Gronprakseri fu Gado—Den kan tyari winimarki kon gi yu

SONDRO tweifri, yu sabi taki meti e handri akruderi a koni di poti na ini den. Furu masyin meki fu wroko akruderi spesrutu tirilin. Ma fu taki en leti, libisma meki fu libi akruderi gronprakseri. Fa yu kan sabi efu dati tru? We, Yehovah, a Sma fu pe ala regtfardiki gronprakseri e komoto, ben meki bekènti di a ben meki den fosi libisma: „Meki wi meki libisma akruderi a prenki fu wi, soleki fa wi de.” A Mekiman na wan yeye; a no abi wan skin soleki fa wi abi dati. Fu dati ede wi na wan „prenki” fu en, fu di wi kan sori den srefi fasi di a abi. Disi wani taki dati wi kan sori pikinso fu den tumusi bun fasi fu en. Libisma man libi akruderi gronprakseri, san wani taki dati den man tyari densrefi akruderi wan fasi di densrefi feni bun. Yehovah meki sma skrifi furu fu den gronprakseri disi na ini a Wortu fu en.—Genesis 1:26; Yohanes 4:24; 17:17.

Wan sma ben kan taki: ’Ma Bijbel abi hondrohondro gronprakseri. Mi noiti sa sabi den alamala.’ Dati tru. Ma prakseri a tru tori disi: Aladi  a de so taki ala den gronprakseri fu Gado e tyari winimarki kon gi wi, toku wan tu fu den prenspari moro leki trawan. Na ini Mateyus 22:37-39 wi e si wan buweisi fu dati. Na ini den tekst disi Yesus ben sori taki sonwan fu den komando na ini a Wet fu Moses èn sosrefi den gronprakseri di abi fu du nanga den komando disi, prenspari moro leki trawan.

San na den moro prenspari gronprakseri? Den moro prenspari gronprakseri na ini Bijbel na den wan di abi krakti tapu a matifasi di wi abi nanga Yehovah. Te wi e hori wisrefi na den gronprakseri disi, dan a Mekiman sa abi a moro bigi krakti tapu a fasi fa wi e tyari wisrefi. Boiti dati, gronprakseri de tu di abi krakti tapu a matifasi di wi abi nanga tra sma. Te wi e hori wisrefi na den gronprakseri disi, dan dati sa yepi wi fu no prakseri wisrefi nomo.

Meki wi bigin nanga wan fu den moro prenspari tru tori na ini Bijbel. San na a tru tori dati, èn sortu krakti a abi na wi tapu?

„A Moro Heiwan na heri grontapu”

Den Santa Buku fu Bijbel e sori krin taki Yehovah na wi Gran Mekiman èn taki en na Gado na Almaktiwan. A no abi en speri èn nowan sma no man teki En presi. A sani disi na wan prenspari tru tori di skrifi na ini Bijbel.—Genesis 17:1; Preikiman 12:1.

Wan fu den psalm skrifiman ben taki fu Yehovah: „Yu wawan na a Moro Heiwan na heri grontapu.” Kownu David fu owruten ben taki: „Fu yu a kownukondre de, o Yehovah, yu di e opo yusrefi leki edeman fu ala sani.” Èn a profeiti Yeremia di furu sma sabi, ben kisi deki-ati fu skrifi: „Nowan sma no de di de leki yu, o Yehovah. Yu bigi èn yu nen bigi ini makti.”—Psalm 83:18; 1 Kroniki 29:11; Yeremia 10:6.

Fa wi kan sori na ini wi aladei libi, taki wi e lespeki den tru tori disi?

A krin fu si suma trutru musu de a moro prenspari sma na ini wi libi. Dati na wi Mekiman noso a Sma di gi wi libi. Fu dati ede, a e fiti taki wi e du muiti fu no kisi a gwenti fu du sani, soso fu kisi grani. A kan taki son sma abi a gwenti disi moro leki trawan. Wi e handri nanga koni te wi e hori wisrefi na a gronprakseri di e leri wi fu „du ala sani fu gi Gado glori” (1 Korentesma 10:31). A profeiti Danièl ben de wan tumusi bun eksempre gi wi, fu di a ben hori ensrefi na a gronprakseri disi.

