Den Kerki Tata—Den Ben Horibaka gi Bijbel Waarheid?

Awinsi yu e taki dati yu na wan Kresten noso awinsi yu e taki dati yu no de dati, toku den ben abi krakti kande na tapu a fasi fa yu e si a Gado fu Bijbel, fa yu e si Yesus, èn fa yu e si Krestenhèit. Sma ben kari wán fu den Golden-Mouthed (Gowtu Mofo); wan trawan den ben kari Great (Bigiwan). Sma ben taki fu den alamala, taki den ben de wan grupu sma „di ben sori na a moro bun fasi fa a libi fu Krestes ben de trutru”. Suma na den sma disi? Den na den sma fu fositen di ben denki fu kerki sani èn di ben skrifi buku di abi fu du nanga kerki tori. Den na sabiman fu kerki tori èn den na filosofiaman tu. Den sma disi ben abi krakti na tapu a fasi fa den sokari „Kresten” na ini a ten disi e denki. Den na den Kerki Tata.

„YU NO o feni ala den Wortu fu Gado na ini Bijbel”, na so Demetrios J. Constantelos, wan Griki Orthodox professor di e studeri kerki tori, e taki. „A Santa Yeye di e meki sma kon sabi a wortu fu Gado, no kan de fu feni na ini wan buku wawan.” Ma na sortu tra presi wi ben kan feni den prakseri di e kon fu Gado èn di wi kan frutrow? Constantelos e fruklari na ini en buku Understanding the Greek Orthodox Church (Kon Frustan a Griki Orthodox Kerki): „Sma e si den Santa Gwenti nanga den Santa Buku fu Bijbel leki tu difrenti sani di Gado e gebroiki fu meki sma kon sabi den prakseri fu en.”

A fondamenti fu den „Santa Gwenti” na den leri nanga den sani di den Kerki Tata ben skrifi. Den ben de prenspari sabiman fu kerki tori èn den ben de „Kresten” filosofiaman tu, di ben libi na mindri a di fu tu nanga a di fu feifi yarihondro G.T. O furu krakti den ben abi na tapu a denki fu den „Kresten” na ini a ten disi? Den ben hori densrefi na Bijbel te den ben e gi leri? Te wan sma wani de wan bakaman fu Yesus Krestes, dan sortu steifi fondamenti fu Kresten waarheid a musu abi?

A Historia fu den Kerki Tata

Di afu fu a di fu tu yarihondro ben pasa kaba, den sokari Kresten ben opo taki gi a bribi fu den fu di den Romesma ben frufolgu den. Den ben opo taki tu gi a bribi fu den fu di den ’ketter’, dati na sma di no ben e agri kwetikweti nanga a kerki leri, ben e haritaki nanga den. Ma disi ben de wan pisi ten pe sma ben abi tumusi furu fasi fu denki fu kerki tori. Sma ben haritaki fu kerki tori soleki a de di Yesus ben de „Gado” efu no. Den ben haritaki tu fu san a santa yeye de trutru noso fu a fasi fa santa yeye e wroko. Disi ben meki pratifasi kon na mindri den sabiman. Boiti dati, den sabiman no ben agri nanga makandra srefisrefi fu „Kresten” kerki leri. Disi tyari seryusu pratifasi kon, èn a ben panya go te na ini a politiek nanga a kulturu. Sontron dati ben abi leki bakapisi taki sma ben meki opruru, den ben opo densrefi teige tirimakti, borgu feti èn so srefi orloku ben kon fu disi. Historia skrifiman Paul Johnson e skrifi: „A Krestendom [di fadon komoto na bribi] ben bigin nanga bruya, strei, èn nanga pratifasi, èn na so a ben go doro. . . . Na ini a fosi nanga a di fu tu yarihondro A.D., dan  sma ben abi someni kerki idea na ini a kontren na a mindrisei pisi nanga na a owstusei pisi fu a Mindrikondre Se. Sma ben du furu muiti fu panya ala den idea disi. . . . Fu sensi a bigin, dan yu ben kisi furu difrenti fasi fu Krestendom di no ben gersi makandra srefisrefi.”

