Wan prenspari dei di wi musu memre

NA A mofoneti bifo Yesus dede, dan a ben gi den disipel fu en wan brede sondro srudeki nanga wan kan redi win, èn a ben taigi den fu nyan èn dringi. A ben taigi den sosrefi: „Tan du disi fu memre mi.”—Lukas 22:19.

A yari disi wi sa memre a fesa disi tapu sonde 4 april, baka te son dongo. Yehovah Kotoigi na heri grontapu sa kon makandra tapu a tumusi prenspari neti disi, fu hori a Memrefesa na a fasi fa Yesus ben komanderi den fu du. Den e gi yu wan switi kari fu du disi makandra nanga den. Grantangi, aksi Yehovah Kotoigi na ini a kontren pe yu e tan fu gi yu a soifri yuru nanga a soifri presi pe a spesrutu konmakandra disi o hori.