Fa wi kan gebroiki ibri dei na wan warti fasi

„SORI wi krin fa fu teri den dei fu wi na so wan fasi taki wi kan kisi wan ati di koni” (Psalm 90:12). Disi na san a Bijbel skrifiman Moses ben begi nanga sakafasi. Ma san a ben aksi trutru? Wi musu aksi Gado a srefi sani disi tu te wi e anbegi en?

Na ini vers 10, Moses ben kragi taki a libi fu libisma syatu. Na wan tra okasi a ben skrifi san Yob ben taki, namku: „Libisma, di wan uma meki, e libi syatu èn den abi furu problema” (Yob 14:1). A de krin taki Moses ben e sari srefisrefi fu si taki onvolmaakti libisma no e libi langa. Dati meki a ben e si ibri dei fu en libi, leki wan warti presenti. Di Moses ben e begi Gado a sani disi, dan a ben e sori taki a wani libi na wan koni fasi nanga den dei di a abi ete, na wan fasi di ben o plisi en Mekiman. Yu no denki taki wisrefi musu du muiti fu gebroiki ibri dei na wan bun fasi? Efu wi wani taki Gado feni wi bun now, dan wi musu du tranga muiti fu du disi.

Ete wan sani ben de di ben abi krakti tapu Moses nanga Yob, èn a srefi sani dati musu abi krakti na wi tapu tu. Den tu man disi di ben abi frede gi Gado, ben e fruwakti wan pai di den ben o kisi na ini a ten di e kon, namku, libi na grontapu na ini moro bun situwâsi (Yob 14:14, 15; Hebrewsma 11:26). Na a ten dati, dede no sa tapu den bun sani di wi e du. A de a prakseri fu wi Mekiman taki getrow sma sa libi fu têgo na wan paradijs na grontapu (Yesaya 65:21-24; Openbaring 21:3, 4). Disi na wan sani di yu kan fruwakti tu efu yu e ’teri den dei fu yu na so wan fasi taki yu kan kisi wan ati di koni’.