A suku di sma e suku fu kisi wan korostu firi

ALBERT ben abi wan koloku trowlibi, èn a ben abi tu pikin di ben e gi en prisiri. Ma a ben e firi neleki wan sani ben e mankeri na ini en libi. Na a ten di a ben musu meki tranga muiti fu feni wroko, a kisi fu du nanga politiek èn a bigin horibaka gi a socialisme. A tron wan fayafaya memre srefi fu a Communist partij fu a kontren dati.

A no teki langa di Albert bigin lasi frutrow na ini a Communisme. A tapu nanga politiek èn a bigin gebroiki ala en ten nanga en krakti gi a bun fu en osofamiri. A sani di ben kon de moro prenspari sani gi en, ben de fu sorgu taki en osofamiri de koloku. Toku Albert ben e firi leki en libi ben e mankeri wan sani ete, iya, a no ben abi wan korostu firi ete.

A sani di pasa nanga Albert na wan sani di e miti furu sma. Milyunmilyun sma ondrosuku difrenti denki, leri, noso den go na ini difrenti sortu kerki fu man kon sabi san na a trutru marki fu a libi. Na ini den kondre di no ben e horibaka gi a Communisme, a grupu sma fu a hippiebeweging di ben de na ini den yari baka 1960, ben e opo densrefi teige den gwenti nanga den markitiki na ini a libimakandra. Moro furu den sma disi ben de yongusma di ben e gebroiki drugs di ben abi krakti tapu den frustan, èn den ben e bribi den leri fu den sokari guru nanga granpriester fu den. Na so den ben e suku fu de koloku èn fu kon sabi san na a marki fu a libi. Toku, a hippiebeweging no ben man tyari trutru koloku kon gi den sma disi. Na presi fu dati, a meki taki sma kisi a takru gwenti fu gebroiki drugs èn taki yonguwan bigin abi seks demakandra nanga furu difrenti sma. A bakapisi ben de taki sma na ini a libimakandra ben e kon bruya moro nanga moro, èn te fu kaba den no ben sabi moro san na a yoisti fasi fa den ben musu tyari densrefi.

 Hondrohondro yari langa, furu sma suku fu kon gudu, fu abi makti, èn fu teki heiskoro, fu di den ben wani de koloku. Ma te fu kaba, den sani disi no e tyari koloku kon. Yesus ben taki: „Srefi te wan sma abi furu gudu, toku den sani di a abi no kan gi en libi” (Lukas 12:15). Na presi fu dati, a de so taki te sma e suku fu kon gudu, dan furu tron sari e miti den. Bijbel e taki: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu di e tyari den go pori krinkrin. Bika te wan sma lobi moni, dan dati na wan rutu fu ala sortu ogri sani; fu di son sma kweki lobi gi moni, meki . . . den gi densrefi furu sari nanga pen.”​—1 Timoteyus 6:9, 10.

Ma fa wan sma kan kisi wan korostu firi èn wan marki na ini a libi? A de so taki wan sma musu pruberi ala sortu sani fosi fu man feni den sani disi, neleki te a e sutu wan peiri go na wan presi na ini a dungru sondro taki a e si pe a sutu a peiri go? Koloku taki dati no de so. Soleki fa wi o si na ini na artikel di e kon, dan sma sa kisi wan korostu firi èn wan marki na ini a libi te den e tapu wan nowtu di de tumusi prenspari, iya, wan nowtu di libisma wawan abi.

[Prenki na tapu bladzijde 3]

Yu sa kisi wan korostu firi te yu e suku fu kon gudu, fu kisi makti, noso fu teki heiskoro?