Fa fu kakafutu gi problema di de leki „wan maka na ini a skin”

„A bun-ati fu mi nofo gi yu.”​—2 KORENTESMA 12:9.

1, 2. (a) Fu san ede wi no musu bruya te wi e kisi tesi nanga problema? (b) Fu san ede wi kan abi a frutrow taki wi man kakafutu gi tesi?

„ALA sma di wani dini Gado fayafaya na ini wánfasi nanga Krestes Yesus, sa kisi frufolgu tu” (2 Timoteyus 3:12). Fu san ede dati de so? Fu di Satan e feni taki libisma e dini Gado soso fu kisi wini gi densrefi, èn Satan e du ala muiti fu sori taki a abi leti. Yesus ben warskow den getrow apostel fu en wan leisi: „Satan de fayafaya fu kisi unu, fu a kan wai unu leki aleisi buba” (Lukas 22:31). Yesus ben sabi heri bun taki Gado e gi Satan pasi fu tesi wi nanga kefalek bigi problema. Soleki fa wi kan frustan, dan dati no wani taki dati ibri problema di wi e kisi e kon fu Satan, noso fu den ogri yeye fu en (Preikiman 9:11). Ma Satan de klariklari fu gebroiki ala san a man feni fu broko wi soifri retifasi.

² Bijbel e fruteri wi taki wi no musu bruya te wi e kisi tesi. Awinsi sortu problema e miti wi, wi e frustan fu san ede den sani disi e pasa, èn wi e fruwakti den sortu sani disi (1 Petrus 4:12). Te yu luku en bun, „den srefi sani disi e miti a heri libimakandra fu [wi] brada na grontapu, leki wan fasi fu kisi pina” (1 Petrus 5:9). Na ini a ten disi, Satan e poti wan lo hebi tapu ibri futuboi fu Gado. Didibri e prisiri te wi e kisi furu problema di e tyari banawtu kon. Fu man du dati, a e gebroiki en seti fu sani na so wan fasi, so taki den ’maka na ini wi skin’ kan hati wi moro (2 Korentesma 12:7). Awinsi fa a no fa, den problema disi di Satan e tyari kon, no musu broko wi soifri retifasi. Neleki fa Yehovah sa ’opo a pasi gi wi’ fu pasa tesi, na so a sa yepi wi tu fu pasa problema di de leki maka na ini wi skin.—1 Korentesma 10:13.

Fa fu kakafutu gi problema di de leki wan maka

3. San Yehovah taki, di Paulus aksi en fu puru a maka na ini en skin?

³ Na apostel Paulus ben begi Gado fu puru a maka na ini en skin. „Fu dati ede mi ben begi Masra tangitangi dri leisi kaba taki a ben sa gowe libi mi.” Fa Yehovah piki a seryusu aksi fu Paulus? Yehovah taigi en: „A bun-ati fu mi nofo gi yu, bika a krakti  fu mi e kon volmaakti na ini swakifasi” (2 Korentesma 12:8, 9). Meki wi taki finifini fu a piki disi èn si fa a kan yepi wi fu kakafutu gi problema di e gi wi furu sari.

4. Fa Paulus ben kisi wini fu a bun-ati fu Yehovah?

⁴ Luku taki Gado ben gi Paulus deki-ati fu warderi a bun-ati di a ben kisi kaba nanga yepi fu Krestes. Iya, Paulus ben kisi furu blesi. Yehovah sori lobi gi Paulus èn a gi en a grani fu tron wan disipel fu Yesus, aladi Paulus ben de wan fayafaya gensman fosi fu den bakaman fu Yesus (Tori fu den Apostel 7:58; 8:3; 9:1-4). Baka dati, Yehovah ben gi Paulus furu bigi wroko fu du èn a ben gi en tra grani sosrefi. Wi kan leri wan sani fu disi. Awinsi wi abi furu problema, toku wi abi furu blesi di e gi wi prisiri. Den tesi di wi e kisi, noiti no musu meki wi frigiti a bunfasi di Yehovah e sori wi.—Psalm 31:19.

