Aksi fu leisiman

Na ini Deuteronomium 14:21 wi e leisi: „Un no mag nyan nowan enkri skin di dede kaba.” A de so taki a tekst disi de kontrari Lefitikus 11:40, pe wi e leisi: „A sma di e nyan iniwan pisi fu a dedeskin fu wan meti, sa musu wasi en krosi, èn a no sa de krin teleki neti fadon”?

Den tu vers disi no de kontrari makandra. A fosi tekst e taki ete wan tron fu a wet di ben taki dati den Israelsma no ben mag nyan wan meti di ben dede kaba di den feni en, kande fu di wan ogri meti kiri en (Exodus 22:31; Lefitikus 22:8). A tekst na ini Lefitikus e fruteri san wan Israelsma ben sa man du efu a ben pasa a wet, ma no fu espresi.

A Wet ben komanderi sma fu no du son sani, ma dati no wani taki dati sma no ben o trangayesi den komando disi son leisi. Fu eksempre, wet ben de di e taki dati sma no mag fufuru, den no mag kiri trawan, den no mag gi falsi kotoigi, èn go so moro fara. Na a srefi ten, difrenti strafu ben de gi sma di pasa den wet di Gado gi. Na so fasi den sma ben o gi yesi na den wet èn den ben o frustan o seryusu den wet ben de.

Efu wan sma ben pasa a wet di taki dati den no ben mag nyan a skin fu wan meti di ben dede kaba di den feni en, dan so wan sma no ben de krin na ini Yehovah ai. A sma dati ben o abi fu du son sani fu krin ensrefi soleki fa a wet ben taki. Efu a no ben krin ensrefi soleki fa a wet ben taki, dan a ben o abi fu „tyari a frantwortu fu en sondu”.​—Lefitikus 17:15, 16.