Na ini a pisi ten dati, skrifiman nanga sma di ben denki fu kerki tori ben feni taki a ben de fanowdu fu gebroiki filosofia wortu fu man frustan den „Kresten” leri. A denki disi ben panya esi-esi. Den skrifiman fu kerki tori ben frutrow srefisrefi tapu Griki nanga Dyu buku di ben skrifi wan langa pisi ten kaba. Den ben du disi so taki den ben kan satisferi den heiden di ben kisi bun leri èn di ben kenki a bribi fu den go na „Krestendom”. A ben bigin nanga Justinus Martyr (di ben libi na ini a pisi ten fu 100-165 G.T.) di ben skrifi buku na ini Grikitongo. Moro fara, sma di ben taki dati den na Kresten, moro nanga moro ben teki den filosofia tori abra di den ben kisi fu a Griki kulturu.

Wan prenspari sani di ben pasa leki bakapisi fu dati, de fu si na ini den sani di Origenes ben skrifi (a ben libi na ini a pisi ten fu 185-254 G.T.). Origenes ben de wan Griki skrifiman di ben libi na Aleksandria. Nanga na artikel di nen On First Principles, dan na wan bun fasi Origenes ben pruberi fu fruklari fu a fosi leisi, den moro prenspari leri fu a „Kresten” kerki. A ben gebroiki Griki filosofia fu du dati. A Kerki Konmakandra fu Nicea (325 G.T.) ben pruberi fu fruklari èn buweisi taki Krestes ben de „Gado”. Disi ben de a heimarki di ben gi sma deki-ati fu fruklari den „Kresten” kerki leri. Nanga a konmakandra dati wan pisi ten ben bigin pe, na den sortu kerki konmakandra disi, sma ben suku fu fruklari a kerki leri moro fini srefi.

Skrifiman Nanga Sma Di Ben Taki na Publiki

Eusebius fu Caesarea, di ben skrifi buku na a ten fu a fosi Kerki Konmakandra fu Nicea, ben abi demakandra nanga Kèiser Konstantijn. Na ini wan pisi ten fu pikinmoro 100 yari baka a Kerki Konmakandra fu Nicea, dan sabiman fu kerki tori di moro furu fu den ben skrifi buku na ini Grikitongo, ben meki wan kerki leri di ben o tron a moro prenspari leri fu Krestendom, a Dri-wánfasi. Den ben kon na a bosroiti disi baka wan seryusu haritaki di ben e go nanga langa. Den moro prenspari sabiman na den mindri ben de Athanasius, a beskopu fu Aleksandria di ben lobi haritaki fu sani, nanga dri kerki fesiman fu Kapadosia, Pikin Asia—Basilius a Bigiwan, en brada Gregorius fu Nyssa, nanga a mati fu den di ben nen Gregorius fu Nasianse.

Sma di ben skrifi buku èn so srefi preikiman na ini a pisi ten dati, ben kon sabi fa fu taki na wan heri bun fasi na publiki. Gregorius fu Nasianse nanga John Chrysostomus (san wani taki „Gowtu Mofo”) ben skrifi buku na ini Grikitongo. Ambrosius fu Milan nanga Augustinus fu Hipo ben skrifi buku na ini Latijn. Ma den man disi ben sabi moro bun leki furu tra sma, fa fu taki na publiki. Na ini a ten fu den, dati ben de wan pôpi sani di sma ben du. We, den man disi ben man taki na publiki, na wan moro bun fasi leki ala tra sma. A moro prenspari skrifiman na ini a pisi ten dati ben de Augustinus. Den buku di a ben skrifi fu kerki tori ben meki „Kresten” na ini a ten disi denki soleki fa en ben denki. Hièronimus ben de a moro koni sabiman na ini a pisi ten dati. Na en ben de a sma di ben teki a frantwortu moro furu fu vertaal den Buku fu Bijbel fu den fosi tongo di a Bijbel ben skrifi na ini, go na ini Latijn. Sma ben kari a vertaling dati a Vulgaat.