5, 6. (a) Fa Yehovah ben leri Paulus taki a krakti di A e gi „e kon volmaakti na ini swakifasi”? (b) Fa na eksempre fu Paulus sori taki Satan na wan leiman?

⁵ A bun-ati fu Yehovah nofo gi wan tra sani tu. A krakti di Gado e gi, nofo fu yepi wi pasa den tesi fu wi (Efeisesma 3:20). Yehovah ben leri Paulus taki a krakti fu En „e kon volmaakti na ini swakifasi”. Fa? Na wan lobi-ati fasi, Gado ben gi Paulus ala krakti di a ben abi fanowdu fu kakafutu gi a tesi fu en. Paulus fu en sei, ben horidoro èn a ben frutrow dorodoro tapu Yehovah. Na so wan fasi, ala Kresten kon si taki a krakti fu Gado trutru ben yepi a man disi fu basi den sondu firi nanga den swakifasi fu en. Prakseri now fa disi ben abi krakti tapu Didibri, di ben taki dati libisma e dini Gado soso te a libi e waka switi èn te problema no de. A hori di Paulus ben hori en soifri retifasi, ben de neleki a naki a leiman dati na en fesi!

⁶ Fosi, Paulus ben de na a sei fu Satan fu di a ben feti nanga Gado; a ben frufolgu Kresten èn a ben de wan fayafaya Fariseiman. A musu de so taki a ben libi wan switi libi, fu di a gebore na ini wan gudu famiri. Now, Paulus ben e dini Yehovah nanga Krestes leki „a moro mendriwan fu den apostel” (1 Korentesma 15:9). A ben e saka ensrefi na a tiri fu a fosi yarihondro Kresten tiri skin. Èn awinsi a ben abi wan maka na ini en skin, toku a ben e horidoro na wan getrow fasi. Satan no ben lobi en srefisrefi taki Paulus ben tan fayafaya awinsi a ben kisi tesi. Noiti Paulus ben frigiti a howpu di a ben abi, taki a ben o tiri makandra nanga trawan na ini Krestes en hemel Kownukondre (2 Timoteyus 2:12; 4:18). Nowan maka ben kan tapu en fu de fayafaya, awinsi omeni a ben hati. Meki wi tan fayafaya tu! Fu di Yehovah e yepi wi fu kakafutu gi tesi, meki wi abi a grani fu sori taki Satan na wan leiman.—Odo 27:11.

Den sani di Yehovah seti de prenspari srefisrefi

7, 8. (a) Fa Yehovah e gi den futuboi fu en krakti na ini a ten disi? (b) Fu san ede a de so prenspari taki wi e leisi èn e studeri Bijbel ibri dei te wi e feti nanga wan maka na ini wi skin?

⁷ Na ini a ten disi, Yehovah e gebroiki en santa yeye, en Wortu nanga wi Kresten bradafasi, fu gi getrow Kresten krakti. Neleki na apostel Paulus, wi kan begi Yehovah èn trowe den hebi fu wi na en tapu (Psalm 55:22). Kande Gado no sa puru den problema gi wi, ma a kan gi wi a koni fu tyari den, srefi den wan di muilek fu tyari. Boiti dati, Yehovah kan gi wi „krakti di bigi pasa marki”, fu yepi wi horidoro.—2 Korentesma 4:7.

⁸ Fa wi e kisi a yepi disi? Wi musu studeri Gado Wortu fayafaya, bika na ini en Wortu wi sa feni furu trowstu (Psalm 94:19). Te wi e leisi Bijbel, dan wi kan si a kefalek moi fasi fa den futuboi fu Gado ben begi en fu kisi yepi. A ben o bun fu denki dipi fu den piki fu Yehovah, bika nofotron a ben taki sani di e gi trowstu. A studeri di wi e studeri Gado Wortu sa meki wi kon tranga, so taki „a krakti di bigi pasa marki, sa de fu Gado, no fu wisrefi”. Neleki fa wi musu nyan ibri dei fu tan na libi  èn fu tan tranga, na so wi musu tan leisi den wortu fu Gado doronomo tu. Wi e du disi? Te wi e du disi, dan wi sa si taki a „krakti di bigi pasa marki” e yepi wi fu horidoro awinsi sortu maka e hati wi now.

