi kon tranga èn den e yere nanga den yesi, ma den no e du san den yere èn den tapu den ai” (Mateyus 13:11, 15). Furu fu den sma di Yesus ben preiki gi, no ben wani arki, èn den no ben wani kenki a fasi fu denki di den ben abi. Den sma disi ben de heri tra fasi leki a bisnisman di ben e waka e seri sani, èn di Yesus ben taki fu en na ini wan agersitori! Di a bisnisman disi feni wan peri di ben warti furu, dan wantewante a seri ala den sani di a ben abi fu man bai en. A musu de leti so prenspari gi wi fu frustan a waarheid fu Bijbel.—Mateyus 13:45, 46.

A tyalensi fu de klariklari fu teki leri

Wan prenspari sani di kan yepi wi fu frustan Bijbel, na te wi de klariklari fu teki leri. Kande wan sma feni en muilek fu leri nyun sani fu wan sma di a e si leki wan mofinasma. Ma den apostel fu Yesus Krestes ben de sma di ’no ben kisi furu skoro, èn den ben de neleki ala tra sma’ (Tori fu den Apostel 4:13). Paulus ben fruklari fu san ede disi ben de so, di a skrifi: „Un brada, unu e si taki di Gado kari unu, a no kari furu sma di koni na libisma fasi, a no kari furu maktiwan, noso furu heihei sma; ma Gado teki den don sma fu grontapu fu meki den koni sma kisi syen” (1 Korentesma 1:26, 27). Efu yu feni en muilek fu sori sakafasi te yu e kisi leri fu wan mofinasma, dan hori na prakseri taki Gado e gebroiki a sma dati nomo fu gi yu leri. Wan moro bigi grani no de leki fu kisi leri fu Yehovah, wi „Gran Leriman”, a no so?—Yesaya 30:20; 54:13.

Naman, a srudati komandanti fu Siria, ben de wan sma di ben feni en muilek fu kisi rai fu wan mofinasma. Fu di a ben e suku wan fasi fu  dresi a gwasi siki fu en, meki a go na Elisa, a profeiti fu Yehovah. Ma Gado gebroiki wan futuboi fu taigi Naman fa fu dresi a siki fu en. A rai di Naman kisi, èn a fasi fa a kisi en, meki taki Naman ben feni en muilek fu teki a rai disi nanga sakafasi. Fu dati ede a ben weigri fosi fu gi yesi na a rai di Gado en profeiti gi en. Ma a no langa baka dati, Naman kenki a fasi fa a ben e denki, èn a kon betre (2 Kownu 5:9-14). Na a srefi problema disi wi abi te wi e leisi Bijbel. Kande wi sa kon si taki fu man abi wan bun banti baka nanga Gado, èn fu man tyari wisrefi na wan fasi di fiti, a de fanowdu taki wi musu drai wi libi. Wi sa abi a sakafasi fu gi pasi taki wan sma leri wi san wi musu du? Soso den wan di de klariklari fu teki leri, kan frustan Bijbel.

Wan prenspari man di ben wroko gi Kandase, na umakownu fu den Etiopiasma, ben sori taki a ben de klariklari fu teki leri. A ben e drai go baka na Afrika na ini en asiwagi, di a disipel Filipus ben e lon pasa a wagi èn bigin taki nanga en. Filipus aksi a man efu a ben e frustan san a ben e leisi. A heiman ben abi nofo sakafasi fu piki: „Fa mi ben sa sabi dati dan, efu nowan sma e leri mi?” Di a man kon frustan a Wortu fu Gado, a teki dopu. Baka dati, a „ teki pasi go moro fara nanga prisiri”.—Tori fu den Apostel 8:27-39.

Moro furu, Yehovah Kotoigi na sma di e libi wan aladei libi. Ibri wiki den e hori oso-bijbelstudie nanga moro leki siksi milyun sma. Bijbel e leri san na a moro bun fasi fu libi, a e fruklari san na a wan-enkri howpu gi libisma, èn a e sori wi fa wi kan kon sabi Gado. Fu dati ede, milyunmilyun sma feni taki a de wan tumusi prisiri sani fu studeri Bijbel, èn fu frustan san skrifi na ini. Yu kan ondrofeni a prisiri disi tu.

[Prenki na tapu bladzijde 7]

Naman ben feni en muilek fu teki rai fu wan mofina futuboi

[Prenki na tapu bladzijde 7]

Te wi e frustan Bijbel, dan dati e meki wi firi prisiri