Aksi fu leisiman

Fa Simson ben kan tan dini leki wan Nasireisma, aladi a ben e fasi den dedeskin fu sma di a kiri?

Na ini Israel fu owruten, wan sma ben kan meki wan sweri fu dini leki wan Nasireisma gi wan spesrutu pisi ten. * Wán fu den sani di wan sma di ben meki wan sweri fu dini leki Nasireisma no ben mag du, na disi: „Ala den dei di a hori ensrefi aparti gi Yehovah, a no mag kon na iniwan dede sili. A no ben musu doti ensrefi, awinsi na en papa, noso en mama, noso en brada, noso en sisa, ben dede.” San a ben musu du efu wan sma „dede leti na en sei wantronso”? Efu disi ben pasa èn a ben fasi wan dede skin, dan dati ben o meki taki a doti ensrefi leki Nasireisma. Fu dati ede Bijbel e taki: „Den dei di ben pasa kaba no sa teri moro.” A ben musu go du spesrutu sani fu meki a kon krin baka èn dan a pisi ten di a ben o de leki wan Nasireisma ben musu bigin baka.​—Numeri 6:6-12.

Ma Simson ben de wan tra sortu Nasireisma. Bifo Simson gebore, dan na engel fu Yehovah ben taigi a mama fu Simson: „Luku! Yu sa kon de nanga bere, èn fu tru yu sa kisi wan manpikin, èn en wiwiri tapu en ede no musu koti, bika na a momenti te a pikin komoto na ini a bere, a sa de wan Nasireisma fu Gado; èn en na a sma di sa teki fesi fu frulusu Israel fu den Filistiasma” (Krutuman 13:5). Simson no ben meki wan sweri fu dini leki wan Nasireisma. Gado ben poti en leki Nasireisma, èn a ben o de wan Nasireisma en heri libi langa. A wet di Gado ben poti taki wan Nasireisma no ben musu fasi wan dede skin, no ben abi fu du nanga en. Efu a no ben mag fasi wan dede skin èn toku a ben pasa taki a fasi wan dede skin sondro fu fruwakti dati, dan fa a ben o bigin dini baka leki wan Nasireisma efu a ben de dati sensi a gebore? Soleki fa a sori, dan den markitiki gi wan sma di ben de wan Nasireisma en heri libi langa ben de heri tra fasi leki den markitiki gi wan sma di ben teki en eigi bosroiti fu dini leki Nasireisma.

Luku san Yehovah ben komanderi Simson, Samuel, nanga Yohanes. Den dri man disi ben de Nasireisma den heri libi langa. Soleki fa wi ben taki na fesi, dan Simson no ben musu koti a wiwiri fu en ede. Di Hana ben taki fu a pikin fu en di no ben gebore ete, namku Samuel, dan a ben meki wan sweri di a taki: „Mi sa gi en na Yehovah ala den dei fu en libi, èn nowan sebinefi sa kon na tapu en ede” (1 Samuel 1:11). Ini a tori fu Yohanes a Dopuman, na engel fu Yehovah  ben taki: „A no musu dringi win nanga sopi kwetikweti” (Lukas 1:15). Boiti dati, dan „Yohanes ben weri krosi di meki fu kameili wiwiri èn a ben tai wan leribuba na en bere. A ben nyan sprenka nanga busi-oni tu” (Mateyus 3:4). Nowan fu den dri man disi ben kisi a komando fu no kon krosibei fu wan dede sili.

Boiti taki Simson ben de wan Nasireisma, dan a ben de wan fu den krutuman di Yehovah ben gebroiki fu frulusu den Israelsma fu den ogri-ati fufuruman di ben e pina den (Krutuman 2:16). Èn di a ben e du a wroko disi, dan a ben e fasi dedeskin. Na wán okasi, Simson ben kiri 30 Filistiasma èn a ben puru den krosi na den skin. Bakaten, a ben go feti nanga a feanti èn ’a ben kiri furu fu den èn a ben trowe ala den dede skin tapu makandra’. A ben teki wan nati kakumbe fu wan buriki èn a ben kiri wán dusun man nanga en (Krutuman 14:19; 15:8, 15). Simson ben du ala den sani disi, aladi Yehovah ben e horibaka gi en. Den Buku fu Bijbel e taki dati Simson de wan eksempre fu wan sma di ben abi bribi.​—Hebrewsma 11:32; 12:1.

Simson ben priti wan lew na tu „neleki fa wan sma e priti wan yongu bokoboko na tu”. A de so taki sma ben abi a gwenti fu priti yongu bokoboko na tu na ini a ten dati?

Nowan buweisi no de di e sori taki sma ben e priti yongu bokoboko na tu, na ini a ten fu den Krutuman fu Israel. Krutuman 14:6 e taki: „A yeye fu Yehovah ben bigin wroko na ini [Simson], so taki a ben priti [a yongu lew nanga wiwiri] na tu, neleki fa wan sma e priti wan yongu bokoboko na tu, aladi a no ben abi noti na ini en anu.” A kan taki disi na wan agersitori.

Den wortu „a priti en na tu”, kan abi fu du nanga tu sani. Kande Simson ben priti a mofo fu a lew na tu, noso na a wán noso tra fasi a ben priti en pisipisi. Efu a ben de so taki a ben priti a mofo fu wan lew na tu, dan wan libisma ben kan du a srefi nanga wan yongu bokoboko. Efu dati ben de so, dan na agersitori e sori taki a ben makriki gi Simson fu kiri a lew nanga en soso anu. A lew ben o de neleki wan yongu bokoboko gi Simson. Ma fa a ben o de efu Simson ben kiri a lew fu di a priti a lew pisipisi? Dan a musu de so taki a tori disi na wan agersitori. A prenspari penti di e kon na krin na ini na agersitori disi, na taki a yeye fu Yehovah ben gi Simson a krakti fu du wan sani gi san a ben musu tranga srefisrefi. Awinsi fa no fa, na agersitori na ini Krutuman 14:6 e sori taki Yehovah ben yepi Simson, so taki a ben kan kiri wan tranga lew makriki, neleki fa iniwan libisma ben kan kiri wan yongu bokoboko makriki.

[Futuwortu]