A Krakti Di Begi Abi

A son e dongo na a foto Nahor ini a Mindri Owstusei. Wan man di nen Eli-eiser fu a kondre Siria e doro nanga wan rei fu tin kameili na wan peti na dorosei fu a foto. Ala di a weri èn watra e kiri en, toku Eli-eiser e broko en ede moro nanga san tra sma abi fanowdu. A kon fu wan dorosei kondre fu feni wan wefi gi a manpikin fu en masra. Boiti dati, a musu feni a wefi disi na mindri den famiri fu en masra. Fa a sa klari a muilek wroko disi di a kisi?

ELI-EISER e bribi ini a krakti di begi abi. Nanga wan aparti bribi neleki di fu wan pikin, a e aksi nanga sakafasi: „Yehovah a Gado fu mi masra Abraham grantangi meki a pasa so na mi fesi tide èn abi lobi bun-ati nanga mi masra Abraham. Mi e tanapu dya na wan watrapeti, èn den umapikin fu den man fu a foto e kon na dorosei fu kisi watra. San musu pasa na taki a yongu uma di mi sa taigi: ’Grantangi, saka yu watrakan, so taki mi kan dringi pikinso’, èn di sa taki trutru: ’Dringi pikinso, èn mi sa gi yu kameili watra tu’, dan na en na a wan di yu musu teki gi yu futuboi, gi Isak; èn meki mi sabi nanga disi taki yu sori loyaal lobi gi mi masra.”—Genesis 24:12-14.

A no fu soso Eli-eiser ben frutrow na ini a krakti di begi abi. ¡Iya, a fosi uma di e kon na a peti na a granpikin fu Abraham en brada! A nen fu en na Rebeka, èn a no trow, a krin na moreel sei, èn a moi. A moi fu si, taki a no ben gi Eli-eiser dringi wawan, ma na wan switi fasi a e aksi fu gi ala den kameili fu en dringi tu. Baka ten, baka wan famiri takimakandra, Rebeka de klariklari èn e agri fu drai go baka nanga Eli-eiser na wan farawe kondre fu tron a wefi fu Isak, a manpikin fu Abraham. ¡Disi na wan kefalek moi bigi èn krin piki na tapu a begi fu Eli-eiser, na wan ten pe Gado ben handri wanwan leisi na wondru fasi!

Wi kan leri furu fu a begi fu Eli-eiser. A begi e sori a tumusi bigi bribi fu en, a sakafasi fu en, èn taki a e broko en ede gi den sani di trawan abi fanowdu sondro fu prakseri ensrefi wawan. A begi fu Eli-eiser ben sori tu taki a e saka ensrefi na ondro a fasi fa Yehovah e handri nanga a libisma famiri. A musu de so taki a ben sabi taki Gado ben abi spesrutu lobi gi Abraham, èn so srefi gi En pramisi taki blesi sa kon nanga yepi fu Abraham gi a heri libisma famiri (Genesis 12:3). Fu dati ede Eli-eiser ben bigin a begi fu en nanga den wortu: „Yehovah a Gado fu mi masra Abraham.”

Yesus Krestes ben de a bakapikin fu Abraham di ben o de a yepi fu blesi a heri libisma famiri di e arki (Genesis 22:18). Efu wi wani dati wi kisi piki na tapu a begi fu wi ini a ten disi, dan wi musu erken nanga sakafasi taki Gado e handri nanga a libisma famiri nanga yepi fu  en Manpikin. Yesus Krestes ben taki: „Efu unu e tan na ini wánfasi nanga mi èn den sani di mi taki e tan na ini unu, dan unu kan aksi san unu wani èn a sa pasa so.”—Yohanes 15:7.

Wan bakaman fu Krestes di ben ondrofeni a tru fu den wortu disi fu Yesus ben de na apostel Paulus. A bribi fu en ini a krakti di begi abi, no ben de fu soso. A ben gi den kompekresten a deki-ati fu poti ala den sorgu fu den ini begi na Gado èn erken taki: „Gi ala sani mi abi a tranga fu en di e gi mi krakti” (Filipisma 4:6, 7, 13). ¿Disi wani taki dati ala den sani di Paulus ben aksi Gado ini begi a ben kisi? Meki wi luku.