Bijbel e fruteri wi taki Kownu Nebukadnesar fu Babilon ben broko en ede nanga wan dren di a ben kisi, èn a komanderi sma fu fruklari a dren disi gi en. Aladi nowan sma no ben man fruklari a dren disi, toku Danièl fruteri a kownu soifri san a ben wani sabi. Danièl ben teki a grani fu san a ben du? Nôno, a ben gi glori na „Gado na ini hemel di de wan Sma di e tyari kibritori kon na krin”. Danièl ben taki moro fara: „A no nanga yepi fu koni di mi abi moro leki iniwan tra libisma, taki a kibritori disi tyari kon na krin gi mi.” Danièl ben de wan man di ben tyari ensrefi na wan lespeki fasi. Fu dati ede, a no e fruwondru wi taki a buku Danièl e taki dri leisi fu en leki wan sma di Gado „lobi srefisrefi”.—Danièl 2:28, 30; 9:23; 10:11, 19.

Yu sa kisi winimarki te yu e tyari yusrefi na a fasi fa Danièl ben tyari ensrefi. Te wi e du dati, dan wi musu sabi bun fu san ede wi e du sani. Suma musu kisi a grani fu den sani di yu e du? Awansi sortu situwâsi yu de na ini, yu man handri na wan fasi di e sori taki yu e lespeki a tumusi  prenspari gronprakseri di e leri wi taki Yehovah na a Moro Hei Masra. Efu yu e du dati dan yu sa tron wan sma di Gado „lobi srefisrefi”.

Meki wi poti prakseri now na tu prenspari gronprakseri di kan sori wi fa fu handri na wan yoisti fasi nanga trawan. Fu di so furu sma e prakseri densrefi nomo, meki a de wan tyalensi trutru fu libi na a fasi disi.

„Du sani nanga sakafasi”

Furu tron a de so taki sma di e prakseri densrefi nomo, no de tevrede sma. Furu fu den sma disi wani nomonomo taki a libi fu den musu kon moro bun, èn den wani taki dati musu pasa wantewante. Den sma disi e si sakafasi leki wan swakifasi. Den feni taki pasensi na wan sani di trawan musu sori. Den sma disi de klariklari fu du iniwan sani di de fanowdu fu sorgu taki sani e waka bun gi den. Yu denki taki yu kan handri tra fasi leki fa den sma disi e handri?

Ala dei futuboi fu Gado e kisi fu du nanga sma di e prakseri densrefi nomo, ma dati no musu abi krakti na den tapu. Lepi Kresten e agri nanga a gronprakseri di e taki: „A no a sma di e prèise ensrefi, Yehovah feni bun, ma a sma di Ensrefi e prèise.”—2 Korentesma 10:18.

A sa de wan yepi gi wi te wi e handri akruderi a gronprakseri di skrifi na Filipisma 2:3, 4. Den tekst dati e gi yu deki-ati fu „no du noti fu di [yu] lobi fu meki trobi noso fu di [yu] e prakseri [yusrefi] nomo, ma du sani nanga sakafasi, fu di [yu] e si den tra sma leki sma di hei moro [yusrefi]”. Na so fasi yu sa „hori ai, no soso tapu [yu] eigi afersi, ma sosrefi tapu den di fu trawan”.

Wan man di ben abi wan  yoisti denki fu ensrefi èn di no ben meki bigi, ben de Gideon. A man disi ben de wan krutuman fu den owruten Hebrewsma. A no ben e suku fu tron fesiman fu Israel. Ma di a ben musu tron fesiman, dan a taki dati a no ben warti fu kisi a grani dati. A fruklari: „A grupu fu mi fu dusun mansma na a moro mendriwan na ini Manase, èn misrefi na a moro pikinwan na ini na oso fu mi papa.”—Krutuman 6:12-16.

Boiti dati, baka di Yehovah ben meki Gideon wini wan feti, dan mansma fu Efraim bigin meki trobi nanga en. San Gideon ben du? A ben kisi bigifasi fu di a ben wini a feti dati? Nôno. Fu di a no ben wani taki wan bigi ogri ben pasa, meki a piki den mansma disi na wan safri-ati fasi. „San mi ben man du te mi e agersi misrefi nanga unu?” Gideon ben abi sakafasi.—Krutuman 8:1-3.

