Sortu krakti Yesus Krestes abi na yu tapu?

TE WI e hori na prakseri san wi ben leisi na ini na artikel fosi a wan disi, dan wi alamala sa agri taki den leri fu Yesus abi furu krakti tapu sma na heri grontapu. Ma a prenspari aksi di wi musu poti gi wisrefi na: „Sortu krakti den leri fu Yesus abi na mi tapu?”

Den leri fu Yesus abi fu du nanga ala sortu afersi. Den prenspari sani di wi kan leri fu den, kan abi krakti tapu ibri afersi fu wi libi. Meki wi go poti prakseri na a fasi fa Yesus leri sma fu poti den moro prenspari sani na a fosi presi na ini den libi, èn fa a leri sma fu tron mati fu Gado, fu lusu problema, èn fu no du ogri-ati sani.

Poti den moro prenspari sani na a fosi presi na ini yu libi

A disiten grontapu pe ala sani e pasa so esi-esi, kan teki so furu fu wi ten nanga krakti, taki nofo tron wi no o abi ten fu poti prakseri na  yeye afersi. Luku san pasa nanga wan man di pasa 20 yari kaba, èn di wi sa kari Jerry. A man disi lobi fu taki fu yeye afersi, èn a e warderi den sani di a e leri fu den takimakandra disi trutru. Ma toku a e taki nanga sari: „Mi no abi ten fu abi den takimakandra disi doronomo. Mi e wroko siksi dei na ini wan wiki. Sonde na a wan-enkri dei di mi no de na wroko. Èn baka te mi du ala san mi musu du, dan mi weri tumusi.” Efu yu de na ini wan srefi sortu situwâsi, dan yu kan kisi wini fu den sani di Yesus leri sma na ini a Bergitaki fu en.

Yesus ben taigi den sma di ben kon makandra fu arki en: „No broko un ede moro nanga un libi èn no broko un ede moro nanga san unu o nyan noso san unu o dringi noso san unu o weri na un skin. A libi prenspari moro leki nyanyan èn a skin prenspari moro leki krosi, a no so? Luku den fowru bun di e frei na loktu, bika den no e sai siri, den no e koti nyanyan èn den no e kibri nyanyan na ini maksin; toku un Tata na hemel e gi den nyanyan. Unu no warti moro den? . . . Fu dati ede, noiti broko un ede nanga sani èn no taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu. Fu dati ede, tan suku a kownukondre nanga en regtfardikifasi fosi èn unu sa kisi ala den tra sani tu” (Mateyus 6:25-33). San wi e leri fu disi?

Yesus no ben taki dati wi no musu sorgu gi den sani di wi nanga wi osofamiri abi fanowdu na skin fasi. „Efu wan sma no e sorgu den sma fu en, spesrutu den sma fu en osofamiri”, na so Bijbel e taki, „dan a drai en baka gi a bribi, èn a takru moro leki wan sma di no e bribi” (1 Timoteyus 5:8). Ma Yesus ben pramisi taki efu wi du den moro prenspari sani fosi èn efu wi poti yeye afersi na a fosi presi na ini wi libi, dan Gado sa sorgu taki wi e kisi den tra sani di wi abi fanowdu. A sani di wi kan leri fu disi, na taki wi musu poti den moro prenspari sani na a fosi presi na ini wi libi. Te wi e teki a rai fu en, dan wi sa de koloku, bika „koloku fu den sma di sabi taki den abi Gado fanowdu”.​—Mateyus 5:3.

Kon tron wan mati fu Gado

Den sma di sabi taki den de na nowtu na yeye fasi, e frustan taki a de prenspari fu abi wan bun banti nanga Gado. Fa wi e kisi wan bun banti nanga wan sma? A no te wi e pruberi fu kon sabi a sma moro bun? Wi musu teki ten fu kon sabi fa a sma e si son sani, sortu denki a abi, den sani di a man du, sortu marki a doro kaba na ini en libi, san a lobi, èn san a no lobi. Na so a de tu te wi wani kon tron mati fu Gado. Wi musu abi soifri sabi fu en. Di Yesus ben e begi Gado gi den disipel fu en, dan a taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Iya, efu wi wani tron bun mati fu Gado, dan wi musu kon leri sabi en. A wan-enkri fasi fa wi kan du dati, de nanga yepi fu Bijbel, a Wortu fu Gado di a meki sma skrifi (2 Timoteyus 3:16). Wi musu poti ten na wan sei fu studeri den Buku fu Bijbel.

