Den Skitsma—Wan Dangra Fositen Pipel

DEN ben de wan pipel di ben e froisi fu a wan tanpresi go na a trawan. Den ben e rèi so srefi na tapu asi na tapu a drei gron, ala di den sadritas fu den ben span nanga den gudu di den ben fufuru fu tra pipel. Fu 700 te go miti 300 b.G.T. a dangra pipel disi ben de basi fu den opo presi na ini Europa nanga Asia. Ne wi no yere noti moro fu den. Ma den sorgu taki libisma no ben o frigiti den. Srefi Bijbel e taki wan sani fu den. Den sma disi ben de den Skitsma.

Hondrohondro yari langa, pipel di ben e froisi fu a wan tanpresi go na a trawan èn so srefi grupu fu werdri asi, ben e libi na tapu den bigi opo presi di e waka fu den Karpatenbergi na a owstusei fu Europa te go miti san de now a zuid-owstusei fu Rosiakondre. Den pipel disi froisi go tan na a westsei fu grontapu, baka di a legre fu a Sneisi Kèiser Hsuan opo go feti nanga den na a ten fu a di fu aiti yarihondro b.G.T. Na a ten di den Skitsma ben e froisi go tan moro fara na a westsei, dan den feti nanga den Simeriasma èn den dwengi den fu gowe libi a kontren dati. Den Simeriasma disi ben tiri a Kaukasus (a kontren na mindri a Blaka Se nanga a Kaspische Se) èn a kontren na a noordsei fu a Blaka Se.

Fu di den Skitsma ben e suku fu kon gudu, dan den broko go na ini Ninifei, a mamafoto fu Asiria, èn den pori a foto disi. Baka ten, den meki wan frubontu nanga Asiria fu feti teige Media, Babilon, nanga tra nâsi. Den go feti srefi nanga pipel di ben e libi na a noordsei fu Egipti. Taki a foto Bet-san di de na a noord-owstusei fu Israèl kisi a nen Scythopolis baka ten, kan de wan buweisi taki den Skitsma ben tiri a foto dati wan pisi ten.—1 Samuèl 31:11, 12.

Te fu kaba, den Skitsma go tan na ini den opo presi fu den kondre di now de Rumenia, Moldova, Ukraini, èn a zuidsei fu Rosiakondre. Drape den kon gudu fu di den ben e du bisnis nanga den Grikisma èn nanga gronman di ben prani siri-nyanyan. Den gronman disi ben de fu a disiten Ukraini èn fu a zuidsei fu Rosiakondre. Den Skitsma ben e gi den Grikisma siri-nyanyan, oni, metibuba, nanga libilibi meti, fu kisi win, krosi, fetisani, nanga koniwroko fu den. Na so fasi den ben kisi bun furu gudu.

 Den Ben De Koni Asi-tyariman

Gi den fetiman disi fu den opo presi, na asi ben de a srefi leki san a kameili ben de gi den sma di e tan na ini a drei sabana. Den Skitsma ben de koni asi-tyariman èn den ben de wan fu den fosi pipel di ben e rèi asi nanga wan sadri di ben abi so srefi linga fu sma poti den futu na ini. Den ben e nyan asi meti èn den ben e dringi a merki fu uma asi. Fu taki en leti, den ben e gebroiki asi leki bron-ofrandi. Te wan fetiman fu den Skitsma ben dede, dan den ben kiri na asi fu en, èn den ben beri en na wan lespeki fasi. Den ben beri na asi disi nanga ala den wrokosani nanga tra moi sani di den ben weri na en skin.

Soleki fa na historia skrifiman Herodotus ben sori, dan den Skitsma ben abi ogri-ati gwenti. Wan tu fu den gwenti disi ben de taki den ben gebroiki den edekrabasi fu den feanti fu den di den ben kiri, leki kan fu dringi na ini. Te den ben go feti nanga den feanti fu den, dan den ben kiri den nanga isri feti-owru, feti-aksi, lansri, nanga peiri di ben abi srapu penti di ben e priti a skin fu sma.

