Kresten e skèin a glori fu Yehovah

„Koloku fu den ai fu unu fu di den e si, èn den yesi fu unu fu di den e yere.”​—MATEYUS 13:16.

1. San wi musu aksi wisrefi te wi e luku a fasi fa den Israelsma ben du di den ben de na fesi Sinaibergi?

DEN Israelsma di ben kon makandra na Sinaibergi, ben sabi heri bun fu san ede den ben musu kon krosibei na Yehovah. Bika te yu luku en bun, a ben frulusu den komoto fu Egepte nanga wan tranga anu. A ben sorgu den te den ben abi wan sani fanowdu, fu di a ben gi den nyanyan nanga watra na ini a gran sabana. Baka dati, a ben meki den wini wan legre fu den Amaleksma di ben kon feti nanga den (Exodus 14:26-31; 16:2–17:13). Di a pipel seti kampu na ini a gran sabana na fesi Sinaibergi, dan a dondrubabari nanga a faya di ben e koti na hemel, ben e meki den kon frede so te, taki den ben e beifi. Baka dati, den si Moses e saka komoto fu Sinaibergi, èn a glori fu Yehovah ben de fu si na tapu en fesi. Ma na presi taki den ben e fruwondru èn taki den ben e sori warderi di den si a glori fu Yehovah, den tan farawe fu en. „Den ben kon frede fu kon krosibei na [Moses]” (Exodus 19:10-19; 34:30). Fu san ede den ben frede fu luku a glori fu Yehovah, a sma di du someni sani gi den?

2. San ben meki kande taki den Israelsma ben e frede di den si a glori fu Gado na tapu Moses fesi?

² A kan taki den Israelsma ben frede, fu di den ben prakseri wan sani di pasa wan pisi ten na fesi. Den trangayesi Yehovah fu espresi di den meki wan gowtu pikin kaw, èn fu dati ede  Yehovah strafu den (Exodus 32:4, 35). Den ben leri wan sani fu a strafu di Yehovah gi den? Den ben warderi a strafu dati? Nôno, nanga moro furu fu den dati no ben de so. Di a yuru doro taki Moses ben o dede, dan a ben taki baka fu a tori fu a gowtu pikin kaw, èn a ben kari ete wan tu okasi pe den Israelsma ben trangayesi Gado. A taigi a pipel: „Unu trangayesi a komando fu Yehovah, un Gado, èn unu no ben bribi en èn unu no ben arki a sten fu en. Sensi a dei di mi kon sabi unu, unu na sma di trangayesi Yehovah.”​—Deuteronomium 9:15-24.

3. San Moses ben du fu tapu en fesi?

³ Luku san Moses du di a si taki den Israelsma ben e frede. A tori e taki: „Te Moses ben kaba taki nanga den, dan a ben tapu en fesi nanga wan duku. Ma te Moses ben e go [na ini a tabernakel] na fesi Yehovah fu taki nanga en, dan a ben puru a duku teleki a ben go na dorosei baka. Baka dati a ben go na dorosei fu fruteri den manpikin fu Israel san Gado taigi en fu du. Den manpikin fu Israel ben si taki Moses fesi, a buba fu Moses fesi, ben e brenki; dan Moses ben tapu en fesi nanga wan duku baka teleki a ben go na inisei baka fu taki nanga [Yehovah]” (Exodus 34:33-35). Fu san ede Moses ben e tapu en fesi nanga wan duku son leisi? San wi kan leri fu disi? A piki tapu den aksi disi kan yepi wi fu luku fa a de nanga a banti di wisrefi abi nanga Yehovah.

