Yu Tron wan „Lepi” Kresten?

„DI MI ben de wan pikin-nengre ete, mi ben taki leki wan pikin-nengre, mi ben denki leki wan pikin-nengre, mi ben frustan sani leki wan pikin-nengre.” Na so na apostel Paulus ben skrifi. Fu tru, wi alamala ben de pikin-nengre wanten sondro yepi. Ma wi no ben tan so gi ala ten. Paulus ben taki: „Now di mi tron wan man, mi ben puru den fasi fu wan pikin-nengre.”—1 Korentesma 13:11.

Na a srefi fasi, ala Kresten e bigin leki pikin-nengre na yeye fasi. Ma baka wan pisi ten, den alamala kan „doro a wánfasi na ini bribi èn doro a soifri sabi fu a Manpikin fu Gado, te leki wi tron wan bigi man, te leki wi doro a marki fu a posisi di Krestes abi dorodoro” (Efeisesma 4:13). Na 1 Korentesma 14:20, wi e kisi a frumane: „Brada, no tron yongu pikin ini a man di yu man frustan sani . . . Tron bigisma ini a man di yu man frustan sani.”

Na abi di wi abi lepi Kresten, na wan trutru blesi gi Gado en pipel noyaso, spesrutu fu di wi abi so furu nyunnyun sma. Den wan di tron lepi Kresten, e meki wan gemeente kon moro tranga. Den abi wan bun krakti tapu a fasi fa a gemeente de, awinsi na ini sortu gemeente den de tu.

Te wan pikin-nengre e gro fu tron bigisma, dan dati e go fu ensrefi; ma te wan sma musu gro na yeye fasi, dan dati e teki ten èn a sma musu du furu muiti. Dati meki a no de wan fruwondru sani taki wan tu Kresten no ben „go moro fara fu kon lepi” na ini a ten fu Paulus, ala di den ben dini Gado furu yari kaba” (Hebrewsma 5:12; 6:1). Fa a de nanga yu? Awansi yu dini Gado furu yari kaba, noso awansi yu no dini En so langa ete, toku a  ben sa bun fu ondrosuku yusrefi krin (2 Korentesma 13:5). Wi sa man kari yu trutru wan lepi Kresten? Efu wi no kan kari yu so, dan fa yu kan tron wan lepi Kresten?

„Tron Bigisma ini a Man Di Yu Man Frustan Sani”

Wan pikin-nengre na yeye fasi makriki e tron wan sma „di [tra] sma e slenger go-kon leki skwala, èn di ibri winti fu leri e fringi go-kon, nanga yepi fu a bedrigifasi fu libisma, èn nanga a triki fasi di den abi fu meki takru plan”. Dati meki Paulus ben gi a deki-ati: „Meki wi gro nanga lobi ini ala sani na ini en di de na edeman, Krestes” (Efeisesma 4:14, 15). Fa wan sma kan du disi? Hebrewsma 5:14 e taki: „Tranga nyanyan de gi lepi sma, gi den wan di, fu di den gebroiki a koni fu den fu si sani krin, ben leri fu man si krin san bun èn san ogri.”

Luku taki lepi sma na sma di ben leri fu gebroiki a koni fu den fu man si sani krin, noso den sabi fa fu gebroiki Bijbel gronprakseri. So bun a de krin, taki wan sma no e tron wan lepi Kresten wantronso; a e teki ten fu gro kon bigi na yeye fasi. Ala di dati de so, toku yu kan du furu fu gro na yeye fasi, efu yu e studeri nanga yusrefi — spesrutu efu yu e studeri den moro dipi sani fu Gado Wortu. Na ini a ten di pasa no so langa ete, A Waktitoren taki fu wan lo dipi tori. Lepi sma no e wai pasi gi den sortu artikel dati, nomo fu di na ini den artikel „wan tu sani de di muilek fu frustan” (2 Petrus 3:16). Na presi fu dati, den e swari den tranga nyanyan dati neleki sma di angri e kiri den!

Fayafaya Preikiman Nanga Leriman

Yesus ben sori den disipel fu en san den ben musu du: „Go fu dati ede èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). Te yu abi prati na a preikiwroko fayafaya, dan dati kan yepi fu gro tu na yeye fasi. Fu san ede yu no e meki muiti fu du so furu leki yu man na ini a diniwroko disi?—Mateus 13:23.

Ten na ten, den hebi fu a libi e kon na wi tapu so taki a muilek sontron fu feni ten fu preiki. Ma toku, efu yu ’e span yusrefi bun tranga’ fu preiki, dan yu e sori o prenspari a „bun nyunsu” de gi yu (Lukas 13:24; Romesma 1:16). Dan trawan kan si yu leki „wan eksempre gi den getrow sma”.—1 Timoteus 4:12.

