Suma sa sorgu taki ala sma na grontapu abi nyanyan?

SOLEKI fa wan organisâsi fu den Verenigde Nâsi di wani puru angri na grontapu, e taki, dan sowan 800 milyun sma de fu dede fu angri, èn wan bigi grupu fu den na pikin-nengre. No so langa pasa, na organisâsi dati ben taki dati den gudu kondre no ben man poti prakseri na a problema dati, bika tra problema soleki ogri-ati sani di sma e du fu gens tirimakti, ben hari a prakseri fu den. A panya di furu siki e panya, meki a problema kon moro bigi. Na organisâsi Global School Feeding Report ben taki fu den Afrikan kondre pe furu sma abi AIDS: „AIDS e kiri wan heri geslakti fu papa nanga mama. Nofo tron den pikin di den e libi na baka, musu sorgu gi densrefi, ma furu fu den no sabi srefisrefi fa fu du gronwroko èn den no sabi fa fu du sani na ini a libi, bika a gwenti de taki den papa nanga mama musu leri den fa fu du den sani disi.”

Na organisâsi di musu sorgu taki nyanyan de na heri grontapu e horibaka gi wan seti di abi leki marki fu gi nyanyan na den pikin na skoro, wan leisi wan dei. A marki a no soso fu meki angri no de moro, ma nanga a leri di den e gi, den wani seti tra programa di e yepi yonguwan fu no kisi HIV/AIDS.

Na den presi pe den bigin nanga a seti disi, den pikin kisi nyanyan, den leri fa den musu de krin na skin sei, èn den ben kisi tra sortu yepi tu. Na organisâsi ben kon si tu taki te sma ben e tyari densrefi na wan tra fasi, dan moro mendri sma ben kisi a siki HIV/AIDS.

A de wan sari tori taki nofo tron den muiti di libisma e meki, e lusu soso wan pisi fu a problema èn den no man gi a dyaranti taki a problema sa lusu krinkrin. Ma Bijbel e gi wi wan pramisi di e trowstu wi, fu di a abi fu du nanga wan têgo lusu gi a problema taki sma no abi nofo fu nyan. Psalm 72:16 e taki dati „siri-nyanyan sa de bogobogo na grontapu”. Ondro a Kownukondre fu Gado, sma o man taki fu Yehovah Gado: „Yu poti yu prakseri na grontapu, so taki yu kan gi en bogobogo . . . Yu e sreka a siri-nyanyan fu den, bika na so yu e sreka grontapu.”​—Psalm 65:9.

[Sma di abi a reti fu a prenki na tapu bladzijde 32]

WFP/​Y. Yuge