A yoisti reide fu san ede wan sma musu bribi na ini Gado

WAN buku skrifi na ini Koreatongo èn a buku dati nen 31 Reasons Why Young People Leave the Church (31 sani di e sori fu san ede yongusma no e go na kerki moro). A buku disi e taki dati furu yongusma no e go na kerki moro fu di den no e kisi bun piki tapu den aksi fu den. Fu gi wan eksempre, disi na wan tu fu den aksi di den yonguwan abi: ’Fu san ede sma di e bribi na ini Gado e pina’ èn ’Fu san ede wi musu bribi ala sani di kerki e leri wi, aladi furu fu den leri dati no e kruderi nanga makandra èn e bruya wi sosrefi?’

Fu di furu sma no e agri nanga den piki di den kerki fesiman fu den e gi den, meki den sma disi e taki dati Bijbel no kan piki den aksi fu den. Te wan kerki fesiman e gebroiki soso en eigi denki fu fruklari wan sani fu Bijbel, dan furu tron sma sa kisi wan fowtu denki fu Gado èn fu Bijbel, iya sma no sa wani bribi den.

Na dati Abel ben ondrofeni. A yonkuman disi ben kweki nanga a Luther bribi na ini Zuid-Afrika. A e fruteri: „A kerki e leri taki te wan sma dede, dan dati du kon fu di Gado ’teki’ a sma dati. Ma mi no ben man frustan fu san ede wan Gado fu lobi ben sa wani ’teki’ papa nanga mama puru fu den pikin fu den. Na ini den boitipresi fu Afrika pe mi gro kon bigi, noiti wi ben e srakti wan fowru teleki den pikin fu en ben gro kon bigi. Te wi ben si taki wan kaw ben de nanga  bere, dan wi ben e wakti fu srakti en teleki a pikin kaw gebore èn teleki a no ben dringi merki moro na en mama. Mi no ben man frustan fu san ede wan lobi-ati Gado no ben e hori libisma na prakseri tu neleki fa wi ben e hori meti na prakseri.”

Aram, wan man fu Kanada, ben abi den srefi sortu tweifri disi. A e fruteri: „Di mi ben abi 13 yari, dan mi papa dede. Na a beri, wan prenspari domri fruklari taki Gado ben wani meki mi papa dede, so taki a ben kan kon na hemel fu de krosibei na En. A domri ben taki: ’Gado e teki bun sma puru fu grontapu, fu di a lobi regtfardiki sma.’ Mi no ben man frustan fa Gado ben kan prakseri ensrefi nomo.”

Te fu kaba, Abel nanga Aram miti Kotoigi fu Yehovah, den studeri Bijbel nanga den, èn den kisi piki tapu den aksi di den ben abi. Den kon lobi Gado èn den kisi wan tranga bribi na ini en. Te fu kaba, den gi den libi abra na Yehovah èn den tron loyaal futuboi fu en.

Wi musu kisi soifri sabi fu man bribi na ini Gado

San den ondrofenitori disi e leri wi? Den e sori wi taki a de prenspari fu kisi soifri sabi fu Bijbel efu wi wani bribi na ini Gado. Na apostel Paulus fruteri den Kresten na ini na owruten foto Filipi: „Disi na san mi e tan begi, taki unu kan sori lobi moro nanga moro, makandra nanga soifri sabi èn nanga ala koni fu man si sani krin” (Filipisma 1:9). Dyaso Paulus e sori taki fu man lobi Gado nanga den yeye brada nanga sisa fu wi, wi musu kisi soifri sabi fu Gado èn wi musu man si krin san na a wani fu en.

A sani disi de krin fu frustan, fu di wi musu sabi wan sma fosi, bifo wi kan frutrow en, èn o moro bun wi sabi a sma, o moro wi sa man frutrow en. Yu musu sabi Gado bun tu fu man bribi na ini en. Paulus ben taki: „Bribi na a overtoigi di wan sma abi taki den sani di a e howpu sa kon tru, a krin buweisi fu sani di de trutru, ma di sma no man si” (Hebrewsma 11:1). Te wan sma e bribi na ini Gado sondro taki a abi soifri sabi fu Bijbel, dan wi kan gersi a bribi dati nanga wan oso di meki nanga karta. Wan pikinso winti nomo de fanowdu fu meki na oso dati fadon.

Te yu e studeri Bijbel, dan dati kan yepi yu fu kisi piki tapu aksi soleki a wan di ben dangra Abel nanga Aram langa ten kaba. Na aksi disi na: Fu san ede sma e dede? Bijbel e fruklari taki „Wán man nomo meki sondu kon na grontapu èn sondu fu en sei tyari dede kon, èn dati meki taki ala sma e dede, bika den alamala sondu” (Romesma 5:12). Libisma e gro kon owru èn den e dede, ma dati no e kon fu di Gado e teki den fu de nanga en, ma den e dede fu di Adam ben sondu (Genesis 2:16, 17; 3:6, 17-19). Boiti dati, Bijbel e tyari kon na krin sortu tru howpu Yehovah e gi libisma. Nanga yepi fu en Manpikin Yesus Krestes, a e gi sondu libisma a howpu taki den sa kisi wan opobaka.​—Yohanes 5:28, 29; Tori fu den Apostel 24:15.