Ma toku wan tu prenspari aksi de: Den Kerki Tata dati ben hori densrefi soifri na san skrifi na ini Bijbel? Te den ben e gi sma leri, dan den ben hori fasti na den Buku fu Bijbel di skrifi nanga yepi fu a santa yeye fu Gado? Den sani di den ben skrifi kan gi wan sma bun tirilin so taki a kan kisi soifri sabi fu Gado?

 Leri fu Gado Noso Leri fu Libisma?

No so langa pasa, a prenspari Griki Orthodox priester Metodius fu Pisidia, ben skrifi a buku di nen The Hellenic Pedestal of Christianity. A ben wani sori taki a Griki kulturu nanga a Griki filosofia ben de a fondamenti fu a nyun „Kresten” denki. Na ini a buku dati a e taki sondro fu degedege: „Pikinmoro ala den prenspari Kerki Tata ben si den Griki denki leki sani di den ben kan gebroiki heri bun. Den ben teki dati abra fu na owruten Griki kulturu nanga filosofia, èn den ben gebroiki den fu man frustan èn fu fruklari den Kresten waarheid na wan bun fasi.”

Luku fu eksempre, a leri taki a Tata, a Manpikin, nanga a santa yeye na wan Dri-wánfasi. Na baka a Kerki Konmakandra fu Nicea, furu Kerki Tata ben tron sma di ben hori tranga na a leri fu a Dri-wánfasi. Den buku di den ben skrifi nanga den tori di den ben fruklari finifini, ben de prenspari fu meki a Dri-wánfasi tron a moro prenspari kerki leri fu Krestendom. Ma wi kan feni a leri fu a Dri-wánfasi na ini Bijbel? Nôno. So bun, pe den Kerki Tata komopo nanga a leri dati? A Dictionary of Religious Knowledge e fruklari dati furu sma e taki, dati a Dri-wánfasi „na wan falsi leri di sma ben teki abra fu den sani di den heiden ben bribi èn den ben moksi en nanga a Kresten bribi”. Èn a buku The Paganism in Our Christianity e horibaka gi disi fu di a e taki: „A leri fu a [Dri-wánfasi] e kon krinkrin fu den heiden.” *—Yohanes 3:16; 14:28.

Noso luku a leri fu a sili di no man dede. Sma e bribi taki wan pisi fu wan libisma e libi go doro baka te a skin fu a sma no de moro. Agen, den Kerki Tata ben de den sma di ben tyari na idea disi kon na ini wan kerki di no ben abi a leri srefi fu wan sili di ben libi go doro baka te a sma dede. Bijbel e sori krin taki a sili kan dede: „A sili di e sondu, ensrefi sa dede” (Esekièl 18:4). San meki taki den Kerki Tata bigin bribi na ini wan sili di no man dede? „A Kresten denki fu wan yeye sili di Gado ben meki èn  di a ben poti na ini a skin te wan uma e kisi bere, so taki wan libisma ben kan abi wan skin nanga wan yeye, na a bakapisi fu wan denki di sma ben kisi safrisafri èn di ben go nanga langa na ini a Kresten filosofia. Origenes na Owstusei èn St. Augustinus na Westsei, ben de den sma di ben sorgu taki a leri disi, dati a sili na wan yeye sani, ben tron wan denki di furu sma ben teki leki kerki leri. A fasi fa den ben denki fu a sili ben de akruderi filosofia. . . . [A kerki leri fu Augustinus] . . . ben teki furu sani abra (èn so srefi son tra sani di no ben bun) fu a Neoplatonisme”, na so a New Catholic Encyclopedia e taki. Èn a tijdschrift Presbyterian Life e taki: „A dede di a sili no man dede na wan denki di ben kon fu den Grikisma èn di ben komopo fu owruten kerki gwenti, èn a filosofiaman Plato ben fruklari en moro fini.” *

A Tranga Fondamenti fu a Kresten Waarheid

Ala di wi ben luku syatu fu pe den Kerki Tata komopo, èn so srefi fu pe den leri fu den komopo, toku a bun fu poti na aksi disi: Wan opregti Kresten musu teki den leri fu den Kerki Tata leki fundamenti fu a bribi fu en? Meki Bijbel gi a piki.

