Bun Nyunsu fu Vrede E Doro den Heipresi fu Chiapas

„Wan grupu fu man nanga fetigon . . . , ben kiri 45 gronman di no ben abi noti fu yepi densrefi. Na mindri den gronman di den ben kiri, so srefi 13 yongu pikin ben de. Disi ben de a moro ogri-ati fasi fa wan grupu libisma ben kiri tra libisma na ini a presi Chiapas.” Na so a nyunsu koranti „El Universal” ben skrifi fu sani di ben pasa na ini Acteal, Distrikt Chiapas, tapu 22 december 1997.

CHIAPAS na wan distrikt na ini Meksikow di de te na zuidsei fu a kondre dati, èn di de na a lanki fu a kondre Gwatemala. Den Ingi di komoto fu den Maya na pôtisma èn den e pina bun langa kaba. Na ini yanuari 1994 wan grupu fu den Ingi disi, ben orga wan revo nanga fetisani, èn den ben kari densrefi na Ejército Zapatista de Liberación Nacional (EZLN, Zapatista Legre fu meki a Kondre kon Fri). A taki di den ben taki nanga makandra fu lusu a problema sondro taki wan feti ben o feti, no ben waka so bun. Fu di na opruru grupu èn so srefi den legre fu lanti ben opo fu feti nanga makandra drape, dati meki brudu ben lon èn sma ben lasi den libi. Na opruru disi ben meki taki furu fu den gronman ben lowe go na tra presi pe den kan feni kibri.

Na ini den bruya situwâsi disi, wan grupu fu sma de di lobi vrede, èn di no e teki sma partèi na ini den politiek feti. Fayafaya, den e poti a prakseri fu sma na Gado en Kownukondre leki a wan-enkri sani di kan lusu den problema fu libisma, na a presi drape èn so srefi na heri grontapu (Danièl 2:44). Suma na den sma disi? Yehovah Kotoigi. Fu di den e gi yesi na a komando fu Yesus, dati meki den e meki muiti fu tyari a bun nyunsu fu Gado Kownukondre go na den moro farawe kontren fu den heipresi fu Chiapas, pe a muilek gi trawan fu doro drape (Mateus 24:14). Fa a ben de fu preiki na ini den sortu situwâsi disi, èn san ben de a bakapisi?

„Mi Na wan fu den Kotoigi fu Yehovah”

Adolfo ben de wan yonkuman di ben tron wan Kownukondre preikiman no so langa pasa. Wan dei a ben wroko na wan radiostation na ini Ocosingo. Wantronso, sma ben naki bun tranga na tapu a doro. Wan grupu mansma di ben tapu den fesi, ben broko kon na inisei èn den poti den gon fu den na a ede fu Alfonso. Esi-esi den ben lon go na ini a kamra pe radio boskopu e seni go na dorosei. Den ben teki den wrokosani drape abra nanga tranga, èn den ben bariwroko na radio taki den ben opo feti nanga lanti.

Den man nanga den fetigon ben drai go na Adolfo baka, èn den ben komanderi en fu kon na ini a grupu fu den. „Mi na wan fu den Kotoigi fu Yehovah”, na so Adolfo ben piki den, ala di a no ben teki dopu ete. A ben taigi den taki a wan-enkri howpu gi vrede na Gado Kownukondre. Kwetikweti Adolfo no ben wani teki a srudati krosi nanga a gon di den ben langa gi en. Di den si a fasti bosroiti di Adolfo ben teki, dan den ben meki a gowe. Adolfo e memre a sani disi di ben pasa nanga en, èn a e taki: „A sani dati di ben pasa nanga mi, trutru ben tranga mi bribi.”

Te fu kaba a situwasi ben kon moro bun drape, ma srudati  ben luku a presi drape ete. Ala di dati pasa, toku Adolfo ben breiti fu teki a kari di den owruman fu wan gemeente drape ben gi en fu wroko nanga wan grupu fu Kresten di e libi na wan presi di muilek fu sma doro drape. Na den srudati postu, pe Adolfo ben musu waka pasa, den srudati ben lespeki en di a ben sori den taki en ben de wan Kotoigi fu Yehovah. Baka ten, Adolfo ben teki dopu èn a ben firi bun srefisrefi di a grupu dati pe a ben go fu gi yepi, ben tron wan gemeente fu Yehovah Kotoigi. „Now di mi dopu,” na so Adolfo e taki, „mi kan taki trutru taki mi na wan Kotoigi fu Yehovah!”

