„Wan Sani Di Sa Tyari Takru Bakapisi Kon te fu Kaba”

WAN ondrosuku di du no so langa ete, tyari kon na krin taki pikinmoro 200.000 sma na ini Amerkankondre, go luku seks tori tapu Internet. Na ondrosuku disi ben du fu kon sabi omeni sma e go tapu Internet fu luku den tori disi. Now ipi-ipi sma e go tapu Internet fu plisi den seks firi fu den. Datra Al Cooper, a psycholoog (wan datra di e ondrosuku fu san ede sma e handri na wan spesrutu fasi) di ben du na ondrosuku disi, e taki: „A sani disi sa tyari takru bakapisi kon te fu kaba, èn a e kon moro takru fu di wan tu sma nomo e si a sani disi leki wan kefar noso leki wan seryusu sani.”

Suma na spesrutu den sma di sa go moro esi tapu Internet fu luku den sortu seks tori disi? „Dati na den sma di kande den heri libi langa no kisi no wan enkri okasi noso den no kisi furu okasi fu plisi den seks firi fu den”, ma „wantronso den e kisi bun furu okasi fu du dati” tapu Internet, na so Datra Cooper e taki.

Ma furu fu den sma dati di abi a gwenti fu go luku seks tori tapu Internet, e feni taki a sani disi no e du ogri. A sani disi tru? Neleki fa wan sma di no man tapu nanga drugs, te fu kaba no sa abi trobi fu gebroiki moro nanga moro fu a drugs disi, na a srefi fasi furu sma di e tan luku seks tori tapu Internet e suku moro „okasi” drape fu plisi den seks firi fu den. A kefar de srefi, taki den kan lasi den wroko èn so srefi a matifasi di den abi nanga a patna fu den!

Ma den sma di wani gi yesi na Gado abi wan moro prenspari reide fu no go tapu Internet fu luku seks tori. A Wortu fu Gado e gi leki rai: „Kiri, fu dati ede, den memre fu un skin di de na grontapu, ini a tori fu hurudu, libi di no krin, seks lostu, ogri lostu, nanga bigi-ai, di de a dini fu kruktu gado. Na fu den sani disi ede, na atibron fu Gado e kon” (Kolosesma 3:5, 6). Te wan sma wani ’kiri den memre fu en skin’ di abi fu du nanga doti seks lostu, dan a musu kweki wan tranga lobi gi Yehovah Gado (Psalm 97:10). Efu a sma dati e si taki a lobi luku seks tori tapu Internet, wan sani di de sa tyari takru bakapisi kon gi en, dan a musu tranga a lobi di a abi gi Yehovah, fu di a e studeri a Wortu fu Gado, a Bijbel. Te wan sma abi bun demakandra nanga Yehovah Kotoigi na a Kownukondre zaal na ini a birti pe a e tan, dan dati kan yepi en furu kaba fu teki wan moro fasti bosroiti fu du a wani fu Gado.