„Waka go na ala sei fu a kondre”
„Waka go na ala sei fu a kondre”
„Waka go na ala sei fu a kondre, na a langa fu en èn a bradi fu en.”—GENESIS 13:17.
1. Sortu span sani Gado ben taigi Abraham fu du?
YU LOBI fu go koiri na wan boitipresi? Kande yu e teki yu wagi rei go na wan boitipresi fu tan wan satra nanga wan sonde. Son sma lobi fu go na den presi disi nanga baisigri so taki den kan lusu den skin pikinso èn den kan teki den ten fu luku san de fu si na pasi. Ma trawan feni en moro switi fu waka luku den presi disi so taki den kan kon sabi den moro bun èn so taki den kan nyan bun fu den. Nofo tron den koiri disi, de fu wan syatu pisi ten nomo. Ma prakseri fa Abraham ben firi di Gado taigi en: „Opo, waka go na ala sei fu a kondre, na a langa fu en èn na a bradi fu en, bika na yu mi sa gi en”!—Genesis 13:17.
2. Pe Abraham go, baka di a gowe libi Egepte?
2 Luku den tekst di e kon fosi a tekst disi. Abraham ben tan na ini Egepte wan pisi ten, makandra nanga en wefi, èn nanga wan tu tra sma. Genesis kapitel 13 e taigi wi taki den gowe libi Egepte èn den tyari den ipi meti fu den go na „Negeb”. Baka dati, Abraham ’go fu a wan kampu na a tra kampu, fu Negeb go na Bethel’. Di wan problema kon na mindri den skapuman fu en nanga den skapuman fu en neef Lot, èn di a sori leki Abraham nanga Lot ben o abi fu suku den eigi weigron, dan Abraham ben de klariklari fu meki Lot bosroiti fosi sortu sei a ben wani go. Lot bosroiti fu go na a „Yordandistrikt” di ben de wan moi lagipresi „neleki a dyari fu Yehovah”, èn baka wan pisi ten Lot go tan na ini Sodom. Gado ben taigi Abraham: „Opo yu ede grantangi èn luku fu a presi pe yu de, go na noordsei, na zuidsei, na owstusei èn na westsei.” Soleki fa a sori, dan Abraham ben de na wan hei presi na Bethel, èn a ben man si tra pisi fu a kondre. Ma Abraham no ben musu luku nomo. Gado ben taigi en fu „waka go na ala sei fu a kondre” fu kon sabi fa a kondre nanga den difrenti kontren de.
3. Fu san ede a kan muilek fu frustan pe den presi ben de pe Abraham ben go?
3 Wi no sabi na omeni presi Abraham go bifo a doro Hebron, ma na a ten di a doro drape a ben sabi a Pramisi Kondre moro bun leki furu fu wi. Prakseri fu den presi di kari na ini a tori disi: Negeb, Bethel, a Yordandistrikt, Sodom, nanga Hebron. Yu e feni en muilek fu frustan pe den sortu presi disi ben de? A muilek gi furu fu wi bika soso wan tu sma fu a pipel fu Yehovah go na den presi fu san den leisi na ini Bijbel, èn soso wan tu sma kisi na okasi waka a heri kondre. Ma toku wi musu wani kon sabi sani fu den presi fu san Bijbel e taki. Fu san ede?
4, 5. (a) Fa Odo 18:15 e sori taki wan sma musu sabi èn frustan sani fu den kondre fu san Bijbel e taki? (b) San Sefanya kapitel 2 e sori?