„Yehovah Ben Tranga Wi”

Syatu baka di na EZLN ben bariwroko na tapu radio taki den ben o feti nanga lanti, dan den sma di ben tan na ini a foto ben lowe. Francisco, wan furuten dinari, noso pionier, ben fruteri fa Yehovah ben tranga en nanga en wefi na ini den sani di ben miti den.

„Wi ben teki a bosroiti fu go kibri na wan presi di e teki so wan dri yuru fu waka. Wan gemeente ben drape, so bun wi ben o de nanga den brada nanga sisa. Heri esi a ten ben doro fu hori wi kring-konmakandra na Palenque. Mi nanga mi wefi no ben wani misi a spesrutu konmakandra nanga den pionier, ma wi ben kon sabi taki na EZLN ben tapu a pasi pe wi musu waka fu go na a kringkonmakandra. Wi ben bosroiti fu waka na busi, èn dati  ben teki neigi yuru langa fu waka. Wi ben doro biten gi a konmakandra nanga den pionier, èn wi ben nyan bun fu a konmakandra dati srefisrefi, èn so srefi fu a heri kring-konmakandra programa.

„Di wi ben drai kon baka na oso, dan wi ben kon si taki den ben bron na oso fu wi èn wi ben kon si taki fufuruman ben fufuru ala wi meti. A wan-enkri sani di ben tan abra na wan pikin saka nanga krosi. Wi ben sari srefisrefi taki wi ben lasi den sani disi, ma den brada na ini Ocosingo ben handri na wan switi fasi nanga wi èn den ben teki wi na ini den oso. Den brada ben sori wi tu fa wi musu wroko nanga sani di wi leki gronman noiti ben du ete. Wan brada ben leri mi fa mi kan meki fowtow, wan tra brada ben leri mi fa fu meki susu. Èn dati na a sani di ben yepi mi nanga mi wefi te leki now fu sorgu wisrefi, so taki wi ben man go doro nanga a pionierwroko. Te wi e prakseri baka san ben pasa nanga wi, dan wi kan si taki ala di a no ben makriki gi wi fu horidoro, toku Yehovah ben tranga wi.”

Froktu fu a Preikiwroko

Tranga ten nanga kefar no ben tapu den Kotoigi na ini Distrikt Chiapas fu no teki prati na a spesrutu wroko fu prati a bun nyunsu nanga sma na a presi drape. Fu gi wan eksempre, na ini april nanga mei fu a yari 1995, den ben span anu makandra nanga den tra kresten na heri grontapu na ini wan preikiwaka fu prati Kownukondre Nyunsu Nr. 34, nanga a nen di ben fiti srefisrefi drape Foe san ede a libi foeroe nanga someni problema?

Na ini a pisi ten fu a preikiwaka disi, dan — na wan presi di den e kari Pueblo Nuevo — wan gewoon pionier di abi leki nen Ciro, ben miti wan osofamiri di ben wani sabi moro. Baka dri dei, Ciro ben go baka na den èn ben bigin wan bijbelstudie nanga den. Ma di Ciro ben go baka nanga wan tra brada fu studeri go doro nanga na osofamiri, dan a masra no ben de na oso. Na presi fu dati, wan grupu man di ben tapu den fesi, ben wakti en fu du en ogri. Den ben aksi Ciro nanga a kompe fu en, san den ben suku drape èn den ben taigi den taki den ben o kiri den. Baka di Ciro nanga a brada ben begi Yehovah safrisafri, dan den tu Kresten ben tyari kon na krin na wan deki-ati fasi taki den ben kon fu leri na osofamiri san Bijbel e taki. Di Ciro nanga a brada ben taki dati, dan den man di ben tapu den ede, ben meki Ciro nanga a brada gowe. Fu wan sani ede, a masra fu na oso no ben kon na oso srefisrefi a dei dati.

Wan dei so wan dri yari baka dati, Ciro ben fruwondru fu si a man dati na en mofodoro. Ciro ben breiti srefisrefi di a ben kon sabi taki a heri osofamiri ben teki dopu kaba èn taki den ben de na ini wan gemeente na ini Gwatemala now! Wan fu den uma-pikin ben dini leki gewoon pionier srefi.

