A bun nyunsu e meki froktu na ini São Tomé nanga Príncipe

KANDE furu sma no yere noiti fu den presi São Tomé nanga Príncipe. Furu tron sma no e meki reklame gi den presi disi na ini den brochure di e sori pe yu kan go nanga fakansi. Te yu e luku na tapu a karta fu grontapu, dan den presi disi pikin srefisrefi. Den de na ini a Golf fu Ginea, krosibei fu a westsei syoro fu Afrika. São Tomé de krosibei fu na evenaar (wan agersi lin di e prati grontapu na ini tu pisi) èn Príncipe de pikinso na a noord-owstusei fu São Tomé. Fu di furu alen e fadon, meki bigi busi de na tapu den furu bergi di hei moro leki 2000 meter.

Den moi èilanti disi abi blaw watra lontu den èn na a sekanti furu palmbon de. Den sma di e libi na den èilanti disi abi switifasi. Den e kon fu Afrika nanga Europa, èn na so yu kon abi wan moksipatu fu difrenti kulturu drape. Sowan 170.000 sma e libi na den èilanti disi èn a moro prenspari wroko di furu fu den e du na fu seri kakaw gi tra kondre. Tra sma e wroko na gron, noso den e du fisiwroko. Na ini den lasti yari disi a ben de wan muilek sani srefi fu feni wan sani fu nyan ibri dei.

Ma na ini den lasti 10 yari fu a di fu 20 yarihondro, wan prenspari sani pasa di ben abi furu krakti tapu a libi fu furu sma na tapu den èilanti disi. Na ini yuni 1993, lanti ben erken Yehovah Kotoigi leki wan trutru organisâsi na ini São Tomé nanga Príncipe, èn na so fasi wan kaba kon na a muilek ten di Yehovah Kotoigi ben abi fosi na tapu den èilanti disi.

Siri di sai na ini muilek ten

Soleki fa a sori, dan a fosi Kotoigi ben kon dyaso na a èilanti na ini den yari baka 1950. Na a ten dati, sma ben seni strafuman fu tra Afrikan kondre di ben de ondro a tiri fu Potogisikondre, fu go wroko na ini strafuman kampu  na den èilanti disi. A Kotoigi disi ben de wan pionier fu Afrika, noso wan furuten dinari, di sma ben seni gowe fu Mosambik fu di a ben preiki a bun nyunsu fu a Kownukondre fu Gado drape. A Kotoigi disi di ben de en wawan, ben tan du furu èn baka sowan siksi mun, ete 13 sma ben prati a bun nyunsu sosrefi. Bakaten, tra Kotoigi ben doro drape tu bika sma ben seni den gowe fu Angola fu di den ben preiki. Di den ben de na strafu, den ben gebroiki ibri okasi fu prati a bun nyunsu nanga den sma fu a presi drape.

Na a ten fu 1966, ala den brada di ben de na strafu na ini São Tomé, ben drai go baka na Afrika. A pikin grupu fu Kownukondre preikiman di ben tan abra na a èilanti, ben go doro nanga deki-ati. Den ben kisi frufolgu, sma ben fon den, èn den ben poti na strafu-oso fu di den ben kon makandra fu studeri Bijbel. Nowan sma ben e fisiti den, noso ben e gi den deki-ati. Na ini 1975, den èilanti kisi srefidensi fu Potogisikondre èn safrisafri den siri fu a Kownukondre waarheid bigin meki froktu.

A wroko e go na fesi èn Kownukondre zaal e bow

Na ini a srefi mun di lanti erken Kotoigi na ini 1993, wan heimarki fu 100 Kownukondre preikiman ben de. Na ini a srefi yari dati, spesrutu pionier fu Potogisikondre kon drape. Den ben meki muiti fu leri wan sortu Potogisitongo di sma e taki drape, èn fu dati ede meki den sma fu a presi drape ben lobi den. Wan prenspari sani di den ben musu du na fu suku wan pisi gron fu bow wan Kownukondre zaal. Di wan sisa di nen Maria kon yere disi, dan a gi den afu fu en gron pe a pikin oso fu en ben de na tapu. A pisi gron ben bigi nofo fu man bow wan bigi Kownukondre zaal na tapu. Maria no ben sabi taki den bisnisman ben luru a pisi gron disi, fu di a no ben abi nowan famiri moro di ben o kisi a gron te a ben o dede. Wan dei wan prenspari bisnisman kon taki nanga Maria.