4 Gado Wortu e taki: „Na ati fu a wan di abi frustan e kisi sabi, èn a yesi fu den koniwan e pruberi fu feni sabi” (Odo 18:15). Furu sani de di wan sma kan kon sabi, ma wan tumusi prenspari sani na fu kon kisi soifri sabi fu sani di abi fu du nanga Yehovah Gado èn nanga a fasi fa a e handri. A no de fu taki dati den sani di wi e leisi na ini Bijbel de prenspari fu kon kisi a soifri sabi disi (2 Timoteyus 3:16). Ma luku taki wi musu gebroiki wi frustan sosrefi. Disi wani taki dati wi musu kon sabi wan tori, èn wi musu man frustan san den difrenti pisi fu a tori abi fu du nanga makandra, so taki te fu kaba wi man frustan a heri tori. Na so a de nanga den presi di Bijbel e kari. Fu eksempre, furu fu wi sabi pe Egepte de, ma san wi e frustan te wi e leisi taki Abraham ben komoto fu Egepte „go na Negeb”, dan a go na Bethel, èn baka dati a go na Hebron? Yu e frustan san den presi disi ben abi fu du nanga makandra?
5 Noso kande yu leisi Sefanya kapitel 2 na ini yu Bijbel leisi schema. Drape yu e leisi den nen fu difrenti foto, pipel, nanga kondre. Na ini a wán kapitel disi nomo, yu e leisi nen soleki Gasa, Askelon, Asdod, Ekron, Sodom, nanga Ninefei, sosrefi Kanan, Moab, Amon, nanga Asiria. Yu ben man si na yu fesi pe den presi disi ben de, pe trutru sma ben e libi, sma di ben abi fu du nanga a kontru fu profeititori fu Gado?
6. Fu san ede son Kresten kon frustan taki a de prenspari fu luku den karta fu den difrenti kondre? (Luku a faki.)
6 Furu sma di e studeri Gado Wortu kisi furu wini di den ondrosuku den karta fu den kondre fu san Bijbel e taki. Den no du disi soso fu di den lobi fu luku den karta, ma den du disi fu di den e frustan taki te den e gebroiki den karta, dan den kan kon kisi moro sabi fu Gado Wortu. Den karta kan yepi den tu fu frustan sani moro bun fu di den man si san den sani di den sabi kaba, abi fu du nanga tra sani di den e leri. A no de fu taki dati te wi o luku wan tu eksempre, dan yu sosrefi o kisi moro lobi gi Yehovah, èn yu o frustan den tori di skrifi na ini en Wortu moro bun. (Luku a faki na tapu bladzijde 14.)
Yu o frustan sani moro bun te yu sabi o fara den presi ben de fu makandra
7, 8. (a) Sortu kefalek sani Simson ben du na Gasa? (b) San kan meki wi frustan moro bun sortu kefalek sani Simson ben du? (c) Fa a kan de wan yepi gi wi te wi kon sabi èn frustan a tori fu Simson moro bun?
7 Na ini Krutuman 16:2 yu kan leisi taki Krutuman Simson ben de na Gasa. A nen Gasa de fu yere furu tron na ini den nyunsu boskopu fu a ten disi, sobun, kande yu sabi frafra pe Simson ben de na ini a kontren fu den Filistiasma, krosibei fu a sesyoro fu a Mindrikondre Se. [11] Luku Krutuman 16:3 now: „Simson tan didon teleki mindrineti èn baka dati a opo na mindrineti èn a grabu den doro fu den portu fu a foto hori èn sosrefi den tu seipostu, èn a hari den puru makandra nanga a sroto, ne a poti den na tapu en skowru èn a tyari den go na tapu a bergi di ben de na abrasei fu Hebron.”
8 A no de fu taki dati den portu nanga den seipostu fu so wan tranga foto leki Gasa, ben bigi èn hebi. Prakseri efu yu ben o pruberi fu opo den tyari gowe! Simson ben du disi, ma pe a ben tyari den go, èn san a ben abi fu du fu doro drape? We, Gasa de na a sesyoro èn a lagi leki a se. [15] Ma Hebron de na owstusei èn a de sowan 900 meter moro hei leki a se, sobun Simson ben abi fu kren moi hei fu doro drape! Wi no man taki soifri pe „a bergi di ben de na abrasei fu Hebron” ben de, ma a foto Hebron de sowan 60 kilometer fu Gasa, èn yu abi fu kren fu doro drape! Te wi sabi o fara Simson ben waka, dan wi kan frustan moro bun o kefalek a sani disi ben de di a du. Èn memre fu san ede Simson ben man du den sortu sani disi: „A yeye fu Yehovah bigin wroko na en tapu” (Krutuman 14:6, 19; 15:14). Wi leki Kresten na ini a ten disi, no e fruwakti taki a yeye fu Gado o meki wi kon tranga pasa marki. Ma a srefi tranga yeye disi kan meki wi frustan dipi yeye tori moro bun, èn a kan meki a sma di wi de na inisei kon moro tranga (1 Korentesma 2:10-16; 13:8; Efeisesma 3:16; Kolosesma 1:9, 10). Iya, te wi e frustan a tori fu Simson, dan wi o kon si moro krin taki a yeye fu Gado kan yepi wi trutru.