Den no gebroiki den okasi di den ben abi

4. Fu san ede Moses ben e tapu en fesi nanga wan duku, soleki fa na apostel Paulus tyari kon na krin?

⁴ Na apostel Paulus ben fruklari taki a tapu di Moses ben e tapu en fesi nanga wan duku, ben sori fa den Israelsma srefi ben e denki èn fa na ati fu den ben tan. Paulus ben skrifi: „Den manpikin fu Israel no ben man tan luku a fesi fu Moses fu di a glori fu Gado ben de fu si na tapu en fesi . . . Den no ben man frustan sani krin” (2 Korentesma 3:7, 14). Dati ben de wan sari sani trutru! Den Israelsma ben de a pipel di Yehovah teki, èn a ben wani taki den ben musu kon krosibei na en (Exodus 19:4-6). Ma den no ben wani tan luku a glori fu Gado di ben de fu si na tapu Moses fesi. Yu ben kan taki dati den ben drai baka gi Yehovah, na presi fu poti prakseri na en èn fu dini en nanga den heri ati.

5, 6. (a) Fa den Dyu fu a fosi yarihondro ben de a srefi leki den Israelsma fu Moses dei? (b) Sortu difrenti ben de na mindri den sma di ben arki Yesus nanga den wan di no ben arki en?

⁵ Wan srefi sortu sani pasa tu na ini a fosi yarihondro G.T. Na a ten di Paulus drai en libi tron wan Kresten, dan a Moro Bigi Moses, Yesus Krestes, ben seti sani kaba fu meki a nyun frubontu kon na ini a presi fu a Wet frubontu. Nanga den sani di Yesus ben e taki èn ben e du, a ben e skèin a glori fu Gado na wan volmaakti fasi. Paulus ben skrifi fu Yesus di ben kisi wan opobaka: „En na a sma di e sori wi a glori fu Gado èn en na a soifri prenki di e sori fa Gado srefi de” (Hebrewsma 1:3). Den Dyu ben abi wan tumusi moi okasi trutru! Den ben kan arki fa a Manpikin fu Gado srefi e fruteri den sani di abi fu du nanga têgo libi! A de wan sari sani taki moro furu fu den sma gi suma Yesus ben e preiki, no ben arki. Yesus ben gebroiki den wortu fu wan profeititori di Yehovah meki Yesaya skrifi, fu sori fa den sma disi ben de: „Na ati fu a pipel disi kon tranga èn den e yere nanga den yesi, ma den no e du san den yere èn den tapu den ai. Disi sa meki taki noiti den sa man si nanga den ai èn noiti den sa man yere nanga den yesi èn frustan nanga den ati san a wani taki, so taki den no sa drai den libi, èn mi no sa meki den kon betre.”​—Mateyus 13:15; Yesaya 6:9, 10.

⁶ Wan bigi difrenti ben de na mindri den Dyu nanga den disipel fu Yesus. A ben taki fu den disipel disi: „Koloku fu den ai fu unu fu di den e si, èn den yesi fu unu fu di den e yere” (Mateyus 13:16). Tru Kresten e angri fu kon sabi Yehovah èn fu dini en. Den e prisiri fu du a wani fu en, di tyari kon na krin na ini Bijbel. Dati meki salfu Kresten e skèin a glori fu  Yehovah na ini a diniwroko fu den di abi fu du nanga a nyun frubontu; den tra skapu e du a srefi sani.​—2 Korentesma 3:6, 18.

Fu san ede sma no man si a bun nyunsu

7. Fu san ede a no musu fruwondru wi taki furu sma no wani arki a bun nyunsu?

⁷ Soleki fa wi si kaba, dan na ini a ten fu Yesus èn na ini a ten fu Moses, moro furu fu den Israelsma no ben wani gebroiki a tumusi moi okasi di den ben abi. Na so a de tu na ini a ten fu wi. Moro furu sma no wani arki a bun nyunsu di wi e preiki. Disi no e fruwondru wi. Paulus ben skrifi: „We, efu trutru a de so, taki wan duku e tapu a bun nyunsu di wi e preiki, dan a tapu gi den sma di o dede, iya, gi den sma di no e bribi, fu di a gado fu a grontapu sistema disi breni den frustan” (2 Korentesma 4:3, 4). Boiti taki Satan e du muiti fu tapu a bun nyunsu, dan a de so tu taki furu sma srefi e tapu den ai fu di den no wani si a bun nyunsu.

