Kownukondre preikiman e fruteri

Wan telefisi programa ben meki taki wan uma gi glori na Gado

NA APOSTEL Paulus ben taki dati „wan tu sma e preiki fu Krestes fu di den e dyarusu èn den lobi strei, ma trawan e preiki nanga wan bun ati” (Filipisma 1:15). Wanwan leisi, srefi den wan di e pruberi fu gi Yehovah pipel porinen, sondro fu den sabi, ben meki taki reti-ati sma teki waarheid.

Na ini november 1998 wan programa ben de fu si na tapu telefisi fu Fransikondre pe den ben e sori a Bethel-oso, dati na a bijkantoro fu Yehovah Kotoigi na ini Louviers, wan presi na Fransikondre. Aladi sma ben taki difrenti sani fu a programa dati, toku a ben abi bun bakapisi di sma no ben fruwakti.

Wán fu den sma di ben luku a programa ben de Anna-Paula, di ben e tan sowan 60 kilometer fu Bethel. Anna-Paula, wan mama di brokotrow èn di abi tu pikin, ben e suku wan wroko. Sobun, a tra mamanten a ben bel go na Bethel, fu aksi efu a ben man feni wan wroko drape. A ben taki: „San mi ben si na a telefisi-programa ben meki mi prakseri taki Bethel ben de wan bun presi èn taki den ben e du wan bun wroko drape.” A ben fruwondru srefisrefi di a ben yere taki ala den sma di e dini na Bethel, na friwani wrokoman! Baka wan syatu takimakandra fu a wroko fu Yehovah Kotoigi, dan Anna-Paula taki dati a ben o feni en bun efu wan Kotoigi ben kon na en.

Lena, wan furuten dinari na ini wan gemeente na ini a birti dati, ben go na Anna-Paula, èn den ben taki bun langa nanga makandra. Anna-Paula teki a buku Sabi di e tjari joe go na têgo libi. * Anna-Paula ben leisi a heri buku kaba di Lena kon na en a di fu tu leisi, èn a ben abi furu aksi gi Lena. A ben teki wan bijbelstudie wantewante. Anna-Paula taki: „Disi ben o gi mi na okasi fu kon sabi a Wortu fu Gado. Noiti ete mi ben hori wan Bijbel na ini mi anu.”

Anna-Paula ben go luku Bethel na ini yanuari 1999, èn a wiki na baka a ben go na wan Kresten konmakandra fu a fosi leisi. Syatu baka dati, a bigin studeri Bijbel nanga den pikin fu en èn a bigin gi kotoigi na den mati fu en. Anna-Paula e taki: „Mi no ben man hori den sani di mi ben leri gi misrefi. Mi ben wani prati den tru tori fu Bijbel nanga sma èn mi ben wani trowstu den.” Baka di Anna-Paula feti nanga wan tu problema di a ben abi, dan a bigin go doronomo na den konmakandra. A ben go na fesi esi-esi èn a ben teki dopu tapu 5 mei 2002.

Ma moro de ete. A moi eksempre di Anna-Paula ben gi èn a faya fasi fa a ben preiki, ben meki taki en mama bigin studeri Bijbel èn wan syatu pisi ten baka dati a ben teki dopu. Anna-Paula e taki: „Mi no abi nofo wortu fu fruteri fa mi e prisiri. Mi e taki Yehovah tangi ala dei fu di a meki mi kon sabi en èn mi e taki en tangi tu fu ala den blesi di a gi mi.”

[Futuwortu]

[Prenki na tapu bladzijde 8]

Na tapusei: Anna-Paula

Na ondrosei: A mofodoro fu a bijkantoro fu Fransikondre