Grebi Di Ben Seti gi Têgo Ten

Den Skitsma ben du obiawroko nanga bonuwroko, èn den ben e anbegi faya èn wan mama gado (Deuteronomium 18:10-12). Den ben si a grebi leki wan tanpresi fu den dedewan. Den ben e srakti srafu nanga meti leki ofrandi so taki den ben kan go doro fu dini a masra fu den baka te a ben dede. Soleki fa sma e taki dan te edeman fu a pipel disi ben dede, dan sma ben beri den makandra nanga den dinari èn nanga den gudu fu den, so taki den ben kan gebroiki den na ini a „tra libi”. Na ini wan grebi fu wan kownu, sma feni feifi dinari di ben e didon na so wan fasi taki den futu ben e sori go na a masra fu den, neleki den ben de klariklari fu opo èn fu go doro nanga a wroko fu den.

Te den tiriman fu den Skitsma ben dede, dan den ben beri den nanga bun furu ofrandi èn te den Skitsma ben e low gi den, dan den ben e koti densrefi fu meki a brudu fu den lon èn den ben e koti den wiwiri puru. Herodotus ben skrifi: „Den ben e koti wan pisi puru fu den yesi fu den, den ben krebi den ede, den ben e kotikoti lontu den anu fu den, den ben e priti a fesi-ede nanga a noso fu den opo, èn den ben e boro a kruktu-anu fu den nanga peiri.” Kontrari fu dati, a Wet di Gado ben gi den Israèlsma fu a srefi pisi ten dati, ben komanderi: „Unu no musu koti un eigi skin gi wan dede sili.”—Lefitikus 19:28.

Den Skitsma libi dusundusun kurgan (grebi) na baka. Den grebi disi, ben meki leki pikin bergi. Furu sani di sma feni na ini den kurgans e fruteri wan sani fu na aladei libi fu den Skitsma. A Tsaar fu Rosiakondre Peter de Grote, bigin tyari den sani disi kon makandra na ini 1715, èn den brenkibrenki sani disi de fu si now na ini den museum na Rosiakondre èn na Ukraini. Wan tu fu den „koniwroko disi di sma meki fu meti” na asi, difrenti sortu aka, pusi-pusi, tigri, difrenti sortu dia, stonpopki fu fowru nanga lew (mekisani fu den anansitori fu den di son leisi abi a skin fu wan fowru noso wan tra meti èn na ede fu wan heri tra sortu meti).

Den Skitsma Nanga Bijbel

Bijbel e taki wán leisi nomo fu den Skitsma. Na Kolosesma 3:11, wi e leisi: „Grikisma noso Dyu no de, pe besnijdenis de noso a no de, wan trakondre-sma, wan Skitsma, wan srafu, noso wan sma di fri, ma Krestes na ala sani èn a de na ini ala sma.” Di a Kresten apostel Paulus ben skrifi den wortu dati, dan a Griki wortu di vertaal leki „Skitsma”, no ben wani taki wan spesrutu nâsi, ma a ben wani taki den moro ogri-ati pipel di no e libi akruderi wet nanga gronprakseri. Paulus ben e sori krin taki nanga yepi fu Yehovah en santa yeye, noso en wrokokrakti, srefi den sortu sma dati ben kan kweki den eigifasi fu Gado.—Kolosesma 3:9, 10.

Wan tu sabiman fu owruten sani e bribi taki a  nen Askenas di skrifi na Yeremia 51:27 wani taki a srefi leki na Asiria wortu Ashguzai, wan wortu di sma ben gebroiki te den ben taki fu den Skitsma. Skrifiplanga di sma ben skrifi nanga spikri-skrifimarki na tapu, e fruteri fu wan frubontu di den sma disi ben meki nanga den Mannaisma, fu feti teige Asiria na ini a di fu seibi yarihondro b.G.T. Syatu bifo Yeremia bigin taki profeititori, den Skitsma ben pasa a kondre fu Yuda te den ben e go èn te den ben e drai baka fu Egipti, sondro taki den ben du den Israèlsma ogri. Fu dati ede, furu fu den sma di ben yere fa Yeremia ben taki na fesi taki wan pipel ben o broko kon fu feti nanga Yuda, kande ben tweifri na a profeititori fu en.—Yeremia 1:13-15.