8. Fu san ede wi kan taki dati sma breni fu di den no sabi noti fu Gado, èn san wi kan du fu disi no pasa nanga wi tu?

⁸ Furu sma breni na wan agersi fasi fu di den no sabi noti fu Gado. Bijbel e taki dati den pipel de „na ini dungru na frustan sei èn den no man kisi a libi di Gado e gi, fu di den no wani sabi noti fu Gado” (Efeisesma 4:18). Bifo Paulus tron wan Kresten, a ben de wan man di ben sabi a Wet heri bun. Ma fu di a no ben sabi noti fu a bun nyunsu, meki a ben breni so te, taki a ben e frufolgu a gemeente fu Gado (1 Korentesma 15:9). Ma toku Yehovah sori en a waarheid. Paulus e taki: „Krestes Yesus ben abi sari-ati nanga mi, so taki a ben kan teki mi, a moro bigi sondari, leki buweisi taki a abi langa pasensi, èn na so fasi mi ben kan de wan eksempre gi den sma di ben o bribi na ini en fu den kan kisi têgo libi” (1 Timoteyus 1:16). Soleki fa a ben de nanga Paulus, na so yu abi furu sma tu di ben e gens a waarheid fu Gado fosi, ma di e dini En now. Na fu dati ede a de wan bun sani fu tan gi kotoigi srefi na sma di e gens wi. Na a srefi ten, wi musu tan studeri Gado Wortu doronomo èn wi musu kon frustan san a wani taki trutru. Na so fasi wi no sa tron sma di no sabi noti fu Yehovah èn di e du sani di a no feni bun.

9, 10. (a) Fa den fosi yarihondro Dyu ben sori taki den no ben wani teki leri èn taki den no ben wani kenki a denki fu den? (b) A srefi sani disi de fu si tu na sma fu Krestenhèit na ini a ten disi? Tyari disi kon na krin.

⁹ Furu sma no man frustan yeye afersi krin, fu di den no wani teki leri èn den no wani kenki a fasi fa den e denki fu sani. Furu Dyu no ben wani bribi na ini Yesus èn den no ben wani bribi den sani tu di a ben e leri sma, fu di den ben e hori nomo na a Wet fu Moses. Ma a no ala Dyu ben de so. Fu eksempre, baka di Yesus kisi wan opobaka, dan „bun furu priester ben e teki a bribi” (Tori fu den Apostel 6:7). Ma fu moro furu fu den Dyu, Paulus ben skrifi: „Te na a dei fu tide wan duku e tapu na ati fu den te  den e leisi den buku fu Moses” (2 Korentesma 3:15). A kan taki Paulus ben sabi san Yesus ben taigi den Dyu kerki fesiman wan pisi ten na fesi, namku: „Unu e ondrosuku Gado Buku, bika unu e denki taki te unu du disi, dan unu o kisi têgo libi; ma den srefi sani dati e kotoigi fu mi” (Yohanes 5:39). Te yu luku en bun, dan Gado Buku di den ben e ondrosuku so finifini, ben musu yepi den fu si taki Yesus ben de a Mesias. Ma den Dyu ben abi den eigi denki, èn srefi a Manpikin fu Gado di ben e du wondru, no ben kan meki den kon abi wan tra denki.

¹⁰ Na so a de tu nanga furu sma fu Krestenhèit na ini a ten disi. Neleki fa a ben de nanga Dyu fu a fosi yarihondro, na so „den [sma disi] de fayafaya fu dini Gado, ma den no abi soifri sabi” (Romesma 10:2). Aladi sonwan fu den e studeri Bijbel, toku den no wani bribi san Bijbel e taki. Den no wani bribi taki Yehovah e gi a pipel fu en leri nanga yepi fu en getrow èn koni srafu-grupu fu salfu Kresten (Mateyus 24:45). Ma wi e frustan taki Yehovah e gi en pipel leri èn taki ala ten Gado tyari a waarheid safrisafri kon na krin gi wi, so taki wi ben kan frustan en moro bun (Odo 4:18). Efu wi e gi Yehovah na okasi fu gi wi leri, dan a o blesi wi fu di a o meki wi kon sabi san na a wani fu en èn san a abi na prakseri.