Na a fosi presi a de so, taki Yesus Krestes srefi ben taki dati wi no musu gebroiki a kerki nen „Tata”. A ben taki: „Unu no musu kari no wan suma na grontapu un tata, bika unu abi wán Tata nomo, di de na hemel” (Mateus 23:9). Sma e gebroiki a nen „Tata” fu sori go na iniwan fesiman fu wan kerki. Disi na wan sani di Kresten no musu du èn dati no de fu feni na ini Bijbel tu. A Wortu fu Gado ben kaba skrifi na ini wan sani fu 98 G.T., nanga den buku fu na apostel Yohanes. So bun, tru Kresten no abi fu luku go na no wan libisma fu kon sabi den boskopu di e kon fu Gado. Den e luku bun taki den no e ’meki a wortu fu Gado lasi en krakti’ fu di den e hori densrefi na libisma gwenti. Efu wan sma e meki libisma gwenti kon ini a presi fu a Wortu fu Gado, dan a bakapisi sa de taki a sa dede na yeye fasi. Yesus ben warskow wi: „Efu . . . wan breniman e tyari wan breniman, dan den ala tu sa fadon go na ini wan olo.”—Mateus 15:6, 14.

Wan Kresten abi iniwan tra boskopu fanowdu boiti a wortu fu Gado, soleki fa dati de fu feni na ini Bijbel? Nôno. A buku Openbaring e warskow taki wi no musu poti iniwan tra sani na a tori di Gado meki sma skrifi nanga yepi fu en santa yeye: „Efu iniwan sma e poti moro na tapu den sani disi, dan Gado sa poti den pestsiki di skrifi na ini a bukulolo disi, na en tapu.”—Openbaring 22:18.

Na ini Bijbel, a Wortu fu Gado di a meki sma skrifi, wi e feni a Kresten waarheid (Yohanes 17:17; 2 Timoteus 3:16; 2 Yohanes 1-4). Wi no abi grontapu filosofia fanowdu fu frustan en krinkrin. Wan tu mansma ben pruberi fu gebroiki a sabi fu libisma fu fruklari boskopu di ben kon fu Gado. Ini a tori disi, a e fiti fu taki ete wan tron san na apostel Paulus ben aksi: „Pe a koniman de? Pe a leriman fu Wet de? Pe a sma fu a seti fu sani disi de, di e strei nanga wortu? A no Gado ben meki a koni fu grontapu de wan don sani?”—1 Korentesma 1:20.

Moro fara, a tru Kresten gemeente na „wan pilari nanga wan fondamenti fu a waarheid” (1 Timoteus 3:15). Den opziener fu a gemeente e luku bun taki a leri di den e gi na ini a gemeente, e tan soifri. Na so fasi den e sorgu taki no wan falsi kerki leri no e kon safrisafri na ini a gemeente fu pori a gemeente (2 Timoteus 2:15-18, 25). Den e luku bun taki ’falsi profeiti, falsi leriman, nanga sekte di e pori sma’ no e kon na ini a gemeente (2 Petrus 2:1). Baka di den apostel dede, dan den Kerki Tata ben gi pasi meki „wortu nanga leri di e kori sma èn di e kon fu ogri yeye”, teki rutu na ini a Kresten gemeente.—1 Timoteus 4:1.

Na ini a ten disi, wi kan si den bakapisi fu a fadon di sma fadon komoto na bribi na ini Krestendom. Den sani di den e bribi nanga den sani di den e du, de heri tra fasi leki a Bijbel waarheid.

