Yu E Memre Disi Ete?

Yu warderi en fu leisi den uitgave fu A Waktitoren di ben kon no so langa pasa? We, luku efu yu kan gi wan piki na tapu den aksi di e kon now:

• Fu san ede wi kan de seiker taki a kontru fu a profeititori fu „nyun hemel nanga wan nyun grontapu” di skrifi na Yesaya 65:17-19 ben wani taki moro leki nomo a drai di den Dyu ben drai kon baka fu katibo?

Bika den apostel Petrus nanga Yohanes di ben skrifi na ini a fosi yarihondro G.T., ben sori go na wan kontru na ini a ten di e kon, di abi fu du nanga blesi di musu kon ete (2 Petrus 3:13; Openbaring 21:1-4).—15/4, bladzijde 10-12.

• San kan de a rutu fu den owruten Griki anansitori di abi fu du nanga ogri afu gado?

Dati kan de den moi tori nanga leitori di sma e fruteri fu wan tu engel di ben teki libisma skin bifo a Frudu èn di ben libi wan ogri nanga huru libi na grontapu (Genesis 6:1, 2).—15/4, bladzijde 27.

• Nanga sortu kefar lepi Kresten musu luku bun na trow-oso?

A de wan prenspari sani fu sorgu taki a trow-oso no e tron wan bradyari fesa, wan sani di kan pasa te sma e gebroiki tumusi furu sopi, èn te den e dansi bruyabruya na tapu tranga poku. Boiti efu den ben taki dati ala sma kan kon na wan trowfesa, dan den wan di no ben kisi wan kari fu kon na a fesa no musu go. A trowmasra musu sorgu taki Kresten di abi frantwortu sa de drape, teleki a fesa e tapu na wan yoisti ten.—1/5, bladzijde 19-22.

• San wi musu frustan nanga den wortu di skrifi na Psalm 128:3 di e taki dati manpikin de „leki pransun fu olijfbon” lontu a tafra fu wan man?

Furutron nyun pransun e sproiti komopo fu na ondrosei pisi fu a skin fu wan olijfbon. Te a mama-bonskin fu wan owru bon no e meki furu froktu moro, dan nyun sproiti kan tron tranga bonskin lontu en. Na a srefi fasi papa nanga mama kan prisiri fu di den abi pikin di e meki froktu ala di den e dini Yehovah makandra nanga den.—15/5, bladzijde 27.

• San na wan tu fu den winimarki di pikin kan kisi fu wan osofamiri situwâsi di bun?

A e poti a fondamenti fu wan yoisti fasi fu si sma di abi frantwortu, den sa frustan san na den yoisti markitiki, èn fa fu abi bun matifasi nanga trawan. So wan osofamiri situwâsi kan yepi den tu fu kweki matifasi nanga Gado.—1/6, bladzijde 18.

• San ben du na ini wan kondre na a Fara Owstusei, fu meki sma kon frustan taki ala Kresten na brada?

Ala den gemeente ben kisi deki-ati fu no gebroiki wortu di e sori taki den e gi sma spesrutu grani. Na presi fu dati den musu gebroiki wortu di den gwenti fu gebroiki di e sori taki ala brada de a srefi.—15/6, bladzijde 21, 22.

• Kotoigi fu Yehovah e teki datra dresi di meki fu sani di sma puru na ini brudu?

Wi e bribi taki a komando fu Bijbel ’tan farawe fu brudu’ e sori taki wi no musu teki brudutransfusie fu a brudu srefi noso den prenspari pisi fu en (plasma, redi brudu-ai, weti brudu-ai nanga bruduplaat) (Tori fu den Apostel 15:28, 29). Te a abi fu du nanga den pikin pisi di teki puru fu den prenspari pisi fu a brudu, dan iniwan Kresten musu teki en eigi bosroiti, ala di a e hori na prakseri san Bijbel e taki, èn so srefi a matifasi di a abi nanga Gado.—15/6, bladzijde 29-31.

• Sma kan de trutru sondro broko-ede ini a ten disi?

Iya. Nanga yepi fu Bijbel, Yesus e tyari sma go tapu a pasi fu soifri anbegi nanga vrede, soleki fa Yesaya 32:18 e fruteri. Moro fara, den wan di e kisi a vrede disi e fruwakti fu nyan bun fu vrede fu têgo na grontapu, san de wan kontru fu Psalm 37:11, 29.—1/7, bladzijde 7.

• Sortu rol George Young ben abi ini a theokrasia historia fu a ten disi?

Na ini 1917, a bigin sori na ini furu kondre, taki en na wan tyariman fu leti fu a bun nyunsu fu a Kownukondre. A diniwroko fu en ben tyari en go na ala sei fu Kanada, na den èilanti na ini a Kribisi Se, na Brasyonkondre nanga tra kondre na ini Zuid-Amerika, na Mindri-Amerika, na Spanyorokondre, na Potogisikondre, na a Sofyet Unie fu fosi, èn na Amerkankondre.—1/7, bladzijde 22-27.

• San 1 Korentesma 15:29 wani taki te a e taki fu son wan di „e dopu nanga a marki fu de dedewan”?

A prenspari penti na taki te sma e tron salfu Kresten nanga yepi fu santa yeye, dan den e gi densrefi abra na wan fasi fu libi di e tyari dede kon, èn baka dati den e opo baka fu kisi libi na ini hemel.—15/7, bladzijde 17.

• San na apostel Paulus ben du na ini a ten di sma e kari den yari di wi no sabi noti fu en?

Kande a ben yepi fu seti noso fu tranga gemeente na ini Siria nanga Silisia. Furu fu den problema di kari na 2 Korentesma 11:23-27 ben musu pasa na ini a pisi ten disi, èn disi e sori taki a ben du a diniwroko nanga faya.—15/7, bladzijde 26, 27.

• San kan yepi wi fu de reidelek ini den sani di wi e fruwakti?

Memre taki Yehovah e frustan wi. Te wi e begi en, dan dati kan yepi wi fu no denki don sani, èn nanga dati wi e sori bescheidenfasi. Wan tra yepi na fu si sani krin, fu di wi e taki nanga wan lepi mati.—1/8, bladzijde 29, 30.