11. Fa a bribi di sma e bribi soso san den wani, meki taki den no man kon sabi a waarheid?

¹¹ Trawan breni fu di den e bribi soso san den wani bribi. Bijbel ben taki na fesi taki son sma ben o spotu nanga a pipel fu Gado èn nanga a boskopu di den e meki bekènti fu a denoya fu Yesus. Na apostel Petrus ben skrifi: „Fu espresi den no wani sabi a sani disi”, namku taki Gado ben meki wan frudu pori a grontapu fu a ten fu Noa (2 Petrus 3:3-6). Na so a de tu, taki furu sma di e taki dati den na Kresten, e agri taki Yehovah abi sari-ati nanga bun-ati, èn taki a e gi sma pardon; toku den no wani bribi taki Gado sa gi strafu te dati de fanowdu (Exodus 34:6, 7). Tru Kresten e du furu muiti fu frustan san Bijbel e leri trutru.

12. Fa gwenti fu libisma breni furu sma?

¹² Furu kerkisma breni fu di den e hori densrefi na gwenti fu libisma. Yesus ben taigi den kerki fesiman fu en ten: „Unu meki a wortu fu Gado lasi krakti, bika unu e hori unsrefi soso na den gwenti fu unu” (Mateyus 15:6). Baka di den Dyu komopo na katibo na ini Babilon èn den drai go baka na oso, dan den ben du bun furu muiti fu anbegi Gado na a yoisti fasi baka. Ma den priester srefi ben kisi bigimemre èn den ben e denki fu densrefi taki den ben bun moro trawan. Den fesa di den ben musu hori fu anbegi Gado, ben tron leki wan plekti nomo, èn den no ben abi trutru lespeki gi Gado (Maleaki 1:6-8). Na ini a ten fu Yesus, den sabiman fu Wet nanga den Fariseiman ben meki sma hori densrefi na wan lo tra gwenti di no ben skrifi na ini a Wet fu Moses. Yesus ben kari den man disi hoigriman fu di den no ben man si moro taki a Wet ben abi fu du nanga regtfardiki gronprakseri (Mateyus 23:23, 24). Tru Kresten musu luku bun taki den no e meki den kerki gwenti fu libisma tapu den fu anbegi Gado na a yoisti fasi.

„Si a Sma di wi no man si nanga ai”

13. Na sortu tu fasi Moses ben si pikinso fu a glori fu Gado?

¹³ Di Moses ben de na tapu a bergi, a aksi Gado efu a ben kan si a glori fu En, èn fu tru a si a brenki leti di ben e skèin, baka di Yehovah pasa na ini a glori fu en. Te a ben e go na ini a tabernakel, dan a no ben e tapu en fesi nanga wan duku. Moses ben de wan man di ben abi  wan tranga bribi èn di ben angri fu du a wani fu Gado. Aladi a ben kisi a blesi fu si pikinso fu a glori fu Yehovah na ini wan fisyun, toku yu kan taki dati a ben si Gado kaba, fu di a ben abi bribi. Bijbel e taki dati Moses „ben tan tanapu kánkan leki a ben e si a Sma di wi no man si nanga ai” (Hebrewsma 11:27; Exodus 34:5-7). A glori fu Gado no ben de fu si wawan na tapu en fesi di ben e brenki wan pisi ten, ma a ben de fu si tu na a muiti di a ben e du fu yepi den Israelsma fu kon sabi Yehovah èn fu dini en.

14. Fa a du kon taki Yesus ben si a glori fu Gado, èn sortu sani ben e gi en prisiri?

¹⁴ Di Yesus ben de na hemel, dan a ben si a glori fu Gado krinkrin dusundusun yari langa, srefi bifo hemel nanga grontapu ben meki (Odo 8:22, 30). A heri pisi ten dati, den ben kon kisi wan tranga banti nanga makandra èn den ben kon lobi makandra trutru. Yehovah Gado ben sori taki a ben abi wan tranga lobi gi a sma disi di de a fosiwan fu ala sani di a meki. Yesus fu en sei, ben sori tu taki a ben abi tranga lobi gi a Gado di gi en libi (Yohanes 14:31; 17:24). A lobi di a Tata nanga en Manpikin ben abi, ben de wan volmaakti lobi. Neleki Moses, Yesus ben e prisiri fu skèin a glori fu Yehovah nanga yepi fu den sani di a ben e leri sma.