Sma Di E Hori Den Soifri Retifasi

Fu gro kon tron wan lepi Kresten, yu musu meki muiti tu fu hori yu soifri retifasi. Soleki fa a skrifi na Psalm 26:1, dan David ben fruklari: „Krutu mi, O Yehovah, bika mi waka na ini mi eigi soifri retifasi, èn mi ben poti mi frutrow na Yehovah tapu, so taki mi no fadon.” Soifri retifasi na wan bun gosontu gwenti, di e sori taki wan sma de bun dorodoro. Ma toku, a no wani taki dati a sma de volmaakti. David srefi ben de wan man di ben du seryusu sondu wan tu leisi. Ma fu di a ben teki piri-ai èn ben kenki a pasi fu en fu waka bun baka, meki a ben sori taki na ini en ati a ben lobi Yehovah Gado trutru ete (Psalm 26:2, 3, 6, 8, 11). Soifri retifasi abi fu du nanga a gi di wan sma e gi ensrefi na ini a dini fu Gado nanga en heri ati. David ben taigi en manpikin Salomo: „Sabi a Gado fu yu tata èn dini en nanga yu heri ati.”—1 Kroniki 28:9.

Fu wan sma hori en soifri retifasi, dan a „no [musu] de wan pisi fu grontapu”, a no musu go na ini den politiek tori fu den nâsi èn a no musu teki prati na den feti fu den nâsi (Yohanes 17:16). Yu musu meki muiti fu no du kruktudu, soleki fu du hurudu, du sutadu, èn fu gebroiki drug (Galasiasma 5:19-21). Ma efu wan sma wani hori en soifri retifasi, dan a musu du moro leki fu no  du den sani disi wawan. Salomo ben warskow: „Dede freifrei e meki na oli fu a sma [di meki dati] tingi, e komoto kon na tapusei. Na so pikinso donfasi e du tu gi wan sma di warti fu di a koni èn de nanga glori” (Preikiman 10:1). Iya, srefi wan „pikinso donfasi” kan pori a bun nen fu wan sma „di warti fu di a koni”; wan „pikinso donfasi” ben kan de te wan sma e meki spotu na wan fasi di no e fiti noso e freiri-freiri nanga wan trawan na wan fasi di no fiti (Yob 31:1). Fu dati ede, sori taki yu de wan lepi sma fu di yu de wan bun eksempre na ini ala den sani di yu e du, èn yu e wai pasi srefi gi ’ala sani di sori ogri’.—1 Tesalonikasma 5:22, Da Bijbel.

Loyaal Sma

Wan lepi Kresten, na wan loyaal sma tu. Leki fa wi e leisi na Efeisesma 4:24, dan na apostel Paulus e frumane Kresten: „Unu musu weri a nyun fasi fa wan sma musu de, di ben meki akruderi a wani fu Gado na ini trutru regtfardikifasi nanga loyaalfasi.” Na ini den Griki Buku fu Bijbel, a wortu „loyaal” na ini a tongo dati, wani taki santafasi, regtfardikifasi, lespekifasi. Wan loyaal sma de opregti, èn lobi dini Gado; a e du ala den plekti fu en bun di a abi na fesi Gado.

San na wan tu fasi fa yu ben sa kan kweki so wan loyaalfasi? Wán fu den ben sa de fu wroko makandra nanga den owruman fu yu na ini a gemeente pe yu de (Hebrewsma 13:17). Fu di lepi Kresten e erken taki Krestes na a Edeman fu a Kresten gemeente, meki den lepi Kresten disi de loyaal na den wan di Krestes poti na wroko „fu wei a gemeente fu Gado” (Tori fu den Apostel 20:28). Dati meki a no ben o fiti kwetikweti fu suku fowtu na a posisi fu frantwortu di owruman abi! Yu musu man firi tu taki yu musu de loyaal na „a getrow èn koni srafu” èn den sani di den e gebroiki fu prati a yeye „nyanyan na a reti ten” (Mateus 24:45). De gaw fu leisi èn fu gebroiki den bodoi di de fu feni na ini A Waktitoren nanga den tra publikâsi.

Sori Lobi Nanga den Sani Di Yu E Du

Paulus ben skrifi den Kresten na Tesalonika: „A lobi fu ibriwan fu unu gi makandra, e gro” (2 Tesalonikasma 1:3). Fu gro na ini lobi, de spesrutu prenspari te wan sma wani gro na yeye fasi. Yesus ben taki soleki fa a skrifi na Yohanes 13:35: „Nanga disi ala sma sa sabi taki unu na mi disipel, efu unu abi lobi na un mindri.” A brada lobi disi no abi fu du soso nanga a firi di wan sma e firi gi tra sma. Soleki fa, Vine’s Expository Dictionary of Old and New Testament Words, e taki dan: „Lobi yu kan si soso na den sani di a lobi e pusu wan sma fu du.” Iya, yu e gro kon tron lepi, te yu e sori lobi nanga den sani di yu e du!