9, 10. (a) San Gideon ben du fu wini den Midiansma? (b) Fa wi o frustan a tori disi moro bun te wi sabi pe den presi ben de?
9 Wan tra tori di e sori o prenspari a de fu sabi o fara den presi ben de, na a di fu Gideon di a ben wini den Midiansma. Furu Bijbel leisiman sabi taki Krutuman Gideon nanga en legre fu 300 man ben wini wan grupu fu 135.000 man di ben kon feti nanga den. Na mindri den 135.000 man disi yu ben abi Midiansma, Amaleksma, nanga tra sma di ben seti kampu na a opo presi fu Yisreèl, krosibei fu a pikin bergi fu Morei. [18] Den man fu Gideon ben bro tutu, èn den ben broko watrakan so taki den frambo fu den ben kon de fu si, ne den bari: „A feti-owru fu Yehovah èn fu Gideon!” A sani disi bruya den feanti èn den kon frede, ne den bigin kiri makandra (Krutuman 6:33; 7:1-22). Ma dati na a heri tori? Na soso wan esi-esi sani den du na neti? Leisi go doro na ini Krutuman kapitel 7 nanga 8. Yu sa si taki Gideon ben tan feti nanga den. Den kari furu presi na ini a pisi tori disi, ma wi no sabi pe sonwan fu den de na ini a ten disi. Dati meki yu no o si den na tapu den Bijbel karta kande. Ma toku wi sabi pe furu fu den presi de, so taki wi kan kon sabi pe Gideon ben go.
10 Gideon lon baka den feanti di ben tan abra, a pasa Bet-Sita, dan a go zuidsei na Abel-Mehola, krosibei fu a Yordanliba (Krutuman 7:22-25). A tori e taki dati: „Gideon doro a Yordanliba, èn en nanga den dri hondro man di ben de nanga en, abra a liba. Den ben weri ma den tan lon na baka den feanti.” Baka di den Israelsma abra a Yordanliba, dan den lon baka den feanti go na zuidsei, na Sukot nanga Pnuel, krosibei fu Yabok, dan den go na tapu den pikin bergi na Yokbeha (krosibei fu a disiten Aman, na ini Yordania). Sobun, den lon sowan 80 kilometer baka den feanti fu feti nanga den. Gideon kisi tu kownu fu den Midiansma èn a kiri den, dan a drai go baka na en foto Ofra, krosibei fu a presi pe a feti ben bigin (Krutuman 8:4-12, 21-27). A de krin fu si taki a kefalek sani disi di Gideon nanga den man fu en du, no ben de soso taki den bro tutu, wai nanga den frambo, èn meki babari. Èn prakseri fa a tori disi e meki yu kon frustan moro krin san ben taki fu den sma di ben abi bribi: „Ten no de fu taki fu Gideon [nanga tra sma] di fu a swakifasi fu den, ben kisi deki-ati na ini feti” (Hebrewsma 11:32-34). Kresten kan kon weri tu, ma toku a de tumusi prenspari fu tan du a wani fu Gado, a no so?—2 Korentesma 4:1, 16; Galasiasma 6:9.
Fa sma e denki èn e handri?