15. Na sortu fasi Kresten e du muiti fu kon sabi moro fu a glori fu Gado?

¹⁵ Neleki fa a ben de nanga Moses èn nanga Yesus, na so den Kotoigi fu Gado di e libi na ini a ten disi e angri fu kon sabi moro fu a glori fu Yehovah. Den no tapu den yesi gi a tumusi moi bun nyunsu. Na apostel Paulus ben skrifi: „Te den e drai go na Yehovah [fu du en wani], dan a duku sa komoto” (2 Korentesma 3:16). Wi e studeri Bijbel fu di wi wani du a wani fu Gado. Wi abi lespeki gi a glori di de fu si na tapu a fesi fu Yehovah en Manpikin, a salfu Kownu Yesus Krestes, èn wi e waka baka na eksempre fu en. Neleki Moses nanga Yesus, wi kisi wan diniwroko fu du pe wi e leri tra sma fu a Gado di wi e anbegi èn di abi bigi glori.

16. Sortu wini wi e kisi fu di wi sabi a waarheid?

¹⁶ Yesus ben begi: „Mi Tata, . . . mi e prèise yu na fesi ala sma, bika yu kibri den sani disi gi den koniwan èn gi den sma di abi frustan èn yu tyari den kon na krin gi nyofi pikin” (Mateyus 11:25). Yehovah e meki opregti sma di abi trutru sakafasi, kon frustan den sani di a abi na prakseri èn sosrefi sortu sma a de (1 Korentesma 1:26-28). A e sorgu wi èn a e gi wi kibri, èn a e leri wi fu libi na so wan fasi taki wi e kisi furu wini fu dati. Meki wi gebroiki ibri okasi fu  kon krosibei na Yehovah, èn meki wi warderi den furu sani di a seti gi wi fu kon sabi en moro bun.

17. Fa wi kan kon sabi den eigifasi fu Yehovah moro bun?

¹⁷ Paulus ben skrifi gi den salfu Kresten: „Neleki wan spikri, wi e skèin a glori fu Yehovah di de fu si na tapu wi fesi di no tapu nanga wan duku; èn wi alamala e kenki kon gersi en, so taki wi e skèin moro nanga moro glori” (2 Korentesma 3:18). A no abi trobi efu wi abi a howpu fu libi na ini hemel noso na grontapu, ma o moro wi e kon sabi Yehovah, namku den eigifasi fu en èn a sortu sma di a de soleki fa Bijbel e sori wi, o moro wi e kon de leki en. Efu wi e prakseri bun fu a libi, a diniwroko, nanga den leri fu Yesus Krestes, èn wi e warderi den sani disi, dan wi sa sori den eigifasi fu Yehovah moro bun na ini wi libi. Iya, wi e meki muiti fu skèin a glori fu wi Gado, èn a de wan prisiri sani trutru fu sabi taki wi e prèise En te wi e du dati!

Yu e memre disi ete?

• Fu san ede den Israelsma ben frede fu luku a glori fu Gado di ben de fu si na tapu Moses fesi?

• Na sortu fasi a bun nyunsu ben „tapu” gi den sma fu a fosi yarihondro èn gi den sma fu a ten disi?

• Fa wi e skèin a glori fu Gado?

[Aksi fu a tori disi]

[Prenki na tapu bladzijde 19]

Den Israelsma no ben man luku Moses fesi

[Prenki na tapu bladzijde 21]

Neleki fa a ben de nanga Paulus, na so furu sma de di ben e gens a waarheid fu Gado fosi, ma di e dini En now

[Prenki na tapu bladzijde 23]

Den futuboi fu Yehovah e prisiri fu skèin a glori fu Gado