Poku Di E Plisi Gado

Den taki dati poku na „a moro moi sani èn a fosi sani di sma man du sondro taki den kisi spesrutu leri fu dati”. Neleki wan tongo di sma e taki, a de wan aparti presenti di e prati libisma fu meti. Poku e wiki den firi fu wan sma. A kan prisiri a yesi, tan anga na ini a prakseri èn san moro prenspari na taki, poku kan plisi Gado.

SOLEKI fa Bijbel e sori, dan den Israèlsma ben de wan pipel di ben lobi poku. Poku ben de „wan prenspari koni na ini owruten fu Bijbel”, na so Unger’s Bible Dictionary taki. Leki wan pisi fu na aladei libi, dan singi èn so srefi poku ben de wan prenspari pisi fu na anbegi fu den. Ma toku a ben de a libisma sten di den ben gebroiki moro furu.

Bifo den ben wèi a tempel di Salomo, a manpikin fu en ben bow, dan Kownu David ben poti sonwan fu den Leifisma „fu teki fesi te sma e singi” na a tabernakel. (1 Kroniki 6:31, 32). Di na ark fu a frubontu, di ben e sori taki Yehovah de nanga den, ben doro na Yerusalem, dan David ben seti sani gi wan tu Leifisma „fu meki den memre Yehovah èn fu taigi en tangi èn fu prèise Yehovah”. Te den ben e singi prèisesingi, dan den ben e prei poku tu. Den ben e du disi nanga sani di abi snaar, nanga harpu, . . . nanga den dyendyen di ben e loi tranga, . . . èn nanga den trompet”. „Den ben e kari den nen fu den man disi di ben abi leki wroko fu taigi Yehovah grantangi, bika ’a lobi bun-ati fu en de te ten di no skotu’.”—1 Kroniki 16:4-6, 41; 25:1.

A pisi fu a singi, „a lobi bun-ati fu [Yehovah] de te ten di no skotu” di e kon ibritron baka, de fu feni furutron na ini den Psalm, a Bijbel buku di abi moro furu fu du nanga poku leki iniwan tra buku. Fu eksempre, a de a di fu tu pisi fu iniwan fu den 26 vers fu Psalm 136. „Fu di a pisi disi syatu, meki a de makriki fu sma singi en”, na so wan Bijbel ondrosukuman e taki. „Ibri sma di yere en ben kan memre en.”

Den sani di skrifi na tapusei fu den psalm e sori taki den ben e gebroiki sani fu prei poku na ala sei. Boiti sani fu prei poku di abi snaar, dan  Psalm 150 e taki tu fu a tutu, a harpu, a sinsin, a froiti nanga a dyendyen. Ma toku, a fosi sani di e hari sma na a sten fu libisma. Vers 6 e gi a deki-ati: „Ibri sani di e bro, meki a prèise Yah. Prèise Yah, un pipel!”

Fu di nanga poku wi kan sori san wi e firi, meki sari prakseri ben pusu sma na ini Bijbel ten fu meki sari singi noso psalmsingi. Ma toku, na soso den Israèlsma ben e singi na a fasi disi. „ Soso na ini wan sarisingi noso na ini wan kragisingi den psalmsingi ben sa moro moi, leki te yu ben o singi den nanga poku. A srefi sani wi e si tu te den psalmsingi no e singi makandra nanga wan poku di e piki na a srefi fasi nomo noso wan poku pe furu krakti no e poti tapu wortu wawan”, na so a Bijbel Encyclopedia Inzicht in de Schrift e taki. *

Yesus nanga den getrow apostel fu en ben singi prèisesingi gi Yehovah na a neti bifo a dede fu en èn a no de fu taki dati den ben e singi den wortu fu den Hallel psalmsingi na wán fasi nomo (Psalm 113-118). Fa disi ben musu tranga den disipel fu Yesus fu erken taki den o lasi a Masra fu den! Moro srefi, di den ben singi den wortu di ben kon ibritron baka, „bika a lobi bun-ati fu en de te ten di no skotu” feifi leisi, dan a bosroiti fu den fu tan futuboi di de getrow na a Moro Hei Soeverein fu na universum, Yehovah, ben musu kon moro tranga.—Psalm 118:1-4, 29.