9. Fa owruman kan horibaka gi den sma di abi problema?

⁹ Kresten owruman di e frede Gado, kan „de leki wan kibripresi gi a winti èn wan kibripresi gi a sibibusi”. Disi wani taki dati den kan yepi den wan di e firi brokosaka èn di abi problema. Fu man du disi, owruman musu abi sakafasi èn den musu de opregti te den e aksi Yehovah fu gi den „a tongo fu den wan di kisi leri”, so taki den kan sabi a yoisti fasi fu piki den wan di e pina. Den wortu fu den owruman kan de leki switi alen di e kowru na ati, èn den kan gi wi trowstu te a libi lai problema. Te owruman e „taki nanga den sili di brokosaka fu gi den trowstu”, dan den e horibaka trutru gi den brada nanga sisa fu den, di kande e kon weri, noso e firi brokosaka fu wan sani di de leki wan maka na ini den skin.—Yesaya 32:2; 50:4; 1 Tesalonikasma 5:14.

10, 11. Fa den futuboi fu Gado kan gi trawan deki-ati di e kisi hebi tesi?

¹⁰ Ala futuboi fu Yehovah na memre fu a Kresten famiri fu en. Iya, wi na „memre di de fu makandra”, èn „wi abi a plekti fu lobi makandra” (Romesma 12:5; 1 Yohanes 4:11). Fa wi e du disi? Akruderi 1 Petrus 3:8, wi e du dati te wi ’sori firi gi trawan, te wi abi brada lobi, èn te wi abi safu sari-ati’ gi ala sma di abi a srefi bribi leki wi. Te wi abi sma na wi mindri di musu feti nanga wan bigi maka na ini a skin, efu na yonguwan noso owruwan, wi alamala kan poti spesrutu prakseri na den sma disi. Fa wi kan du dati?

¹¹ Wi musu pruberi fu prakseri fa den sma e firi di e pina. Te wi no e sori sari-ati gi den sma disi, te wi no e firi nanga den, noso te wi e du leki noti no pasa, dan sondro fu sabi, wi ben kan hati den moro. A sabi di wi sabi taki den e kisi tesi, musu meki wi luku bun nanga san wi e taki, fa wi e taki sani, èn fa wi e du sani. Te wi e poti prakseri na bun sani èn e gi den deki-ati, dan dati kan yepi fu safu a pen fu den, awinsi sortu maka e hati den. Na so wan fasi wi kan yepi fu gi den sma disi krakti.—Kolosesma 4:11.

Fa son getrow sma horidoro

12-14. (a) San wan Kresten sisa du fu man kakafutu gi den problema di kanker e tyari kon? (b) Fa brada nanga sisa yepi na uma disi èn fa den gi en deki-ati?

¹² O moro wi e doro a kaba fu den lasti dei disi, o moro ogri a „pen fu banawtu” e kon dei fu dei (Mateyus 24:8). Sobun, tesi kan miti ibri sma na grontapu, spesrutu den getrow  futuboi fu Yehovah di e suku fu du en wani. Poti prakseri fu eksempre na wan Kresten di de na ini a furuten diniwroko. Datra ben kon si taki a abi kanker èn den ben musu koti en. Di a sisa nanga en masra kon sabi taki a abi a siki disi, dan wantewante den begi Yehovah èn den taki wan langa pisi ten nanga en. Bakaten a sisa taki dati den ben firi korostu srefisrefi na ini den ati. Ma wanwan leisi so, a ben firi bun èn tra leisi a ben firi brokosaka, spesrutu te den dresi ben meki en firi siki.

¹³ Fu di a sisa disi ben wani sabi san a ben musu du, meki a ben du muiti fu kon sabi ala sani fu kanker. A ben poti aksi gi den datra fu en. Na ini A Waktitoren, Ontwaakt!, nanga tra Kresten publikâsi, a ben feni ondrofenitori di e sori fa sma hori densrefi, aladi den ben abi a siki disi. Boiti dati, a ben leisi bijbeltekst tu di e sori taki Yehovah abi a makti fu yepi a pipel fu en te den abi problema. Èn a ben leisi tra sani tu di yepi en trutru.