Fu eksempre, na Romesma 15:7 wi e leisi: „Gi makandra wan switi kon.” Wán fasi fu sori lobi na fu taki yu kompe-bribiman odi èn so srefi den nyun wan di e kon na den gemeente konmakandra — taki den odi na wan switi fasi! Pruberi fu yusrefi kon sabi den. Sori taki yu „lobi fu luku fa a de” nanga trawan (Filipisma 2:4). Kande yu kan sori srefi taki yu lobi ontfanga sma na oso, èn gi difrenti sma di e kon na den gemeente konmakandra, wan kari fu kon luku yu na oso (Tori fu den Apostel 16:14, 15). Na onvolmaaktifasi fu trawan kan tesi a dipi fu yu lobi wanwan leisi. Ma te yu e leri fu ’frudrage den na ini lobi’, dan yu e sori taki yu e tron wan lepi sma.—Efeisesma 4:2.

Gebroiki den Gudu fu Wi fu Horibaka gi Tru Anbegi

Na ini owruten, a no ala sma fu a pipel fu Gado ben du a frantwortu di den ben abi fu horibaka gi Yehovah en tempel. Dati meki, Gado ben seni profeiti soleki Hagai nanga Maleaki fu gi en pipel deki-ati ini a tori disi (Hagai 1:2-6; Maleaki 3:10). Na ini a ten disi, lepi Kresten e prisiri fu gebroiki den gudu fu den fu horibaka gi na anbegi fu  Yehovah. Waka baka na eksempre fu den sma disi, fu di yu e gebroiki a gronprakseri di skrifi na 1 Korentesma 16:1, 2, fu ala ten ’poti wan sani na wan sei’ fu gi bijdrage na a gemeente èn na a wroko fu Yehovah Kotoigi na heri grontapu. Gado en Wortu e pramisi: „A sma di e sai pasa marki, sa koti pasa marki tu.”—2 Korentesma 9:6.

No frigiti den tra gudu di yu abi, soleki yu ten nanga yu krakti. Pruberi fu ’bai ten’ fu sani di no de so prenspari (Efeisesma 5:15, 16; Filipisma 1:10). Leri fu gebroiki yu ten moro bun. Efu yu e du dati, dan dati sa meki taki yu sa man yepi nanga sani di musu du fu sorgu a Kownukondre zaal, èn yu sa man yepi nanga tra srefi sortu wroko di e horibaka gi Yehovah en anbegi. Te yu e gebroiki yu ten na a fasi disi, dan dati sa gi moro buweisi taki yu e tron wan lepi Kresten.

Go Moro Fara fu Kon Lepi!

Man nanga uma di de seryusu, di lobi studeri èn di sabi sani, di e preiki fayafaya, di e hori den soifri retifasi, di de loyaal èn e sori lobi, èn di wani fu gi den gudu di den abi nanga a skin krakti fu den fu horibaka gi a Kownukondre wroko, na sma di de wan bigi blesi trutru. Dati meki a no de fu fruwondru taki na apostel Paulus ben frumane: „Now di wi gowe libi a fondamenti leri fu a Krestes na wi baka, meki wi go moro fara fu kon lepi”!—Hebrewsma 6:1.

Yu na wan lepi Kresten kaba? Noso a de so taki na a wán noso tra fasi, yu de wan pikin-nengre ete na yeye fasi? (Hebrewsma 5:13) Awansi efu na so a de, noso efu a no de so, toku abi a fasti bosroiti fu gi yusrefi na a studeri di yu e studeri nanga yusrefi, a preiki di yu e du e preiki èn a sori di yu e sori lobi gi yu brada. Awansi sortu rai nanga trangaleri yu e kisi fu lepi Kresten, si den rai nanga trangaleri leki bun sani gi yu (Odo 8:33). Teki ala yu frantwortu leki wan Kresten. Te yu e teki ten èn e du muiti, dan yu tu kan „doro a wánfasi na ini bribi èn doro a soifri sabi fu a Manpikin fu Gado, te leki [yu] tron wan bigi man, te leki [yu] doro a marki fu a posisi di Krestes abi dorodoro”.—Efeisesma 4:13.

[Prenspari pisi na tapu bladzijde 27]

Lepi Kresten, e meki wan gemeente kon moro tranga. Den abi wan bun krakti tapu a fasi fa a gemeente de.

[Prenki na tapu bladzijde 29]

Lepi Kresten e yepi fu a gemeente kon moro bun, fu di den lobi fu luku fa a de nanga trawan