„A sani san mi e yere fu yu, no de wan bun sani!” na so a man ben warskow en. „Mi yere taki yu gi sma a pisi gron fu yu fu soso. Yu no sabi taki yu kan kisi bun furu moni gi a gron fu di a de leti na ini a foto?”

 Maria aksi a man: „Efu mi ben o seri a gron gi yu, dan omeni yu ben o pai mi?” Di a man no piki en, dan Maria taki moro fara: „Srefi efu yu ben o gi mi ala moni di de na grontapu, toku dati srefi no ben o sari fu di moni no man bai libi.”

A man aksi en: „Yu no abi pikin, a no so?”

Maria ben wani tapu a takimakandra èn fu dati ede a taki: „A gron na fu Yehovah. A leni mi a gron furu yari langa èn now mi gi en a gron baka. Mi abi a howpu fu libi fu têgo.” Dan a aksi a man: „Yu no man gi mi têgo libi, a no so?” Sondro fu taki wan sani, a man drai waka gowe.

Bakaten wan moi gebow ben meki nanga yepi fu brada di sabi bow èn di komoto na Potogisikondre. A gebow abi wan bigi kamra ondro gron. Boiti dati a abi wan bigi Kownukondre zaal, sosrefi wan tu kamra pe sma kan tan fu wan pisi ten. A abi wan tu kamra sosrefi di den e gebroiki fu hori a skoro gi den owruman, den dinari ini a diniwroko, nanga den pionier. Now tu gemeente e hori konmakandra drape, èn disi na trutru wan bun presi na ini a mamafoto pe sma kan kisi leri fu a tru anbegi.

Na ini Mé-Zochi, wan gemeente nanga 60 fayafaya preikiman ben de. Na ini wan bâna gron den ben bow wan sani di den ben gebroiki leki konmakandra presi. Bakaten den kon si taki den abi wan bun Kownukondre zaal fanowdu. Den brada ben aksi lanti fu kisi wan pisi gron. Den lantiman ben abi switifasi trutru, èn den gi den brada wan bun pisi gron di ben de na a moro prenspari strati fu na èilanti. Baka tu mun wan moi Kownukondre zaal ben bow nanga a yepi fu brada di ben kon fu Potogisikondre. Den gebroiki wan spesrutu fasi fu bow a zaal esi-esi. Den sma fu a presi drape no ben man bribi san den si. Wan koni bowman fu Sweden di ben du wan bow-wroko na ini a foto, ben fruwondru fu si fa den brada nanga sisa ben e wroko. „Mi no man bribi disi!”, na so a ben taki. „Yehovah Kotoigi dyaso na ini Mé-Zochi, e gebroiki a spesrutu fasi fu bow sani esi-esi! Wisrefi musu seti a bow-wroko fu wi na so wan fasi.” A Kownukondre zaal ben gi abra na Yehovah tapu 12 yuni 1999 èn 232 sma ben de drape. A zaal na wan fu den prenspari sani di sma e kon luku te den e fisiti a foto Mé-Zochi.

A fosi kongres di hori

Wan prenspari sani di pasa gi den Yehovah Kotoigi na ini São Tomé nanga Príncipe na a dri  dei „Leri fu Gado” Distrikt Kongres, di ben hori na ini yanuari 1994. Disi ben de a fosi kongres di hori na den èilanti disi. A ben hori na ini a moro bun zaal na ini a kondre, èn a zaal disi ben abi airco srefi. Yu kan frustan taki den 116 Kownukondre preikiman ben e prisiri srefisrefi di den si taki wan bigi grupu fu 405 sma ben de drape. Den ben breiti trutru di den si den Bijbel drama fu a fosi leisi, èn di den kisi nyun publikâsi na a kongres. Den 20 sma di ben gi densrefi abra na Yehovah, ben go na sekanti fu teki dopu na ini se.

Wan nyun sani di ben hari a prakseri fu sma, na den aparti lapelkarta di den Kotoigi ben weri go na a kongres. A ben gersi wan internationaal kongres, fu di 25 fisitiman ben kon fu Potogisikondre nanga Angola. Heri esi den Kresten disi ben sori taki den lobi makandra trutru, èn furu sma ben krei na a lasti pisi fu a programa di den ben taki adyosi.​—Yohanes 13:35.