¹⁴ Wan artikel di ben taki fu san wi kan du te wi e firi brokosaka, ben abi den koni wortu disi: „Wan sma di e hori ensrefi aparti, sa suku en eigi wini nomo” (Odo 18:1). Fu dati ede, na artikel ben gi a rai disi: „Yu no musu tapu fu abi demakandra nanga trawan.” * A sisa e fruteri: „Furu brada nanga sisa taigi mi taki den ben e begi gi mi; trawan ben bel mi. Tu owruman ben bel doronomo fu aksi fa a ben go nanga mi. Mi ben kisi bromki èn sma ben seni karta gi mi fu taki mi odi. Sonwan ben bori nyanyan srefi. Boiti dati, furu fu den ben teki a ten fu tyari mi go na datra.”

15-17. (a) San wán Kresten du di a kisi mankeri? (b) Fa den sma na ini a gemeente ben yepi en?

¹⁵ Na ini Nyun Meksikow, Amerkankondre, wan sisa di e dini Yehovah wan langa pisi ten kaba, ben kisi mankeri tu leisi nanga oto. Sowan 25 yari kaba, a ben abi a siki di den e kari artritis. Fu di a ben kisi mankeri na en neki èn na den skowru fu en, meki a kon moro siki. A e taki: „Mi ben musu du furu muiti fu opo mi ede èn fu syow sani di ben wegi moro leki tu kilo. Ma mi ben e taki furu nanga Yehovah èn dati yepi mi trutru. Den artikel na ini A Waktitoren di wi studeri kaba, yepi mi bun furu tu. Wan fu den artikel ben taki fu Mika 6:8. Na artikel ben sori taki a waka di wi e waka bescheiden nanga Gado, wani taki dati wi musu hori na prakseri taki wi no man du ala sani. Disi yepi mi fu frustan taki aladi mi siki, mi no musu lasi-ati, awinsi mi no ben preiki so furu moro leki fa mi ben wani. Mi musu dini Gado nanga a yoisti denki. Dati na a moro prenspari sani.”

¹⁶ A sisa e fruteri tu: „Den owruman ben prèise mi ala ten fu a muiti di mi ben meki fu go na den konmakandra èn fu go na ini a preikiwroko. Yongusma ben kon brasa mi. Den pionier ben abi pasensi nanga mi srefisrefi, èn nofotron den ben seti sani tra fasi te mi ben siki tumusi fu go na ini preikiwroko. Te a weer no ben moi, dan den ben tyari mi go na den gobaka noso den bijbelstudie fu den. Fu di mi no ben man syow wan tas nanga buku, meki tra preikiman ben poti den buku fu mi na ini den tas fu den te mi ben go na ini a preikiwroko.”

¹⁷ Luku fa gemeente owruman nanga tra Kotoigi ben yepi den tu sisa disi fu horidoro awinsi den ben siki so. Den gi den sisa disi yepi na yeye fasi, den yepi den sisa fu du sani di densrefi no ben man du, èn den gi den deki-ati. Disi no e naki yu ati fu yepi tra brada nanga sisa di abi problema? Yonguwan, unu srefi kan yepi den wan na ini un gemeente, di musu feti nanga problema di de leki maka na ini den skin.—Odo 20:29.

18. Fa den ondrofenitori na ini A Waktitoren nanga Ontwaakt! kan gi wi deki-ati?

¹⁸ A Waktitoren nanga Ontwaakt! fruteri  someni ondrofenitori fu Kotoigi di kakafutu, èn di e tan kakafutu, gi problema fu a libi. Te yu e leisi den artikel disi ala ten, dan yu o si taki den brada nanga sisa fu yu na heri grontapu horidoro di den ben kisi fu du nanga problema na ekonomia sei, di den lasi wan lobiwan na ini wan rampu èn di feti ben de. Trawan abi siki di e meki den kon swaki, so taki den no man du furu moro. Furu fu den no man du den aladei sani di gosontu sma man du. A siki fu den na wan hebi tesi gi den, spesrutu te den no man teki so furu prati moro na Kresten wroko. Den trutru e warderi a yepi di yongu nanga owru brada nanga sisa e gi den!