Bijbel abi difrenti eksempre fu sma di Yesus ben gi wan opobaka, èn den eksempre disi e yepi wi fu frustan taki libisma sa kisi wan opobaka trutru (Lukas 7:11-17; 8:40-56; Yohanes 11:17-45). Te yu e leisi den Bijbel tori disi, dan poti prakseri na a prisiri di mati nanga famiriman fu den sma di kisi wan opobaka ondrofeni. Yu e si sosrefi taki a sani disi meki taki den prèise Gado èn den poti bribi na ini Yesus.

Na ini a ten disi, a srefi sani disi kan pasa nanga sma di e kisi soifri sabi fu Gado èn fu den prakseri fu en. Furu sma ben bruya fosi, den ben e bribi sani di no ben tru, èn den ben naki futu sosrefi fu di den no ben kisi piki tapu prenspari aksi di den ben abi. Ma di den studeri Bijbel, dan den kisi piki tapu den aksi dati, èn a sani dati kenki den libi dorodoro.

Wi musu lobi Gado fu man dini en

Aladi a de fanowdu srefisrefi taki wan sma abi soifri sabi fu Gado fu man bribi na ini en, toku moro de fanowdu efu a sma wani gi yesi na en èn dini en. Di wan sma ben aksi Yesus san na a moro prenspari komando fu Gado, dan Yesus taki: „Yu musu lobi Yehovah yu Gado nanga yu heri ati èn nanga yu heri sili èn nanga yu heri frustan èn nanga ala yu krakti” (Markus 12:30). Te wan sma lobi Gado na a fasi fa Yesus ben sori, dan a sma dati sa de klariklari trutru fu anbegi en èn fu dini en. A de so tu nanga yu?

Rachel di e dini someni tenti yari langa kaba  leki wan zendeling na ini Korea, e taki fu san ede a e bribi na ini Gado: „Mi e prakseri omeni bun sani Yehovah e du gi den mekisani fu en, a e gi libisma pardon, èn a e meki wi kon sabi san na a wani fu en fu di a wani trutru taki wi e kisi wini gi wisrefi. Ala den sortu sani dati e meki taki a lobi di mi abi gi Gado e gro. Èn a lobi dati e meki taki mi wani dini en.”

Martha na wan weduwe fu Doisrikondre, èn a e dini Yehovah 48 yari langa kaba. A e taki: „Fu san ede mi e dini Yehovah? Fu di mi lobi en. Ibri neti te mi e begi, mi e taki nanga Yehovah èn mi e taigi en fa mi de nanga tangi na ati trutru gi ala den blesi di a gi mi, spesrutu gi a frulusu ofrandi.”

Iya, a lobi di wi abi gi Gado e meki taki wi wani dini en nanga wi heri ati. Ma fa wan sma e kon firi a sortu lobi disi gi Gado? A moro prenspari sani di e yepi wi fu kon lobi Gado, na te wi abi bigi warderi gi a lobi di a sori gi wi. Poti prakseri na den moi wortu disi di de fu feni na ini Bijbel: „A sma di no lobi trawan, no kon sabi Gado, bika Gado na lobi. Na so a lobi fu Gado ben kon na krin gi wi, fu di Gado ben seni en wan-enkri Manpikin kon na grontapu so taki nanga yepi fu en wi ben kan kisi libi. A lobi disi no wani taki dati na wi lobi Gado, ma taki en lobi wi, en a seni en Manpikin kon leki wan srakti-ofrandi di e tapu den sondu fu wi.”​—1 Yohanes 4:8-10.

Yu e frustan o bigi a lobi disi de? Prakseri taki yu ben de fu sungu na ini wan sula, en wan man e poti en libi na ini kefar fu yepi yu. Yu ben o frigiti san a man dati du, noso yu no ben de nanga tangi na ati trutru gi san a du gi yu? Yu no ben o de klariklari fu du iniwan sani gi en? A lobi di Gado sori gi wi fu di a gi en Manpikin, Yesus Krestes, leki a frulusu ofrandi, bigi furu tron moro leki san a man dati du (Yohanes 3:16; Romesma 8:38, 39). Te a lobi fu Gado naki yu ati, dan dati sa meki taki yu sa lobi en, èn yu sa dini en nanga yu heri ati.

Blesi di wi e kisi now èn na ini a ten di e kon

Aladi a musu de so taki wi e du a wani fu Gado funamku fu di wi lobi en, ma toku a e naki wi ati fu sabi taki Gado e blesi den wan di e dini en. Na  apostel Paulus e sori: „Sondro bribi wan sma no kan plisi Gado, bika a sma di e kon na Gado musu bribi taki a de èn taki a e tron a sma di e pai den wan di e suku en fayafaya.”​—Hebrewsma 11:6.