Nyunsuman fu radio ben kon fu taki nanga a kongres opziener. Den ben poti wan tu pisi fu a programa na radio sosrefi. Disi ben de trutru wan prenspari momenti èn Yehovah en organisâsi na grontapu sori fu de moro krosibei gi den getrow Kotoigi disi di ben de den wawan fu so wan langa pisi ten.

Yehovah e kisi prèise te a Kownukondre boskopu e meki froktu

Te a Kownukondre boskopu e meki froktu, dan dati e meki taki sma e tyari densrefi na wan bun fasi èn disi e tyari prèise nanga grani gi Yehovah (Titus 2:10). Wan tini meisje ben lobi san a ben e leri fu a bijbelstudie di den Kotoigi ben hori nanga en ala wiki. Ma en papa no ben wani kwetikweti taki a meisje go na den gemeente konmakandra. Di a meisje fruteri en papa na wan lespeki fasi o prenspari a de gi en fu go na den gemeente konmakandra èn taki a ben wani du disi trutru, dan en papa yagi en gowe fu oso wantewante. Kande a papa ben denki taki a meisje ben o du san furu yongusma e du, namku fu go libi nanga wan man esi-esi, so taki a man kan sorgu en. Di a papa kon yere taki a meisje ben e libi wan bun èn krin libi leki Kresten, dan disi ben meki taki a teki en baka na oso èn a gi en pasi fu du ala sani fu man dini Yehovah.

Wan tra eksempre na di fu wan fesiman fu wan grupu di e plèi poku. A no ben koloku srefisrefi nanga a yayo libi di a ben abi. Aladi a ben e suku wan marki na ini en libi, dan a kon miti nanga den Kotoigi. Di a bigin libi akruderi den krin markitiki fu Bijbel, dan ala sma na ini a foto ben taki fu a sani disi. Heri esi a bigin si taki a musu tapu fu abi takru kompe (1 Korentesma 15:33). Te fu kaba a teki a prenspari bosroiti fu gi en libi abra na Yehovah èn teki dopu.

Wan grupu fu yonguwan ben e suku a tru bribi. Disi meki taki den ben abi takimakandra nanga den domri fu difrenti kerki grupu, ma baka dati den kon bruya moro èn den lasi-ati. Fu dati ede, den ben e wakawaka lontu e du ogri. Boiti dati, den ben wisiwasi iniwan sani di abi fu du nanga kerki.

Wan dei, wan zendeling fu Yehovah Kotoigi ben de na pasi fu go hori wan bijbelstudie èn a ben pasa na a presi pe den yonguwan disi ben de. A grupu yonguwan ben kari a zendeling kon fu di den ben wani taki a ben musu piki wan tu aksi. Den tyari en go na wan bakadyari pe den gi en wan pikin sturu fu sidon. Baka dati, den poti wan lo aksi gi en, fu tori soleki a sili, helfaya, libi na ini hemel, nanga a kaba fu a grontapu. Nanga yepi fu a Bijbel di a fesiman fu a grupu leni en, a Kotoigi piki ala den aksi fu den. Baka wan yuru, dan a fesiman fu a grupu di ben nen Law, ben taigi a zendeling: „Di wi aksi yu fu kon dyaso èn piki den aksi fu wi, dan wi ben wani fu spotu yu neleki fa wi ben du nanga sma fu tra kerki. Wi ben denki taki nowan sma man piki den aksi dati. Ma yu ben piki den aksi, èn yu ben du so nanga yepi fu Bijbel wawan! Taigi mi, fa mi kan leri sabi moro fu Bijbel?” Law bigin studeri Bijbel èn heri esi a bigin go na den konmakandra. Syatu baka dati a gowe libi a grupu èn a no ben du ogri moro. Na ini wan yari ten a gi en libi abra na Yehovah èn a teki dopu. Now a e dini leki wan dinari ini a diniwroko.

Wan gwenti di moro nanga moro sma abi na taki man nanga uma e libi nanga makandra  sondro taki den trow na lanti. Furu sma libi someni yari langa nanga makandra kaba, èn den abi pikin srefi. Den e feni en wan muilek sani fu si a tori disi leki fa Gado e si en. A e gi deki-ati fu si fa a Wortu fu Gado yepi wan sma fu wini a problema disi.​—2 Korentesma 10:4-6; Hebrewsma 4:12.