Wi sa de koloku te wi e horidoro

19. Fu san ede Paulus ben man prisiri awinsi tesi nanga swakifasi ben trobi en doronomo?

¹⁹ Paulus ben breiti di a si fa Gado ben gi en krakti. A ben taki: „A moro betre fu meki bigi nanga den swakifasi fu mi, so taki a krakti fu a Krestes kan de leki wan tenti na mi tapu. Fu dati ede mi e prisiri nanga swakifasi, kosikosi, nowtu, frufolgu nanga problema, fu Krestes ede. Bika te mi swaki, dan mi tranga” (2 Korentesma 12:9, 10). Fu di Paulus srefi ben ondrofeni furu sani na ini a libi, meki a ben kan taki nanga overtoigi: „Mi no e taki dati mi e mankeri sani, bika mi leri, na ini awansi sortu situwâsi mi de, fu de tevrede nanga san mi abi. Fu tru mi sabi san a wani taki fu no abi furu sani, fu tru mi sabi san a wani taki fu abi sani pasa marki. Na ini ala situwâsi mi leri a kibritori fu ala tu: fu nyan te a sari mi èn fu abi angri, fu abi sani pasa marki èn fu mankeri sani. Gi ala sani mi abi a tranga fu en di e gi mi krakti.”—Filipisma 4:11-13.

20, 21. (a) Fu san ede wi sa de koloku te wi e denki dipi fu „den sani di wi no kan si”? (b) San na wan tu „sani di wi no kan si” di yu wani si na ini a Paradijs na grontapu?

²⁰ Sobun, awinsi sortu problema wi abi di de leki wan maka na ini wi skin, toku wi kan de koloku te wi e horidoro. Wi kan sori ala sma taki a krakti fu Yehovah e kon volmaakti na ini a swakifasi fu wi. Paulus ben skrifi: „Wi no e tapu . . . Fu tru a sma di wi de na inisei e kon nyun baka, ibri dei. Bika aladi a banawtu de gi wan syatu pisi ten nomo èn lekti, toku a e tyari gi wi wan glori di moro bigi srefisrefi èn e tan fu têgo, aladi wi e tan hori wi ai . . . na tapu den sani di wi no kan si. Bika den sani . . . di wi no kan si, de fu têgo.”—2 Korentesma 4:16-18.

²¹ Furu fu Yehovah en pipel na ini a ten disi e howpu fu libi na ini a Paradijs fu en na grontapu, èn fu prisiri fu den blesi di a pramisi den. Den blesi disi na sani di wi „no kan si” na ini a ten disi. Ma a ten e doro esi-esi te wi sa si den blesi dati nanga wi eigi ai. Iya, wi sa prisiri fu den fu têgo. Wán fu den blesi dati na taki noiti moro wi sa abi problema di de leki wan maka na ini wi skin! A Manpikin fu Gado sa „broko den wroko fu Didibri” èn a sa „tyari a wan di abi den wrokosani fu tyari dede kon, kon tron noti”.—1 Yohanes 3:8; Hebrewsma 2:14.

22. Sortu frutrow wi musu abi? San musu de wi fasti bosroiti?

²² Sobun, awinsi sortu maka e hati wi nownowde, meki wi horidoro. Neleki Paulus, wi sa abi a krakti fu du dati nanga yepi fu Yehovah, di e gi wi furu krakti. Te wi sa libi na ini a Paradijs na grontapu, dan wi sa blesi Yehovah wi Gado ibri dei gi ala den moi sani di a e du gi wi.—Psalm 103:2.

[Futuwortu]

San yu ben sa piki?

• Fu san ede Didibri e pruberi fu broko a soifri retifasi fu tru Kresten èn fa a e du dati?

• Fa a krakti fu Yehovah „e kon volmaakti na ini swakifasi”?

• Fa owruman nanga tra sma kan gi deki-ati na den sma di abi problema?

[Aksi fu a tori disi]

[Prenki na tapu bladzijde 18]

Paulus ben begi Gado dri leisi fu a puru a maka na ini en skin