A No Ala Sani Di Wi E Aksi, Wi Sa Kisi

Ini a diniwroko fu en pe a no ben denki ensrefi, Paulus ben pina fu wan sani di a ben kari „wan maka na ini a skin” (2 Korentesma 12:7). Disi ben kan de pen na frustan sei noso na emotioneel sei di ben kon leki wan bakapisi fu san gensman nanga „den falsi brada” ben du (2 Korentesma 11:26; Galasiasma 2:4). Noso a ben kan de wan sani di ben hati en na skin sei, soleki wan takru tesi na a ai fu en (Galasiasma 4:15). Awansi san a ben kan de, a „maka na ini a skin” disi ben swaki Paulus. „Mi ben begi Masra tangitangi dri leisi kaba taki a ben sa gowe libi mi”, a ben skrifi. Ma Paulus no ben kisi san a ben aksi. Gado ben taigi Paulus taki den yeye blesi di a kisi fu Gado kaba, soleki a krakti fu horidoro na ondro tesi, ben nofo. Moro fara, Gado ben taki: „A krakti fu mi e kon volmaakti na ini swakifasi.”—2 Korentesma 12:8, 9.

San wi e leri fu den eksempre fu Eli-eiser nanga Paulus? Yehovah Gado e arki trutru den begi fu den wan di e suku fu dini en nanga sakafasi. Ma disi no wani taki dati ala ten a e gi den san den aksi fu di Gado kan si sani langa ten na fesi. A sabi moro wi san de bun gi wisrefi. Moro prenspari, a e handri akruderi a prakseri fu en di skrifi na ini Bijbel.

Wan Ten fu Dresi Sma na Yeye Sei

Gado e pramisi fu dresi libisma fu ala siki na skin sei, frustan sei, nanga na emotioneel sei na ini a pisi ten te en Manpikin sa tiri grontapu dusun yari (Openbaring 20:1-3; 21:3-5). Opregti Kresten e wakti fayafaya tapu a pramisi disi gi a ten di e kon, nanga ala bribi ini a krakti di Gado abi fu meki a kon tron wan trutru sani. Fu di den no e fruwakti fu kon betre tapu wan wondru fasi ini a ten disi, den e begi Gado fu kisi trowstu nanga krakti fu kakafutu teige tesi (Psalm 55:22). Te den e kon siki, den kan begi tu fu Gado tiri den fu kan kisi a moro betre datra yepi ini na ekonomia situwâsi fu den.

Son kerki e gi den sikisma a deki-ati fu begi fu kon betre wantewante, fu di den e sori den wondru di Yesus nanga den apostel fu en ben du fu dresi libisma. Ma den wondru disi ben du nanga wan spesrutu reide. Den ben musu buweisi taki Yesus Krestes ben de a trutru Mesias èn den ben musu sori taki Gado ben feni a yongu Kresten gemeente bun, na presi fu a Dyu nâsi. Na ini a ten dati, Gado ben gi presenti fu du wondru fu steifi a bribi fu a nyun Kresten gemeente. Di a nyun-nyun gemeente disi ben kon steifi kaba leki fa a ben musu fu de, èn ben kon lepi, dan den wondru presenti ben „kon na wan kaba”.—1 Korentesma 13:8, 11.

Na ini a muilek ten disi, Yehovah Gado e tiri den anbegiman fu en ini a moro prenspari wroko fu dresi sma na yeye sei. Fu di den sma abi ten ete, meki den musu gi yesi seryusu na a kari disi: „Suku Yehovah un pipel, ala di unu kan feni en. Kari en, ala di a sori taki a de krosibei. Meki a godelowsu sma libi en pasi, èn a sma fu takrudu den prakseri fu en; èn meki a drai go baka na Yehovah, di sa sori en sari-ati, èn na wi Gado, bika a sa gi furu pardon.”—Yesaya 55:6, 7.

A preiki di wi e preiki a bun nyunsu fu Gado en Kownukondre e meki sondari di abi berow kon gosontu na yeye fasi (Mateus 24:14). Fu di Yehovah Gado e gi den futuboi fu en a krakti fu du a wroko disi di e kibri libi, a e yepi milyunmilyun sma fu ala nâsi fu abi berow fu den sondu fu den èn fu abi wan bun matifasi nanga en bifo a godelowsu sistema disi kaba. Ala den wan di e begi fayafaya gi so wan gosontu na yeye sei èn ala den wan di e begi fu yepi du a wroko disi fu dresi sma na yeye sei e kisi piki trutru na tapu den begi fu den.

[Sma di abi a reti fu a prenki na tapu bladzijde 3]

Eli-eiser nanga Rebeka/​The Doré Bible Illustrations/​Dover Publications