Ma sabi wawan no sari. Na ini a srefi begi, Yesus taki: „Den [disipel fu en] ben hori densrefi na a wortu fu yu” (Yohanes 17:6). Wi no musu kon kisi sabi fu Gado nomo, ma wi musu handri akruderi a sabi dati tu. Efu wi no e du dati, dan fa wi o man tron mati fu Gado dan? Yu denki trutru taki yu kan tron wan bun mati fu wan sma efu na fu espresi yu e du sani di a trawan no lobi kwetikweti? Fu dati ede, ala sani di wi e du na ini wi libi, wi musu hori na prakseri fa Gado e si den sani dati, èn san na den gronprakseri fu en. Luku fa tu fu den gronprakseri  fu en e yepi wi fu abi wan bun banti nanga trawan.

Kon abi wan bun banti nanga trawan

Wan leisi, Yesus ben fruteri wan syatu tori fu leri sma wan prenspari sani di ben o yepi den fu abi wan bun banti nanga trawan. A ben fruteri fu wan kownu di ben wani taki den futuboi fu en pai en baka san a ben leni den. Ma wan fu den ben abi wan bun bigi paiman na a kownu, èn a no ben abi nowan fasi fu pai a moni baka. Fu dati ede, a kownu gi sma a komando fu seri a man, en wefi, nanga den pikin fu en, so taki a paiman ben kan pai. Ne a man di ben abi a paiman fadon na gron èn a begi a kownu: „Abi pasensi nanga mi, dan mi o pai yu ala sani.” Fu di a kownu ben e sari a man, meki a taigi en taki a no ben abi fu pai a paiman moro. Ma di a srafu disi gowe, dan a miti wan tra srafu di ben musu pai en pikinso moni nomo, èn a ben de nomonomo taki a tra srafu musu pai en. Aladi a tra srafu ben begi en fu abi sari-ati, toku a fosi srafu meki sma trowe a tra srafu na ini dungru-oso teleki a ben pai en ala a moni baka. Di a kownu yere san pasa, en ati bron srefisrefi. „Yu no ben musu abi sari-ati nanga a tra srafu tu, neleki fa mi ben abi sari-ati nanga yu?”, na so a kownu aksi. Ne a meki sma grabu a srafu di no ben wani gi a trawan pardon, èn a meki den poti en na dungru-oso teleki a ben pai a heri paiman. Fu sori den sma san den ben musu leri fu a tori disi, meki Yesus taki: „Na so mi Tata na hemel sa du tu nanga unu te unu no e gi un brada pardon nanga un heri ati.”​—Mateyus 18:23-35.

Leki sondu libisma, wi e meki furu fowtu. Noiti wi o man pai Gado a bun bigi paiman di wi kon abi na en, fu di wi e sondu teige en. A wan-enkri sani di wi man du, na fu aksi en pardon. Èn te wi e gi wi brada pardon fu den sondu di den du teige wi, dan Yehovah Gado de klariklari fu gi wi pardon fu ala den fowtu di wi meki. Iya, dati na trutru wan moi sani di wi leri! Yesus ben leri den bakaman fu en fu begi: „Gi wi pardon fu den sondu fu wi leki fa wi e gi pardon na sma di du wan sondu teige wi.”​—Mateyus 6:12.

Lusu a problema te na a rutu

Yesus ben sabi heri bun fa libisma tan. A rai di a ben gi fa fu lusu problema, ben yepi fu puru den problema na pasi krinkrin. Luku den tu eksempre di e kon now.