11. Pe den Israelsma waka bifo èn baka di den doro Kades?
11 Son sma o luku den Bijbel karta fu man sabi pe den presi de, ma yu denki taki den karta kan meki yu sabi fa den sma ben e denki? Teki leki eksempre, den Israelsma di ben komoto fu Sinaibergi go na a Pramisi Kondre. Baka di den stop na wan tu presi na pasi, dan te fu kaba den doro Kades (noso, Kades-Barnea). [9] Deuteronomium 1:2 e taki dati a waka disi ben teki 11 dei èn a ben de sowan 270 kilometer. Na drape den ben de di Moses seni 12 spion go na ini a Pramisi Kondre (Numeri 10:12, 33; 11:34, 35; 12:16; 13:1-3, 25, 26). Den spion go na noordsei, den pasa na ini Negeb, kande den pasa Berseiba, dan den go na Hebron, èn te fu kaba den doro na a noordsei lanki fu a Pramisi Kondre (Numeri 13:21-24). Fu di den Israelsma ben bribi a takru boskopu fu den tin spion, meki den ben abi fu waka na ini a gran sabana 40 yari langa (Numeri 14:1-34). San disi e sori fu a bribi fu den? Den ben de klariklari fu frutrow tapu Yehovah?—Deuteronomium 1:19-33; Psalm 78:22, 32-43; Yudas 5.
12. San wi kan taki fu a bribi fu den Israelsma, èn fu san ede wi musu denki dipi fu dati?
12 Te yu e denki fu a tori disi, dan hori na prakseri pe den presi disi ben de. Efu den Israelsma ben sori bribi èn ben teki a rai fu Yosua nanga Kaleb, dan yu denki taki den ben o abi fu waka fara fu doro a Pramisi Kondre? Kades ben de sowan 16 kilometer fu Beèr-Lakai-Rowi, a presi pe Isak nanga Rebeka ben libi fositen. [7] Den no ben abi fu waka 95 kilometer srefi fu man doro Berseiba, di ben de na a zuidsei lanki fu a Pramisi Kondre (Genesis 24:62; 25:11; 2 Samuel 3:10). Fu di den ben waka fu Egepte go na a Sinaibergi, èn baka dati den ben waka 270 kilometer go na Kades, meki yu kan taki dati den ben de na a mofodoro fu a Pramisi Kondre. Yu kan taki dati wi sosrefi de na a mofodoro fu a Paradijs grontapu di Gado pramisi. San wi kan leri fu a tori disi? Di na apostel Paulus ben taki fu a situwâsi fu den Israelsma, dan a gi a rai disi: „Fu dati ede, meki wi du ala muiti fu go na ini a rostu dati, so taki nowan sma fadon go na ini a srefi eksempre fu trangayesi.”—Hebrewsma 3:16–4:11.
13, 14. (a) Na ini sortu situwâsi den Gibeonsma no draidrai fu du wan sani? (b) San e kon na krin te wi e luku a fasi fa den Gibeonsma ben tyari densrefi, èn san wi kan leri fu disi?
13 Wi e si wan tra fasi fu denki na ini a Bijbel tori di abi fu du nanga den Gibeonsma. Den ben abi a frutrow taki Gado ben o du soleki fa a ben abi na prakseri. Baka di Yosua meki den Israelsma abra a Yordanliba fu go na ini a kondre di Gado ben pramisi a famiri fu Abraham, dan a ten ben doro fu yagi den Kanansma fu a kondre dati (Deuteronomium 7:1-3). Sobun, den ben o abi fu yagi den Gibeonsma sosrefi. Den Israelsma ben wini Yeriko nanga Ai, èn now den ben seti kampu na Gilgal. Fu di den Gibeonsma no ben wani dede leki ogri Kanansma, meki den seni wan tu sma di ben o teki presi gi den, fu go na Yosua di ben de na Gilgal. Den ben du neleki den ben de fu wan kontren dorosei fu Kanan, so taki den ben kan seti wan frubontu di ben o meki den tron mati fu den Hebrewsma.