A tru taki den sani di abi fu du nanga Gideon, ben pasa wan langa pisi ten bifo. Toku, a bun fu poti prakseri na a tori dati. Yu kan si taki Gideon ben de heri tra fasi leki furu sma na ini a ten disi. A ben tan tyari ensrefi na wan yoisti fasi, èn dati tyari wini kon gi en.

A gwenti di sma abi na ini a ten disi fu prakseri densrefi nomo, kan meki taki wi e kisi wan fowtu denki fu wisrefi. Bijbel gronprakseri e yepi wi fu kenki a denki dati, fu di den e leri wi san na a tru waarde fu wi te wi e gersi wisrefi nanga wi Mekiman èn nanga tra sma.

Te wi e hori wisrefi na Bijbel gronprakseri, dan wi no sa prakseri wisrefi nomo. Wi no sa handri soleki fa wi firi noso soleki fa tra sma e handri. O moro wi e kon sabi fu den regtfardiki gronprakseri, o moro wi e kon sabi a Sma fu pe den komoto. Iya, a bun fu poti bun prakseri na den gronprakseri fu Gado te wi e leisi Bijbel.—Luku a faki.

Yehovah meki libisma hei moro meti. Meti e handri moro furu akruderi a koni di poti na ini den. Wi musu handri akruderi den gronprakseri fu Gado efu wi wani du a wani fu en. Na so fasi wi kan tan tyari wisrefi na a yoisti fasi, èn leki bakapisi fu dati wi sa go na ini wan nyun seti di Gado meki. Bijbel e sori wi taki heri esi wi kan fruwakti wan nyun seti fu sani na heri grontapu, èn „regtfardikifasi sa de” na ini a grontapu disi.—2 Petrus 3:13.

[Faki/Prenki na tapu bladzijde 6]

Wan tu Bijbel gronprakseri di sa yepi wi

Na ini na osofamiri:

„Meki ibri sma no tan suku en eigi bun, ma di fu a tra sma.”—1 Korentesma 10:24.

„Lobi . . no e suku en eigi belang.”—1 Korentesma 13:4, 5.

„Meki [sosrefi] ibriwan fu unu aparti lobi en wefi soleki fa a lobi ensrefi.”—Efeisesma 5:33.

„Un wefi, saka unsrefi na un masra ondro.”—Kolosesma 3:18.

„Arki yu papa di meki yu gebore, èn no wisiwasi yu mama soso fu di a kon owru.”—Odo 23:22.

Na skoro, na yu wrokope, noso na ini bisnis afersi:

„Wan wegi di no soifri na wan tegu sani . . . Na ogri sma e meki moni na wan bedrigi fasi.”—Odo 11:1, 18.

„Meki a sma di e fufuru, no fufuru moro, ma na presi fu dati meki a go wroko tranga.”—Efeisesma 4:28.

„Efu wan sma no wani wroko, dan no meki a nyan tu.”—2 Tesalonikasma 3:10.

„Awansi san unu e du, du en nanga unu heri sili leki gi Yehovah.”— Kolosesma 3:23.

„Wi wani tyari wisrefi na wan opregti fasi na ini ala sani.”—Hebrewsma 13:18.

A fasi fa wi musu si gudu:

„A sma di e hasti ensrefi fu kisi gudu, no sa tan sondro fowtu.”—Odo 28:20.

„Wan sma di lobi solfru nomo, no sa de tevrede nanga solfru.”—Preikiman 5:10.

A yoisti denki di wi musu abi fu wisrefi:

„Te libisma e suku den eigi glori, dan dati na glori trutru?”—Odo 25:27.

„Meki wan freimdesma prèise yu, èn no yu eigi mofo.”—Odo 27:2.

„Mi e taigi ibriwan sma drape na un mindri, fu no denki fu ensrefi moro leki a de fanowdu.”—Romesma 12:3.

„Efu iniwan sma e denki taki a de wan sani aladi a de noti, dan a e kori en eigi prakseri.”—Galasiasma 6:3.

[Prenki na tapu bladzijde 5]

Danièl ben gi Gado a grani di A ben musu kisi

[Prenki na tapu bladzijde 7]

Te wi e handri nanga trawan akruderi gronprakseri fu Gado, dan dati sa meki taki wi sa abi switi matifasi nanga trawan, èn wi sa de koloku

[Sma di abi a reti fu a prenki na tapu bladzijde 7]

U.S. Fish & Wildlife Service, Washington, D.C./Robert Bridges