„Un yere taki den taigi den sma fu fositen: ’Yu no musu kiri sma; ma a sma di e kiri wan trawan, sa musu gi frantwortu na fesi krutu’”, na so Yesus ben taki. „Ma mi e taigi unu taki iniwan sma di e tan atibron nanga en brada, sa musu kon na fesi krutu fu gi frantwortu” (Mateyus 5:21, 22). Dyaso Yesus sori taki a no a kiri di sma e kiri trawan na a rutu fu a problema. A rutu fu a problema, na a denki di a kiriman e kweki na ini en ati. Efu sma no ben e kweki bita-ati nanga atibron, dan den no ben o prakseri fa fu du ogri-ati sani nanga trawan. Iya, efu sma ben e du san Yesus leri, dan furu sma no ben o lasi den libi fu di trawan kiri den!

Luku fa Yesus e sori sma san na a rutu fu wan tra problema di e meki furu sma sari. A taigi den sma: „Un yere taki den taki: ’Yu no musu du sutadu.’ Ma mi e taigi unu taki iniwan sma di e tan luku wan uma fu kisi tranga lostu gi en, du sutadu kaba na ini en ati. Ma efu yu retisei ai e meki yu du wan sondu, dan diki en puru èn trowe en gowe” (Mateyus 5:27-29). Yesus ben sori sma taki a no a sutadu di wan sma du na a rutu fu a problema. A rutu fu a problema na san e kon fosi wan sma du sutadu, namku te a sma e kweki takru lostu. Efu wan sma e weigri fu poti prakseri na takru lostu èn efu a e ’diki den puru’ fu en prakseri, dan a sa man sorgu taki a no e tyari ensrefi na wan fasi di no fiti.

„Poti yu feti-owru na en presi baka”

Na a neti di sma tori Yesus èn di den grabu en, dan wan fu den disipel fu en hari en feti-owru fu di a no ben wani taki sma du Yesus ogri. Yesus taigi en: „Poti yu feti-owru na en presi baka, bika a sma di e teki a feti-owru, na a feti-owru o kiri en” (Mateyus 26:52). A mamanten baka dati, Yesus taigi Pontius Pilatus: „Mi kownukondre no de wan pisi fu a grontapu disi. Efu mi kownukondre ben de wan pisi fu a grontapu disi, dan den dinari fu mi ben sa feti,  so taki sma no ben sa gi mi abra na den Dyu. Ma soleki fa a de, mi kownukondre no de fu a fonten disi” (Yohanes 18:36). A leri disi na wan don leri?

Fa den fosi Kresten ben feni den sani di Yesus leri sma fu tapu den fu no du ogri? Wan buku e taki: „Fu di den [leri fu Yesus] ben e sori krin taki a de teige a wet fu du iniwan sortu ogri, noso iniwan sani fu gi wan trawan mankeri, meki a ben de krin fu frustan taki a no ben fiti fu teki prati na orloku . . . Den fosi Kresten ben e du soifri san Yesus ben taki, èn den ben e frustan taki den leri fu Yesus ben wani taki dati trutru den ben musu libi bun nanga tra sma, èn taki den no ben musu du ogri-ati sani fu kakafutu gi trawan. Den ben e frustan taki a bribi fu den ben abi furu fu du nanga vrede; den ben de teige a feti di sma e feti na ini orloku, fu di furu sma ben e lasi libi na ini den feti disi” (The Early Christian Attitude to War [A fasi fa den fosi Kresten ben e si orloku]). Iya, sani ben o waka heri tra fasi nanga libisma efu ala sma di ben e taki dati den na Kresten, ben gi yesi na a leri disi!

Yu kan kisi wini fu ala den leri fu Yesus

Den leri fu Yesus di wi luku dyaso moi srefisrefi, den de makriki fu frustan, èn den abi furu krakti. Libisma kan kisi wini fu den leri fu en te den e kon sabi san na den leri disi, èn te den e gi yesi na den sosrefi. *

Yehovah Kotoigi na ini a birti fu yu, o breiti fu yepi yu fu kon si fa yu kan kisi wini fu den moro koni leri di wan libisma ben gi wanten. Wi e gi yu deki-ati fu meki muiti fu miti den, noso fu skrifi wan brifi go na a adres di skrifi na tapu bladzijde 2 fu a tijdschrift disi, so taki yu kan kisi yepi.

[Futuwortu]

[Prenki na tapu bladzijde 5]

„Un Tata na hemel e gi den nyanyan”

[Prenki na tapu bladzijde 7]

Den leri fu Yesus kan tyari wini kon na ini yu libi