[Futuwortu]

 [Faki/Prenki na tapu bladzijde 18]

DEN TATA FU KAPADOSIA

„Na Orthodox Kerki . . . e gi spesrutu grani na den skrifiman fu a di fu fo yarihondro. Den e gi spesrutu grani tu na den wan di den e kari ’den dri Bigi Kerki Fesiman’, èn den na Gregorius fu Nasianse, Basilius a Bigiwan, nanga John Chrysostomus”, na so Kallistos e taki, di de wan skrifiman nanga wan moniki. Den sani di den Kerki Tata disi ben leri sma, ben kon fu den Santa Buku fu Bijbel? A buku The Fathers of the Greek Church e taki fu Basilius a Bigiwan: „Den sani di a ben skrifi e sori taki, en heri libi langa, a ben de bun mati nanga Plato, Homerus, den historia skrifiman nanga den sma di ben sabi heri bun fa fu taki na publiki. Den sma disi trutru ben abi krakti tapu a fasi fa a ben skrifi buku. . . . Basilius ben tan de wan ’Grikisma’. ” Sma kan taki a srefi sani fu Gregorius fu Nasianse. „Soleki fa en ben si sani, dan a Kerki ben kan sori sma taki a ben wini èn taki a ben hei moro ala tra bribi. A moro bun fasi fa a Kerki ben kan sori dati, ben o de efu den ben o teki ala den sani ini a tori fu kulturu abra di moro furu sma ben gwenti du kaba.”

Professor Panagiotis K. Christou e skrifi fu ala den dri man disi: „Sontron, den man disi e warskow gi ’filosofia nanga bedrigifasi di de wan soso sani’ [Kolosesma 2:8]. Den e du dati so taki den kan handri akruderi a komando di gi na ini a Nyun Testamenti. Ma ala di den e du dati, toku na a srefi ten densrefi e studeri filosofia nanga prenspari tirilin di e sori fa wan sma musu tyari ensrefi. Den ben gi tra sma rai srefi fu studeri den sani dati tu.” A de krin fu si, taki den kerki leriman dati ben denki taki Bijbel no ben de nofo fu horibaka gi den idea fu den. A suku di den ben suku tra sani fu horibaka gi den idea fu den, ben wani taki dan dati den leri fu den kwetikweti no ben abi noti fu du nanga Bijbel? Na apostel Paulus ben warskow den Hebrew Kresten: „No meki sma hari unu nanga ala sortu freimde leri.”—Hebrewsma 13:9.

[Sma di abi a reti fu a prenki]

© Archivo Iconografico, S.A./CORBIS

[Faki/Prenki na tapu bladzijde 20]

CYRILLUS FU ALEKSANDRIA—WAN KERKI TATA DI TYARI FURU STREI KON

Wan fu den Kerki Tata di ben tyari furu strei kon ben de Cyrillus fu Aleksandria (a ben libi na ini wan pisi ten fu 375-444 G.T.). Hans von Campenhausen di e skrifi fu a historia fu kerki, e taki fu en leki wan sma „di ben hori ensrefi na kerki leri, di ben abi ogri-ati, èn di ben bedrigi tra sma. A prenspari wroko di a ben abi leki Kerki Tata, ben meki taki a kisi bigifasi.” A e taki moro fara: „Noiti a ben feni wan sani bun, boiti te a ben kan gebroiki dati fu meki a makti nanga krakti di a ben abi na sma tapu, kon moro bigi. . . . Noiti a ben firi sari fu na ogri-ati fasi fa a ben handri noso fu a krukafasi fu en”. Di Cyrillus ben de beskopu fu Aleksandria, a ben gi sma tyuku èn a ben taki ogri-ati lei fu pori sma nen, soso fu puru a beskopu fu Konstantinopel. Sma e taki dati Cyrillus abi a frantwortu fu a kiri di den ben kiri a barinen filosofiaman Hypatia na wan ogri-ati fasi na ini 415 G.T. Campenhausen e taki fu den sani di Cyrillus ben skrifi fu kerki tori: „Na en ben bigin nanga a gwenti fu lusu problema di ben abi fu du nanga a bribi, no wawan nanga yepi fu Bijbel, ma so srefi nanga yepi fu sani di barinen man ben skrifi èn ben taki fu a tori.”

[Prenki na tapu bladzijde 19]

Hièronimus

[Sma di abi a reti fu a prenki]

Garo Nalbandian