Wan tu sabiman feni taki Yeremia 50:42 e sori go na den Skitsma fu di a vers disi e taki: „Bow nanga lansri den e gebroiki. Den abi ogri-ati èn den no sa sori sari-ati. A babari fu den de leki a se di bruya, èn na tapu asi den sa rei; leki wán man, èn den de klariklari fu opo kon fu feti nanga yu, o umapikin fu Babilon.” Ma a vers disi abi fu du spesrutu nanga den Mediasma èn nanga den Persiasma, di ben teki Babilon abra na ini 539 b.G.T.

Sma taki dati „a kondre fu Magog” di Esekièl kapitel 38 nanga 39 e taki fu en, e sori go na den lo fu den Skitsma. Ma „a kondre fu Magog” no de wan trutru kondre, a wani taki wan tra sani. A krin fu si taki a e sori go na a kontren fu grontapu, pe Gado ben fringi Satan makandra nanga den engel fu en baka na orloku na ini hemel.—Openbaring 12:7-17.

Den Skitsma ben abi fu du nanga a kontru fu a profeititori fu Nahum di ben taki na fesi taki tra pipel ben o teki Ninifei abra (Nahum 1:1, 14). Den Kaldewsma, den Skitsma, nanga den Mediasma teki Ninifei abra na ini 632 b.G.T., èn dati meki taki a Gran Kownukondre Asiria fadon.

Wan Pori Di Kon na wan Fasi Di E Dangra Sma

A tru taki den Skitsma no de moro, ma fa dati du kon? „We, wi no sabi san pasa”, na so wan prenspari Ukraini sabiman fu owruten sani e taki. Wan tu sabiman nanga historia skrifiman e bribi taki den Skitsma ben kon swaki leki fetiman, fu di den ben kon gudu. Leki bakapisi fu dati, na ini a fosi èn a di fu tu yarihondro b.G.T., den brokokindi gi wan nyun grupu fu sma fu Asia di ben e froisi go fu a wan tanpresi go na wan trawan. Den sma dati ben de den Sarmatiasma.

Tra sabiman nanga historiaman e bribi taki a strei di ben de na mindri den lo fu den Skitsma srefi, meki taki den ben go na baka krinkrin. Tra sma de tu di e taki dati wan fikapisi fu den Skitsma kande de fu feni na mindri den Osetiasma di e libi na ini a kontren fu a Kaukasus. Awansi fa a no fa, a dangra fositen pipel disi sorgu taki libisma no sa frigiti den. Na fu den ede meki sma e gebroiki a nen Skitsma leki wan tra wortu gi ogri-atifasi.

[Karta tapu bladzijde 24]

(Efu yu wani si pe den sani disi skrifi, luku a tijdschrift)

□ Wan Owruten Foto

• Wan Foto fu a Ten Disi

Donau

SKITIA ← A PASI DI DEN BEN TEKI FU FROISI

• Kiev

Dnipro

Dnister

Blaka Se

OSSETIA

Kaukasusbergi

Kaspische Se

ASIRIA ← DEN PASI DI DEN BEN TEKI FU GO FETI

□ Ninifei

Tigris

MEDIA ← DEN PASI DI DEN BEN TEKI FU GO FETI

MESOPOTAMIA

BABILONIA ← DEN PASI DI DEN BEN TEKI FU GO FETI

□ Babilon

Eufraat

GRAN KOWNUKONDRE PERSIA

□ Susa

Persische Golf

PALESTINA

• Bet-san (Scythopolis)

EGIPTI ← DEN PASI DI DEN BEN TEKI FU GO FETI

Nijl

Mindrikondre Se

GRIKIKONDRE

[Prenki na tapu bladzijde 25]

Den Skitsma ben de wan pipel di ben lobi fu feti

[Sma di abi a reti fu a prenki]

A State Hermitage Museum, St. Petersburg

[Prenki na tapu bladzijde 26]

Den Skitsma ben gi den Grikisma sani di den ben abi fu kisi moi Griki koniwroko fu den, èn den kon gudu srefisrefi leki bakapisi fu dati

[Sma di abi a reti fu a prenki]

Nanga primisi fu na Ukraine Historic Treasures Museum, Kiev