Den fosi Kresten fu Efeise nanga Kolose ben singi „psalmsingi nanga prèisesingi gi Gado” (san wani taki trutru, prèisesingi gi Gado”). Boiti den singi disi den ben meki „yeye singi” tu di den ben e singi na ini den ati (Efeisesma 5:19; Kolosesma 3:16). Den ben gebroiki a mofo fu den bun fu di den ben prèise Yehovah nanga singi èn nanga san den ben e taki. A no Yesus ben taki dati „san furu na ati pasa marki, na dati a mofo e taki”?—Mateus 12:34

Poku Di No E Plisi Gado

A no ala poku di Bijbel e kari ben plisi Gado. Luku a sani di ben pasa na a Sinaibergi, pe Moses ben kisi a Wet makandra nanga den Tin Komando. San Moses ben yere di a ben saka fu a bergi? „A no a babari di e kon fu singi di sma e singi fu wan bigi sani di du”, „a no de a babari di e kon fu a singi di sma e singi te den lasi”, ma „a babari fu wan tra sortu singi mi e yere”. Disi ben de poku di abi fu du nanga afkodrei, wan sani di e meki taki Gado no e prisiri èn di ben abi leki bakapisi taki so wan 3000 fu den pokuman disi dede.—Exodus 32:18, 25-28.

Ala di sma kan meki poku, prei poku, èn prisiri fu arki ala sortu poku, toku dati no wani taki dati ala sortu poku e plisi Gado. Fu san ede? A Kresten apostel Paulus e fruklari: „Den alamala sondu èn no e doro a glori fu Gado” (Romesma 3:23). Den heiden gwenti fu taki den gado fu den tangi fu meki sani waka bun, a leri fu a sili di no man dede èn a gi di den e gi Maria grani leki „mama fu Gado” de moro furu den prenspari tori fu poku. Ma toku den bribi disi nanga den gwenti disi no e gi a Gado fu waarheid grani. Disi de so bika den no e kruderi nanga den sani di tyari kon na krin na ini Bijbel, a wortu di sma skrifi nanga yepi fu en santa yeye.—Deuteronomium 18:10-12; Esekièl 18:4; Lukas 1:35, 38.

Teki wan Yoisti Bosroiti ini a Tori fu Poku

Den poku di de fu kisi de so furu taki den kan bruya wan sma srefisrefi. A fesisei fu den compact disc meki fu hari sma fu bai ala sortu poku. Ma efu wan anbegiman fu Gado e angri fu plisi En, dan a sa luku bun fosi a bai wan poku. A sa du disi fu di a no wani teki singi èn poku pe sma no e singi di abi den gron tapu falsi kerki leri noso di e poti prakseri na sani di de teige bun gwenti nanga wet èn na tapu ogri yeye.

Albert, di ben dini wan ten leki wan Kresten zendeling na ini Afrika, e erken taki a no ben abi furu okasi fu prei a piano drape. Ma toku, a ben arki ala ten baka na wan tu plaat di a ben tyari go drape na ini a kondre. Now di a de baka na ini en mama kondre, Albert e go na den Kresten gemeente leki opziener di e reis. A no abi furuten fu arki poku. „A poku skrifiman di mi lobi moro furu na Beethoven”, a e taki. „Na ini den yari di pasa mi bai plaat fu den symfonie, den concert, den sonate, nanga den kwartet fu en.” Te a ben e arki den poku disi, dan dati ben e prisiri en bun furu. A no de fu taki dati ibri sma abi en eigi sortu poku di a lobi, ma leki Kresten wi e hori a rai fu Paulus na prakseri: „Awansi unu e nyan noso unu e dringi noso unu e du iniwan tra sani, du ala sani fu gi Gado glori.”—1 Korentesma 10:31.