14 Den sma di ben e teki presi gi den Gibeonsma, ben taki: „Na fu a nen fu Yehovah yu Gado ede, meki den futuboi fu yu komoto fu wan bun fara kondre” (Yosua 9:3-9). Den krosi nanga a nyanyan fu den ben meki a gersi leki trutru den komoto fu farawe, ma te yu luku en bun, dan Gibeon ben de sowan 30 kilometer fu Gilgal. [19] Fu di Yosua nanga den tra edeman ben e bribi den, meki den seti wan frubontu di ben o meki den tron mati fu den sma fu Gibeon èn fu den tra foto krosibei fu Gibeon. Ma a sani di den Gibeonsma du, ben de soso wan triki fu di den no ben wani dede? Kwetikweti, a ben sori taki den ben wani plisi a Gado fu Israel. Yehovah ben feni en bun taki den Gibeonsma tron „sma di e tyari udu kon na wán èn di e go teki watra gi a heri pipel èn gi na altari fu Yehovah”, èn den ben musu go suku udu fu meki faya gi na altari pe den ben e bron ofrandi (Yosua 9:11-27). Den Gibeonsma tan sori taki den ben de klariklari fu du wroko gi Yehovah, di no ben de so prenspari. Soleki fa a sori, dan sonwan fu den ben de na mindri den Netinim di ben komoto fu Babilon èn drai baka go na Yerusalem fu dini na ini a tempel di ben o bow baka (Esra 2:1, 2, 43-54; 8:20). Wi kan du leki den fu di wi e du muiti fu tan abi vrede nanga Gado, èn fu di wi de klariklari fu du wroko gi en srefi di no de so prenspari.
Du sani sondro fu suku wini gi yusrefi
15. Fu san ede a de prenspari fu sabi pe den presi de fu san Bijbel e taki, te wi e leisi den Kresten Griki Buku fu Bijbel?
15 A fasi fa den difrenti presi seti na ini den kondre fu san Bijbel e taki, e kon moi na krin na ini den tori fu den Kresten Griki Buku fu Bijbel, soleki den tori di e taki fu a ten di Yesus nanga na apostel Paulus ben e waka fu du a diniwroko fu den (Markus 1:38; 7:24, 31; 10:1; Lukas 8:1; 13:22; 2 Korentesma 11:25, 26). Te wi o taki fu den tori di e kon now, dan pruberi fu si na yu fesi na sortu presi den ben go.
16. Fa den Kresten fu Berea sori lobi èn warderi gi Paulus?
16 Na a di fu tu preikiwaka fu Paulus (a paars lin na tapu a karta), a ben go na Filipi di de na ini Grikikondre now. [33] Drape a preiki, sma poti en na dungru-oso, baka dati den lusu en, dan a go na Tesalonika (Tori fu den Apostel 16:6–17:1). Di den Dyu bigin meki wan lo dyugudyugu, dan den brada fu Tesalonika begi Paulus fu go na Berea, di ben de sowan 65 kilometer moro fara. Paulus ben abi bun bakapisi di a ben preiki na Berea, ma den Dyu kon, èn den bigin meki dyugudyugu drape tu. Fu dati ede, „den brada seni Paulus go te na sesyoro wantewante”, èn „den man di ben go nanga Paulus tyari en go te na Ateine” (Tori fu den Apostel 17:5-15). Soleki fa a sori, dan son sma di ben tron Kresten no so langa pasa, ben de klariklari fu waka 40 kilometer go na a Egeus Se pe den ben pai fu go nanga sipi sowan 500 kilometer moro fara. Aladi problema ben kan miti den na pasi, toku den brada ben de klariklari fu go na en èn na so fasi den ben kan de moro langa nanga Paulus di ben go na difrenti presi fu taki fu Gado.