Warderi gi Yeye Nyanyan

Ala di sani e tan tranga na ini Chiapas, toku wan distriktopziener e fruteri taki den Kotoigi drape e frustan trutru o prenspari a  de fu kon makandra (Hebrewsma 10:24, 25). A e fruteri san ben pasa na wan spesrutu dei-konmakandra no so langa pasa. A konmakandra dati ben seti fu bigin fruku mamanten so taki den wan di ben o kon drape ben sa man go na oso baka fosi neti tapu, so taki a leti fu a dei ben sa man yepi den fu doro bun na oso. Ala di furu fu den ben musu waka moro leki dri yuru langa na ini a busi, soso fu doro a presi pe a spesrutu dei-konmakandra ben o hori, toku den alamala ben sidon na ini den sidonpresi 7.00 mamanten. Siksi sma fu na EZLN grupu ben de tu leki arkiman drape. Den ben arki a programa, den ben klop na ini den anu, èn soleki fa a sori den ben nyan bun fu a programa. Densrefi ben waka dri yuru langa fu doro a presi pe a konmakandra ben e hori. Twenti sma fu a grupu ben kon tu na a Memrefesa fu Krestes dede, di ben hori na ini a Kownukondre zaal drape.

Wan tra yonkuman di ben de na ini a guerrila grupu, ben kisi a wroko fu den basi fu en fu luku wan spesrutu presi na ini a busi. Di a ben doro drape na a presi pe sma ben libi, pe furu fu den sma ben de Yehovah Kotoigi, a ben kon si taki ala den sma drape ben lowe gowe. A ben seti ensrefi na ini wan fu den leigi oso fu den sma di ben libi den oso na baka. Fu di a no ben abi furu fu du, meki a ben teki wan tu buku di a ben feni ini na oso, èn a ben bigin leisi den. Den buku disi ben de buku fu a Waktitoren Genootschap di den Kotoigi ben libi na baka. Fu di a yonkuman ben de en wawan drape, meki a ben abi ten fu prakseri dipi fu den sani di a ben leisi. A ben teki a bosroiti taki a ben musu kenki en libi, èn taki a no musu waka nanga fetigon moro. So esi leki a ben man du dati, a ben suku den Kotoigi èn a ben bigin nanga wan bijbelstudie. Bifo siksi mun ben pasa, a ben e fruteri tra sma a bun nyunsu. En, makandra nanga dri tra sma fu en famiri di ben horibaka gi a guerilla grupu, dopu leki Kresten now.

Bun Sani Ben De fu Si

Ala di a feti ben de wan tranga sani gi sma, toku a feti ben abi bun bakapisi. Dati ben de so fu di a feti ben meki taki sma ben kisi wan bun fasi fu denki fu a preikiwroko. Wan owruman fu a srefi foto pe a feti ben bigin, e fruteri: „So wan feifi dei di a feti ben bigin, wi ben orga a preikiwroko na ini a foto èn so srefi dorosei fu a foto. Den sma ben wani arki wi nomonomo. Wi ben prati furu Bijbel publikâsi èn wi ben opo furu bijbelstudie. Na wan presi, furu sma ben gens a waarheid, ma fu di a feti broko kon, meki den wani arki now, den wani studeri Bijbel, èn den wani kon na den konmakandra èn so srefi na den bigi konmakandra.”

Den brada breiti srefisrefi taki den theokrasia wroko kan go doro ala di a situwâsi drape no bun kwetikweti ete. Den ben taigi den legre fu lanti taki den o hori den bigi konmakandra, èn den ben taigi na EZLN so srefi fu dati. Den bigi konmakandra disi tranga den brada na yeye fasi. A kon di den kringopziener nanga distriktopziener ben kon na den, ben yepi den furu tu fu go doro nanga a preikiwroko. A de wan moi sani fu si, taki den Kotoigi e kisi deki-ati fu sma di de na ini a feti, di furutron e gi den Kotoigi a deki-ati fu tan go doro nanga a preikiwroko.

Ala di den tesi nanga pina di ben miti den sma na Chiapas no de sa hebi moro, toku den no kaba ete. Awansi fa a no fa, wán sani de seiker — Yehovah Kotoigi abi a fasti bosroiti fu tan meki muiti fu fruteri sma a bun nyunsu fu vrede di e kon fu Gado Wortu, a Bijbel (Tori fu den Apostel 10:34-36; Efeisesma 6:15). Den e erken den wortu di a profeiti Yeremia ben taki, dati „a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi” (Yeremia 10:23). Soso a Kownukondre fu Gado na ini na anu fu en Manpikin, Yesus Krestes, kan lusu den problema fu onregtfardikifasi nanga pôtifasi na grontapu.—Mateus 6:10.

[Karta na tapu bladzijde 9]

(Efu yu wani si pe den sani disi skrifi, luku a tijdschrift)

Golf fu Meksikow

CHIAPAS

GWATEMALA

Stille Zuidzee

[Sma di abi a reti fu a karta]

Mountain High Maps® Copyright © 1997 Digital Wisdom, Inc.

[Prenki na tapu bladzijde 9]

Kotoigi e go fu preiki na ini den heipresi fu Chiapas