Trutru, Gado e blesi den sma di lobi en èn di e gi yesi na en. Furu sma abi wan moro bun gosontu fu di den e hori densrefi na Bijbel gronprakseri (Odo 23:20, 21; 2 Korentesma 7:1). Furu tron a de so taki wrokobasi e frutrow den sma di e hori densrefi na Bijbel gronprakseri di abi fu du nanga eerlijkfasi èn nanga a wroko di wan sma musu wroko tranga. Leki bakapisi fu dati, den sortu sma disi kan abi wan moro bigi dyaranti taki sani sa waka bun nanga den na ekonomia sei (Kolosesma 3:23). Fu di den futuboi fu Yehovah e poti frutrow tapu a Gado fu den, meki den no e broko den ede tumusi nanga sani, awansi tesi e miti den (Odo 28:25; Filipisma 4:6, 7). Ma a moro prenspari sani, na taki den sma disi e fruwakti nanga ala overtoigi taki den sa kisi a blesi fu têgo libi na ini a paradijs di sa de na grontapu.​—Psalm 37:11, 29.

Sortu firi den sma di e ondrofeni den sortu blesi disi abi gi Yehovah? Jacqueline, wan Kresten na ini Kanada, e taki omeni warderi a abi gi Gado: „Ala ten a e gi wi den tumusi moi presenti, èn a e gi wi a howpu taki wi sa kisi têgo libi trutru.” Abel, di kari na a bigin fu na artikel e fruteri fa a feni a tori disi: „A ben de wan nyun sani gi mi taki mi sa man libi fu têgo tapu wan paradijs na grontapu, èn mi e angri fu si a ten dati. Ma srefi efu a wan Paradijs no ben o kon, dan toku mi ben o prisiri fu dini Gado, bika mi lobi en.”

Yu sosrefi kan abi wan tru bribi

„Yehovah fu den legre e krutu libisma na wan regtfardiki fasi; a e ondrosuku den niri nanga na ati”, na so Bijbel e taki (Yeremia 11:20). Iya, Yehovah e ondrosuku san de dipi na ini wi ati. Ibriwan sma musu ondrosuku fu san ede wi e bribi na ini Gado. Falsi bribi nanga denki fu Gado kande meki taki wi no handri bun na ini a ten di pasa. Ma te wi e kisi soifri sabi fu Bijbel dan dati kan yepi wi fu kisi wan bun banti nanga a Mekiman, Yehovah Gado.​—1 Timoteyus 2:3, 4.

Yehovah Kotoigi e studeri Bijbel fri nanga sma fu kan yepi den fu kisi soifri sabi fu Gado (Mateyus 28:20). Furu sma di teki a yepi dati kisi lobi gi Gado èn den kisi tru bribi na ini en. Fu di den e studeri Bijbel, meki den kisi „koni nanga frustan”, san e yepi den fu „waka na ini seikerfasi” na ini na ogri-ati ten disi (Odo 3:21-23). Ma san moro prenspari, na taki now den sma disi abi wan howpu gi a ten di e kon, èn a howpu disi „de seiker èn a no e degedege” (Hebrewsma 6:19). Yu tu kan abi tru bribi èn yu kan ondrofeni den blesi disi tu.

[Faki na tapu bladzijde 6]

Wan tu dangra aksi di musu kisi piki

„Di mi ben e teki leri na ini wan ati-oso fu kan tron wan datra, dan mi si fa bunbun sma e dyeme fu skin-ati fu di den ben siki, noso fu di rampu ben miti den. Efu wan Gado de, dan fu san ede den sani disi e pasa? A de so taki sma musu bribi Gado soso fu no abi tumusi furu broko-ede?”​—Wan sma na ini Korea di ben abi a Presbiter bribi fosi.

„Furu tron mi aksi misrefi efu mi papa, di de wan sopiman, ben go na hel noso hemel. Mi ben frede srefisrefi gi dede èn gi helfaya. Mi no ben man frustan fa wan lobi-ati Gado ben kan seni wan sma go na hel fu kisi pina fu têgo.”​—Wan sma na ini Brasilia di ben abi a Lomsu bribi fosi.

„San o pasa nanga grontapu èn nanga libisma na ini a ten di e kon? Fa libisma sa man libi fu têgo? Fa libisma sa man kisi tru vrede?”​—Wan sma na ini Doisrikondre di ben abi a Lomsu bribi fosi.

„Mi no ben man frustan a leri di e taki dati libisma e nasi te den dede. Meti no e anbegi Gado, sobun efu wan sma nasi kon tron wan meti fu man butu gi den sondu fu en, dan fa a kan meki sani bun baka so taki a e tron wan libisma baka?”​—Wan sma na ini Zuid-Afrika di ben de Hindu fosi.

„Mi kweki na ini wan famiri di ben abi a bribi fu Confusius, èn mi ben gwenti fu teki prati na a seremonia di wi ben e hori fu plisi wi afo. Te mi ben e yepi fu seti a kra-tafra èn te mi ben e boigi, dan mi ben e aksi misrefi efu den dede afo ben kon fu nyan a nyanyan èn efu den ben e si fa wi ben e boigi gi den.”​—Wan sma na ini Korea di ben abi a bribi fu Confusius fosi.

Ala den sma disi kisi piki tapu den aksi fu den di den studeri Bijbel nanga Yehovah Kotoigi.