17. San wi o frustan moro bun, te wi sabi o fara Mileite ben de fu Efeise?
17 Na a di fu dri waka fu en (a grun lin na tapu a karta), Paulus doro a lanpe fu Mileite. A seni kari den owruman fu a gemeente fu Efeise, di ben de sowan 50 kilometer moro fara. Prakseri nomo: Den owruman libi ala a wroko fu den, soso fu go na Paulus. Di den ben de na pasi, dan kande den ben e taki fayafaya fu san ben o pasa te den ben o miti en. Baka di den miti Paulus èn di den yere fa a begi, „den alamala ben bari krei, èn den ben brasa Paulus èn ben bosi en na wan lobi fasi”. Baka dati, „den tyari en go na a boto” so taki a ben kan go doro na Yerusalem (Tori fu den Apostel 20:14-38). A musu fu de so, taki den ben abi furu fu prakseri èn fu taki nanga makandra di den ben de na pasi fu go baka na Efeise. A sani disi no e naki yu ati? Prakseri a lobi nanga warderi di den brada disi sori fu di den waka so fara, soso fu de nanga wan dinari di ben e go na difrenti presi, so taki a ben kan fruteri den wan tu sani èn gi den deki-ati. Yu e leri wan sani fu a tori disi di yu kan gebroiki na ini yu libi èn na ini a fasi fa yu denki?
Kon sabi sani fu a Pramisi Kondre èn sani di de fu kon ete
18. Sortu sani di abi fu du nanga den presi fu san Bijbel e taki, wi musu wani du trutru?
18 Den eksempre di wi ben luku e sori o prenspari a de fu kon sabi a kondre di Gado ben gi den Israelsma, soleki fa furu Bijbel tori e sori. (Èn wi o frustan sani moro krin te wi kon sabi sani fu den kondre fu san Bijbel e taki, kondre di ben de na ini a birti fu a Pramisi Kondre.) Aladi wi e kon sabi èn frustan moro sani, spesrutu sani fu a Pramisi Kondre, dan meki wi hori wan prenspari sani na prakseri di den Israelsma ben musu du fu man go na ini a kondre fu „merki nanga oni” èn fu nyan bun fu a kondre disi. A sani di den ben musu du, na fu frede Yehovah èn fu hori densrefi na den komando fu en.—Deuteronomium 6:1, 2; 27:3.
19. Na sortu tu paradijs wi musu poti prakseri?
19 Na so wi na ini a ten disi musu du wan sani tu. Wi musu frede Yehovah èn hori wisrefi na den pasi fu en. Te wi e du disi, dan wi o yepi fu meki a yeye paradijs, di de na ini a Kresten gemeente na heri grontapu now, kon moro bun èn moro moi. Wi sa kisi moro sabi fu a fasi fa a yeye paradijs de èn sortu blesi de fu kisi na ini. Èn wi sabi taki moro de fu kon ete. Yosua ben tyari den Israelsma abra a Yordanliba go na ini wan kondre pe sani ben e gro heri bun èn pe sma ben e firi switi. Na ini a ten disi, wi abi nofo reide fu bribi na ini a Paradijs, noso a bun kondre di musu kon ete.
Yu e memre disi ete?
• Fu san ede wi musu wani sabi èn frustan moro fu den kondre fu san Bijbel e taki?
• Sortu sani di abi fu du nanga den presi fu san wi taki na ini na artikel disi, meki yu kon frustan sani moro bun?
• Sortu sani yu e frustan moro krin, now di yu kon sabi moro fu den presi di kari na ini wan tu tori fu san Bijbel e taki?
[Aksi fu a tori disi]
[Faki/Prenki na tapu bladzijde 14]
’Luku a bun kondre’
Na den kongres fu 2003 nanga 2004, Yehovah Kotoigi ben breiti fu kisi a brochure ’Zie het goede land’ (’Luku a bun kondre’). A nyun brochure disi de fu kisi na ini sowan 80 tongo, èn a lai karta di abi furu kloru. Den karta e sori difrenti presi fu san Bijbel e taki, èn spesrutu a Pramisi Kondre na ini den difrenti pisi ten.
Na artikel disi e sori go na difrenti karta na ini a brochure èn den nomru fu den bladzijde pe a karta de, skrifi na ini fatu letter, fu eksempre [15]. Efu yu abi a nyun brochure disi, dan teki ten fu sabi den difrenti sani di de na ini, di kan yepi yu fu kon sabi èn fu frustan Gado Wortu moro bun.