Antonio kon frustan taki a musu trow na lanti. Fu dati ede a seti sani fu trow, baka te a ben koti a karu, so taki a ben kan abi pikinso moni fu hori wan trowfesa. Ma wan neti fosi a kotiwroko, dan fufuruman kon fufuru den sani di a prani. A bosroiti fu wakti te tra yari te a ben o de a ten fu a kotiwroko, ma sma ben fufuru den sani baka. Antonio ben meki muiti ete wan tron fu kisi pikinso moni gi a trow fu en, ma srefi dati no ben go bun. A kon frustan suma na a sma di ben e gens en trutru. A ben taki: „Satan no o du san a wani nanga mi moro! Wi sa trow baka wan nanga afu mun, awinsi wi abi wan trowfesa efu no!” Sobun, den trow trutru èn den ben fruwondru di den mati fu den tyari fowru, doksi, nanga wan krabita so taki den ben kan hori a trowfesa. Baka di Antonio nanga en wefi trow na lanti, dan makandra nanga den siksi pikin den teki dopu fu sori taki den gi den libi abra na Yehovah.

Meki wi poti prakseri na a èilanti Príncipe

Na ini den lasti yari di pasa, dan wanwan leisi opziener di e reis èn pionier fu São Tomé ben kon fisiti den 6000 sma di e libi na ini Príncipe. Den sma fu na èilanti ben abi switifasi èn den ben de fayafaya fu arki den Kotoigi. Baka di wan man leisi wan traktaat di tu pionier ben libi gi en, dan a ben go suku den a tra dei fu di a ben wani yepi den fu prati moro traktaat. Den pionier ben fruteri a man taki disi ben de wan wroko di den wawan ben musu du. Ma a man ben wani go nomonomo oso fu oso nanga den pionier so taki a ben kan taigi den ososma, dati den musu arki den pionier bun. A man prèise den pionier fu a prenspari wroko di den ben e du, èn a gowe te fu kaba.

Na ini 1998, tu pionier fu São Tomé froisi go na Príncipe, èn heri esi den ben hori 17 oso-bijbelstudie. A wroko ben tan go na fesi èn a no langa baka dati sowan 16 sma ben kon na a Gemeente Bukustudie, èn moro leki 30 sma ben kon na a publikitaki. Den brada ben si taki den ben abi wan presi fanowdu pe den ben kan kon makandra. Sobun, den fruteri dati na Lanti èn nanga prisiri den gi den Kotoigi gron pe den ben kan bow wan Kownukondre zaal. Brada fu São Tomé ben kon yepi fu bow wan pikin Kownukondre zaal di abi wan presi sosrefi pe tu spesrutu pionier kan tan.

A de krin taki a bun nyunsu e meki furu froktu èn a e go na fesi na den èilanti disi (Kolosesma 1:5, 6). Na ini yanuari 1990, São Tomé nanga Príncipe ben abi 46 preikiman. Na ini a dienstyari 2002, den ben doro a heimarki fu 388 Kownukondre preikiman! Moro leki 20 procent fu den preikiman de na ini a furuten diniwroko èn sowan 1400 oso-bijbelstudie e hori. Na ini 2001, na èilanti doro wan trutru heimarki fu di 1907 sma ben kon na a Memrefesa. Iya, a wortu fu Yehovah e panya esi-esi go na ala sei na den moi èilanti disi, èn sma e gi a wortu glori.​—2 Tesalonikasma 3:1.

[Faki na tapu bladzijde 12]

Pôpi radio programa

Den sma fu den èilanti disi abi furu warderi gi a buku Wat jonge mensen vragen — Praktische antwoorden. * Ibri tu wiki, wan programa fu 15 miniti di abi a nen fu a buku disi, de fu yere na radio. A de wan span sani fu yere a nyunsuman e aksi: „Yongu sma, fa yu kan sabi efu yu lobi wan sma trutru?” Baka dati a e leisi wan pisi fu a buku. (Luku kapitel 31.) Wan tra programa na radio e taki sosrefi fu spesrutu pisi fu a buku A sroto gi wan kolokoe osofamiri. *

[Futuwortu]

[Prenki na tapu bladzijde 9]

A fosi Kownukondre zaal na São Tomé na ini 1994

[Prenki na tapu bladzijde 10]

1. A Kownukondre zaal na ini Mé-Zochi di den bow esi-esi

2. A fosi distrikt kongres hori na ini a zaal disi

3. Den sma di teki dopu na a kongres e prisiri

[Sma di abi a reti fu a prenki na tapu bladzijde 8]

Globe: Mountain High Maps® Copyright © 1997 Digital Wisdom, Inc.