 Poku èn a Gi Di Wi E Gi Wisrefi Abra Na Gado

A sani di Susie ben lobi sensi a ben e gro kon ben de poku. „Mi ben bigin prei a piano di mi ben abi 6 yari, a finyoro di mi ben de 10 yari èn te fu kaba a harpu di mi ben abi 12 yari”, a e fruklari. Baka ten Susie ben go na a Royal College of Music (wan hei skoro fu gi poku leri) na ini Londen, na Ingrisikondre, fu leri fu prei a harpu. Fo yari langa a ben kisi leri fu wan pôpi Spanyoro uma di sabi prei harpu, èn ete wan yari na a Paris Conservatoire (wan moro hei skoro), pe a ben kisi wan hei titel èn so srefi diploma fu di a ben sabi prei a harpu èn fu di a ben sabi fa fu gi piano les.

Susie ben kon abi demakandra nanga wan gemeente fu Yehovah Kotoigi na ini Londen. Drape a ben feni trutru belangstelling nanga lobi na mindri den kompekotoigi. Safrisafri a lobi fu en gi Yehovah ben gro èn a faya di a ben abi gi a diniwroko fu en ben meki a suku fasi fa fu dini en. Disi ben abi leki bakapisi taki a ben gi ensrefi abra èn taki a ben teki dopu. „Te wan sma abi poku leki wan wroko, dan a e libi na so wan fasi taki a e gi ensrefi abra na poku. So bun wan libi pe wan sma e gi ensrefi abra na wan sani di no ben nyun gi mi”, na so Susie e taki. Di a ben teki prati na a Kresten diniwroko fu preiki a bun nyunsu fu Gado Kownukondre fu di a ben gi yesi na den komando fu Yesus, dan a ten di a ben abi fu gi show no ben de so furu moro.—Mateus 24:14; Markus 13:10.

Fa a e firi now, di a e gebroiki soso wan pisi fu a ten di a abi fu prei poku? „We son leisi mi e firi taki mi lasi-ati pikinso fu di mi no abi moro ten fu oefen”, na so a e erken, „ma toku mi e prei den poku preisani fu mi ete èn mi e lobi fu arki poku. Poku na wan presenti fu Yehovah. Now di mi poti a diniwroko fu en na a fosi presi na ini mi libi mi e prisiri moro nanga poku.”—Mateus 6:33

Poku Di E Prèise Gado

Makandra nanga pikinmoro siksi milyun tra Kotoigi fu Yehovah Albert nanga Susie e prèise Yehovah Gado nanga poku doronomo. Na Kresten konmakandra di e hori na ini den Kownukondre zaal na ini 234 kondre den e bigin èn e tapu den konmakandra fu den, pe dati kan, nanga wan singi gi Yehovah. Den moi poku, efu den na prisiri poku noso sari poku, abi wortu di komoto na Bijbel. Den poku disi e prèise Yehovah Gado.

Ala sma di de drape e opo den sten fu singi na wan moi fasi taki Yehovah na wan Gado di e sorgu sma (Singi 28). Den e singi wan singi fu prèise Yehovah (Singi 84). Den singi fu den e taki fu den prisiri nanga den frantwortu fu a Kresten bradafasi, fu a Kresten libi èn fu den Kresten eigifasi. Wan sani di ben meki den prisiri moro srefi, na den difrenti sortu fasi fu prei poku di den Kotoigi fu Asia, Australia, Europa, Noord-Amerika nanga Zuid-Amerika ben gebroiki te den ben e meki den melodi. *

„Singi wan nyun singi gi Yehovah. Singi gi Yehovah, un sma fu heri grontapu. Singi gi Yehovah, blesi a nen fu en”, na den bigin wortu fu wan kefalek moi singi di ben skrifi na ini den dei fu a psalm skrifiman. „Fruteri a bun nyunsu fu a frulusu di a e gi, ibri dei. Meki a glori fu en bekènti na mindri den nâsi, na mindri ala pipel den wondruwroko fu en. (Psalm 96:1-3). Disi na san Yehovah Kotoigi e du na ini yu birti èn den e gi yu wan kari fu kon singi a prèisesingi disi nanga den. A sa de wan prisiri sani efu yu kon na den Kownukondre zaal fu den, pe yu kan leri fa fu prèise Yehovah nanga poku di e plisi en.

[Futuwortu]

[Prenki na tapu bladzijde 28]

Singi prèise singi gi Yehovah