(1) Na furu fu den karta wan sani skrifi, noso wan faki de di e sori san den spesrutu marki na tapu a karta wani taki [18]. (2) Moro furu fu den karta abi wan syatu lin na ondrosei, di e sori den mijl noso den kilometer, so taki yu sa man frustan o bigi, noso o fara sani de trutru [26]. (3) Nofo tron yu o si wan peiri di e sori go na noordsei, so taki yu kan sabi na sortu sei den presi de na tapu a karta [19]. (4) Furu tron den karta abi kloru sosrefi, fu sori o hei, noso o lagi den presi de [12]. (5) Son karta abi letter nanga nomru na a lanki. Efu yu wani feni wan presi na tapu a karta, dan yu musu hari wan lin fu a letter na tapusei go na a srefi letter na ondrosei, sosrefi yu musu hari wan lin fu a nomru na a reti-anusei go na a srefi nomru na a kruktu-anusei. Yu sa feni a presi di yu e suku, na ini a birti pe den tu lin disi e miti densrefi. [23]. (6) Ala den nen fu den presi de fu feni na ini a register di de na tapu tu bladzijde [34, 35]. Baka a nen fu wan presi, a nomru fu a bladzijde skrifi nanga fatu letter. Nofo tron wan letter nanga wan nomru, soleki E2, skrifi tu fu sori pe a presi de fu feni na tapu a karta. Baka te yu wroko nanga den sani disi wan tu leisi kaba, dan kande yusrefi o fruwondru o prenspari den de fu kon sabi èn fu frustan Bijbel moro bun.
[Schema/Karta na tapu bladzijde 16, 17 di e tyari sani kon na krin]
KARTA FU DIFRENTI PISI KONTREN
(Efu yu wani si pe den sani disi skrifi, luku a tijdschrift)
A. Syoro fu a Bigi Se
B. Opo presi na a westsei fu a Yordanliba
1. Na opo presi fu Aser
2. A pisi sesyoro na Dor
3. Weigron fu Saron
4. Na opo presi fu Filistia
5. A Mindri Owstu-Westsei Lagipresi
a. Na opo presi fu Megido
b. A lagipresi fu Yisreèl
C. Bergi na a westsei fu a Yordanliba
1. Den pikin bergi fu Galilea
2. Den pikin bergi fu Karmel
3. Den pikin bergi fu Samaria
4. Syefela (lagi bergi)
5. Bergi kontren fu Yuda
6. Gran sabana fu Yuda
7. Negeb
8. Gran sabana fu Paran
D. Araba (smara, dipi kontren fu Yordanliba)
1. Hula-swampu
2. Kontren lontu a Se fu Galilea
3. Yordan Lagipresi
4. Sowtu Se (Dede Se)
5. Araba (na a zuidsei fu a Sowtu Se)
E. Bergi nanga plata kontren na a owstusei fu a Yordanliba
1. Basan
2. Gilead
3. Amon nanga Moab
4. Den plata bergi fu Edom
F. Den bergi fu Libanon
[Karta]
Hermonbergi
Morei
Abel-Mehola
Sukot
Yokbeha
Bethel
Gilgal
Gibeon
Jerusalem
Hebron
Gasa
Berseiba
Sodom?
Kades
[Karta/Prenki na tapu bladzijde 15]
(Efu yu wani si pe den sani disi skrifi, luku a tijdschrift)
KANAN
Megido
GILEAD
Dotan
Sikem
Bethel (Lus)
Ai
Yerusalem (Salem)
Betlehem (Efrat)
Mamre
Hebron (Makpela)
Gerar
Berseiba
Sodom?
NEGEB
Rehobot?
[Den bergi]
Moria
[Den se]
Sowtu Se
[Den liba]
Yordanliba
[Prenki]
Abraham ben waka lontu na ini a kondre
[Karta na tapu bladzijde 18]
(Efu yu wani si pe den sani disi skrifi, luku a tijdschrift)
Troas
SAMOTRASA
Neapolis
Filipi
Amfipolis
Tesalonika
Berea
Ateine
Korente
Efeise
Mileite
RODOS